Молитвы

Помяни, Господи Боже наш, в вере и надежди живота вечнаго преставльшагося раба Твоего, брата нашего (имя), яко Благ и Человеколюбец, отпущаяй грехи и потребляяй неправды, ослаби, остави и прости вся вольная его согрешения и невольная, избави его вечныя муки и огня геенскаго, и даруй ему причастие и наслаждение вечных Твоих благих, уготованных любящым Тя: аще бо и согреши, но не отступи от Тебе, и несумненно во Отца и Сына и Святаго Духа, Бога Тя в Троице славимаго, верова, и Единицу в Троице и Троицу в Единстве православно даже до последняго своего издыхания исповеда. Темже милостив тому буди, и веру яже в Тя вместо дел вмени, и со святыми Твоими яко Щедр упокой: несть бо человека, иже поживет и не согрешит. Но Ты Един еси кроме всякаго греха, и правда Твоя правда во веки, и Ты еси Един Бог милостей и щедрот, и человеколюбия, и Тебе славу возсылаем, Отцу и Сыну и Святому Духу, ныне и присно и во веки веков. Аминь.

Господи Иисусе Христе Боже наш, сирых Защитниче, странных Наставниче, плавающих Кормчий, обуреваемых пристанище, с путешествующими путешествующий, утешение плачущих, нищих кормителю! Молим Тя, Многомилостиве Господи, помяни во Царствии Твоем души усопших раб Твоих (имена), в вере преставльшихся к Тебе, но отшедших в земли чуждей, без матерняго Святыя Твоея Церкви напутствия и благословения. Приими, Владыко, под Твое благоутробие рабов преставльшихся тамо в скорби и печали о своих присных и ближних, имже никтоже бе утешаяй в страшный час смерти, идеже никтоже бе возносяй Тебе теплое моление о благотишном прохождении их от сея привременныя жизни в мир горний. Темже убо молим Тя, Преблагий, молим Тя, вездесущий и присносущный Господи, воззри на сих рабов Твоих благосердием Твоим, прости им всякое согрешение вольное и невольное, словом и делом содеянное и вся, яже в ведении и неведении. Умоляем Тя молитвами и предстательством Матере Твоея, Пресвятая Владычицы нашея Богородицы, и всех святых, не погуби отшедших к Тебе со беззаконием их, но сотвори им велию милость Твою, яви им Твое человеколюбие и щедроты Твоя, приведи их к тихому Твоему пристанищу и водвори их в Дому Твоем. Еще молимся о упокоении душ усопших раб Твоих (души усопшаго (-шия) раба Твоего (рабы Твоея) (имена), отшедших к Тебе безродными и никогоже от присных своих о себе молитвенников имущими, разве Святыя Твоея Церкви; сего убо ради молим Тя, Господи, приими и о сих наше моление: прости им вся согрешения и помилуй их по велицей Твоей милости; всели их во Святом жилище Твоем, да обрящут в Тебе покой, яко в Спасителе и Искупителе рода человескаго. Господи! Господи! Аще усопший раби Твои, иже быша в нищете и убожестве, за чашу студеныя воды, за укрух хлеба, за едину лепту, поданныя им во имя Твое, приносили быша Тебе моления о нас, прошения и благодарения; аще сирые благословляли быша благотворящую им руку, моляся о ниспослании нам благ Твоих, того убо ради молим Тя ныне, Христе Боже наш, и мы о них: помяни убо во Царствии Твоем сих, яко меньших, по реченному Тобою, братий Твоих; прости им всякое прегрешение вольное и невольное, покрый их Твоим благоутробием и всели их во Святый чертог Твой; и яко получавших зде на земли пропитание чрез призывание святаго Твоего имени, препитай тамо на небеси от тука дома Твоего и да утешатся, и да насладятся нескончаемою радостию вси истинно плакавшие к Тебе; водвори их со святыми Твоими, да вси купно у Тебе, Судие живых и мертвых, составят сонмы избранных Твоих, и тако да славят, хвалят и превозносят безпредельное Твое милосердие в безпредельные веки. Аминь.

Страстей победителя, душам помощника, о всех молебника, всем спасения ходатая и наставника, из глубины сердца воздыхая, усердно и пламенно молим тя, Паисие Преподобне! Внемли и помози нам, не отринь и не презри нас, но абие услыши в смирении сердца притекающих к тебе. Ты, преподобне, к спасению ближних прилежно стремился и многих грешников к свету спасения привел еси. Подвиги чрезмерные успокоением считал по себе, пречудне, и, любовью ко Господу всегда горя, явления Христа Спаса сподобился еси, и Ему, за людей Умершему, любовию подражая, и об отрекшихся от Христа молился еси. Услыши нас, Паисие прехвальне, ибо недостойны есмы молитися о даровании нам великой милости Господней, понеже грешны есмы, и уста оскверненныя и сердца отягощенныя имеем, и под бременем прегрешений страждем, и не достигает молитва наша до Господа. Сего ради помолися за нас мольбою твоею крепкою и богоприятною, святый Паисие, да избавлены будут скончавшиеся без покаяния сродники, ближние и знаемые наши от муки вечныя, и молитву твою во благоволении приимет Спас наш и милосердие Свое вместо добрых дел их даст им, свободит их, веруем, от страданий и вселит в селениях праведных, и нас в покаянии скончатися удостоит, да прославим вкупе Всесвятое и великолепое имя Отца и Сына и Святаго Духа, во веки веков. Аминь.

О, святый мучениче Уаре досточудный, ревностию по Владыце Христу разжигаемь, Небеснаго Царя пред мучителем исповедал еси, и о Нем усердно пострадал еси, и ныне предстоиши Ему со ангелы, и в вышних ликуеши, и зриши ясно Святую Троицу, и светом Безначальнаго Сияния наслаждаешися, воспомяни и наших сродников томление, умерших в нечестии, приими наше прошение, и якоже Клеопатрин род неверный молитвами твоими от вечных мук свободил еси, тако воспомяни елицы противобожне погребенныя, умершия некрещенными, потщися испросити оным от вечныя тьмы избавление, да вси едиными усты и единем сердцем восхвалим Премилосерднаго Творца во веки веков. Аминь

Неисповедимы судьбы Твои, Господи! Неизследимы пути Твои! Даяй дыхание всякой твари и вся от не сущих в бытие приведый, Ты овому посылаеши Ангела смерти в День, егоже не весть, и в час, егоже не чает; оваго же исхищаеши из руки смерти, даруеши живот при последнем издыхании; овому долготерпиши и даеши время на покаяние; оваго же, яко злак, сечеши мечем смерти во едином часе, во мгновении ока; оваго поражаеши громом и молниею, оваго сожигаеши пламенем, оваго же предаеши в снедь зверем дубравниим; овых повелеваеши поглотити волнам и безднам морским и пропастям земным; овых похищаеши язвою губительною, идеже смерть яко жнец пожинает и разлучает отца или матерь от чад их, брата от брата, супруга от супруги, младенца отторгает от лона матерняго, бездыханными повергает сильных земли, богатых и убогих. Что убо сие есть? Дивное и недоумеваемое нами смотрение Твое, Боже! Но Господи, Господи! Ты токмо Един, ведый вся, веси, чесо ради бывает сия и чесо ради быть, яко раб Твоей (раба Твоя) (имя) во едино мгновение ока пожерт(-та) бысть зиянием смерти. Аще наказуеши за многая, тяжкия прегрешения его(ея), молим Тя, Многомилостиве и Всемилостиве Господи, да не яростию Твоею обличиши его (ю) и накажеши вконец, но, по благости Твоей и по безприкладному Твоему милосердию, яви ему (ей) велию милость Твою в прощении и оставлении грехов. Аще ли же усопший (-шая) раб Твой (раба Твоя), в житии сем помышляя День Судный, позна свое окаянство и возжела принести Тебе плоды достойные покаяния, но не достиже сего, зане позван(-на) бысть Тобою в день, егоже не веда, и в час, егоже не жда, того убо ради паче молим Тя, Преблагий и Премилосердый Господи, несоделанное покаяние, еже видесте очи Твои, и неоконченное дело спасения его(ея) исправи, устрой, соверши Твоею неизреченною благостию и человеколюбием; едину бо надежду имамы на Твое безконечное милосердие: у Тебе бо суд и наказание, у Тебе правда и неистощимая милость; Ты наказуеши, вкупе же и милуеши; биеши, вкупе же и приемлеши; прилежно молим Тя, Господи Боже наш, не накажи внезапу позванного(-ую) к Тебе Страшным Судом Твоим, но пощади, пощади его (ю) и не отрини от лица Твоего. О, страшно внезапу впасти в руце Твои, Господи, и предстати на суд Твой нелицеприятный! Страшно отъити к Тебе без благодатнаго напутствия, без Покаяния и причащения Святых Твоих страшных и животворящих Тайн, Господи! Аще внезапу усопший(-шая) приснопоминаемый(-мая) нами раб Твой (раба Твоя) толико многогрешен(-на), толико повинен(-на) есть осуждению на Твоем праведном суде, молим Тя, умилосердися над ним (нею), не осуди его (ю) на вечное мучение, на вечную смерть; потерпи нам еще, даждь нам долготу дний наших, еже молитися Ти по вся дни о усопшем(-шей) рабе Твоем(ей), дондеже услышиши нас и приимеши милостию Твоею внезапу отшедшаго(-ую) к Тебе; и даждь нам, Владыко, омыти грехи его (ея) слезами сокрушения и воздыханиями нашими пред Тобою, да не низведен(-на) будет по грехом своим на место мучения раб Твой (раба Твоя) (имя), но да вселится в место упокоения. Ты Сам, Господи, повелеваеши ударяти в двери милосердия Твоего, молим Тя убо, Прещедрый Царю, и не престанем умоляти Твое милосердие и взывати с кающимся Давидом: помилуй, помилуй раба Твоего (рабу Твою), Боже, по велицей Твоей милости. Аще же недовольно Ти словес наших, сего малаго моления нашего, умоляем Тя, Господи, верою в спасительныя заслуги Твои, упованием на искупительную и чудодейственную силу Твоея жертвы, принесенныя Тобою за грехи всего мира; молим Тя, о Сладчайший Иисусе! Ты еси Агнец Божий, вземляй грехи мира, распныйся ради нашего спасения! Молим Тя, яко Спасителя и Искупителя нашего, спаси и помилуй и вечныя муки избави душу приснопоминаемаго(-ыя) нами внезапу усопшаго(-шия) раба Твоего (рабы Твоея) (имя), не остави его (ю) погибнути во веки, но сподоби достигнути тихаго пристанища Твоего и упокой тамо, идеже вси святии Твои упокоеваются. Вкупе же молим Тя, Господи Иисусе Христе Боже наш, приими милостию Твоею и всех внезапу преставльшихся к Тебе рабов Твоих (имена), ихже вода покры, трус объят, убийцы убиша, огнь попали, град, снег, мраз, голоть и дух бурен умертвиша, гром и молния попали, губительная язва порази, или иною коею виною умреша, по Твоему изволению и попущению, молим Тя, приими их под Твое благоутробие и воскреси их в жизнь вечную, святую и блаженную. Аминь.

Христе Иисусе, Господи и Вседержителю! Ты - плачущих утешение, сирых и вдовиц заступление. Ты рекл еси: призови Мя в день скорби твоея, и изму тя. Во дни скорби своея прибегаю к Тебе аз и молюся Ти: не отврати лица Твоего от мене и услыши моление мое, приносимое Тебе со слезами. Ты, Господи Владыко всяческих, благословил еси сочетати мя со единем из рабов Твоих, во еже быти нам едино тело и един дух; Ты дал еси мне сего раба, яко сожителя и защитника. Твоей же благой и премудрой воле изволися отьяти от мене сего раба Твоего и оставити мя едину. Преклоняйся пред сею Твоею волею и к Тебе прибегаю во дни скорби моея: утоли печаль мою о разлучении с рабом Твоим, другом моим. Аще отъял еси его от меня, не отыми от меня Твоея милости. Якоже некогда приял вдовицы две лепты, тако приими и сие моление мое. Помяни, Господи, душу усопшаго раба Твоего (имярек), прости ему вся согрешения его, вольная и невольная, аще словом, аще делом, аще ведением и неведением, не погуби его со беззаконьми его и не предаждь вечной муки, но по велицей милости Твоей и по множеству щедрот Твоих ослаби и прости вся согрешения его и вчини его со святыми Твоими, идеже несть болезнь, ни печаль, ни воздыхание, но жизнь безконечная. Молю и прошу Тя, Господи, даруй ми во вся дни жизни моея не преставати молитися о усопшем рабе Твоем, и даже до исхода моего просити у Тебе, Судии всего мира, оставления всех согрешений его и вселения его в небесныя обители, яже еси уготовал любящим Тя. Яко аще бо и согреши, но не отступи от Тебе, и несумненно Отца и Сына и Святаго Духа православно даже до последняго своего издыхания исповеда; тем же веру его, яже в Тя, вместо дел ему вмени: яко несть человек, иже жив будет и не согрешит, Ты Един кроме греха, и правда Твоя - правда во веки. Верую Господи, и исповедую, яко Ты услышиши моление мое и не отвратиши лица Твоего от мене. Видя вдовицу, зельне плачущу, умилосердився, сына ея, на погребение несома, воскресил еси: тако, умилосердився, утиши и скорбь мою. Яко же отверзл еси рабу Твоему Феофилу, отшедшему к Тебе, двери милосердия Твоего и простил еси ему прегрешения его по молитвам святыя Церкви Твоея внемля молитвам и милостыням супруги его: сице и аз молю Тя, приими и мое моление о рабе Твоем, и введи его в жизнь вечную. Яко Ты еси упование наше, Ты еси Бог, еже миловати и спасати, и Тебе славу возсылаем со Отцем и Святым Духом, ныне и присно и во веки веков. Аминь!

Христе Иисусе, Господи и Вседержителю! В сокрушении и умилении сердца моего молюся Тебе: упокой, Господи, душу усопшия рабы Твоея (имярек), в Небесном Царствии Твоем. Владыко Вседержителю! Ты благоволил еси супружеский союз мужа и жены, егда рекл еси: не добро быти человеку единому, сотворим ему помощника по нему. Ты освятил еси союз сей во образ духовнаго союза Христа с Церковью. Верую, Господи, и исповедую, яко Ты благословил еси сочетати и мене сим святым союзом с единою из рабынь Твоих. Твоей же благой и премудрой воле изволися отъяти у мене сию рабу Твою, юже дал еси мне, яко помощницу и сопутницу жизни моея. Преклоняюся пред сею Твоею волею, и молюся Ти от всего сердца моего, приими моление мое сие о рабе Твоей (имярек), и прости ей, аще согреши словом, делом, помышлением, ведением и неведением; аще земное возлюби паче небеснаго; аще о одежде и украшении тела своего печеся паче, неже о просвещении одеяния души своея; или аще небреже о чадех своих; аще преогорчи кого словом или делом; аще проропта в сердце своем на ближняго своего или осуди кого или ино что от таковых злых содела. Вся сия прости ей, яко благий и человеколюбивый: яко несть человек, иже жив будет и не согрешит. Не вниди в суд с рабою Твоею, яко созданием Твоим, не осуди ю по грехом ея на вечныя муки, но пощади и помилуй по велицей милости Твоей. Молю и прошу Тя, Господи Сил, даруй ми по вся дни жизни моея не преставати молитися о усопшей рабе Твоей, и даже до кончины живота моего просити ей у Тебе, Судии всего мира, оставления согрешений ея. Да якоже Ты, Боже, положил еси на главу ея венец от камене честна, венчая ю зде на земли; тако увенчай ю вечною Твоею славою в Небесном Царствии Твоем, со всеми святыми, тамо ликующими, да вкупе с ними вечно воспевает Всесвятое Имя Твое с Отцем и Святым Духом. Аминь.

Молитвами святых отец наших, Господи Иисусе Христе, Боже наш, помилуй нас. Аминь. Слава Тебе, Боже наш, слава Тебе. Царю Небесный, Утешителю, Душе истины, Иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша. Святый Боже, Святый Крепкий, Святый Безсмертный, помилуй нас. (Tрижды) Слава Отцу и Сыну и Святому Духу, и ныне и присно и во веки веков. Аминь. Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради. Господи, помилуй. (Трижды) Слава Отцу и Сыну и Святому Духу, и ныне и присно и во веки веков. Аминь. Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго. Господи, помилуй. (12 раз) Слава Отцу и Сыну и Святому Духу. И ныне и присно и во веки веков. Аминь. Приидите, поклонимся Цареви нашему Богу. (Поклон) Приидите, поклонимся и припадем Христу, Цареви нашему Богу. (Поклон) Приидите, поклонимся и припадем Самому Христу, Цареви и Богу нашему. (Поклон) Псалом 90 Живый в помощи Вышняго, в крове Бога Небеснаго водворится. Речет Господеви: Заступник мой еси, и Прибежище мое, Бог мой, и уповаю на Него. Яко Той избавит тя от сети ловчи и от словесе мятежна, плещма Своима осенит тя, и под криле Его надеешися: оружием обыдет тя истина Его. Не убоишися от страха нощнаго, от стрелы летящия во дни, от вещи во тьме преходящия, от сряща и беса полуденнаго. Падет от страны твоея тысяща, и тма одесную тебе, к тебе же не приближится: обаче очима твоима смотриши, и воздаяние грешников узриши. Яко Ты, Господи, упование мое, Вышняго положил еси прибежище твое. Не приидет к тебе зло, и рана не приближится телеси твоему. Яко ангелом Своим заповесть о тебе, сохранити тя во всех путех твоих. На руках возмут тя, да не когда преткнеши о камень ногу твою. На аспида и василиска наступиши, и попереши льва и змия. Яко на Мя упова, и избавлю и; покрыю и, яко позна имя Мое. Воззовет ко Мне, и услышу его; с ним есмь в скорби, изму его, и прославлю его; долготою дний исполню его, и явлю ему спасение Мое. Слава Отцу и Сыну и Святому Духу, и ныне и присно и во веки веков. Аминь. Аллилуиа, аллилуиа, аллилуиа, слава Тебе, Боже. (Трижды) Тропарь, глас 4-й: Со духи праведных скончавшихся, душу раба Твоего, Спасе, упокой, сохраняя ю во блаженной жизни, яже у Тебе, Человеколюбче. В покоищи Твоем, Господи, идеже вси святии Твои упокоеваются, упокой и душу раба Твоего, яко Един еси Человеколюбец. Слава Отцу и Сыну и Святому Духу. Ты еси Бог, сошедый во ад, и узы окованных разрешивый, Сам и душу раба Твоего упокой. И ныне и присно и во веки веков. Аминь. Едина Чистая и непорочная Дево, Бога без семени рождшая, моли спастися душе его. Седален, глас 5-й: Покой, Спасе наш, с праведными раба Твоего, и сего всели во дворы Твоя, якоже есть писано, презирая, яко Благ, прегрешения его вольная и невольная, и вся яже в ведении и не в ведении, Человеколюбче. Кондак, глас 8-й: Со святыми упокой, Христе, душу раба Твоего, идеже несть болезнь, ни печаль, ни воздыхание, но жизнь безконечная. Икос: Сам Един еси Безсмертный, сотворивый и создавый человека, земнии убо от земли создахомся, и в землю туюжде пойдем, якоже повелел еси, Создавый мя и рекий ми: яко земля еси, и в землю отъидеши, аможе вси человецы пойдем, надгробное рыдание творяще песнь: аллилуиа, аллилуиа, аллилуиа. Достойно есть яко воистинну блажити Тя, Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем. Слава Отцу и Сыну и Святому Духу, и ныне и присно и во веки веков. Аминь. Господи, помилуй (Трижды), благослови. Молитвами святых отец наших, Господи Иисусе Христе, Боже наш, помилуй нас. Аминь. Во блаженном успении вечный покой подаждь, Господи, усопшему рабу Твоему (имя), и сотвори ему вечную память. Вечная память. (Трижды) Душа его во благих водворится, и память его в род и род.