Истине основание, и веры утверждение,/ и в поучениих преизряднаго свемы тя, благочестию споспешника,/ апостолом сопрестольника, страстотерпцем сопричастника,/ постником купноревнителя похваляем тя, Гурие святителю,/ и велия таинника Божия благодати.
Чувственныя страсти победив,/ чистотою, яко солнце, возсиял еси,/ чисто житие до конца сохранив,/ и от неверия в веру многих ко Христу привел еси,/ и Того ради от Бога нетлением почтен был еси/ и чудесы удивляем./ Молим тя, святителю Гурие,/ молитвами твоими от бед избави нас, да зовем ти:// радуйся, отче предивный, граду Казани похвала и утверждение.
От младости удалялся земнаго мудрования/ и последовав скорбным путем Законоположителю своему Христу Богу./ Темже и Он тя воздарова на земли нетлением,/ на Небесех же со угодившими Ему архиереи ликовствуеши,/ Гурие святителю,/ моли Христа Бога/ подати отечеству нашему на враги победу,/ и мир мирови,/ и душам нашим велию милость.
Правило веры и образ целомудрия,/ учителя добрых дел/ и наставника спасения даде тя Господь/ новопросвещенному граду Казани,/ в немже приобрел еси новыя от язык люди/ и привел еси я Христови./ Сего ради в память твою радостно сошедшеся,/ честне празднуем святое твое успение,/ ты же, отче наш, святителю Христов Гурие,/ моли Христа Бога/ спастися душам нашим.
В Троице благочестно певаемому/ последовавши Богу, страстотерпице,/ идольская притупила еси чтилища,/ посреде же подвига страдальчествующи, Варваро,/ мучителей прещения не устрашилася еси, мужемудренная,/ велегласно поющи присно:// Троицу чту, Едино Божество.
Агнице всеблаженная Варваре,/ Божественне озарившися Светом Святыя Троицы Трисолнечным/ и в купели утвердившися,/ в побеждение лести отеческия/ веру исповедала еси Христову./ Тем, всечестная, свыше благодать тебе дарова Бог/ исцеляти недуги и болезни вся./ Егоже моли, великомученице,/ да спасет души, наша.
Варвару святую почтим:/ вражия бо сети сокруши/ и, яко птица, избавися от них// помощию и оружием Креста, всечестная.
Песнописца и честнаго богоглагольника,/ Церкве наказателя и учителя/ и врагов сопротивоборца, Иоанна воспоим:/ оружие бо взем, Крест Господень,/ всю отрази ересей прелесть/ и яко теплый предстатель к Богу// всем подает прегрешений прощение.
Православия наставниче,/ благочестия учителю и чистоты,/ вселенныя светильниче,/ монашествующих богодохновенное удобрение, Иоанне премудре,/ ученьми твоими вся просветил еси, цевнице духовная,// моли Христа Бога спастися душам нашим.
Велия исправления о церковном благолепии являя,/ Православную веру утвердил еси,/ святителю отче Геннадие,/ не престай молитися о нас,/ во Царствии Небеснем Безсмертныя трапезы наслаждался.
Уподобился еси древним отцем,/ святителю отче Геннадие,/ Священныя Книги собрав и еретики посрамив,/ ревность по Бозе показуя, паству оградил еси,/ моли и ныне Христа Бога/ мир Церкви даровати/ и спастися душам нашим.
Царя тленнаго и скорогибнущия славы,/ мудре отче, изменил еси вечно пребывающими,/ от столпнаго же и прискорбнаго жития в Горнее и всерадостное взыде,/ превеличества славы Небесному Царю сцарствуя, Феодуле,/ моли непрестанно о всех нас.
В тебе, отче, известно спасеся, еже по образу,/ приим бо крест, последовал еси Христу/ и, дея, учил еси презирати убо плоть, преходит бо,/ прилежати же о души, вещи безсмертней./ Темже и со Ангелы срадуется, преподобне Феодуле, дух твой.
Явился еси светозарен Божественным Духом,/ пророче Софоние,/ Божие явление возгласив:/ радуйся зело, дщи Сионя Иерусалимова, проповеждь:// се Царь Твой грядет, спасаяй.
Пророка Твоего Софонии память, Господи, празднующе,/ тем Тя молим:// спаси души наша.
Господним желанием распалився,/ страсти плотския воздержанием оттряс,/ Божественнаго света незаходимое светило явился еси,/ чудес лучами всех просвещаеши,/ притекающих к мощем твоим,// Савво преподобне, отче наш.
По имени, о страстотерпице Миропие,/ миро источаеши благодати чудес/ и пасеши всех, подобающих и взыскающих/ и верою и добродетелию прибегающих к раке твоей пречестней,/ яже держит прах твой.
Добромученице Миропие и Христа невесто нетленная,/ ныне Емуже предстоиши, прекрасная,/ раны носящи плоти,/ яко камни светлы и светообразны,/и в кровавую порфиру, яко царица, облеченная, преславная,/ умоли Его за ны,/; яже с любовию восхваляющия/ хвалы победными; и песньми твою Божественную страсть.
Отрасли благородныя цвет прекрасный явился еси, Уроше всечестне,/ завистию бо убиен был еси от твоих присных,/ Божиим же Духом просвещен,/ святороднаго племене свят был еси/ и, мученическим венцем увязся,/ в чертозе Небеснем водворяешися./ Молися о нас, святе, творящих любовию память твою.