Тропари, кондаки и величания

Завет Пастыреначальника исполнив,/ старчества благодать наследовал еси,/ болезнуя сердцем о всех, с верою притекающих к тебе./ Темже и мы, чада твоя, с любовию вопием ти:/ отче святый Амвросие,// моли Христа Бога спастися душам нашим.

Яко к целебному источнику,/ притекаем к тебе, Амвросие, отче наш,/ ты бо на путь спасения нас верно наставляеши,/ молитвами от бед и напастей охраняеши,/ в телесных и душевных скорбех утешаеши,/ паче же смирению, терпению и любви научаеши;/ моли человеколюбца Христа/ и Заступницу усердную// спастися душам нашим.

Троицы Святыя служителю,/ земне ангеле и небесне человече,/ духовнаго Оптинскаго старчества преемниче,/ Христов священнотаинниче и исповедниче,/ Духа Святаго обитель всечестная,/ преподобне отче Севастиане, досточтиме,/ испроси мирови мир/ и душам нашим велию милость.

Твердо мудрости догматы в души благочестивых вложившаго,/ похвалами да ублажим яко боговещателя вси Иакова:/ Престолу бо славы Владычню предстоя,/ и со всеми Ангелы радуется,// моля непрестанно о всех нас.

Апостоле святый Иакове,/ моли Милостиваго Бога,/ да прегрешений оставление// подаст душам нашим.

Благородия нравом тя честно похвалим, Андрониче,/ иже Господь в лик преподобным отцем сочета,/ яко воистинну благородия Божественныя славы венец улучи.

Пустынный житель и в телеси Ангел и чудотворец показался еси,/ Богоносне отче наш Андрониче,/ постом, бдением, молитвою Небесная дарования приим,/ исцеляеши недужныя и души верою притекающих к тебе./ Слава Давшему тебе крепость,/ слава Венчавшему тя,/ слава Действующему тобою всем исцеления.

Тело твое постами изнуривши,/ бденными молитвами Творца умолила еси о деяниих твоих,/ яко да приимеши совершенное оставление,/ еже и обрела еси, мати, яве,/ путь покаяния показавши.

В тебе мати известно спасеся, еже по образу:/ приймши бо крест, последовала еси Христу,/ и, деющи, учила еси презирати убо плоть, преходит бо,/ прилежати же о души, вещи безсмертней./ Темже и со Ангелы срадуется, преподобная Пелагие, дух твой.

Волнений множество невлажно преходя,/ безплотныя враги струями слез твоих крепко погрузил еси,/ Богомудре Трифоне,/ и чудес дар прием,/ моли непрестанно о всех нас.

Днесь в начале основания добродетелем, блаженне,/ положил еси в души своей страх Божий,/ от юности взем крест свой,/ благочестно Христови последовал еси,/ Ангельским образом облечеся и бысть монах предивен,/ в добро детелех цветяше, к будущим Богови простирался./ И своей плоти, яко врагу, немилостив, отче, был еси,/ терпением явися, блаженне, яко злато искушено в горниле,/ но и ныне не забуди посещати чад своих,/ поминай нас, чтущих пресвятую память твою,/ да вси благодарив вопием ти:/ радуйся, премудре Трифоне, наставниче монахом.

Яко светозарная звезда,/ возсиял еси от востока до запада,/ оставль бо свое отечество,/ дошел еси Вятския страны и Богоспасаемаго града Хлынова,/ в немже обитель во славу Пресвятыя Богородицы создав, / , тамо на добродетель вперився,/ собрал еси иночествующих множество,/ и, сих наставляя на путь спасения,/ был еси Ангелом собеседник,/ и постником сопричастник, Трифоне преподобне,/ с ними Христа Бога моли спастися душам нашим.

От земных на Небесная помыслив,/ иноческое житие измлада, преподобне, возлюбив,/ и делом совершив ко Господу любовь,/ и твердым умом Его Духновенным учением озаряя мир,/ и, возлюбив, блаженне, всенощное бдение/ и молитву непрестанну, и наставления Божественнаго разума,/ инок стадо собра, мудре,/ и наставил еси ко свету Богоразумия, Трифоне отче наш,/ Христа Бога моли даровати душам нашим велию милость.

Чистотою душевною Божественно вооружився/ и непрестанный молитвы, яко копие, вручив,/ крепко пробол еси бесовская ополчения,/ Досифее, отче наш,/ моли непрестанно о всех нас.

Яко светильник всесветел явился еси во острове Псковскаго езера, / преподобне отче наш Досифее. / Ты бо крест Христов от юности своея на рамо взем, / усердно Тому последовал еси, / чистотою Богови приближився, / отонудуже и чудес дарованием обогатился еси. / Темже и мы, притекающе ко святей иконе твоей, умильно глаголем: / отче преподобне, моли Христа Бога / спастися душам нашим.

Яко звезда пресветлая, от Святыя Горы провозшедши,/ доброты чудес твоих весь просветил мир,/ Христов бо крест взем, последова Ему,/ в пустынном озлоблении, в молитвах же и пощениих,/ во бдениих же и злостраданиих изнурив плоть свою,/ тем и Христос даром чудес одари тебе,/ Емуже о нас моляся, посещай чад своих, да зовем ти:/ радуйся, Сергие отче наш, пустынный жителю.

Желанием духовным разгарашеся, пребогате,/ слез твоих течением душу свою напоил еси/ и еже из глубины воздыханьми уязвляше сердце свое,/ и бодренными молитвами, и всенощным предстоянием Владыце Христу/ многодобродетелен плод принесе сам себе./ И сего ради яко Божий угодник светло миру показася,/ сияя чудесы, Сергие отче наш,/ теплый молитвенниче к Богу, всегда о нас Того моли,/ да спасет души наша.

От юнаго возраста Божественным желанием разжегся,/ честному учителю вдан был еси/ и в воздержании мнозе, отче,пребыл еси,/ ревнуя благому наказанию,/ плод многодобродетелен Богу принесл еси,/ тем молим тя, отче Мартиниане,/ моли Христа Бога спастися душам нашим.

Благоизволив, преподобне,/ от юнаго возраста работати Господеви день и нощь,/ в страсе Божий и благоговении чистоту душевную соблюл еси,/ в молитвах же и бдениих ум твой предочистил еси,/ в подвизех же, злостраданиих тело твое изнурив,/ вся добродетели духовный исправил еси/ и образ хотящим по тебе спастися явился еси./ Темже ныне, присно зря на Небесех Пресвятую Троицу,/ молися, всеблаженне, даровати душам нашим спасение,/ и житию нашему исправление,/ да вси верою вопием ти:/ радуйся, преподобне Мартиниане, отче наш.

От юности, отче, избран и возлюблен был еси Господом Богом,/ Иже, провидя доброе твое произволение,/ научи тя прийти к преподобному угоднику Своему, Кириллу всеблаженному,/ от негоже наставлен быв на путь спасения,/ в страсе Божий и чистоте душевней,/ в благоговении же и непрестанных к Богу молитвах/ житие твое непорочно прешел еси,/ и ныне, со дерзновением предстоя на Небесех Престолу Христову,/ отче Мартиниане всеблаженне,/ не престай моля Христа Бога спасти и помиловати души наша.