Тропари, кондаки и величания

Великий Ангельский образ иноческаго чина святую схиму яко прием,/ и второе отрицание суетнаго мира сего яко сотворь,/ тщался еси всеми образы, преподобне Иларионе,/ обещание делом исполнити/ и образу святому приличие пожити,/ тем тя чтим и ублажаем.

Воистину достойне наречен был еси Иларион,/ тихостен бо и кроток нрав по имени твоему имел еси, блаженне,/ имже кроткому Господу Иисусу благоугодив,/ молися Ему о нас рабех твоих.

Яко светоносна явися, архиерее, память твоя,/ тьму разруши уныния и свет облиста даров Небесных,/ вся созывающи на радость,/ от Бога бо, Иларионе, благодать обрел еси/ и монахов был еси степень.

Чудо явився извещения,/ делы возсиял еси добродетелей Божиих,/ монашествующих лики упасл еси,/ архиерейская седалища изчистил еси,/ еретическаго же нападания не усумневся,/ церкви Христовы воздвигл еси,/ преподобне Иларионе,/ умер, яко спя,/ тело же твое цело и нетленно соблюдено бысть,/ и подает цельбы болящим от различных недуг,/ и демоны прогоняет,/ сего ради молим тя:/ моли спастися душам нашим.

Яко светильника незаходимаго умнаго тя Солнца,/ сошедшеся днесь, восхваляем в песнех,/ возсиял бо еси сущим во тьме неведения,/ вся возводя к Божественней высоте, Иларионе./ Темже вопием:// радуйся, отче, всех постников основание.

Яко иноков утверждение, наставник же граждан пустынных,/ и чудотворец благодатию Великому Антонию подобяся,/ помощник в страстех бедствующим неотступен, Иларионе отче наш,/ моли за чтущия святую память твою.

Слез твоих теченьми пустыни безплодное возделал еси/ и, иже из глубины воздыханьми, во сто трудов уплодоносил еси,/ и был еси светильник вселенней,/ сияя чудесы, Иларионе, отче наш:/ моли Христа Бога спастися душам нашим.

Возсия днесь пресветлая память премудраго Артемия;/ Богоданная благодать, яко реки, изливает от целебных мощей его дивная исцеления,/ имиже от многоразличных недуг избавляемся,/ с верою приемлюще я и взывающе:/ радуйся, Артемие Богомудре.

Вышняго повелением,/ тученосным облаком, небо помрачившим/ и молниям блистающим,/ грому же возшумевшу с прещением,/ испустил еси душу твою в руце Господеви,/ премудре Артемие,/ и ныне предстоиши Престолу Владыки всех,/ иже верою и любовию приходящим к тебе,/ подай исцеление всем неотложно/ и моляся Христу Богу,/ спастися душам нашим.

Благочестиваго и венценоснаго мученика,/ на враги победы вземшаго одоление,/ сошедшеся, достойно песньми восхвалим Артемия,/ превеликаго в мученицех,/ чудес же дателя пребогатаго,// молится бо Господу о всех нас.

Истинною бо Христовою верою/ утверждься, страстотерпче,/ мучителя злочестива царя/ победил еси со идольским того возношением./ Тем от Царя Великаго, вечно царствующаго,/ пресветлым венцем победным одарен бысть,/ вся исцеляяй болящия и призывающий тя, Артемие великий,/ моли Христа Бога/ спасти души наша.

Христу последуя, мучениче Уаре,/ Того испив чашу,/ и мучения венцем увязеся,/ и со Ангелы ликовствуеши:// моли непрестанно за души наша.

Воинством святых страстотерпец страждущих законне,/ зря онех, показал еси мужески крепость свою./И устремився на страсть волею,/ и умрети вожделе за Христа,/ Иже приял еси почесть победы твоего страдания, Уаре,/ моли спастися душам нашим.

Владычню речению усердно в подобстве последова, / яко убо пастырь добрый душу свою за Христовы овцы положил еси,/ священномучениче Садоче, молим тя, многострадальне, / моли пастырем начальника Христа/ и нас причести деснаго овец стояния,/ да воспоем ти:/ радуйся, священный отче Садоче,/ иже за Христа кровь свою излиявый.

Просветившееся Духом чистое твое сердце/ пророчества бысть светлейшаго приятилище:/ зриши бо, яко настоящая, далече сущая,/ сего ради тя почитаем, пророче, блаженне Иоиле, славне.

Предведый Божие пришествие во плоти/ и наитие Духа Святаго и грядущий Суд предсказавый,/ пророче Иоиле:/ спасай молитвами твоими/ чтущия тя от всех скорбей.

Предведый Божие пришествие во плоти/ и наитие Духа Святаго и грядущий Суд предсказавый,/ пророче Иоиле,/ спасай молитвами твоими// чтущия тя от всех скорбей.

Ангельскому житию поревновав, преподобне,/ вся земная оставив, ко Христу притекл еси/ и, Того заповедъми ограждался,/ явился еси столп непоколебим от вражиих нападений./ Тем зовем ти:/ радуйся, отче Иоанне, светило пресветлое.

Твоих мощей возвращением/ обитель твоя обогатися,/ церковь же твоя, приемши я, просветися/ и, красящися, верных созывает с веселием/ светоносный твой светло праздновати день,/ грядите, глаголющи,/ и приимите благодатей дарования.

Истиннаго благочестия проповедника/ и таин неизреченных ритора,/ звезду церковную, Луку Божественнаго восхвалим:/ Слово бо его избра, с Павлом мудрым языков учителя,// Един ведый сердечная.