Тропари, кондаки и величания

Днесь светло красуется царствующий град Москва,/ имеющи в себе, о Всемилостивейшая, всея твари Честнейшая,/ Заступнице наша Дево Богородице,/ честный образ Твой,/ имже подсолнечныя концы земли удивляеши/ и мир мирови даруеши,/ во образ бо Святыя Троицы являеши трие руце:/ двема убо Сына Своего, Христа Бога нашего, носиши,/ третиею от напастей и бед/ верно к Тебе прибегающих избавляеши,/ и от потопления изымаеши,/ и всем полезная даруеши,/ и преподобному Михаилу Малеонскую гору показа,/ и всех всегда милуеши,/ честною ризою Своею покрываеши жительство сие/ и вся грады и страны наша, да зовем Ти:/ радуйся, Обрадованная.

Пустыни явился еси доброе прозябение, / отче преподобне, / от юности бо чистое житие изволил еси, / духовному учителю последуя, / и, того учением ум твой к Небесным вперив, / в пустыню вселился еси, / и в ней обитель создал еси, / и стаду твоему премудр наставник показался еси, / великому же Новуграду похвала и утверждение, / темже и Христос, яко пресветла светильника, / чудесы обогати и прослави тя. / Ксенофонте, отче наш, / моли Христа Бога спастися душам нашим.

Великое врачевство вселенней,/ супряжение Христово возлюбленное,/ светильники сияющия, зарю исцелений,/ воспоем, вернии, велегласно,/ внутрь церкве им вопиюще:/ Кире и Иоанне,/ податели чудесем, врачеве недужным,/ освящаете вся страны.

От Божественныя благодати дар чудес приемши, святии,/ чудодействуете непрестанно,/ вся наша страсти рукодейством секуще невидимым,/ Кире богомудре со Иоанном славным:// вы бо Божественнии врачеве есте. Февраль

Премудрии вселенней врачеве,/ Кире и Иоанне,/ от Бога приясте власть целити недуги душевныя,/ вкупе же и телесныя,/ и ныне молитеся/ сохранити град и люди от одержащих зол/ и спасти молитвами вашими души наша.

Троичная благодать всельшися в честная сердца ваша,/ преблаженнии Кире и Иоанне,/ на духи нечистью страшни прогонителие явистеся./ И не точию явленным, но и тайным/ недугом врачеве бысте,/ темже, дерзновение имуще к Человеколюбцу Богу,/ непрестанною молитвою душевныя наша страсти исцелите.

Святии славнии Кире и Иоанне,/ безсребренницы, мученицы и чудотворцы,/ милосердием своим, яко стеною необоримою, нас оградите от всех бед/ и от врагов видимых и невидимых сохраните/ непрестанною вашею молитвою ко Господу.

Чудеса святых Твоих мученик/ стену необориму нам даровавый, Христе Боже,/ тех молитвами советы языков разори,/ Церковь Святую укрепи,// яко Един Благ и Человеколюбец.

От мирскаго жития изшедше,/ отвержением мира Христу последовасте,/ и достигосте великаго Нева езера,/ и, в нем на острове Валааме всельшеся,/ равноангельное житие пожили есте,/ отонудуже веселящеся прешли есте к Небесным чертогом./ И ныне со Ангелы Владычню Престолу предстояще,/ поминайте нас, чад своих,/ яже собрали есте, богомудрии,/ да радостно от души вопием:// радуйтеся, Сергие и Германе, отцы преблаженнии.

От мирския молвы бегающе, безмолвия и благочестия рачители,/ в тихое пристанище Валаама от востока приидосте,/и в нем Евангельски Христу добродетельми последовавше, на верх совершенства востеклй есте:/и ныне в торжестве премирном Богозрением наслаждающиеся,/ всеблаженнии отцы Сергие и Германе, Человеколюбца Бога молите,/ еже спасти всех нас, благочестно вас почитающих.

Евангелия Христова истиннии послушницы/ явистеся, преподобнии,/ мир и вся, яже в нем, яко не сущая,/ преобидевше любве ради Христовы,/ и в морский остров вселистеся,/ и трудолюбно в нем противу козней невидимых врагов подвизастеся,/ постом, бдением же и всенощным стоянием/ плоти своя духу мудре повинули есте./ Сего ради от Вседержительныя десницы достойныя венцы прияли есте,/ и ныне Пресвятей Троице предстояще, молитеся,/ всеблаженнии отцы Сергие и Германе,/ сохранитися в мире отечеству нашему// и спастися душам нашим.

Яко врача всеизрядна и молитвенника благоприятна,/ к раце твоей Божественней притекающе, Сампсоне богомудре преподобне,/ сошедшеся любовию, псалмы и песньми, радующеся, Христа прославляем,// таковую тебе благодать подавающа исцелений. Тропарь и кондак преподобного Амвросия (см. 10/23 октября)

В терпении твоем стяжал еси мзду твою, отче преподобне,/ в молитвах непрестанно терпевый,/ нищия возлюбивый и сия удовливый,/ но молися Христу Богу, Сампсоне милостиве блаженне,// спастися душам нашим.

Тяжким недугом страждущий и людьми забытый,/ молил еси жажду утолити, преподобне Мартине,/ темже Христос посла с Небесе благоверных Бориса и Глеба/ тебе послужити и недуг исцелити.

Завет Пастыреначальника исполнив,/ старчества благодать наследовал еси,/ болезнуя сердцем о всех, с верою притекающих к тебе./ Темже и мы, чада твоя, с любовию вопием ти:/ отче святый Амвросие,// моли Христа Бога спастися душам нашим.

Яко к целебному источнику,/ притекаем к тебе, Амвросие, отче наш,/ ты бо на путь спасения нас верно наставляеши,/ молитвами от бед и напастей охраняеши,/ в телесных и душевных скорбех утешаеши,/ паче же смирению, терпению и любви научаеши;/ моли человеколюбца Христа/ и Заступницу усердную// спастися душам нашим.

Притецем, людие, к Девей Богородице Царице,/ благодаряще Христа Бога,/ и, к Тоя чудотворней иконе, умильно взирающи, припадем и возопием Ей:/ о Владычице Марие,/ присетивше страну сию Твоего честнаго образа явлением чудесно,/ спасай в мире и благовременстве отечество наше и вся христианы,/ наследники показующи Небесныя жизни,/ Тебе бо верно зовем:// радуйся, Дево, мира спасение.

Днесь, яко солнце пресветлое,/ возсия нам на воздусе всечестная икона Твоя, Владычице,/ лучами милости мир просвещающи,/ юже великая Россия,/ яко некий дар Божественный свыше благоговейне восприемши,/ прославляет Тя, Богомати, всех Владычицу,/ и от Тебе рождшагося Христа Бога нашего величает радостно./ Емуже молися, о Госпоже Царице Богородице,/ да сохранит вся грады и страны христианския/ невредимы от всех навет вражиих/ и спасет верою покланяющихся Его Божественному/ и Твоему пречистому образу,// Дево Неискусобрачная.

Христовою любовию уязвився, преподобне,/ во след Его невозвратно шествовал еси,/ постом и воздержанием плотския страсти умертвил еси,/ бдением же и молитвами вселукаваго врага до конца низложил еси/ и слезами, яко елеем, свещу светлу себе уготовал еси;/ темже в Небесныя обители невозбранно вшел еси,/ идеже, радуяся, Господеви предстоиши,/ Емуже прилежно молися, молим тя,/ яко да милостив нам будет в День страшнаго Его пришествия,/ и да не пребудем и мы вне чертога Христова,/ но да сподобит ны одесную Себе стати/ молитвами твоими, преподобне, да зовем ти:/ радуйся, Богомудре отче наш Тихоне.

Желанием духовным в пустыню вселился еси/ и, тамо невозвратно шествовав Божественными стезями,/ достигл еси в Небесныя обители,/ и ныне со Ангелы предстоиши/ у Престола всех Царя Христа Бога,/ Емуже прилежно молися/ помиловати град сей и люди,/ верою празднующия пречестную память твою,// Тихоне преподобне, отче наш.