Тропари, кондаки и величания

В мори житейстем обуреваемии,/ треволнению подпадаем страстей и искушений./ Подаждь убо нам, Госпоже, руку помощи, якоже Петрови Сын Твой,/ и ускори от бед избавити ны, да зовем Ти:// радуйся, Всеблагая Скоропослушнице.

К Богородице притецем, сущии в бедах,/ и святей иконе Ея ныне припадем,/ с верою зовуще из глубины души:/ скоро наше услыши моление, Дево,/ яко Скоропослушница нарекшаяся./ Тебе бо раби Твои в нуждах// готовую Помощницу имамы.

За любовь Господню, преподобная Матроно,/ покоя желание возненавидела еси,/ лощением дух твой просветивши,/ но твоими молитвами и противных шатания разори,/ крепко бо звери победила еси.

Мужескомудрено утаившися вражиих лукавых путей, Матроно,/ к жизни воистину шествовавши несумненною волею/ и неуклонное течение Богомудро скончавши,/ от Христа прияла еси благодать духовную,/ тем и воду цельбам источаеши/ любовию притекающим в память твою славную,/ мнихом похвала,/ моли Христа Бога спастися душам нашим.

Мученик двоица, пострадавше крепко,/ вражию гордыню на землю низложисте,/ озарившеся благодатию несозданныя Троицы,/ славнии Онисифоре и Порфирие,// молитеся непрестанно о всех нас.

Мученицы Твои, Господи,/ во страданиих своих венцы прияша нетленныя от Тебе, Бога нашего,/ имуще бо крепость Твою,/ мучителей низложиша,/ сокрушиша и демонов немощныя дерзости./ Тех молитвами// спаси души наша.

Величаем вас,/ Архангели, и Ангели/ и вся Воинства,/ Херувими и Серафими,// славящии Господа.

Архистратизи Божии,/ служителие Божественныя славы,/ Ангелов начальницы и человеков наставницы,/ полезное нам просите и велию милость,// яко Безплотных Архистратизи.

Небесных воинств Архистратизи,/ молим вас присно мы, недостойнии,/ да вашими молитвами оградите нас/ кровом крил невещественныя вашея славы,/ сохраняюще ны, припадающия прилежно и вопиющия:/ от бед избавите ны,// яко чиноначальницы Вышних сил.

Яко светильника превеликаго/ Церковь Христова славит тя/ с веселием псаломски,/ темже не престай моляся Христу// дати всем прегрешений прощение.

Бденными молитвами,/ теченьми слезными столп омочил еси,/ и из глубины воздыханьми/ во сто трудов уплодоносил еси,/ и был еси пастырь, всем подая прощение,/ преподобне отче наш Лазаре:/ молися Христу Богу// спастися душам нашим.

Христов ярем на рамо взем,/ усердно Тому последова,/ чистотою Богови приближився,/ отче преподобне Кирилле,/ молим тя, посещай милостивно чад своих,/ и моли непрестанно о всех нас.

Взбранному и крепкому адаманту,/ прогонителю бесов, новому чудотворцу/ победительная, страстей злых свободившеся,/ благодарственная восписуем ти, отче наш Кирилле./ Но яко имея дерзновение у престола Христова,/ верою чтущих тя, град же и люди, молитвою твоею сохраняй,/ ты бо еси стаду твоему похвала и утверждение.

Яко светильник явился еси всесветел/ во отоце Нова езера на Красном острове,/ преподобне отче Кирилле,/ ты бо крест Христов на рамо взем,/ усердно Тому последовал еси,/ чистотою Богови приближився,/ от Негоже и силами чудес обогатися,/ тем и мы любезно прибегаем к раце честных мощей твоих, умильно глаголем:/ о, преподобне отче Кирилле!/ моли Христа Бога спастися душам нашим.

Божиим Духом подвизаемь,/ слез твоих тучами изсохшее напоил еси,/ и безплотное в пустыни житие показал еси,/ и еже из глубины сердца бодренными молитвами и постом/ благодеяния труды уплодоносил еси,/ и вселенную всю просветил еси сиянием чудес твоих,/ отче наш Кирилле./ Моли Христа Бога, спастися душам нашим.

Лик мученический ясен, полк светоносен,/ сошед к нам разумно,/ Церковь днесь просветил есть чудными зарями./ Темже, празднующе честную память их,/ просим от Тебе, Спасе наш:/ тех молитвами от бед избави нас,// да поем Ти: аллилуия.

Мученицы Твои, Господи,/ во страданиих своих венцы прияша нетленныя от Тебе, Бога нашего,/ имуще бо крепость Твою,/ мучителей низложиша,/ сокрушиша и демонов немощныя дерзости./ Тех молитвами// спаси души наша.

Таврион славный и Авкт дивный, огневи противистася и всем инем казнем,/ молитвами возмогающа;/ та убо молением сердца похваляюще,/ верою пресвятую и честную память ею совершим,/ душам просвещение почерпающа.

Облиставый на земли, яко звезда небосветлая,/ Кафолическую просвещаеши Церковь ныне,/ о нейже и страдальчествовал еси,/ душу твою, Павле, предложив,/ и, якоже 3ахариина и Авелева,// ясно вопиет твоя кровь ко Господу.

Божественныя веры исповеданием/ другаго Павла тя Церковь, ревнителя во священницех, показа,/ свозопиет ти и Авель ко Господу,/ и 3ахариина кровь праведная./ Отче преподобне,/ Христа Бога моли// дароватися нам велией милости.