Тропари, кондаки и величания

Непобедимый явлься стратилат,/ варварския козни победил еси/ и, страдальчествовав, славне, твердейши,/ множество врагов невидимых поборил еси,/ темже венец исплел еси победы./ О нас моли Христа, Савво всеблаженне,/ верою почитающих тя.

Земнаго сана пояс оставив и почести, страдальче,/ пред мучителем, льстивым царем/ Христа, Бога суща, исповедал еси/ и Того ради многа страдания подъял еси, славне./ Тем прекрасным победы венцем увязлся еси/ от Царя всех царствующаго,/ с Небесными вои светло преукрашен./ Предстоя Тому, Савво,// моли, да спасет души наша.

Богатство благодати и сыноположения стяжаете/ многими подвиги и добродетельми,/ ихже ради Христос всели души ваша/ в Небесныя селения Своя,/ даровав благодать нетления/ и чудес мощем вашим,/ сего ради вопием вам:/ радуйтеся, Савво и Алексие,/ ликов иноческих похвале и украшение.

Преблаженнии и Богоноснии отцы наши Савво и Алексие,/ яко стяжавший дерзновение ко Господу/ равноангельным своим житием,/ егоже ради обогати Христос/ нетлением и чудесы мощи ваша,/ молим вас прилежно:/ испросите душам нашим очищение/ и велию и богатую милость.

Царства земнаго славу презревши,/ Единаго Христа, нас ради распятаго, возлюбила еси/ и, Того мужественне исповедающи,/ венцем мученическим увенчалася еси,/ всеблаженная царице Александре./ Темже и ныне Престолу Царя славы на Небесех предстоящи,/ молися о спасении душ наших.

Возделан от Бога,/ показался еси благочестия делатель честнейший,/ добродетелей рукояти собрав себе:/ сеяв бо в слезах, веселием жнеши,/ страдальчествовав же кровию, Христа приял еси,/ молитвами, святе, твоими всем подаеши// прегрешений прощение.

Подвигом добрым подвизался еси,/ страстотерпче Христов,/ верою и мучителей обличил еси нечестие,/ жертва же благоприятна Богу принеслся еси./ Темже и венец приял еси победы/ и молитвами, святе, твоими всем подавши/ прегрешений прощение.

Яко пленных свободитель/ и нищих защититель,/ немощствующих врач,/ православных поборниче,/ победоносче, великомучениче Георгие,/ моли Христа Бога// спастися душам нашим.

Яко на огненную колесницу добродетельми, богоносе, возшед,/ востекл еси на Небесная жилища,/ яко Ангел, с человеки пожил еси/ и, яко человек, со Ангелы окрест ликовствуеши./ Сего ради показался еси чудес Божественное приятелище,// Феодоре преподобне.

Познан быв от пелен освящен/ и явлься благодатей исполнен,/ чудесы мир озарил еси/ и демонов множество отгнал еси,/ священнодетелю Феодоре,// темже о нас молися Господеви.

Возвеселися, Христова церковь,/ имущи в себе источника чудесем обильна./ Днесь, любовию сошедшеся в тя, людие твой,/ в пренесение честных мощей блаженнаго князя Гавриила,/ воспоем песнь единому Богу в Троице, радующеся,/ сподобльшаго нас видети пречестное сокровище, мощи его,/ от мног лет сокровенны, напоследок же нам явлены./ Яко да молитвами его к Богу от всех находящих зол избавимся/ и радостною душею и веселием сердца/ благодарная воспоем, глаголюще:/ радуйся, утверждение граду нашему.

Наста днесь всечестный новый праздник,/ пренесение честных мощей/ блаженнаго князя Гавриила,/ веселящи изрядно всех благочестивых множества,/ темже, вси вернии,/ сошедшеся во святый храм Живоначальныя Троицы, возопием:/ блаженне княже Гаврииле,/ имея дерзновение ко Христу Богу,/ моли спастися празднующим любовию память твою.

Праведнаго Лазаря Боголюбивыя сестры,/ Марфо и Марие преславныя,/ чистым сердцем Христа в житии вашем возлюбили есте,/ мироносиц вземше чин,/ и Его, яко Сына Божия, безбоязненно исповедали есте,/ сего ради ныне во обителех Отца Небеснаго/ со Ангелы и всеми святыми славно царствуете./ Умолите, Егоже возлюбили есте,/ и нам, грешным, в вере и любви Христовой утвердитися/ и Царствия Небеснаго сподобитися.

Священия помазанием и мучения кровию украсистеся,/ славне Ианнуарие и Феодоре,/ и сияете всюду, в Вышних ликующе,/ и нас назирайте, в храм ваш пришедшия/ и в нем непрестанно зовущия:// всех нас соблюдите, моляще Человеколюбца Бога.

Явился еси предивен житием,/ Феодоре мудре отче,/ власяными рубы изменив/ паче царских сокровищ,/ яже на земли,/ сего ради небесную одежду восприял еси,// присно моли о нас, преподобне.

Отечество твое Зверки бысть, / мучениче Христов Гаврииле, / идеже от истых зверей - иудеев восхищен:/ абие родитилей лишен еси, / таже вся поряду люте претерпев, / в отечество Небесное преселился еси. / Восхищай и нас зде от всяких напастей и скорбей/ и умоли, молим тя, / улучити вечное наследие твое.

Святый младенче Гаврииле, / ты за Прободеннаго нас ради от иудей/люте от онехже в ребра прободен был еси/ и за Истощившаго кровь Свою за нас/ все тело твое на истощение крове/ в лютыя язвы предал еси, / ныне же во славе вечней с Ним вселился еси. / Тем помяни и нас, молим, зде чтущих память твою, / прося нам здравие телеси/ и спасение душам нашим.

Родителей своих любовь отринул еси/ и дом свой, яко чужд, оставил еси,/ водвори бо ся в пустыню,/ и тамо виде Бог труды твоя и подвиги,/ пастыря и наставника избранному Своему стаду сподобляет тя/ и по преставлении великими чудесы прославляет тя,/ исцеляти различный недуги./ Моли о нас Христа Бога,/ празднующих любовию святую память твою,/ да вси единогласно вопием ти:/ радуйся, Александре преподобне, отче наш.

Христа, истиннаго Бога, всею душею возлюбил еси/ и Тому невозвратным желанием последовал еси,/ вся же красная и сладкая мира сего возненавидев,/ яко небопарный орел, на Небеса возлете/ и тамо со Ангелы ликуеши и со всеми святыми Святей Троице предстоиши,/ моли и нам спастися, чадом твоим,/ яко же обещася, Александре преподобне, отче наш.

К служению Христову/ от чрева матерня предызбранная,/ праведная Матроно,/ стезею скорбей и печалей шествующи,/ твердую веру и благочестие явивши,/ Богу угодила еси./ Темже, почитающе память твою, молим тя:/ помози и нам в любви Божии пребывати,// старице блаженная.