Тропари, кондаки и величания

Многострадальнаго праотца долготерпение стяжав,/ Крестителеву воздержанию уподобляяся,/ Божественныя же ревности обою приобщаяся,/ тех имена достойно прияти сподобился еси/ и истинныя веры был еси проповедник безбоязнен;/ темже монахов множества ко Христу привел еси,/ и вся люди в Православии утвердил еси,/ Иове преподобне отче наш,/ моли спастися душам нашим.

Звезду Российскую, от Киева возсиявшую,/ и чрез Новград Северский в Ростов достигшую,/ всю же страну сию ученьми и чудесы озарившую,/ ублажим златословеснаго учителя Димитрия:/ той бо всем вся написа, яже к наставлению,/ да всех приобрящет, якоже Павел, Христу// и спасет правоверием души наша.

Святителие премудрии,/ паствы вашея учителие богопросвещеннии,/ веру евангельскую в людех преумножившия,/ любве Небесныя на земли достоподражательнии образи,/ люди страны Ростовския и Ярославския приобщавшии спасению,/ служителие воистинну Божий/ и сопричастницы апостолов достойнии явилися есте,/ Леонтие священномучениче, Исаие, Игнатие, Иакове, Феодоре/ и златословесниче Российский Димитрие,/ Христа Бога молите/ о архиереех, на престоле вашем преемницех,/ о людех, благочестно вас почитающих,/ о стране нашей православной/ и о всей Христовой Церкви.

Православия ревнителю и раскола искоренителю,/ Российский целебниче и новый к Богу молитвенниче,/ списаньми твоими буих уцеломудрил еси,/ цевнице духовная, Димитрие блаженне,// моли Христа Бога спастися душам нашим.

Мученическая честная память прииде днесь,/ веселящи всяческая,/ Терентия премудраго и подружии его,/ тепле убо стецемся,/ да приимем исцеление,/ сии бо благодать приемше от Духа Святаго// исцеляти недуги и болезни душ наших.

Мученицы Твои, Господи,/ во страданиих своих венцы прияша нетленныя от Тебе, Бога нашего:/ имуще бо крепость Твою,/ мучителей низложиша,/ сокрушиша и демонов немощныя дерзости,/ тех молитвами// спаси души наша.

В пищи словес твоих, Богоносе Арсение,/ разумно чада твоя питая,/ языком хваля, устнами же пение принося, вещанием зовый:/ Христе, Ты еси Свет неизреченный.

Милости наставниче и благоутробия сокровище,/ еже всем отверзл еси,/ правоверия учителю и архиереев Божественное удобрение,/ отче наш, иерарше Арсение,/ нищих был еси заступник:/ тем моли Христа Бога,/ просветити души наша, да не когда уснем в смерть.

Благочестия непобедимаго воина/ и истине согласника и оружника/ вси по достоянию восхвалим Нестора великаго днесь/ и к нему возопием:/ моли Христа Бога о всех нас.

Страдальчествовав добре,/ безсмертную славу наследовал еси ныне,/ яко воин изрядный Владыки был еси,/ молитвами Димитрия мученика:/ с ним убо, Несторе мудре,// моля не престай о всех нас.

Мученик Твой, Господи, Нестор/ во страдании своем венец прият нетленный от Тебе, Бога нашего,/ имеяй бо крепость Твою,/ мучителей низложи,/ сокруши и демонов немощныя дерзости:/ того молитвами// спаси души наша.

Дивный во святых Своих Господь/ удивися изрядне в сем святем Несторе,/ иже аще и безкнижен сый и прост,/ но превзыде премудрых и посрами книжников,/ чтущих и не творящих,/ наследи блага вечная/ и молит присно еже спастися нам.

Чист и прав сый сердцем,/ и свят, преподобне Несторе, душею,/ прост же паки и не умея сам чести книг,/ сего ради чтущим я прилежне внимал еси/ и, оная в себе соблюдая, спешно тщался еси исправляти,/ яже яко разумен исполнив, обрел еси Царствие Небесное.

Яко сый Богоноснаго Феодосия ученик/ и истинный жития того подражатель,/ первый честных его мощей самовидец быти сподобился еси,/ яже с прочиими святолепно пренес,/ наследил еси с темиже Царство Небесное,/ еже получити и нам, чтущим тя, Господеви молися.

Времена и лета достопамятных деяний,/ подвиги и труды Богоносных отец,/ Несторе премудре, написуя,/ любовию возгорелся еси последовати стопам первоначальных,/ с нимиже не престай молитися Христу Богу,/ спастися душам нашим.

Великих князей русских деяния/ и преподобных отец Печерских жития и чудеса написавый,/ свое же, Богомудре Несторе, многих ти ради добродетелей имя/ написано на небеси стяжавый, моли и нам написатися в Книги Животныя.

Насажден во дворех Господних,/ своими преподобными детельми/ в дому святаго Чудотворца Николая/ красно процвел еси,/ мира красоту и славу сего света ни во что вменив,/ Единаго Христа возлюбил еси;/ слез твоих течением напаяем,/ уязвился еси желанием будущих даров./ Темже зовем ти:/ радуйся, святе княже Андрее Смоленский,/ граду Переяславлю похвало/ и всей Российстей земли великое утверждение.

Возвысився на добродетель/ и, очистив ум свой, к желанию прекрасному достигл еси,/ безстрастием украсився своим лощением изрядно,/ в молитвах безплотно вознесеся/ и возсия в мире, яко солнце, во граде Переяславле,/ отче преблаженне, святе княже Андрее Смоленский,/ моли спастися душам нашим.

Град твой Смоленск яко чужд имея,/ водворился еси во граде Переяславле,/ и в дому святителя Николая/ жестоким житием временную жизнь совершив,/ востекл еси в Горняя предстояти Христу,/ Егоже моли о творящих память твою,/ да вси вопием ти:/ радуйся, святе княже Андрее,/ Ангелом собеседниче и человеком помощниче.

Блаженство Евангельское возлюбив,/ Богомудре княже Андрее,/ чистоту сердца девством почтил еси/ и, суету мира сего презрев,/ устремился еси зрети Бога,/ Иже тя прослави чудесы/ во врачевании различие страждущих./ Сего ради молим тя:/ проси нам у Христа Господа/ всяких скорбей избавления/ и получение Царства Небеснаго.