Тропари, кондаки и величания

Княжескую диадему обагрил еси кровию твоею, / Богомудре страстотерпче Игоре, / за скиптр крест в руку приим, явился еси победоносец / и жертву непорочну Владыце принесл еси себе. / Яко бо агнец незлобив от раб убиен был еси, / и ныне радуяся предстоиши Святей Троице, / молися спастися душам нашим.

Изменил еси земнаго княжения славу/ во иночества образ смиренный/ и страдальчески земное житие скончав,/ ныне на Небесех радуешися,/ усердие моляся/ о чтущих тя, Игоре, страдальцев похвало.

Просветився Божественным крещением, / Духа Святаго светлостьми озаряем, / Евангелие Христово в сердце твое восприял еси / делом слово Сына Божия исполняя, благоверный княже Игоре, / моли Всеблагаго Спасителя нашего даровати нам мир, и милость, / и спасение душ наших, чтущих честную память твою.

Наста днесь всечестная память страстотерпца благовернаго князя Игоря,/ созывающая люди в пречестный храм Спасов,/ идеже радостно сошедшеся благочестивых множество/ молитвенно празднуют святую память твою,/ и с верою взывают ти:/ молися, святе, стране Российстей, граду Чернигову и всем православным христианом/ в мире и благоденствии спастися.

Яко страдальцев основание и благочестия утверждение,/ Церковь чтит и славит твое светоносное страдание,/ приснопеваемый блаженне страдальче, доблемудре славне Трофиме,/ со страдавшими с тобою,// очищение поющим тя испроси, яко непобедим.

В Троице хвалимый Бог троицу мученик прослави,/ Трофима и Савватия и Доримедонта:/ в Того бо веровавше, врага низложиша.// Тех молитвами, Христе Боже наш, помилуй нас.

Яко светильницы и врачеве преизряднии явистеся,/ верним сердцем озаряюще добродетельми чудес ваших,/ в плоти бо на земли благоугодители,/ Иже во святых Прославляемому непрестанно молите о всех нас.

Явистеся светильницы всесветлии во плоти яко Ангели,/ и яко жизни древеса райская,/ пощением, бдением и верою возращаеми, процвели есте,/ молитвами вашими небесныя благодати приемше,/ врачеве крепцы явльшеся, / исцеляете недугующих души,/ с верою прибегающих к вам чудотворцы славнии, Феодоре, Давиде и Константине:/ молите Христа Бога, грехов оставление даровати/ верою и любовию чтущым память вашу.

Явися велие солнце Христове Церкви,/ просвещая учением светлостьми, всечестне,/ яко черпалом златым от кладязя неископаннаго чудес почерпл еси от Источника неистощимаго/ на успение свое приспел еси, всеблаженне Феодоре,/ ныне всем даеши грехов прощение.

Яко апостолом спричастницы и врачеве предобрии, служители Богоприятнии, / памяти вашей Божественней притекающим, / святии Богомудрии, достоблаженнии, благочестивии князи, / новоявленнии чудотворцы Феодоре и Давиде, и Константине, / сошедшеся любовию в память вашу светло празднуем / в песнех и пениих, радующеся Христа славяще, таковую благодать даровавшего вам исцелением, / граду вашему Ярославлю великое утверждение.

Яко звезды многосветлыя от юности возсиявше, / осветили есте сердца верных пренесением честных мощей ваших, / во плоти, яко Ангелы на земли показастеся, / пощением насаждени бысте яко древа, при водах воздержания, / напоени струями слез ваших, и скверну омысте. / Сего ради явистеся приятелища Божия Духа, / Феодоре, и Давиде, и Константине, / молите Христа Бога, спастися душам нашым.

От юности вашея Христове любви прилепившеся, святии, / усердно закон и оправдания Того сохранисте, / отонудуже и чудесными даровании обогатившеся, / исцеления источаете, Феодоре, Давиде и Константине, / о верою вас почитающих, / молите Христа Бога, спастися душам нашым.

Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти: ускори на молитву, и потщися на умоление, предстательствующи присно, Богородице, чтущих Тя.

Любовию, Чистая Дево, Твою святую икону почитающим/ и Божию Тя истинную Матерь прославляющим/ и верно поклоняющимтися/ Целительница явися,/ всякое зло и болезни от сих удаляющая,/ яко Всемогущая.

Яко Пресветлая Звездо, просия Божественными чудесы святый Твой образ, Целительнице, подаждь убо и нам, Богородице Марие, исцеление недугов душевных и телесных, спасение и велию милость.

Девства чистотою возмогла еси свещу своего разума/ и просветила еси душевную чистоту,/ лощением же и бдением плоть поработила еси духу,/ темже, преподобная Евфросиние,/ почитающе подвиги трудов твоих, молимся,/ моли Христа Бога спастися душам нашим.

Девства чистый сосуд елеем молитвы и любве исполнивши, неугасимый светильник в сердце своем возжгла еси, преподобная, с нимже бодренно в сретение Небеснаго Жениха изшедши, в чертог Того пресветлый прията была еси: идеже ныне водворялся с лики Ангелов и святых, молися, молимся, Христу Богу, части дев юродивых избавится нам.

Святая твоя память Суждальскую страну веселит, верных же вся созывает во всечестный храм твой, идеже ныне совершается всеславная память твоя, Евфросиние преподобная: моли Христа Бога, спастися душам нашим.

В тебе, мати, известно спасеся еже по образу, приимши бо Крест, последовала еси Христу и, деющи, учила еси презирати убо плоть, преходит бо: прилежати же о души вещи безсмертней. Темже и со Ангелы срадуется,. преподобная Евфросиние, дух твой.

Светом Божественным просветився, всеблаженне,/ просвещаеши ны,/ любовию поющия твое честное и славное/ и святое, отче, преставление,/ иерарше Евмение,// моля непрестанно о всех нас.