Тропари, кондаки и величания

Словенска языка, Псковския земли/ плотски в юродстве быв,/ юродства притворением Горняго Иерусалима гражданин явися,/ Ангелом, славне, свеселишися,/ мироточиваго святителя Николая звание восприим,/ с нимже всегда Христа Бога моли/ даровати нам велию милость.

Преподобен быв, Богу возложился еси,/ и просвещая добрыми виды, Кассиане,/ яко солнце облистал еси/ сиянием Божественных твоих учений,/ сердца всех чтущих тя всегда просвещая./ Но прилежно моли Христа,/ о иже любовию тепле восхваляющих тя.

Постом предочистився, премудрости постигл еси разумение, / от пустынных же Богоносных отец научился еси страстей обузданию./ Того ради подаждь нам твоими молитвами/ плоти нашея духу послушание:/ еси бо наставник, Кассиане преподобне,/ всем поющим о Христе твою память.

С высоты приим Божественное откровение,/ изшел еси, мудре, от среды молв/ и, монашествовав преподобно,/ чудес приял еси действо/ и недуги исцеляти благодатию,// Василие всеблаженне священнейший.

Пустынный житель, и в телеси Ангел,/ и чудотворец явился еси, Богоносе, отче наш Василие,/ постом, бдением, молитвою Небесная дарования приим,/ исцелявши недужныя и души верою притекающих ти./ Слава Давшему ти крепость,/ слава Венчавшему тя,/ слава Действующему тобою всем исцеления.

Смирению Господню подобней,/ смирился еси, священник сый пред лицем гордаго диакона Евагрия,/ беззлобие Тите,/ за что приял еси не токмо временныя жизни неотпадение,/ Ангелу тя воздвигшу,/ но и вечныя наслаждение,/ в нейже ликуя, избавляй нас лютаго гнева и памятозлобия.

Братолюбне тя живуща видев любве ненавистник,/ победил тя во гнев,/ но, ведый твоя прежния труды любве источник - Господь,/ преложи тя паки на братолюбие,/ в немже ты прочее пожив Богоугодне,/ молися о нас, яко да поживем братолюбне.

Воина Христова храбраго,/ щитом преподобия обложшагося/ и воев невидимых крепко победивша,/ приидите, вернии, восхвалим,/ Тита крепкодушнаго и возопиим:/ прииди, святе, к нам и никтоже озлобит ны.

Воинство тленное оставль,/ в нетленном ввоенился еси Христови,/ и оружием его крестным победив подземных ефиопов,/ победы венец от Христа, Тите, славно приял еси,/ Емуже молися даровати нам мир и велию милость.

Денницу днесь Церковь имущи,/ всякую злославия мглу разгоняет,/ почитающи Тя, Небеснотаинниче, Прокопие преславне.

Слез твоих теченьми пустыни безплодное возделал еси,/ и иже из глубины воздыханьми во сто трудов уплодоносил еси,/ и был еси светильник вселенней,/ сияя чудесы, Прокопие отче наш./ Моли Христа Бога спастися душам нашим.

Сиянием Духа Пресвятаго, мудре Севастиане, просвещся, оставил еси яже в житии молвы, пустыню же достиг, преподобне отче, воз­веселил еси иже над всеми Бога и Зиждителя. Сего ради прославляет тя Христос, блаженне, Великий Дародатель.

Удалився мира и водворився в пустыни, добрым подвигом подвизася, злостраданием, и вниманием, и молитвами, отнюдуже и по смерти источаеши исцеления, Севастиане, отче наш, моли Христа Бога спастися душам нашим.

Священнейшими твоими нравы украшаемь,/ священства одеждею озарился еси,/ всеблаженне Богомудре Порфирие,/ и исцелений удобряеши возвышеньми,/ моляся непрестанно о всех нас.

Труды и болезни твоя, яже по благочестию,/ кто исповесть, отче?/ день бо и ночь не престал еси трудяся,/ дондеже от нечестия Газу очистив, благочестие насадил еси,/ тем яко всегда еси предстатель о стаде твоем,/ тако, святе Порфирие,/ моли Христа Бога да спасет души наша.

Православными догматы Церковь уяснив,/ и Христову, блаженне, честную икону почитати/ и покланятися всех научив,/ обличил еси иконоборцев безбожное веление./ Сего ради вопием ти:// о отче, радуйся, мудре Тарасие.

Правило веры и образ кротости,/ воздержания учителя,/ яви тя стаду твоему,/ яже вещей истина,/ сего ради стяжал еси смирением высокая,/ нищетою богатая./ Отче Тарасие,/ моли Христа Бога/ спастися душам нашим.

Пророче Божий и Предтече благодати,/ главу твою, яко шипок священнейший, от земли обретше,/ исцеления всегда приемлем,/ ибо паки, якоже прежде,// в мире проповедуеши покаяние.

От земли возсиявши, Предтечева глава/ лучи испущает нетления верным исцелений,/ свыше собирает множество Ангел,/ доле же созывает человеческий род// единогласную возсылати славу Христу Богу.

Украсивый церковь Богоматере/ расточением имения ти на сие иконами, Еразме славне,/ себе же о том нераскаянием;/ подаждь и нам расточением грехов своих/ и покаяния лепотою украсившимся/ церковию светлою Духови Святому явитися.