Тропари, кондаки и величания

Готовися, Вифлееме,/ отверзися всем, Едеме,/ красуйся, Евфрафо,/ яко древо живота в вертепе процвете от Девы:/ рай бо Оноя чрево явися мысленный,/ в немже Божественный сад,/ от негоже ядше, живи будем,/ не якоже Адам умрем.// Христос раждается прежде падший возставити образ.

Днесь пастырь Кронштадтский/ предстоит Престолу Божию/ и усердно молит о верных/ Христа Пастыреначальника,/ обетование давшаго:/ созижду Церковь Мою, // и врата адова не одолеют ей.

Православныя веры поборниче,/ земли Российския печальниче,/ пастырем правило и образе верным,/ покаяния и жизни во Христе проповедниче,/ Божественных Таин благоговейный служителю/ и дерзновенный о людех молитвенниче,/ отче праведный Иоанне,/ целителю и предивный чудотворче,/ граду Кронштадту похвало/ и Церкве нашея украшение,/ моли Всеблагаго Бога// умирити мир и спасти души наша.

Проходя, всеблаженне, добродетельми от силы в силу,/ и всех, с тобою сущих, оными превозвышая,/ всем служил еси, Игнатие, и угождал,/ тем избран был еси всем, в дому Божия Матере сущим, в старейшину и вождя,/ в несом; паче Господеви благоугождь и стадо Его добре; упасши,/ молися о нас, чадех твоих.

Чистаго ради и непорочнаго твоего жития,/ Богоносе отче Игнатие,/ приемый от Господа чудотворныя дары исцеляти немощныя,/ исцели, молим тя, и немощи наша,/ моля о нас Единаго Человеколюбца.

Светлых подвиг твоих светоносный день/ предпроповедует всем в вертепе Рожденнаго:/ Сего бо жаждая от любве насладитися,/ потщался еси от зверей снеден быти,/ сего ради и Богоносец нареклся еси,// Игнатие всемудре.

Апостольских нравов подражателю/ и престола их снаследниче,/ архиереев удобрение/ и мучеников славо, богодухновенне,/ на огнь, и меч, и звери дерзнул еси веры ради/ и, слово истины исправляя, до крове пострадал еси,/ священномучениче Игнатие,/ моли Христа Бога// спастися душам нашим.

Возбранному и дивному нашел земли светильнику днесь любовию притекаем/ и песнь тебе, Богоносе, плетем,/ яко имущему дерзновение ко Господу:/ избави нас от многообразных обстояний, да зовем ти:/ радуйся, утверждение отечеству нашему и великий покровителю обители своея.

Чудо явися извещения,/ делами добродетелей Божиих возсиял еси,/ монашествующих лики упасл еси,/ архиерейская седалища утвердил еси,/ еретическаго нападения не усумневся,/ Церковию Христовою управляя,/ преподобне отче, Данииле премудре,/ умер, яко спя,/ тело же твое цело и нетленно соблюдено бысть,/ и подает цельбы болящим от различных недугов,/ и демоны прогоняет./ Сего ради молим тя: моли спастися душам нашим.

Изыде к приятию страстотерпческих мощей и страждущих законне веры ради зря,/ показал еси мужески крепость свою,/ устремився на страсти исповеданием во Христа,/ Иже прием почесть победы твоего страдания,/ Вонифатие, присно моли за ны.

Священие непорочное/ самовольне тебе привел еси,/ Иже от Девы тебе ради родитися хотящему,/ святе венченосче,// премудре Вонифатие.

К сословию послан мучеников,/ мученик был еси истинен,/ пострадав за Христа крепчайше, всехвальне,/ мощми же возвратился еси верою пославшей тя, Вонифатие блаженне,/ моли Христа Бога// прияти нам грехов прощение.

Девства чистоты возлюбльши и обручника к благим увещавши,/ премножество богатства расточи/ в пребывание иночествующим, Богоблаженная, и обители воздвиже./ Темже в Небесная обители вселися,/ поминай нас, Желание всечестная.

Наста светоносный день чудесных подвиг твоих, страстотерпице преславная,/ днесь Божия честная Церковь празднует и созывает вопити тебе:/ радуйся, дево мученице Анисие всеблаженная.

Богомудрым учением и книжным списанием/ потщался еси, святителю Макарие,/ люди российския просветити/ и святых земли нашея прославити./ Сего ради чуден пронаречеся,/ преемниче первопрестольников российских,// моли сохранитися нам в вере и благочестии невредимо.

Яко великим пастырем единонравна/ и учителем вселенныя единомысленна,/ Божия Премудрости служителя изрядна,/ иже блаженству тезоименита,/ днесь, вернии, вси воспоим:/ Христа Бога моли, святителю Макарие,// умирити мир и спасти души наша.

За любовь Христову, преподобне, нищия возлюбив,/ и сих удоволил еси,/ и Небесное богатство ныне восприял еси, Зотике пребогате./ Сего ради вси тя почитаем,/ совершающе память твою.

В Вифлееме рождшуся Царю, волсви от Персиды с дары приходят,/ звездою свыше наставляеми,/ но Ирод смущается и пожинает младенцы, яко пшеницу,/ и рыдает себе,/ яко держава его вскоре разорится.

Звезда волхвы посла к Рождшемуся,/ и Ирод неправедное воинство посла люто,// убити мня во яслех яко Младенца лежаща.

Болезньми святых, имиже о Тебе пострадаша,/ умолен буди, Господи,/ и вся наша болезни исцели,// Человеколюбче, молимся.