Канон зачатию Пророка, Предтечи и Крестителя Господня Иоанна

Минея, 23 Сентября, Канон свята́го Глас 6 Песнь 1 Ирмос: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на ви́дя потопля́ема,// Бо́гу побе́дную песнь пои́м, вопия́ше. Припев: Святы́й вели́кий Иоа́нне, Предте́че Госпо́день, моли́ Бо́га о нас. Непло́дствующия души́ моей помышле́ния непло́дная исто́ргни,/ непло́дныя прозябе́ние благохвали́ти начина́ющу,/ твое́ во утро́бе ма́терни свято́е зача́тие. Припев: Святы́й вели́кий Иоа́нне, Предте́че Госпо́день, моли́ Бо́га о нас. Свяще́нный Заха́рия, в храм вшед,/ ви́де Боже́ственнаго Ангела, ему́ я́ве возвеща́юща:/ сы́на в старости, свяще́нниче, прии́меши Предте́чу. Сла́ва Отцу́ и Сы́ну и Свято́му Ду́ху. Свети́льник Со́лнца сла́вы светоза́рен/ во чре́ве зачина́ется возсия́ти ма́терни,/ и́мже тьма разреша́ется страсте́й и непло́дствия у́зы,/ вели́кий Предте́ча. И ны́не и при́сно и во ве́ки веко́в. Ами́нь. Богородичен: Во чре́ве Твое́м Влады́ку,/ в Ма́терни носи́ма, Богоро́дице Пречи́стая, чре́ве, ви́дев,/ взыгра́ся я́ве Иоа́нн,/ я́ко су́щий Того́ Предте́ча. Песнь 3 Ирмос: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени// испове́дания Твоего́. Припев: Святы́й вели́кий Иоа́нне, Предте́че Госпо́день, моли́ Бо́га о нас. Непло́ды днесь плод свяще́нный зачина́ет,/ и́же напосле́док все непло́дие душ секи́рою мы́сленною отсещи́ хотя́щ,/ благода́тию. Припев: Святы́й вели́кий Иоа́нне, Предте́че Госпо́день, моли́ Бо́га о нас. Огло́хнув внутрь хра́ма, Заха́рия вели́кий/ глас Сло́ва возвеще́нием стра́шным прие́млет/ и све́тло велича́ет Го́спода благоутро́бнаго. Сла́ва Отцу́ и Сы́ну и Свято́му Ду́ху. Показа́вый стезю́ тве́рду ве́рным покая́ния,/ повеле́нием А́нгела во чре́ве ма́терни прозябе́,/ Боже́ственным Сове́том па́че наде́жди, сла́вный Предте́ча. И ны́не и при́сно и во ве́ки веко́в. Ами́нь. Богородичен: Во чре́ве носи́маго Христа́ Де́вы я́ко позна́, и́же из непло́дове,/ взыгра́ся, провозвеща́я ра́дость, прише́дшую на зе́млю/ се́тования вся изба́вити. Седален, глас 4 Кадя́щу в хра́ме Заха́рии свяще́нному,/ Гаврии́л с Небесе́ предста́, глаго́ля к нему́:/ я́ко в ста́рости твое́й возыме́вши плод благосла́вен,/ и непло́дство пе́рвое Елисаве́ти ны́не разреши́тся а́бие, и непло́дства рожде́ние;/ и, заче́нши, роди́т пропове́дника Иису́сова же и Предте́чу./ Тех мольба́ми, Спа́се ми́ра, спаси́ ду́ши на́ша. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Чи́стая, Всенепоро́чная и Неискусобра́чная,/ еди́на Безле́тнаго Сы́на и Сло́во Бо́жие в ле́те ро́ждшая,/ Того́ со святы́ми и честны́ми апо́столы,/ му́ченики и проро́ки, преподо́бными/ моли́ дарова́ти нам очище́ние и ве́лию ми́лость. Песнь 4 Ирмос: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,// от смы́сла чи́ста о Го́споде пра́зднующи. Припев: Святы́й вели́кий Иоа́нне, Предте́че Госпо́день, моли́ Бо́га о нас. Глас А́нгелов тя су́що А́нгела Христо́ва прише́ствия/ свяще́ннику свяще́нно провозвести́,/ из чре́ва непло́днаго прозяба́ти, блаже́нне Предте́че. Припев: Святы́й вели́кий Иоа́нне, Предте́че Госпо́день, моли́ Бо́га о нас. Пре́жде безча́дная и неражда́ющая, ны́не весели́ся, непло́ды,/ я́ко Христо́ва Крести́теля и Предте́чу плодороди́ши всесла́вно,/ Елисаве́то досточу́дная. Сла́ва Отцу́ и Сы́ну и Свято́му Ду́ху. Секи́рою, Предте́че, твоея́ моли́твы/ страсте́й мои́х те́рние и помышле́ний исто́ргни преткнове́ния/ и плодоно́сен мой ум доброде́тельми, всеблаже́нне, сотвори́. И ны́не и при́сно и во ве́ки веко́в. Ами́нь. Богородичен: Чре́во Тя ноша́ше, вся нося́щаго, Де́вы,/ егда́ Крести́тель, во утро́бе носи́мь, Тебе́ поклони́ся, Христе́,/ и игра́я веселя́шеся. Песнь 5 Ирмос: Бо́жиим све́том Твои́м, Бла́же,/ у́тренюющих ти ду́ши любо́вию озари́, молю́ся,/ Тя ве́дети, Сло́ве Бо́жий,/ И́стиннаго Бо́га,// от мра́ка грехо́внаго взыва́юща. Припев: Святы́й вели́кий Иоа́нне, Предте́че Госпо́день, моли́ Бо́га о нас. Иду́щу внутрь святи́лища и зако́нныя Творцу́ слу́жбы принося́щу,/ яви́ся проро́ку святы́й А́нгел,/ возвеща́я Предте́чи боже́ственное зача́тие. Припев: Святы́й вели́кий Иоа́нне, Предте́че Госпо́день, моли́ Бо́га о нас. Ка́ко бу́дет сие́ мне?/ Явле́нно есмь бо ста́рец, я́ко ви́диши,/ и непло́дну сопру́жницу и́мам, рече́ Заха́рия ко Арха́нгелу:/ естества́ проти́вныя мне глаго́леши глаго́лы. Сла́ва Отцу́ и Сы́ну и Свято́му Ду́ху. К Са́рре воззри́ Авраа́мове и виждь,/ ка́ко она́ Исаа́ка в ста́рости роди́, челове́че,/ и глаго́лемым пра́ведно ве́руй,/ ста́рцу приглаша́ше вели́кий Арха́нгел. И ны́не и при́сно и во ве́ки веко́в. Ами́нь. Богородичен: Благослове́нна в жена́х Ты, Богора́дованная,/ я́ве Елисаве́т вопия́ше Тебе́,/ егда́ ражда́ющу безму́жно позна́ Тя,/ еди́ну по рождестве́ нетле́нну пребы́вшу. Песнь 6 Ирмос: Жите́йское мо́ре/ воздвиза́емое зря напа́стей бу́рею,/ к тихому приста́нищу Твоему́ прите́к, вопию́ Ти:/ возведи́ от тли живо́т мой,// Многоми́лостиве. Припев: Святы́й вели́кий Иоа́нне, Предте́че Госпо́день, моли́ Бо́га о нас. Сомне́нно и́мам помышле́ние аз/ и не ве́рую словесе́м твои́м,/ Арха́нгелу рече́ свяще́нник:/ люде́й бо спасе́ния, не от мои́х чресл плода́ прошу́. Припев: Святы́й вели́кий Иоа́нне, Предте́че Госпо́день, моли́ Бо́га о нас. Созда́тель естества́, А́нгелов Царь,/ служи́тель отвеща́,/ прише́ствия Своего́ А́нгела благоволи́ роди́ти тебе́,/ мои́м словесе́м не не ве́руй, челове́че. Сла́ва Отцу́ и Сы́ну и Свято́му Ду́ху. Вид твой о́гнен, и взор твой стра́шен, и чу́дно сло́во твое́,/ Заха́рия рече́ служи́телю:/ но у́бо не ве́рую тебе́,/ па́че естества́ глаго́лющу ми стра́нныя глаго́лы. И ны́не и при́сно и во ве́ки веко́в. Ами́нь. Богородичен: Светильник Со́лнца/ во о́блаце Ма́терни утро́бе скрыва́ема позна́в,/ сый в те́мнем ложесна́ селе́нии,/ поклони́ся, ра́дуяся, и игра́ше. Кондак, глас 1 Весели́тся све́тло Заха́рия вели́кий/ со всесла́вною Елисаве́тию сопру́жницею,/ досто́йно зачина́юще Иоа́нна Предте́чу,/ его́же Арха́нгел благовести́, ра́дуяся,/ и челове́цы достодо́лжно почти́м,/ я́ко таи́нника благода́ти. Икос Свяще́нное Ева́нгелие разгне́м, е́же Лука́ нам написа́, свяще́нный и чу́дный,/ и Предте́чево у́зрим зача́тие, све́тлое и честно́е./ Глаго́лет бо: я́ко вни́де ста́рец и пра́ведный Заха́рия во Свята́я Святы́х,/ е́же покади́ти во вре́мя чреды́,/ предста́ ему́ Гаврии́л, благовеству́я и глаго́ля:/ возыме́вши сы́на, священнонача́льниче, в ста́рости,/ проро́ка же и Предте́чу,/ гла́са же и пропове́дника присносве́тлаго и таи́нника благода́ти. Песнь 7 Ирмос: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:// благослове́н еси́, Бо́же оте́ц на́ших. Припев: Святы́й вели́кий Иоа́нне, Предте́че Госпо́день, моли́ Бо́га о нас. Не ве́ровав мои́м глаго́лом, оглохнове́ние приими́ явле́ннейше,/ и, ражда́емь егда́ у́зриши глас Сло́ва, восприими́ глас,/ благослове́н еси́, вопия́, Изра́илев Бо́же. Припев: Святы́й вели́кий Иоа́нне, Предте́че Госпо́день, моли́ Бо́га о нас. Луне́ Елисаве́ти примеша́яся, многосве́тлый, я́ко со́лнце, Заха́рия/ светоно́сна свети́льника све́та породи́,/ светя́ща нам, су́щим во тьме страсте́й, держи́мым лю́те. Сла́ва Отцу́ и Сы́ну и Свято́му Ду́ху. Игра́ния я́ко глаго́лы употреби́в, Христе́, вели́кий Предте́ча/ поклони́ся Тебе́ в чре́ве де́вственнем, сам носи́мь утро́бою Елисаве́тиною, Иису́се,/ отце́в на́ших Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: Луна́ Елисаве́т, внутрь нося́щи звезду́, боже́ственнаго Предте́чу,/ поклони́ся све́тлому о́блаку, Мари́и, Со́лнце нося́щей, Христа́,/ плотоноси́ма от Нея́ на спасе́ние на́ше. Песнь 8 Ирмос: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти.// Тя превозно́сим во вся ве́ки. Припев: Святы́й вели́кий Иоа́нне, Предте́че Госпо́день, моли́ Бо́га о нас. Женихо́в друг предуготовля́ется,/ глас же Сло́ва нача́ло прие́млет,/ и в непло́дней ны́не утро́бе пита́ется/ Всецаря́ вели́кий во́ин. Припев: Святы́й вели́кий Иоа́нне, Предте́че Госпо́день, моли́ Бо́га о нас. Непло́дным сердца́м де́латель процвете́,/ страсте́й секи́ра уже́ куе́тся,/ теле́ц честны́й воздержа́ния пита́ется, Предте́ча вели́кий:/ лю́дие, весели́теся. Сла́ва Отцу́ и Сы́ну и Свято́му Ду́ху. У́зы я́коже дре́вле непло́дныя,/ моего́ помышле́ния си́це окамене́ние разреши́, Крести́телю,/ и плоды́ покая́ния мя сотвори́ возраща́ти,/ и жи́ти во ве́ки. И ны́не и при́сно и во ве́ки веко́в. Ами́нь. Богородичен: Чревоно́сную Тя, Отрокови́це, я́ко Елисаве́т ви́де,/ боже́ственне возра́довася,/ внутрь ея́ младе́нцу взыгра́вшуся,/ я́ко позна́вшу своего́ Влады́ку. Песнь 9 Ирмос: Бо́га/ челове́ком невозмо́жно ви́дети,/ на Него́же не сме́ют чи́ни а́нгельстии взира́ти:/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и// Тя ублажа́ем. Припев: Святы́й вели́кий Иоа́нне, Предте́че Госпо́день, моли́ Бо́га о нас. Христо́в вели́кий и боже́ственный Предте́ча, непло́дная ны́не врата́ отве́рз,/ водворя́ется, я́ко во ца́рских, в боку́ ма́тере:/ да я́ко во́ин произы́дет, Всецаря́ пути́ уготовля́я. Припев: Святы́й вели́кий Иоа́нне, Предте́че Госпо́день, моли́ Бо́га о нас. Бо́жий проро́че, ста́рче, лику́й, роди́ши бо сы́на,/ его́же бо́льший в челове́цех не воста́, Иоа́нна, Госпо́дня Предте́чу,/ взыгра́й, Елисаве́т, земля́ вся, ра́дуйся,/ хвалу́ всех Творцу́ Бо́гу принося́щи. Сла́ва Отцу́ и Сы́ну и Свято́му Ду́ху. Нас, ве́рою благохва́лящих тя, помяни́ ны́не, Госпо́день проро́че и Предте́че,/ от душе́вных страсте́й избавля́я:/спаса́й ны от бед,/ к Небе́сней стези́ путево́ждствуя боголе́пно, присноблаже́нне. И ны́не и при́сно и во ве́ки веко́в. Ами́нь. Богородичен: Чи́стую Ма́терь я́ве позна́ Тя,/ непло́дных уз Елисаве́т я́ко ощути́ разреше́ну себе́ и нося́щу Предте́чу/ во утро́бе Твое́й Все́льшагося,/ Чи́стая Де́во, Мариа́м Богора́дованная. Светилен Предте́чево сла́вное зача́тие предвозвеща́ет из Де́вы хотя́щаго роди́тися Царя́,/ я́ко сей от Елисаве́ти непло́дныя и безча́дныя,/ ста́рца же и иере́я Заха́рии вели́каго./ И́хже моли́твами, и Богоро́дицы,/ и Иоа́нна, Крести́теля Твоего́, Го́споди,/ спаси́ и уще́дри вся. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Сотвори́ я́ко и́стинно с Тобо́ю вели́чия Сын предве́чный сове́том Оте́ческим,/ Жизнь бо безсме́ртную безстра́стно родила́ еси́,/ и пребыла́ еси́ я́ко пре́жде рождества́, ма́терских избе́гши,/ и Де́ва по рождестве́ пребыла́ еси́, Де́во.