Тропари, кондаки и величания

Светозарное, яко солнце,/ во весь мир изшедшее/ вещание твое/ просвещает языческую Церковь благодатию,// чудоносче Матфие апостоле.

Апостоле святый Матфие,/ моли Милостиваго Бога,/ да прегрешений оставление// подаст душам нашим.

Странное и богоприятное светоноснаго зрака Твоего явление,/ Пречистая Дево,/ с верою взирающим бывает известное чаяние спасения,/ столпом бо огненным являющи предстательство,/ неусыпное и теплое за ны к Богу возсылаеши моление,/ имже от всяких бед избави, молимся,/ да радостными усты вопием Ти вси:/ радуйся, Ходатаице вечнаго блаженства.

Чудное и богоприятное светоноснаго зрака Твоего явление, Пречистая Дево,/ с верою взирающим бывает известное чаяние спасения,/ столпом бо огненным являющи предстательство,/ неусыпное и теплое за ны к Богу возсылаеши моление,/ имже страну Российскую от всяких бед избави, молимся,/ да радостными усты вопием Ти вси:/ радуйся, Предводительнице вечнаго блаженства.

Днесь светло сияет на Толге/ образ Твой, Пречистая Дево Богородице,/ и, яко солнце незаходимое,/ всегда верным подадеся,/ Егоже видев на воздусе,/ невидимо Ангелы, яко никим, держима,/ преосвященный епископ града Ростова Трифон/ тече ко явленному светящемуся столпу огненну,/ и по водам, яко по суху, прейде, и моляшеся Ти верно о пастве и о людех./ И мы, к Тебе притекающе, зовем:/ Пресвятая Дево Богородице,/ верно Тя славящих спасай,/ страну нашу, архиереев/ и вся Российския народы от всех бед избавляй/ по велицей Твоей милости.

Христовою любовию уязвившеся, преподобнии,/ и Того крест, на рамо вземше, понесли есте,/ божественне вооружившеся на невидимыя враги/ и непрестанный молитвы, яко копие в руках, имуще,/ крепко победили есте бесовская ополчения;/ благодать Господню приемше целити недуги душ и телес/ притекающих к ракам честных мощей ваших,/ чудес лучи испущаете всюду./ Тем зовем вам:/ радуйтеся, преподобнии отцы Зосимо и Савватие,/ монахов удобрение.

Яко светильницы явистеся всесветлии / во отоце окияна моря, / преподобнии отцы Зосимо и Савватие, / вы бо, крест Христов на рамо вземше, / усердно Тому последовасте / и, чистотою Богови приближившеся, / отонуду силами чудес обогатистеся. / Темже и мы любезно притекаем к ракам честных мощей ваших и умильно глаголем: / о, преподобнии, молите Христа Бога спастися душам нашим.

Постническое и равноангельское житие ваше, / преподобнии отцы Зосимо и Савватие, / вселенней познаны сотвори вас чудодеянии различными богоноснии, / просвещайте верою призывающия вы / и чтущия честную память вашу.

Добляго тя поборника по Троице явльшася/ Церковь славит, поющи, Емилиане,/ за нюже пострадал еси./ Сего ради почитаем память твою,// языческаго нашествия избави рабы твоя.

Величаем Тя,/ Живодавче Христе,/ и почитаем пречистыя плоти Твоея/ преславное// преображение.

На горе преобразился еси,/ и якоже вмещаху ученицы Твои,/ славу Твою, Христе Боже, видеша,/ да егда Тя узрят распинаема,/ страдание убо уразумеют вольное,/ мирови же проповедят,// яко Ты еси воистинну Отчее сияние.

Преобразился еси на горе, Христе Боже,/ показавый учеником Твоим славу Твою,/ якоже можаху,/ да возсияет и нам, грешным,/ Свет Твой присносущный/ молитвами Богородицы,// Светодавче, слава Тебе.

Божественным днесь преображением/ человеческое все естество/ просиявает божественно,/ в веселии зовущее:// преобразуется Христос, спасаяй вся.

Христово преображение предусрящем,/ светло торжествующе предпразднственная, вернии, и возопиим:/ приспе день Божественнаго веселия,/ восходит на гору Фаворскую Владыка,// Божества Своего облистати красоту.

Прославивый на земли святыя Твоя/ прежде втораго и страшнаго пришествия Твоего, Христе,/ преславным востанием отроков/ показал еси Воскресение неведящим е,/ нетленна одеяния и телеса явив,/ и царя уверил еси вопити:/ воистинну есть мертвых востание.

Мира сущая тленная презревше/ и нетленныя дары приемше,/ умерше, кроме тления пребыша./ Темже востают по многих летех,/ все погребше лютых неверие,/ яже во хвалении днесь, вернии, восхваляюще,// Христа воспоим.

Благочестия проповедники и Воскресения умерших изобразители,/ Церкви столпы седмочисленныя,/ отроки всеблаженныя песньми восхвалим:/ тии бо по многих летех нетления, аки от сна воставше,/ всем возвестиша яве мертвых востание.

Велия веры чудесе,/ в пещере, яко в чертозе царском,/ святии седмь отроцы пребыша,/ и умроша без тли,/ и по мнозех временех восташа, яко от сна,/ во уверение воскресения всех человеков.// Тех молитвами, Христе Боже, помилуй нас.

Пощением возсиявшия, яко светила,/ и ереси развратившия верою,/ песньми Исаакия восхвалим и с Далматом Фавста,/ яко Христовы угодники,// Того молящия о всех нас.

Боже отец наших,/ творяй присно с нами по Твоей кротости,/ не отстави милость Твою от нас,/ но молитвами их// в мире управи живот наш.