Тропари, кондаки и величания

Завидя враг честному ти житию,/ изринул тя бяше злокознством своим от начальства паствы,/ но ты, изгнан быв,/ и на ином месте церковь Богородицы воздвигл еси,/ за что и Та саном почте тя архиерейства,/ в нейже ты добре упас врученная ти овцы,/ прейде во веселии ко Христу, Стефане,/ Емуже молися о нас, рабех твоих.

Яко сый Богоноснаго Феодосия ученик/ и истинный жития его подражатель,/ первый по нем бремя настоятельства понесый,/ темже и мощей его честных самовидец быти сподобился еси,/ яже с прочими святолепно принес,/ наследил еси с темже Царство Небесное,/ Еже получити и нам, чтущим тя, Стефане,/ Господеви молися.

Православия наставниче,/ благочестия учителю и чистоты,/ Волынския паствы светильниче,/ архиереев Богодухновенное удобрение,/ Стефане премудре,/ ученьми своими вся просветил еси, цевнице духовная,/ моли Христа Бога спастися душам нашим.

Учению пов инуяся Богоноснаго Феодосия,/ поставлен бысть от него вождь быти святому его стаду, еже добре пасый,/ церковь Богородицы,/ волею Тоя основанную чудне,/ совершил еси благолепно,/ приснопамятне Стефане,/в нейже нам, молящимся, испроси от Христа Бога велию милость.

Яко звезду превелию,/ Церковь, имущи днесь богоглаголиваго Симеона,/ световодится, зовущи:/ радуйся, мучеников// честный венче.

В мире радуешися, Симеоне Иерусалимский,/ любезно Христу Богу,/ тело душевное чисто сохранив,/ претерпевши страсть телесную, долготерпеливе, крепко,/ и в конец на кресте распят бысть./ Ты бо, Истинному Рачителю подобяся,/ и от мира скоро отлучися,/ лютыя язвы на себе понесе/ и молишися о душах наших.

Христова тя сродника, Симеоне священноначальниче,/ и мученика тверда священно восхваляем,/ прелесть потребившаго/ и веру соблюдшаго./ Темже, днесь всесвятую твою память празднующе,// грехов разрешение молитвами твоими приемлем.

От юности, Богомудре, возлюбив ангельское житие,/ вся красная оставил еси,/ зайде бо, якоже звезда от мира,/ востек к разумному и праведному солнцу, Христу,/ от Него же приемь благодать исцеления,/ различныя недуги врачуеши притекающих к священней раце твоей./ Темже и мы, совершающе любовию всечестную твою память, вопием ти:/ радуйся, отче Иоанникие.

Пощением, молитвами и благодатию Божественною просветився,/ земныя концы светло озаряеши благочестно,/ чудес благодать от Бога прием,/ исцеляеши недуги, духи же лукавыя от человеков отгоняеши,/ иже с верою притекают к раце мощей твоих святых,/ преподобне отче наш Иоанникие./ Слава Давшему ти благодать,/ слава Укрепившему тя,/ слава Действующему тобою всем исцеления.

Самозванен не ищущим тебе, святителю, обрелся еси,/ люди, от идольския лести свободив, ко Христове вере привел еси/ и волхва пансотника посрамил еси,/ темже и первый епископ и учитель Перми был еси./ Сего ради духовная твоя чада,/ яко тобою избавльшеся от идол, благодарная тебе возопием:/ радуйся, Стефане, учителю премудрый.

Божественным желанием,/ от юнаго возраста, Стефане премудре, разжегся,/ ярем Христов взял еси/ и людей оляденевшая древле неверием сердца,/ Божественное семя в них сеяв,/ евангельски духовне породил еси./ Темже преславную твою память почитающе, молим тя:/ моли, Егоже проповедал еси,/ да спасет души наша.

Царево повеление преобидев,/ Царство Небесное получил еси, Василие,/ в немже ликуя,/ поминай нас, чтущих память твою,/ священномучениче.

Препрославленная Вышняго Матерь/ созывает к песнопению нас Своего образа пришествием от Царьграда/ и возбуждает зрением того на подвиг,/ побеждати сопротивных силу,/ и к Ней, яко нашея радости виновней, пети:/ радуйся, Невесто Неневестная.

Возсия нам, яко солнце светозарное от востока в велелепии./ Твоя, Владычице, икона,/ озаряющи чудес сиянием преславно всех, приходящих к ней с верою и любовию/ и молящихся усердно к Твоему, еже о Сыне Твоем и Бозе, величию./ Слава Богу, Евфосином сию давшему нам!/ Слава Приведшему ю от Царьграда!/ Слава Дающему тою всем исцеления.

Подвигом добрым подвизался еси, преподобне,/ и душу твою, яко жертву чисту и непорочну,/ Духу Святому принеся еси,/ и по смерти твоей стадо твое духовное соблюдавши,/ и в болезнех скоро посещавши./ Темже молим тя, преблаженне:/ с лики преподобных моли Христа Бога,/ да спасет православный христианы/ и подаст людем в мире глубоце устроитися, да зовем ти:/ радуйся, Сильвестре, иноком духовный пастырю и наставниче.

Яко добр блаженнаго Сергия ученик,/ вере и благочестию его подражая,/ стяжал еси даров Духа Святаго сокровище/ и силы многи соделал еси о Господе/ во спасение и утешение верных./ Не остави убо и нас, с верою притекающих к тебе,/ Сильвестре преподобне.

Иже измлада Христа возлюбив/ и верою к Нему приближся,/ изнурил еси, в пустыни живый, многострадальное тело твое./ Тем, блаженне Сильвестре, со Ангелы ликовствуя,/ моли Христа Бога мир мирови даровати/ и буди помощник верою призывающим тя на помощь/ и чтущим святую память твою.

С высоты приим благодать Духа,/ риторская плетения разрушил еси, апостоле,/ и, языки вся уловив, Марко всеславне,/ твоему Владыце привел еси,// Божественное проповедав Евангелие.

У верховнаго Петра научився,/ апостол Христов был еси/ и, яко солнце, странам возсиял еси,/ Александриом удобрение быв, блаженне:/ тобою Египет от прелести свободися,/ евангельским твоим учением просвещ вся,/ яко свет, столп церковный./ Сего ради твою память чтуще, светло празднуем,/ Марко Богогласе,/ моли тобою благовестимаго Бога/ да согрешений оставление подаст душам нашим.

Апостоле святый и Евангелисте Марко,/ моли Милостиваго Бога,/ да прегрешений оставление// подаст душам нашим.