Тропари, кондаки и величания

Яко звезда, возсиял еси от Рима,/ и, дошед Богоспасаемаго Великаго Новаграда,/ ту в нем обитель сотворил еси,/ и, церковь поставив,/ созва инок множество./ С нимиже моли о нас, чтущих память твою, да зовем ти:/ радуйся, преподобне отче Антоние.

Римское воспитание, Великому же Новуграду благодатное процветение,/ многими бо труды и подвиги в нем Богу угодил еси./ Сего ради чудес дарований от Него сподобился еси,/ и тело твое многими леты соблюде нетленно./ Мы же, сие лобызающе, радостно от души вопием ти:// радуйся, отче Антоние.

Ветхий Рим, отечество твое, оставив, / на камень, яко на легкий корабль, возшел еси / и на нем паче естества, аки безплотен, по водам шествовал еси, / промышлением Божественнаго разума направляемь, / Великаго Новаграда достигл еси / и, обитель в нем сотворив, / тело твое в ней предложил еси, яко дар освящен. / Тем молим тя, отче Антоние: / моли Христа Бога, да спасет души наша.

Ветхий Рим, отечество твое, оставив,/ на камень, яко на легкий корабль, возшел еси/ и на нем паче естества, аки безплотен, по водам шествовал еси,/ промышлением Божественнаго разума направляемь,/ Великаго Новаграда достигл еси/ и, обитель в нем сотворив,/ тело твое в ней предложил еси, яко дар освящен./ Тем молим тя, отче Антоние:// моли Христа Бога, да спасет души наша.

Первый сеялся еси на земли Небесным делателем,/ всехвальне Стефане,/ первый на земли за Христа кровь излиял еси, блаженне,/ первый от Него победы венцем увязлся еси на Небесех,/ страдальцев начало,/ венечниче, мучеников первострадальне.

Апостолом совсельник/ и страстотерпцем первострадалец,/ Христов служитель, прехвальне Стефане,/ первее бо совершив мучения течение,/ безчисленныя роды человек равно Подвигоположнику Христу приведе./ Темже яко апостола и страдальца верховнаго/ чтуще тя, молим:/ моли Христа Бога/ даровати нам велию милость.

Царским венцем венчася/ твой верх от страданий,/ яже претерпел еси по Христе Бозе,/ мучеников первострадальче Стефане,/ ты бо, иудейское обличивый неистовство,/ видел еси твоего Спаса одесную Отца:/ Того убо моли о душах наших.

Явил тя есть Господь нынешнему роду/ исцелителя болезнем и прогонителя недугом/ любовию, Василие, притекающим к тебе/ и призывающим верою молитвы твоя.

Духом Божиим водим, преблаженне Василие,/ оттрясл еси мирский мятеж,/ и жития треволнения возгнушался еси,/ и, совлекся одеяний тленных и облекся в ризу безстрастия,/ убежал еси ловления льстиваго миродержца,/ и был еси странен во твоем языце,/ и, паче земнаго богатства избрав богатство Небесное,/ увязлся еси венцем терпения./ И ныне, преблаженне Василие, моли Христа Бога/ о творящих святую память твою, да зовем ти:/ радуйся, преблаженне Василие.

Якоже бо солнце и луна наготою своею не срамляются,/ тако и ты, угодниче Христов Василие, наг сый, не срамляшеся,/ восприят бо ризу Адама первозданнаго,/ юже он ношаше прежде в рай,/ ты же сию на земли поносил еси;/ и был еси добрый купец:/ елико имеяше, вся остави/ и купи мздою терпения своего село,/ на немже сокровен безценный Бисер, Христос./ Сего ради явися всем грешным образ покаяния/ и вселися в райскую широту,/ и, предстоя Христови,/ не забуди град, в немже обита, и люди, преблаженне,/ и моли спасти души наша.

Плоть удручившу ти злостраданием,/ душу же просветившу чистотою сердца,/ обогатился еси благодатию Пресвятаго Духа, Василие,/ даровати требующим полезная./ Сего ради недужнии, притекающе к цельбоподательному твоему гробу, премудроюроде,/ независтно приемлют болезней отложение/ и благодарственно воспевают прославльшаго тя,/ Единаго Человеколюбца.

Житие твое, Василие, неложное, и чистота нескверна,/ Христа ради тело твое изнурил еси постом и бдением,/ и мразом и теплотою солнечною,/ и слотою и дождевным облаком,/ и просветися лице твое, яко солнце,/ и ныне приходят к тебе Российстии народи и вси людие,/ прославляюще святое твое успение./ Тем Христа Бога моли,/ да избавит ны от варварскаго пленения и междоусобныя брани/ и мир мирови подаст и душам нашим велию милость.

Вознесыйся на Крест волею,/ тезоименитому Твоему новому жительству/ щедроты Твоя даруй, Христе Боже,/ возвесели нас силою Твоею,/ победы дая нам на супостаты,/ пособие имущим Твое оружие мира// непобедимую победу.

Премудрости Божия столпи седмочисленнии/ и Божественнаго Света светильницы седмосвещнии,/ Маккавеи всемудрии,/ прежде мучеников превелии мученицы,/ с нимиже всех Богу молитеся// спастися почитающим вас.

Болезньми святых, имиже о Тебе пострадаша,/ умолен буди, Господи,/ и вся наша болезни исцели,// Человеколюбче, молимся.

Вышних желая, с вышними совокупляяся,/ и колесницу огненную, Божественными восхожденьми добродетелей, совершил еси душу,/ преблаженне Евдокиме,/ на земли пожив, яко безплотен,// Зиждителю всех благоугодил еси.

От земли воззвавый тя к Небесным селением/ соблюдает и по смерти невредимо тело твое, святе Евдокиме:/ ты бо в целомудрии и чистом жительстве, блаженне,/ жительствовал еси, не осквернив плоти.// Темже со дерзновением моли Христа Бога спастися нам.

От юности иго Христово на рамо взем,/ истинный страж Православныя Церкве явился еси,/ священномучениче Вениамине./ Клевету, узы, страдания и суд неправедный/ от беззаконных мужественне претерпевая,/ святыню церковную на поругание не предал еси./ Темже и Христос даром терпения и любве тя исполни,/ во еже пред мученическою кончиною/ со благодарением взывати:// за вся, Господи, слава Тебе.

Светильник всесветлый во граде святаго Петра явился еси,/ пастырю добрый, священномучениче отче Вениамине./ Любовь и милосердие в сердцах верных насаждая,/ благотворити призывал еси терпящим глад и нищету. Сего ради и мы к тебе прибегаем и с верою вопием ти:/ моли милостиваго Бога/ Отечество наше в Православии и благочестии утвердити,/ мир Церкви даровати// и душам нашим велию милость.

Вышняго живота желающи сподобитися,/ нижнюю пищу тщательно оставила еси,/ и богатство твое расточила еси нищим,/ и Небесное богатство прияла еси,/ и по смерти нас освящавши,/ и чудеса твоя, всехвальная Ангелино, источаеши./ Темже твое успение святое почитаем, взывающе:/ радуйся, мати прехвальная.