Тропари, кондаки и величания

От мирскаго мятежа из младых ногтей/ исшед в тихое пристанище,/ честный обители Печерския достигл еси/ и, тамо ярем Христов восприим на ся,/ равно Ангелом житие поживе,/ отнюду же пришед, святителю Христов Нифонте, в великий Новград,/ и архиерейский престол восприял еси/ и многи люди учением своим ко Христу привел еси,/ Егоже моли, святителю преподобне, спастися душам нашим.

Яко сый нравом православных/ Восточныя Церкве преданий истинный защитник,/ сподобился еси великаго во отцех Феодосия/ видети по смерти яко жива,/ возвещающа тебе Царствия Небеснаго наследие,/ егоже неизреченных доброт/ ныне с ним неразлучно наслаждаяся,/ моли и о нас, чадех своих, Нифонте прехвальне.

Явистеся Христовы ученицы и апостоли всечестнии,/ Иродионе славне, Агаве и Руфе,/ Асинкрите, Флегонте со Ермом,/ присно молитеся Господеви// подати нам согрешений прощение, поющим вас.

Невечерняго Света пресветлое светило,/ жития чистотою просвещающее всех,/ явился еси, отче Данииле:/ образ бо и правило иноком был еси,/ сиротам нее отец и питатель вдовицам./ Сего ради и мы, чада твоя, вопием ти:/ радуйся, радосте и венче наш;/ радуйся, многое имый к Богу дерзновение;/ радуйся, граду нашему велие утверждение.

От юности, блаженне, всего себе Господеви возложив,/ выну повинуяся Богу,/ противяся же диаволу,/ над страстьмй греховными воцарился еси,/ тем сам храм Божий быв,/ и обитель красну во славу Пресвятыя Троицы воздвигнув/ и собранное тобою в ней стадо Христово Богоугодно упасши,/ преставился еси к вечным обителем,/ отче Данииле,/ моли Триипостаснаго во едином Существе Бога спастися душам нашим.

Троицы Святыя служителю,/ земне ангеле и небесне человече,/ духовнаго Оптинскаго старчества преемниче,/ Христов священнотаинниче и исповедниче,/ Духа Святаго обитель всечестная,/ преподобне отче Севастиане, досточтиме,/ испроси мирови мир/ и душам нашим велию милость.

Божественна и верна Мефодия/ вси воспоим, людие, и любовию ублажим,/ яко пастыря великаго словеном,/ служителя Троицы честна,/ прогонителя ереси,/ молит бо ся о всех нас.

Святителя Твоего, Христе,/ творящим светло торжество успения/ милость Твою свыше подаждь,/ отверзи же Царствия двери,/ разреши же узы наша многих грехов/ ходатайством святаго Твоего ученика,/ отца нашего.

Божественнаго верно Евтихия вси поюще, людие,/ любовию да ублажим, яко пастыря велика и служителя,/ и учителя премудра, и прогонителя ересей,/ молит бо Господа о всех нас.

Божественнаго верно Евтихия вси поюще, людие,/ любовию да ублажим, яко пастыря велика и служителя,/ и учителя премудра, и прогонителя ересей,// молит бо Господа о всех нас.

Правило веры и образ кротости,/ воздержания учителя/ яви тя стаду твоему/ яже вещей истина,/ сего ради стяжал еси смирением высокая,/ нищетою богатая./ Отче Евтихие,/ моли Христа Бога/ спастися душам нашим.

Правило веры и образ кротости,/ воздержания учителя/ яви тя стаду твоему/ Яже вещей Истина,/ сего ради стяжал еси смирением высокая,/ нищетою богатая,/ отче Евтихие,/ моли Христа Бога// спастися душам нашим.

В годину лютых искушений/ многострадальному Иову подобяся,/ в жертву живу и непорочну/ себе Христу принесл еси,/ обратив паству к покаянию,/ терпеливе Иове святителю,/ моли и нам за вся благодарити Господа/ и всегда воздавати// славу Богови.

Православия поборниче,/ веры Христовы исповедниче,/ первоиерарше Церкве Русския,/ святителю отче Иове,/ за ны Христа Бога моли:/ веру отеческую утвердити,/ грехов оставление нам даровати// и подати миру велию милость.

Многолетне страдая в болезнех,/ молитвою и обещанием восприятия иночества/ приял еси здравие от Бога,/ и, неленостно подвизався в Печерстей обители,/ наследил еси неболезненную и вечную жизнь,/ и исцелявши недуги чтущих тя,/ преподобне Иосифе, отче наш.

Слез твоих теченьми пустыни безплодное возделал еси,/ и инее из глубины воздыханьми во сто трудов уплодоносил еси,/ и был еси светильник вселенней, сияя чудесы,/ Иосифе, отче наш,/ моли Христа Бога спастися душам нашим.

Покаяния источник неисчерпаемый,/ утешения податель некончаемаго/ и умиления пучина еси, Иосифе,/ слезы нам подаждь покаяния Божественнаго,/ имиже утешение, зде плачущеся,/ обрящем от Бога,/ твоея помощи просяще, святе.

Покаяния источник неисчерпаемый,/ утешения податель некончаемаго/ и умиления пучина еси, Иосифе,/ слезы нам подаждь покаяния Божественнаго,/ имиже утешение, зде плачущеся,/ обрящем от Бога,// твоея помощи просяще, святе.

Радуйся, Богоневесто, жезле тайный,/ Цвет Неувядаемый процветший,/ радуйся, Владычице, Еюже радости наполняемся/ и жизнь наследствуем.

Небесный ум и житие стяжав,/ сиявши ясно, якоже солнце, светлостию дел,/ просвещавши сущия во тьме житейстей, отче Никито,/ и, приводя всех к Богу,/ моли непрестанно о всех нас.