Тропари, кондаки и величания

Одолением чудесным/ победила еси вражия силы до конца,/ Недело преславная,/ идоложрения бо тьму/ далече Креста честнаго светлостию прогнала еси./ Мученице всехвальная,/ Христу Богу молися/ даровати нам велию милость.

Вся красная мира сего, яко суетная, презревши/ и тело твое постом и бдением изнуривши,/ непрестанными молитвами Богу угодила еси,/ преподобная Евфросиние,/ и, дар исцелений от Него прияти сподобльшися,/ слепому прозрение и многим недужным иcцеление даровала еси./ Темже радостно взываем, глаголюще:// слава Богу, прославляющему святыя Своя.

От юности предызбранная Богом угоднице,/ оставльши светлый чертог княжеский,/ уклонилася еси во обитель, тобою созданную,/ и, пучину житейскаго моря преплывши,/ ныне со Ангелы песнословиши Христа Бога./ Емуже непрестанно молися, преподобная,/ яко да сохраняет выну обитель, тобою созданную,/ и дарует нам мир и велию милость.

По земнем вдовстве Небесному Жениху себе уневестивши/ и в княжестем чертозе подвижнически поживши,/ послежде и чертог, и чад твоих/ Бога ради оставила еси, преподобная Евфросиние,/ и вшедши во обитель, тобою созданную,/ и во иночестем образе многи подвиги показала еси,/ и святое твое житие по благодати Божией блаженною кончиною увенчала еси./ И ныне предстоящи Христу Богу,// моли спастися душам нашим.

Мир оставль, Христу последовал еси от младенства,/ премудре Акакие преподобне,/ Того подражая вольное смирение,/ низвергл еси гордостнаго мучителя,// моли непрестанно о всех нас.

Мир оставль, Христу последовал еси от младенства,/ премудре Акакие преподобне,/ Того подражая вольное смирение,/ низвергл еси гордостнаго мучителя,// моли непрестанно о всех нас.

Светила богосиянная миру/ и иноков одушевленный зари,/ Фома чудесы, Акакий же послушанием,/ возсиясте светло;/ сих, яко имущих дерзновение к Богу,/ молитвами во бранех пособствовати молим,/ да просят от Христа Бога даровати прощение согрешений/ чтущим их святую память.

Боже отец наших,/ творяй присно с нами по Твоей кротости,/ не отстави милость Твою от нас,/ но молитвами их// в мире управи живот наш.

Девства добротами преочищена/ и целомудрия цветы венчавшися,/ Богоблаженная дево Иулиание,/ явилася еси миру в нетлением телеси твоем,/ источник исцелений и даров духовных подающи всем к тебе притекающим,/ и ныне, яко свеща теплая, благодати елеем возжженная,/ предстоящи Престолу Господа и Жениха твоего Небеснаго,/ Того моли, дево чистая,/ избавити нас от всякаго зла,/ чтущих память твою верою и любовию.

Приидите, вси концы отечества нашего,/ прославим святый лик угодников Радонежских,/ яко звезды, украсивших небо церковное подвиги земнаго жительства,/ тех бо предстателъством теплым ко Господу/ многия нам милости Его низпосылаются,/ бедствия отгоняются и злыя страсти укрощаются./ Ихже всесвятую память ныне празднующе, тако возопиим:/ радуйтеся, Сергие и Никоне и вси Радонежстии чудотворцы,/ усерднии служителие Живоначальныя Троицы.

Плоды добродетелей на земли принесше,/ преподобнии отцы,/ в Небесных чертозех ныне благоухаете, яко райстии цвети,/ и лицем к лицу зрите Пресвятую Троицу,/ Юже дерзновенно молите,/ спастися душам нашим.

О, Милосердная Мати, не отрини слез и воздыханий наших, с верою и любовию к Тебе приносимых: пред иконою Богородскою услыши ныне молящихся и на путь спасения настави, и душ наших грехи исцели, от земли Уфимския вся пагуби потреби, Ты бо еси людем сокровище вечнаго спасения и источниче Божественныя благодати.

Заступнице Усердная, Надеждо ненадежных, Помощнице нищих и сирых, плачущих Утешение, согрешающих очищение, Путеводительнице заблуждших, болящих Целебнице и исправление падающих, Ты бо еси Похвало земли Уфимския, Дево Богородице.

Приводим Ти, о Всещедре, Иулианию,/ присносветящую свещу, елеем благодати обдержимую,/ немощным цельбу./ Еяже молитвами от всякаго зла свободи нас и спаси всех,/ иже Тя с поклонением величают.

Яко непорочная невеста Нетленнаго Жениха Христа,/ праведная дево Иулиание,/ с светлою свещею добрых дел вошла еси в чертог Его Небесный/ и тамо со святыми блаженства вечнаго наслаждаешися./ Темже моли, Бгоже возлюбила еси/ и Емуже девство твое обручила еси,/ спасти души наша.

Сисое чудне,/ на страсти вельми подвизавыйся/ и постом и мощными молитвами сия успивый,/ благодать от Христа приял еси/ в страстех бедствующим пособствовати./ Тем и наша страсти плоти и духа исцели, молимся.

Пустынный житель, и в телеси Ангел,/ и чудотворец явился еси, Богоносе отче наш Сисое,/ постом, бдением, молитвою Небесная дарования приим,/ исцеляеши недужныя и души верою притекающих ти./ Слава Давшему тебе крепость,/ слава Венчавшему тя,/ слава Действующему тобою всем исцеления.

Яко безплотным единожитель/ и всем преподобным сопричастник,/ постническими труды и бдении молитвенными непрестанно себе вооружая, мудре,/ тем и дар приял еси от Бога/ исцеляти недуги и прогоняти бесы./ Того ради вопием ти:/ радуйся, отче наш Сисое преподобне.

Подвизався, Ангел на земли виден был еси,/ озаряли, преподобне, помышления верных Богознаменьми всегда./ Темже тя верою, Сисое, почитаем.

Пустынный житель, и в телеси Ангел,/ и чудотворец явился еси, Богоносе отче наш Сисое,/ постом, бдением, молитвою Небесная дарования приим,/ исцелявши недужныя и души верою притекающих ти./ Слава Давшему тебе крепость,/ слава Венчавшему тя,/ слава Действующему тобою всем исцеления.