Тропари, кондаки и величания

Апостольским преданием, истинней вере проповедницы,/ и от тьмы к свету Богоразумия человеком наставницы,/ и за ны к Богу молебницы,/ на Небесная любовь возложисте к Любящему вы./ И ныне на Небеси со Ангелы и со всеми святыми ликовствующе/ у Престола славы всех Царя, Христа Бога нашего,/ святии чудотворцы Леонтие, и Исаие, и Игнатие,/ молите даровати стране нашей мир,/ на враги одоление,/ Церкви единомыслие/ и душам нашим велию милость.

Православия наставниче,/ благочестия учителю и чистоты,/ Ростову пресветлый светильниче,/ святителем Богодохновенное удобрение,/ Исаие премудре,/ учением бо твоим вся Российския концы просветил еси благодатию духовною,/ святителю блаженне,/ моли Христа Бога, да спасет души наша.

Божиим светолитием просвещен, отче,/ постническое стяжав жительство, преподобне,/ иноком предобрый наставниче и постником благое украшение./ Сего ради Господь, труды твоя видев, даром чудес обогати тя,/ источавши бо исцеления./ Мы же, радующеся, вопием ти:/ радуйся, отче Евфросине, иноком удобрение.

Изволением Божественнаго разума вселися в пустыню/ и тамо вперив свой ум в Небесныя обители/ и равно Ангелом житие пожив на земли,/ в молитвах, и в трудех, и в пощениих образ быв своим учеником./ Темже Бог, видев твое благое изволение,/ умножи тебе чада в пустыни,/ слез твоих тучами напаяема,/ но, яко имея дерзновение к Богу,/ поминай стадо свое, еже собрал еси, мудре,/ и не забуди, якоже обещался еси, посещая чад своих,/ Евфросине, преподобне отче наш.

Житейскую печаль и всяк мятеж мира сего/ любве ради Христовы со дерзновением отвергл еси, блаженне,/ и повеленная распятым Господем Иисусом Христом/ вся исправил еси,/ и, Того ярем взем, во всем воли Его повинулся еси,/ и, благочестив делатель, животным заповедем Христовым/ благотрудно прилежал еси./ И сего ради Бог прослави тя/ и по преставлении чудеса показа от честнаго гроба твоя,/ Темже и неоскудно угобзися обитель твоя,/ и нищим бысть богатное пристанище и покров,/ отче наш преподобне Евфросине,/ моли Христа Бога, да спасет души наша.

Возсия днесь в славней памяти твоей верным веселие,/ яко бо доброрасленный грезн, прозябл еси/ и Христу красен плод принесл еси себе;/ темже и по убиении твоем соблюде тело твое нетленно,/ страдальчески обагреное кровию./ Благородие святе Димитрие,/ соблюдай отечество твое и град твой невредим,/ тому бо еси утверждение.

Всеоружеством Духа благодати вооружен быв/ и необорим столп и утверждение отечеству своему показася,/ яко агнец незлобивый, от врага неправедно заклан быв/ и в жертву непорочну Господеви принесеся./ И ныне дар благодати от всех Подвигоположника прием,/ источавши всем исцеление, достохвальне благоверный царевичу княже Димитрие./ Слава Восприимшему тя от земных в Небесная,/ слава Венчавшему тя венцем неувядаемым,/ слава Действующему тобою всем исцеление.

Царскую диадиму обагрил еси кровию твоею,/ Богомудре мучениче,/ за скиптр Крест в руку приим,/ явился еси победоносец/ и жертву непорочну Владыце принесл еси себе:/ яко бо агнец незлобив, от раба заколен еси./ И ныне, радуяся, предстоиши Святей Троице,/ молися о державе сродников твоих богоугодней быти/ и сыновом российским спастися.

Трисиятельнаго Божества сиянием просветив сердце твое, преподобне,/ световиден весь явился еси добродетельми,/ яко и Гору Афонскую свет трудолюбия твоего озари,/ идеже святую икону Солнца истиннаго,/ Христа, и Его Пречистыя Матере в дар приим,/ на остров Нева езера пришед,/ обитель устроил еси, всеблаженне./ Тем, верою и любовию к тебе притекающе, радостно вопием:/ радуйся, пресветлый светильниче, Арсение, отче наш.

Духом Божиим наставляемый,/ возлюбил еси безмолвие,/ в немже евангельски подвизающуся,/ пречудный Афонский дар -/ Богоматере икона, даровася ти, всеблаженне,/ и, образ добродетелей быв стаду твоему,/ Арсение отче наш,/ к Горнему торжеству возшел еси,/ идеже со Ангелы ликовствуя,/ моли Христа Бога/ спастися душам нашим.

Божественною любовию возгоревся,/ мирская пристрастия от души отвергше,/ тесным путем постничества во след Христа/ невозвратным умом шествовал еси, Арсение всеблаженне,/ от Негоже и мзду трудов твоих на Небесех восприим,/ поминай нас, чтущих святую память твою и вопиющих:/ слава Давшему ти крепость,/ слава Венчавшему тя,/ слава Действующему тобою всем исцеления.

Победив вражия лести добле и светло добротедельми просияв, святительства одеждою облеклся еси, преславне Никито, в немже светом жития твоего и чудесы сияя паче солнца, многих просветив, привел еси Христови, Егоже моли о нас, поющих тя.

Небеснаго пространства желая,/ от юности в тесне месте затворился еси,/ в немже прельщен быв от врага,/ паки смирением и послушанием/ победил еси прелестника крепце, Никито,/ и ныне, предстоя Христови,/ моли спастися всем нам.

Управитель превеликий вселенней ты явился еси, святе,/ твоими к Богу молитвами,/ темже воспеваем тя днесь,/ мучениче Богомудре,/ Исидоре преславне.

Мученик Твой, Господи, Исидор/ во страдании своем венец прият нетленный от Тебе, Бога нашего,/ имеяй бо крепость Твою/ мучителей низложи,/ сокруши и демонов немощныя дерзости./ Того молитвами/ спаси души наша.

Верою память твою, блаженне, совершающий,/ соблюдай от всякия злобы и соблазна змиина,/ имаши бо дерзновение ко всех Владыце, Христу Богу,/ Егоже моли избавитися от бед и напастей рабом твоим,/ Богомудре Исидоре.

Взбранному и дивному в праведницех,/ иже убо от Христа дар чудес приимшему,/ похвальный ныне принесем глаголы,/ но яко имея дерзновение ко Святей Троице,/ Юже моли избавитися от бед рабом твоим, да зовем ти:/ радуйся, Богомудре Исидоре.

Божественною свыше просветився благодатию, Богомудре,/ многим терпением во временней жизни течение совершил еси,/ темже и по успении источавши чудеса/ иже с верою приходящим к раце мощей твоих, Исидоре всеблаженне./ Слава Давшему ти крепость,/ слава Прославльшему тя в чудесех,/ слава Действующему тобою всем исцеления.

От земли Воззвавый тя на вечныя обители,/ соблюдает и по смерти тело твое невредимо,/ святе Исидоре,/ ты бо в целомудрии и чистоте жития пожил еси, блаженне,/ не осквернив своего телесе,/ темже со дерзновением Христа Бога моли/ спастися душам нашим.

Просветився Божественною благодатию, Богомудре,/ целомудрием многим и терпением/ во временней жизни течение добре скончал еси./ Тем и по смерти яви тя светлость жития твоего:/ источавши бо исцелений благодать/ иже с верою притекающим ко святому твоему гробу,/ Исидоре блаженне,/ моли Христа Бога,/ да спасет души наша.