Тропари, кондаки и величания

Яко трисветлаго солнца светозарный звезды,/ Троическим светом озаряете сердца верных,/ сосуда Света Пресвятыя Троицы явльшеся,/ и предивным вашим житием иноком бысте твердии законоположителие/ и церквам благолепие, и благоверным, и святителем, и всем людем,/ вся бо демонския скверны отгнавше отсюду/ вашими чистыми учении и делы,/ добре упасосте стадо, собранное вами,/ но и ныне молим вас:/ посещайте чад своих, яко имущий дерзновение ко Святей Троице,/ Богомудре Сергие с чудным учеником своим Никоном,/ и молите Христа Бога, да спасет души наша.

Днесь, вернии, сошедшеся,/ восхвалим двоицу блаженную, благовернаго Кирилла и Марию добронравную,/ тии бо молятся вкупе со возлюбленным сыном своим, преподобным Сергием,/ ко Единому во Святей Троице Богу,/ отечество наше в правоверии утвердити,/ домы миром оградити,/ юныя от напастей и соблазнов избавити,/ старость укрепити// и спасти души наша.

Блаженств Христовых причастницы,/ честнаго супружества и попечения о чадех добрый образе,/ праведнии Кирилле и Марие,/ плод благочестия, Сергия преподобнаго, нам явившии,/ с нимже усердно молите Господа/ низпослати нам дух любве и смиренномудрия,/ да в мире и единомыслии// прославим Троицу Единосущную.

Слышавше, отцы и братия, немедленно притецем,/ и немолчно и усердно вопием ему, глаголюще:/ о пресветлый наш о Господе учителю, отче Иродионе./Во спасаемых подвигах ревнитель был еси,/ преподобному Корнилию и стопам последовал еси его./ И един Единому Богу изволи служити/ слезами, и постом, и бдением изнуряя тело свое вечныя ради жизни./ Господеви работая, Крест Господень на рамо взем, последовал еси Ему,/ бодренными своими молитвами вооружался невидимо на врага. И ныне зрети сподобися во свете неизреченныя радости Пресвятую Троицу./ Слава Богу, Вселыпемуся в тя,/ слава Укреплыпему тя,/ слава Деющу тобою всем исцеление.

Возсия днесь светло, радуется град Белоезеро,/ имея во области своей великаго светильника, блаженнаго отца Иродиона./ Сошедшеся убо людие и празднующе пресветлую память его, осиявающу многими деянии чудес дара./ Просящим с верою исцеления,/ страждущим от различных недуг подает здравие./ Яко финикс насажден в дому Божия Матере,/ яко кедр при водах благодатию Христовою растущ./ И яко же шипок благовонен обстоянии водами огражден./ И мы, чада твоя суще, припадающе, молимтися:/ моли Пресвятую Троицу,/ еже сохранитися граду нашему от нахождения иноплеменник/ и от враг видимых и невидимых./ Яко да твоими, отче, ко Господу молитвами спасаемии/ всегда просим с верою у тебе:/ моли о нас Христа Бога спастися душам нашим.

С лики Ангельскими предстоя,/ блаженне княже Вячеславе,/ наслаждаешися Божественныя и неизреченныя доброты/ и, оттуду благодетельныя дары почерп чудес,/ всем, притекающим верою под твою святыню,/ источавши цельбам дарование.

Благочестиваго корене отрасль пречестная,/ святый благоверный великий княже Вячеславе,/ поборник быв Восточныя в Чехах Церкве/ и прибежище теплое убогим и сирым,/ яко вторый Авель, незлобиве претерпел еси смерть,/ во главу усечен рукою брата пред враты церковными./ Темже и всели тя Христос/ яко исповедника правыя веры во обители Небесныя,/ прослави всечестную память твою в словенских языцех/ и дарова тя скораго помощника всем, почитающим тя./ Молися о людех твоих ко Господу,/ да обратит их в лоно Православный Церкве и спасет души наша.

Днесь Ангели с человеки радуются вкупе общим веселием,/ Небо и земля светло ликуют в память твою, святе./ И мы, грешнии, прилежно ти вопием:/ помолися к Владыце о нас,/ избавити ны от напасти/ видимых и невидимых враг,/ чтущих пресветлую память твою.

Дух мирен и кроток стяжав,/ твердое упование на милосердие Божие имея,/ блюститель верный Церкве Российския/ и исповедник Христов явился еси,/ священномучениче Петре,/ присный о нас пред Богом предстателю// и молитвенниче о душах наших.

Божиим смотрением к святительскому служению/ святым патриархом Тихоном призванный,/ стаду Христову явился еси страж неусыпный/ и защитник небоязненный,/ священномучениче Петре,/ жестокая заточения и дальная изгнания,/ страдание и смерть от богоборцев претерпел еси,/ венец мученический прияв,/ на Небеси ныне радуешися./ Моли милостиваго Бога,/ да сохранит Церковь нашу от нестроений,/ единомыслие и мир людем Своим дарует// и спасет души наша.

Яко звезда всесветлая добродетельми сияющи,/ чудес лучи испущающи обоюду,/ богатя приходящих души целя и телеса,/ благодать имея, Савватие,/ Прославляет бо Своя Себе Великий Дародатель.

Житейския молвы отбег и вселися в морский остров, премудре./ И крест Господень на рамо взем, Христови последовал еси в молитвах и во бдениих, и в пощениих, злостраданием плоть свою изнуряя./ Тем бысть иноком удобрение./ Иже любовию память твою празднующим, преподобне Савватие,/ моли непрестанно о всех нас.

От юности своея, преподобне, весь себе Господеви предложив./ И земная вся оставль Христовым стопам тепле последовал еси. И безплотным сожитель явися и всем преподобным сообещого, преблаженне Савватие./ Тем молимтися, отче, молися о нас непрестанно Христу Богу, яко да милостив будет нам в День судный.

Удалився мира и водворися в пустыни, / добрым подвигом подвизався, злостраданием, и вниманием, и молитвами. / Отнудуже и по смерти источаеши исцеления, Савватие отче наш, / моли Христа Бога спастися душам нашим.

Многообразныя раны претерпевше, и венцы от Бога яве приимше,/ о нас молитеся блаженнии Христу,/ память всепразднственную вашу совершающих,/ величайший Каллистрате со страдавшими с тобою,/ еже умирити паству, и люди:/ той бо есть верных утверждение.

Всяк труд днесь Церковь ныне совершающи святии,/ восхваляет таинственно,/ яко за ню страдальчествовавшия мученицы Божественнии,/ добропобеднии всемудрии.

Мученицы Твои Господи,/ во страданиих своих венцы прияша нетленныя от Тебе Бога нашего:/ имуще бо крепость Твою,/ мучителей низложиша,/ сокрушиша и демонов немощныя дерзости,/ тех молитвами спаси души наша.

Величия твоя, девственниче, кто повесть?/ Точиши бо чудеса, и изливаеши исцеления,/ и молишися о душах наших,// яко Богослов и друг Христов.

Апостоле, Христу Богу возлюбленне,/ ускори избавити люди безответны:/ приемлет тя припадающа/ Иже падша на перси Приемый,/ Егоже моли, Богослове,/ и належащую мглу языков разгнати,// прося нам мира и велия милости.

Ангельскому житию поревновав, преподобне,/ вся земная оставив, ко Христу притекл еси/ и, Того заповедьми ограждся,/ явился еси столп непоколебим от вражиих нападаний./ Тем зовем ти:/ радуйся, Ефреме, светило пресветлое.