Тропари, кондаки и величания

От юности, преподобне Феодосие, / желание твое ко Христу Богу вперил еси, / егоже ради град и отечество оставль / и славу суетную, яко прах вменив, / последовал еси преподобному Димитрию / и обители его сожитель был еси, / преселився ко граду Тотьме / и в междоречие вселився, / постом и бдением, и власяным одеянием, / и веригами тело твое удручил еси. / Сего ради Бог, видев твоя труды, / по преставлении твоем чудесы обогати тя: / бесы изгоняеши и слепыя просвещаеши, / от всяких недуг и бед избавляеши приходящия к тебе с верою и вопиющия: / слава Давшему ти крепость, / слава Венчавшему тя, / слава Дающему тобою всем исцеление.

Жезлом, святе, от Бога тебе данным,/ люди твоя упаси, на пажитех живоносных:/ звери же невидимый и неукротимыя/ сокруши под ноги тя поющих:/ яко вси иже в бедах предстателя тя тепла, Маманте, имут.

Мученик Твой Господи, Мамант,/ во страдании своем венец прият нетленный, от Тебе, Бога нашего: имели бо крепость Твою, мучителей низложи,/ сокруши и демонов немощныя дерзости,/ того молитвами спаси душы наша.

Твердыя столпы благочестия,/ недвижимая иноческих законоположений основания, и необоримыя стены Российския восхвалим:/ Антониа, возлюблыпаго Бога, и Феодосиа, возлюбленнаго Богом:/ труды бо онех и постническия подвиги прият паче всякаго всеплодия,/ Един во святых прославляемый.

Двоицу великих отец и правило иноков светлое,/ умныя зари, онебесившия Российскую Церковь,/ кто по достоянию хвалами воспоет?/ Тии бо Престолу Божию предстоят./ Но яко имущии дерзновение к Святей Троице,/ Антоние преблаженне и Феодосие приснопамятне,/ молитеся о молебная вам приносящих// и любовию песньми вас ублажающих.

Двоицу начальных российских светил почтим,/ Антония, Богом посланнаго, и Феодосия, Богом дарованнаго:/ тии бо первии, равноангельным в России житием просиявше от гор Киевских,/ осветиша отечествия нашего вся концы,/ и путь к Небеси правый многим показаша,/ и, первоотцы иноком бывше, лики спасаемых Богови приведоша,/ и ныне, предстояще в вышних немерцаемому Божества Свету, молятся о душах наших.

Звезды мысленныя,/ просиявшия на тверди Церковней,/ иноков Российских основание,/ песньми, людие, почтим,/ радостныя похвалы сим воздающе,/ радуйтеся, преблаженнии отцы, Антоние со Феодосием богомудрым,// присно молящиися о возследствующих и чтущих память вашу.

В вышних живый, Христе Царю,/ всех видимых и невидимых Творче и Зиждителю,/ Иже дни и нощи, времена и лета сотворивый,/ благослови ныне венец лета,/ соблюди и сохрани в мире/ град и люди Твоя, Многомилостиве.

Всея твари Содетелю,/ времена и лета во Своей власти положивый,/ благослови венец лета благости Твоея, Господи,/ сохраняя в мире люди и град Твой/ молитвами Богородицы и спаси ны.

Пречистая Владычице Богородице, упование всех христиан,/ понеже инаго упования не имамы разве Тебе,/ Всенепорочная Владычице моя, Госпоже Богородице,/ Мати Христа Бога моего./ Темже помилуй и избави мя от всех зол моих/ и умоли Милостиваго Сына Своего и Бога моего,/ да помилует окаянную душу мою,/ и да избавит мя от вечныя муки, и сподобит мя Царствия Своего.

Во праздник Твой сошедшеся, вернии,/ священное ко славе Божией торжество Твое, Владычице, днесь всеблагоговейно совершаем,/ любовию же чтуще честную икону Твою,/ Тебе песнословим вси в радости:/ радуйся, Дево Честная Всеблаженная.

Торжество днесь празднуем светлое,/ се бо предлежит, о Всеблаженная, икона Твоя Всечестная,/ к ней же любовию сердца вси приходяще, Владычице,/ поклоняемся и тепло Тебе вопием:/ избави нас от бед и обстояний.

Вышних ищай, нижним совокупляяйся,/ и колесницу огненную столп соделавый:/ тем собеседник ангелом был еси преподобне,/ с ними Христу Богу моляся/ непрестанно о всех нас.

Терпения столп был еси,/ ревновавый праотцем, преподобне,/ Иову во страстех, Иосифу во искушениих,/ и безплотных жительству, сый в телеси,/ Симеоне отче наш,/ моли Христа Бога спастися душам нашим.

Честнаго пояса Твоего положение/ празднует днесь Твой, Препетая, храм/ и прилежно взывает Ти:/ радуйся, Дево,/ христиан похвало.

Богоприятное Твое чрево, Богородице,/ объемший пояс Твой честный/ держава граду Твоему необорима/ и сокровище есть благих неоскудно,/ едина рождшая Приснодево.

Богородице Приснодево, человеков покрове,/ ризу и пояс пречистаго Твоего телесе,/ державное граду Твоему обложение даровала еси,/ безсеменным рождеством Твоим нетленна пребывающи,/ о Тебе бо и естество обновляется и время./ Темже молим Тя мир граду Твоему даровати/ и душам нашим велию милость.

Днесь Симеон с Саввою, блаженнии, в дусе пришедше,/ спасают от обстояний паству их:/ сии бо Троицу проповедаша Единаго Бога,/ Церкве явишася утверждение,/ в преподобных Мироточивый и во святых чудотворец:/ сии бо и во бранех необоримии защитницы ноказашася,/ Афона похвала и народа Сербскаго крепость.

Избраннаго от пелен Христовою благодатию/ и возлюбленнаго от юности Божиим Духом,/ юностный цвет, Савву блаженнаго,/ похвальный венцы, вернии, днесь сплетше/ и Божественную главу его венчающе, воззовем:/ радуйся, отче, Божие жилище.

Заступниче скорбящим,/ в напастех помощниче,/ ко Владыце молебниче,/ не презри нас, смиренных, обремененных грехи,/ но предвари и исхити от мук вечных с верою молящихтися,/ ускори на заступление и потщися на помощь,/ заступи, святителю Христов Савво, поющия тя.