Тропари, кондаки и величания

Приспе день светлаго торжества,/ град Барский радуется,/ и с ним вселенная вся ликовствует/ песньми и пеньми духовными:/ днесь бо священное торжество/ в пренесение честных и многоцелебных мощей/ святителя и чудотворца Николая,/ якоже солнце незаходимое, возсия светозарными лучами,/ разгоняя тьму искушений же и бед/ от вопиющих верно:// спасай нас, яко предстатель наш, великий Николае.

Пророчества дарование прием, пророкомучениче, Исаие Богопроповедниче,/ всем изъяснил еси вочеловечение Господне,/ возгласив велегласно концем:/ се Дева во чреве приимет.

Пророка Твоего Исаии память, Господи, празднующе,/ тем Тя молим:/ спаси души наша.

Величия твоя, девственниче, кто повесть?/ Точиши бо чудеса, и изливаеши исцеления,/ и молишися о душах наших,// яко Богослов и друг Христов.

Апостоле, Христу Богу возлюбленне,/ ускори избавити люди безответны,/ приемлет тя припадающа/ Иже падша на перси приемый./ Егоже моли, Богослове,/ и належащий облак языков разгнати,// прося нам мира и велия милости.

Яже на земли оставль, Христовым стопам последовал еси тепле/ и, Того, славне, на рамо взем честный крест,/ умертвил еси труды постническими телесныя желания, треблаженне./ Темже зовем ти: радуйся, отче Арсение.

Слез твоих теченьми пустыни безплодное возделал еси,/ и иже из глубины воздыханьми во сто трудов уплодоносил еси,/ и был еси светильник вселенней, сияя чудесы, Арсение отче наш,/ моли Христа Бога спастися душам нашим.

От Рима возсиял еси, якоже солнце великое,/ и к Царскому граду достигл еси, преблаженне,/ словесы твоими просвещая сего и делы,/ всяку неразумия мглу отгоня./ Сего ради тя почитаем,// отцев славо, Арсение преподобне.

Слез твоих теченьми пустыни безплодное возделал еси,/ и иже из глубины воздыханьми во сто трудов уплодоносил еси,/ и был еси светильник вселенней, сияя чудесы, Арсение отче наш,// моли Христа Бога спастися душам нашим.

Притецем, вернии, к многоцелебному образу Заступницы нашел, Богородицы Марии,/ и, припадающе к нему с любовию, сице рцем:/ о Всепетая Мати, о Царице Всемилостивая,/ призри свыше благосердием Твоим на ны, недостойныя,/ и молитвами угодника Твоего, преподобнаго Антония Печерскаго,/ яви нам Твоя милости и щедроты:/ в болезнех исцеление, в скорбех утешение,/ в бедах скорую помощь нам даруй,/ и вся ны спаси, на Тя уповающий, да зовем Ти:/ радуйся, Дево, христиан заступление.

Преблагословенная Царице,/ Пречистая Дево Богородице,/ прославльшая град Любеч/ угодника Твоего преподобнаго Антония Печерскаго рождением и чудотворныя иконы Твоея явлением,/ молим Тя, Всеблагая:/ моли за ны рождшагося от Тебе Царя,/ Христа Бога нашего,/ и Матерним Твоим к Нему предстательством избави нас от всякаго зла,/ недуги наша исцели, печали наша утоли/ и наследники яви нас Царствия Небеснаго,/ яко Милосердна.

Отверзый небеса заключенная,/ на небеси пресветлыя лучи,/ на земли возсия пречистый Крест;/ Темже сияний Его действа приемше,/ к незаходимому наставляемся свету/ и во бранех имамы Его оружие мира/ непобедимую победу.

Креста Твоего образ ныне паче солнца возсия,/ егоже от горы святыя даже до лобнаго места простерл еси/ и в нем Твою, Спасе, крепость уяснил еси./ сим укрепляя нас/ и спасай выну в мире/ молитвами Богородицы, Христе Боже, и спаси нас.

Еже от земли явление/ священных мощей твоих, Ниле,/ совозсия сиянию Креста,/ того бо вожделел еси тепле от младенства,/ кости твоя, сораспявшияся Христови,/ воскресшему яко превечному Богу,/ Того пришла благодать.

Монашествовав богоугодно в Горе Афонстей,/ в молитвах и постех Бога взыскал еси/ и стал еси приятелище чистое Духа,/ облиставая верным добродетелей лучи,/ имиже осияваеши, Ниле, вопиющих тебе:/ слава прославльшему тя Богу,/ слава Венчавшему тя,/ слава Действующему тобою всем исцеления.

Величия Твоя кто исповесть,/ Пресвятая Дево,/ Творца всех Христа Бога рождшая?/ Едина бо еси Мати и Дева/ Преблагословенная и Препрославленная,/ упование наше, источник благостыни,/ верным прибежище и миру спасение.

Помощи от Тебе требующий не презри, Владычице,/ и милосердия бездну отверзи всем,/ притекающим к цельбоносней иконе Твоей./ Печали наша житейский утоли, Всещедрая,/ и от юдоли сея плачевныя/ к радости вечней верныя Твоя престави:/ Тебе бо вси стяжахом надежду и утверждение,/ милости источник, покров и спасение душ наших.

Пред святою Твоею иконою, Владычице,/ молящиися исцелений сподобляются,/ веры истинныя познание приемлют/ и агарянская нашествия отражают/ Темже и нам, к Тебе припадающим,/ грехов оставления испроси,/ помыслами благочестия сердца наша просвети/ и к Сыну Твоему молитву вознеси/ о спасении душ наших.

Житие твое служением Господним исправил еси/ и, взем крест, оставил еси вся житейская,/ красото пустыни, преподобне Шио./ Кого убо паче тя, и по смерти жива суща/ страна Иверская почитает/ и мощми твоими, от гроба явленными услаждается,/ темже не престай моляся о нас ко Господу.

В тебе, отче, известно спасеся еже по образу,/ приим бо крест, последовал еси Христу,/ и, дея, учил еси презирати убо плоть, преходит бо,/ прилежати же о души, вещи безсмертней./ Темже и со Ангелы срадуется, преподобне Шио, дух твой.