Преподобный Петр Ордынский, Ростовский, царевич

Оте́чества своего́, блаже́нне Пе́тре, удали́вся,/ и богоме́рзкую ве́ру отню́д возненави́дев,/ от тьмы́ во свет прише́л еси́,/ и всели́лся еси́ во сла́вный и многонаро́дный град Росто́в,/ в не́мже житие́ че́стно пожи́в,/ це́рковь во и́мя святы́х апо́стол Петра́ и Па́вла воздви́гл еси Христо́вою благода́тию,/ и сию́ чу́дными ико́нами, я́ко неве́сту украси́в,/ святи́теля же, и кня́зя, и вся лю́ди житие́м свои́м удиви́л еси́,/ те́мже и по сме́рти твое́й Христо́с да́ром чуде́с обогати́ тя./ Помина́й нас чту́щих пресве́тлую па́мять твою́, преподо́бне о́тче Пе́тре,// и моли́ Христа́ Бо́га, спасти́ся душа́м на́шим.

Перевод: Отечества своего, блаженный Петр, удалившись, и богопротивную веру совершенно возненавидев, от тьмы к свету пришел ты и поселился в славном и многолюдном городе Ростове, в нем же, прожив почтенную жизнь, содействием Христовой благодати ты воздвиг храм во имя святых апостолов Петра и Павла, и украсив его, как невесту, чудесными иконами, удивил ты святителя и князя, и всех людей своей жизнью, потому и после смерти твоей Христос обогатил тебя даром чудотворений. Вспоминай нас, почитающих пресветлую память твою, преподобный отче Петр, и моли Христа Бога о спасении наших душ.

Яви́ся ве́лие со́лнце Христо́вой Це́ркви,/ просвеща́я уче́ния светлостьми́, всече́стне,/ я́ко черпа́лом златы́м,/ от кла́дязя неиско́паннаго чуде́с поче́рпл еси́,/ от исто́чника неистощи́маго,/ на па́мять успе́ния твоего́ прише́дшим, всеблаже́нне Пе́тре,// ны́не всем подава́еши грехо́в проще́ние, сла́во преподо́бным.

О, преподо́бне Пе́тре царе́виче, Росто́вский чудотво́рче! Я́коже из мра́ка язы́ческаго во свет Ева́нгельскаго уче́ния Госпо́дь тя призва́, та́ко умоли́ Его́, да и нас по неизрече́нней Свое́й бла́гости и человеколю́бию и́змет всеси́льною Свое́ю десни́цею из тьмы грехо́вныя, и осия́ет сердца́ на́ша к де́ланию Его́ Боже́ственных за́поведей. Я́коже ты избе́г мяте́жа мирски́х волне́ний, во ангелоподо́бное безпеча́льное житие́ сподо́бился еси́ дости́гнути, та́ко сподо́би и нам гре́шным мо́ря сего́, вла́емаго страстьми́, пучи́ну безмяте́жно преплы́ти, име́я тя, о́тче, ко́рмчаго о Го́споде на́шем, и дости́гнути чи́стым покая́нием ко приста́нищу спасе́ния ве́чнаго. И я́коже име́л еси́ споспе́шников тебе́ верхо́вных апо́столов Петра́ и Па́вла в созида́нии оби́тели, та́ко подви́гни их умилосе́рдитися и о нас недосто́йных, и дарова́ти нам от сугу́быя апо́стольския бла́гости дерзнове́ние ко Христу́ Бо́гу. Ве́руем бо, я́ко а́ще мо́щи твоя́ святы́я и сокрове́нны в земли́, но ты ца́рствуеши со избра́нными Бо́жиими на Небеси́: исхода́тайствуй у́бо, да и нам гре́шным моли́твами твои́ми отве́рзется дверь Ца́рствия Небе́снаго в безконе́чныя ве́ки. Ами́нь.

О, преподо́бне о́тче Пе́тре царе́виче, душе́ю на Небеси́ Престо́лу Бо́жию предстои́ши и Тро́ичныя сла́вы наслажда́ешися, те́лом же на земли́ в Боже́ственном хра́ме сем почива́яй, и да́нною ти свы́ше благода́тию разли́чная источа́яй чудеса́, при́зри ми́лостивым о́ком на предстоя́щия честне́й твое́й ра́це лю́ди и прося́щия уми́льно твоея́ по́мощи; се бо мы безме́рными согреше́нии пра́ведный гнев Бо́жий на ся наведо́хом и вся́кия ми́лости недосто́йни сотвори́хомся; тем же не сме́юще вознести́ очеса́ на́ша к высоте́ небе́сней, ниже́ вознести́ моле́бный глас ко Го́споду, се́рдцем сокруше́нным и смире́нным ду́хом тебе́ в хода́тайство и на по́мощь призыва́ем, испроси́ у Го́спода Це́ркви благостоя́ние, возду́ха благорастворе́ние, земли́ плодоно́сие; изба́ви всех, ве́рою несомне́нною к Бо́гу приходя́щих и к ра́це моще́й твои́х прибега́ющих, от вся́ких бед душе́вных и теле́сных; бу́ди печа́льным уте́шитель, неду́гующим врач, напа́ствуемым помо́щник, вдови́цам засту́пник, си́рым защи́тник, младе́нцам пита́тель, стра́нствующим путево́ждь, ста́рым укрепле́ние, пла́вающим ко́рмчий; исхода́тайствуй всем, твоея́ по́мощи тре́бующим, вся, я́же ко спасе́нию поле́зная, я́ко да твои́ми моли́твами наставля́еми, путь маловре́меннаго жития́ бе́збедне соверши́м, улучи́м на Небеси́ ве́чный поко́й и просла́вим всех благи́х Да́теля, в Тро́ице сла́вимаго Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в, ами́нь.