- Главная страница
- Молитвы
- Канон Святых отец шести Вселенских Соборов (2-й)
Канон Святых отец шести Вселенских Соборов (2-й)
Текст молитвы
Глас 8
Песнь 1
Ирмос: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.
Припев: Святи́и отцы́, моли́те Бóга о нáс.
Оте́ц благочести́вое собра́ние, сте́кшееся иногда́ на Евти́ха,/ вои́стинну Спа́са пропове́да в неразде́льных естества́х сугу́бых,/ Боже́ственнаго отца́ Кири́лла уче́нием ше́ствующее я́ве и пребыва́ющее.
Припев: Святи́и отцы́, моли́те Бóга о нáс.
Число́ шестьсо́т тридеся́тое благочести́вейших муже́й,/ Евти́хову пре́лесть и Севи́рову е́ресь низло́жше,/ достиго́ша воспе́ти си́це:/ Христа́ во двою́ существу́ пропове́дуем,/ ше́ствующе рече́нием Кири́лла блаже́ннаго.
Сла́ва Отцу́ и Сы́ну и Свято́му Ду́ху.
И́же не пропове́дует во двою́ естеству́ и де́йствиих Христа́, Сло́во Отчее,/ прии́мет ана́фему,/ четве́ртый бо Собо́р святы́х оте́ц единому́дренно си́це пропове́да./ Вси у́бо их да ублажи́м.
И ны́не и при́сно и во ве́ки веко́в. Ами́нь.
Богородичен: Пресла́вная о Тебе́ возглаго́лашася в ро́дех родо́в,/ Я́же Бо́га Сло́ва во чре́ве вмести́вшая, чиста́ же пребы́вши, Богоро́дице Мари́е,/ тем Тя вси почита́ем, по Бо́зе Предста́тельницу на́шу.
Песнь 3
Ирмос: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́,/ Еди́не Человеколю́бче.
Припев: Святи́и отцы́, моли́те Бóга о нáс.
И́же Севи́ра безсту́дно прекло́ншеся словесе́м, я́да смертото́чнаго испо́лненным,/ посрами́теся при́сно, отлуча́ющеся вси Це́ркве,/ я́коже во́лцы и пси хи́щнии.
Припев: Святи́и отцы́, моли́те Бóга о нáс.
Лико́вственницы и ве́рнии, Вседе́теля и Спа́са/ во двою́ неразде́льных существа́х и хоте́ниих сугу́бых и де́йствиих почита́ем,/ те́мже Севи́ра пре́лести вконе́ц отвраща́емся.
Сла́ва Отцу́ и Сы́ну и Свято́му Ду́ху.
Прииди́те, Севи́ра и Иа́кова неблагополу́чных пре́лесть,/ с си́ми Феодо́сия, Диоско́ра отме́щем я́ве,/ четве́ртый же Собо́р благочести́вых оте́ц воспое́м пе́сньми Боже́ственными.
И ны́не и при́сно и во ве́ки веко́в. Ами́нь.
Богородичен: Херуви́м и Серафи́м яви́лася еси́ вы́шши, Богоро́дице:/ Ты бо еди́на прия́ла еси́ Невмести́маго Бо́га во Твое́м чре́ве, Нескве́рная./ Те́мже Тя, вси ве́рнии, пе́сньми, Чи́стая, ублажа́ем.
Седален, глас 4
Свети́льницы пресве́тлии и́стины Христо́вы ми́ру яви́стеся на земли́,/ вои́стинну блаже́ннейшии, отцы́ Боговеща́ннии,/ изсуши́вше е́реси ху́льных языковре́дий/ и угаси́вше пламенови́дная злосла́вных смуще́ния:/ те́мже, я́ко святи́телие Христо́вы, моли́теся спасти́ся нам.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Обнови́ла еси́, Чи́стая, Боже́ственным Рождество́м Твои́м/ истле́вшее во страсте́х земноро́дных ме́ртвенное существо́/ и воздви́гла еси́ вся от сме́рти к животу́ нетле́ния./ Те́мже Тя по до́лгу блажи́м вси, Де́во Препросла́вленная, я́коже прорекла́ еси́.
Песнь 4
Ирмос: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.
Припев: Святи́и отцы́, моли́те Бóга о нáс.
Рцы нам, безу́мный Севи́ре и су́етный:/ еди́но естество́ сло́жно безнача́льно, свет Сло́во О́тчее и Сы́на?/ А́ще бо си́це рече́ши, и друго́е естество́ знамена́л еси́:/ плоть бо и Сло́во, не еди́но существо́, но сугу́бо су́щее, окая́нне.
Припев: Святи́и отцы́, моли́те Бóга о нáс.
Еди́но ре́кши естество́ Сло́ва, наведе́ вопло́щшееся естество́ челове́чества,/ кроме́ измене́ния вся́чески и смеше́ния,/ александри́ом учи́тель же и председа́тель,/ я́сно два естества́ и хоте́ния науча́я правосла́вно му́дрствовати хотя́щих.
Сла́ва Отцу́ и Сы́ну и Свято́му Ду́ху.
Два естества́ Христо́ва вси пропове́даем неслия́нно,/ вся́кое нече́стие Евти́хия, ве́рнии, а́бие и Диоско́ра безу́мнаго попира́юще,/ после́дуем преде́лу святы́х оте́ц и Кири́лла Боже́ственнаго рече́нием.
И ны́не и при́сно и во ве́ки веко́в. Ами́нь.
Богородичен: Херуви́мское носи́ло Ты, Богома́ти Чи́стая,/ Ты вмести́лище, Ты и прия́телище Сло́ва О́тча и Бо́га,/ от пречи́стых ложе́сн в плоть обле́кшагося./ Те́мже, во двою́ существу́ из Тебе́ Вопло́щшемуся покланя́ющеся, непреста́нно сла́вим.
Песнь 5
Ирмос: Вску́ю мя отри́нул еси́/ от лица́ Твоего́, Свете Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.
Припев: Святи́и отцы́, моли́те Бóга о нáс.
О Севи́ре! Есте́ств Христо́вых не слива́й лю́те, законопресту́пне,/ и́бо жри́телие и преблаже́ннии учи́телие вси,/ во двою́ существу́ и во Еди́ном Христо́вом Лице́ провозвести́вше, всем изложи́ша.
Припев: Святи́и отцы́, моли́те Бóга о нáс.
Прия́т естество́ челове́ческое я́ве Безнача́льный, Отчее Сло́во,/ я́ко Человеколю́бец, хотя́ уще́дрити нас, поги́бших./ Те́мже Того́ пропове́дую во двою́ существу́ и хоте́нию.
Сла́ва Отцу́ и Сы́ну и Свято́му Ду́ху.
Низложи́в Севи́ра четве́ртый Собо́р и Диоско́ра, Христа́ ху́лящия,/ извеща́я сви́ток Лео́нта, первоседа́льника Ри́мскаго, зело́ до́бре,/ сугу́ба естества́ Спа́сова несеко́мо явля́я.
И ны́не и при́сно и во ве́ки веко́в. Ами́нь.
Богородичен: Ма́тернее дерзнове́ние, е́же к Сы́ну Твоему́ иму́щи, Всечи́стая,/ сро́днаго промышле́ния, е́же о нас, не пре́зри, мо́лимся,/ я́ко Тебе́ и еди́ну, христиа́не, ко Влады́це очище́ние ми́лостивно предлага́ем.
Песнь 6
Ирмос: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.
Припев: Святи́и отцы́, моли́те Бóга о нáс.
Два посла́ния Кири́лла, я́же ко Си́нгелу по́сланная иногда́,/ восто́ку преоблада́ющу, облича́ют Севи́рову всю пре́лесть,/ благоче́стно Христа́ пропове́дующая.
Сла́ва Отцу́ и Сы́ну и Свято́му Ду́ху.
Кири́лл Христа́ пропове́дует во двою́ естеству́ и де́йствиих сугу́бых,/ Севи́ра несмы́сленнаго е́ресь отсеца́я./ Те́мже вси во уче́ниих того́ пребу́дем.
И ны́не и при́сно и во ве́ки веко́в. Ами́нь.
Богородичен: Де́ву Тя и Чи́стую Пресла́вную, Богороди́тельнице Мари́е,/ благочести́вии, вои́стинну пропове́дуем,/ загражда́юще безсту́дная уста́ Несто́рия и Диоско́ра зломы́слие.
Кондак, глас 8
Апо́стол пропове́дание и оте́ц догма́ты/ Це́ркве еди́ну ве́ру запечатле́ша,/ я́же и ри́зу нося́щи и́стины, истка́нну от е́же свы́ше Богосло́вия,/ исправля́ет и сла́вит благоче́стия вели́кое та́инство.
Икос
Высо́ким пропове́данием Бо́жию Це́рковь услы́шим, вопию́щу:/ жа́ждай, да гряде́т ко мне и пие́т ча́шу, ю́же держу́,/ ча́ша есть прему́дрости./ Сие́ питие́ и́стины сло́вом почерпо́х, во́ду пролива́ющую не прекосло́вия,/ но испове́дания, ю́же пия́, ны́нешний Изра́иль Бо́га зрит, веща́юща:/ ви́дите, ви́дите, я́ко Сам Аз есмь и не пременя́юся:/ Аз Бог пе́рвый, Аз же и по сих, и ра́зве Мене́, несть ино́го отню́д./ Отсю́ду причаща́ющиися насы́тятся/ и восхва́лят благоче́стия вели́кое та́инство.
Песнь 7
Ирмос: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.
Припев: Святи́и отцы́, моли́те Бóга о нáс.
Во двою́ у́бо естеству́ и де́йствиях испове́дающе Христа́,/ несли́тне, непрело́жне, пре́лесть Севи́ра побежда́ем,/ те́мже, пло́ти прия́тием страсть претерпе́вшему, вопие́м Ему́:/ благослове́н Бог оте́ц на́ших.
Припев: Святи́и отцы́, моли́те Бóга о нáс.
Еди́наго разуме́ем, И́же на дре́ве и в не́дрех Оте́ческих,/ я́ко Бо́га в Вы́шних и во гро́бе, я́ко совокупле́нна пло́тию./ Ему́же пое́м, согла́сно взыва́юще:/ благослове́н еси́, Бо́же оте́ц на́ших.
Сла́ва Отцу́ и Сы́ну и Свято́му Ду́ху.
А́риево истоща́ние, пресече́ние же, Бо́га умаля́ющаго, ве́рнии,/ соединомы́слие а́бие Саве́ллиево,/ Тро́ическия враги́ возненави́девше, Тро́ице возопие́м:/ благослове́н Бог оте́ц на́ших.
И ны́не и при́сно и во ве́ки веко́в. Ами́нь.
Троичен: Всех у́бо Госпо́дь, Еди́наго же то́чию Единоро́днаго Сы́на,/ правосла́вно Отца́ богосло́вяще, Тя возвеща́ем,/ и Еди́н ве́дяще Твой исходя́щий Дух, прав, сра́слен и Соприсносу́щен.
Песнь 8
Ирмос: Седмери́цею пещь/ халде́нский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Избави́телю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Припев: Святи́и отцы́, моли́те Бóга о нáс.
Да постыдя́тся ли́ца, и да заградя́тся уста́,/ не пропове́дающих во двою́ естеству́/ несеко́мо, непрело́жно же и несли́тно, Еди́наго Сы́на:/ благочести́вии бо мы прославля́ем,/ и́нако у́бо и и́нако, де́йствовати же и хоте́ти Христу́,/ не у́бо ли́цы, но во двои́х естества́х.
Припев: Святи́и отцы́, моли́те Бóга о нáс.
И́же Иа́кова иму́щии Кенто́на назва́ние, того́жде и́мя себе́ напису́ющии, отвеща́йте нам:/ а́ще в назва́нии его́ вы в купе́ли крести́стеся дре́вле?/ Те́мже сих ра́ди благода́ти Христа́ отступи́сте вои́стинну,/ во́лею со лжи́вым сим безсту́дствующе.
Припев: Святи́и отцы́, моли́те Бóга о нáс.
В Халкидо́не Собо́р четве́ртый Диоско́ра, Евти́ха же и Севи́ра лю́тых низложи́/ и до конца́ отсече́ терно́вную их пре́лесть,/ слия́тельную суще́ств Спа́совых, от Це́ркве Христа́ и Влады́ки;/ с не́юже правосла́вящии, возненави́дим сих.
Сла́ва Отцу́ и Сы́ну и Свято́му Ду́ху.
Троичен: Трисве́тлую Божества́ еди́нственную сия́ющую зарю́ от Еди́наго Триипоста́снаго Естества́:/ Роди́теля Безнача́льна, сра́слена же Сло́ва О́тча и сца́рствующий Единосу́щный Дух,/ де́ти, благослови́те, свяще́нницы, воспо́йте,/ лю́дие, превозноси́те Его́ во вся ве́ки.
И ны́не и при́сно и во ве́ки веко́в. Ами́нь.
Богородичен: Богороди́тельнице Пречи́стая, души́ моея́ я́звы и грехо́вныя собла́зны очи́сти,/ исто́чником омыва́ющи из ребр Сы́на Твоего́ и и́же из них исте́кшими струя́ми,/ к Тебе́ бо взыва́ю, и к Тебе́ прибега́ю, и Тебе́ призыва́ю, Богоблагода́тную.
Песнь 9
Ирмос: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют.
Припев: Святи́и отцы́, моли́те Бóга о нáс.
Преше́д Севи́р Христо́ву благосла́вную Це́рковь льсти́вый,/ и отмще́ние сове́том оте́ц благочести́вых хуле́ния ра́ди и хитростносло́вия своего́ прия́т пра́ведно,/ и отрева́ется учи́телей сосло́вия, осужде́нный.
Сла́ва Отцу́ и Сы́ну и Свято́му Ду́ху.
Естества́ Христо́ва что́ слива́еши и смеше́ние вво́диши и сли́тие,/ Кре́стную страсть и погребе́ние прилага́яй безстра́стному Божеству́/ Единоро́днаго Сло́ва Бо́жия, о окая́нне Севи́ре?/ Те́мже вели́каго твоего́ хуле́ния гнуша́емся.
И ны́не и при́сно и во ве́ки веко́в. Ами́нь.
Богородичен: Бро́ви и де́рзость вку́пе вражде́бных рожде́йся от Де́вы низложи́/ и сове́ты злосло́вящих Соде́теля,/ ве́рных же Собо́р утверди́ непоколе́блем, я́ко Бог,/ рог вознесы́й и ве́рою укрепи́вый, да Тя вси велича́ем.
Светилен
Оте́ц Боже́ственных днесь пя́мять пра́зднующе, моле́ньми тех мо́лим, Всеще́дре:/ вся́каго вре́да ересе́й изба́ви люди Твоя́, Го́споди,/ и вся сподо́би Отца́, Сло́во сла́вити и Всесвята́го Ду́ха.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Ра́дуйся, Бо́жия пала́то./ Ра́дуйся, горо́ присе́нная./ Ра́дуйся, Неопали́мая купино́./ Ра́дуйся, престо́ле сла́вы./ Ра́дуйся, Боже́ственная трапе́зо./ Ра́дуйся, ру́чко всезла́тая./ Ра́дуйся, свети́льниче всесве́тлый./ Ра́дуйся, ле́гкий о́блаче, Де́во Ма́ти Мари́е.
