Канон святому великомученику Феодору Тирону

Великомученик Феодор Тирон Триодь, Суббота 1-й седимцы Великого Поста, Канон св. Феодора Тирона Глас 4 Песнь 1 Ирмос: Отве́рзу уста́ моя́, и напо́лнятся ду́ха, и сло́во отры́гну Цари́це Ма́тери, и явлю́ся све́тло торжеству́я, и воспою́ ра́дуяся Тоя́ чудеса́. Припев: Святы́й великому́чениче Фео́доре, моли́ Бо́га о на́с. Всех Превы́шший, Тя неизрече́нно роди́вшую, всех предположи́ вы́шшую Своих избра́нных: те́мже днесь сего́ вене́чника пою́ще, Всепе́тая, Тебе́ предначина́ем. Припев: Святы́й великому́чениче Фео́доре, моли́ Бо́га о на́с. Вели́каго в му́ченицех, страда́льца пресве́тлаго, имени́таго и пресла́внаго в чудесе́х, от коне́ц земли́ и до коне́ц знамени́таго, пе́сньми воспо́ю Фео́дора. Припев: Святы́й великому́чениче Фео́доре, моли́ Бо́га о на́с. День весе́лый в ско́рбех возсия́, и се́тование сих уясни́, предпра́зднственная предпу́тия издале́ча, просия́вша благода́тию боже́ственнаго му́ченика. Сла́ва Отцу́ и Сы́ну и Свято́му Ду́ху. Кропи́т очище́ния Це́рковь, кровьми́ свято́е заколе́ние, е́же прия́т пожре́нный и в же́ртву прия́тый, страда́льчествовавшаго Божественныя ра́ди сла́вы Его́. И ны́не и при́сно и во ве́ки веко́в. Ами́нь. Богородичен: Красно́ а́ще и незре́ло, е́же пра́здновати узако́нися: украси́вшая бо вся Влады́чица, и ны́не показа́ сея́ па́мяти приобща́ющияся предбе́дствующему кро́вию. Песнь 3 Ирмос: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе совоку́пльшия, духо́вно утверди́/ в Боже́ственней Твое́й сла́ве// венце́в сла́вы сподо́би. Припев: Святы́й великому́чениче Фео́доре, моли́ Бо́га о на́с. Ви́дети день Сы́на Твоего́ жела́юще христоимени́тии лю́дие, во о́браз сего́, Влады́чице, тому́ ны́не предпра́зднствуют, Тебе́ нося́ще показа́ние, и сла́внаго страстоте́рпца Твоего́. Припев: Святы́й великому́чениче Фео́доре, моли́ Бо́га о на́с. Побеждаю́т вся́кими о́бразы лу́чшая: вели́кий бо во страда́льцех в весе́лие измени́ вре́менную скорбь, свята́го зе́льное поста́ обрати́в во ослабле́ние. Припев: Святы́й великому́чениче Фео́доре, моли́ Бо́га о на́с. Сво́йственный и подо́бный тебе́ дар, и́бо от свои́х, страда́льче: и́хже бо сам всели́л еси́ в сей ча́стице твое́й, обра́дованно да́ры тебе́ похва́л прино́сим. Припев: Святы́й великому́чениче Фео́доре, моли́ Бо́га о на́с. Добре́йшее основа́ние положи́л еси́, твои́ми изря́дствы, изря́дне, зве́ря всегуби́тельна, огне́м и уби́йством ды́шуща, низложи́в я́ко безде́льна, преесте́ственною до́блестию. Сла́ва Отцу́ и Сы́ну и Свято́му Ду́ху. Неи́стовствовав но́вый отсту́пник по ра́вному лю́те дре́внему, же́ртвы бра́шном я́коже я́дом смеси́, но ло́жный окая́нник премудри́ся му́чеником. И ны́не и при́сно и во ве́ки веко́в. Ами́нь. Богородичен: Испо́лнися у́бо вся, Де́во, зна́ти Го́спода земля́, из Тебе́ ми́ру я́вльшася, но боже́ственным му́чеником благода́ть мно́гая, утверди́вшим саме́ми собо́ю и́стину. Седален, глас 8 Боже́ственное всеору́жие восприи́м, и и́долов лесть низложи́в, А́нгелы воздви́гл еси́ восхваля́ти по́двиги твоя́: боже́ственным бо жела́нием ум распали́в, смерть во огни́ до́блественно презре́л еси́. Те́мже именоно́сно прося́щим тя да́руй Боже́ственныя да́ры, исцеле́ний подая́ния, страстоте́рпче Фео́доре: моли́ся Христу́ Бо́гу, согреше́ний оставле́ние дарова́ти, пра́зднующим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Я́ко Всенепоро́чная Неве́ста Творца́, я́ко Неискусому́жная Ма́ти Изба́вителя, я́ко прия́телище су́щи Вы́шняго, Всепе́тая, беззако́ния мя су́ща скве́рное жили́ще, и в ра́зуме бы́вша бесо́в игра́лище, потщи́ся и сих злоде́йствия мя изба́вити, све́тлое жили́ще доброде́телию стяжа́вшая, светоприе́мнице нетле́нная: разжени́ о́блак страсте́й, и го́рния све́тлости сподо́би, и све́та невече́рняго моли́твами Твои́ми. Песнь 4 Ирмос: Седя́й в сла́ве, на престо́ле Божества́, во о́блаце ле́гце прии́де Иису́с Пребоже́ственный, нетле́нною дла́нию, и спасе́ зову́щия: сла́ва, Христе́, си́ле Твое́й. Припев: Святы́й великому́чениче Фео́доре, моли́ Бо́га о на́с. О но́ваго и пресла́внаго смеше́ния же и растворе́ния! Де́вству рождество́ соедини́ роди́выйся Богочелове́к: се́тованным же днем весе́лие, Своего́ почита́я страда́льца, вмеси́. Припев: Святы́й великому́чениче Фео́доре, моли́ Бо́га о на́с. Виждь, ка́ко Христа́ любя́ше, Христо́ви во́инствуяй! Враги́ бо се́го ре́вностию и огне́м погуби́, и себе́ коне́чне до́брую и прия́тную Ему́ же́ртву усе́рдно отдаде́. Припев: Святы́й великому́чениче Фео́доре, моли́ Бо́га о на́с. Победоносный от страда́льчеств до́блий разреши́, дерзнове́нно глаго́ля, и презре́нием муче́ний зри́тели удиви́в, и быв всей тва́ри но́вое и пресла́вное позо́рище. Сла́ва Отцу́ и Сы́ну и Свято́му Ду́ху. Кость у́бо не сокруши́ся Бо́га и Влады́ки моего́, о долготерпе́ния, и по умерщвле́нии стра́ждуща! Во́ина же Его огнь прие́м, и ко́ло устыде́ся, уме́ршу прикосну́тися. И ны́не и при́сно и во ве́ки веко́в. Ами́нь. Богородичен: Соуме́ршии Влады́це, Живота́ служи́тели, и совоста́вшии живу́т у Него́ ны́не ве́чно: и Сы́ну Ма́терь спрославля́ют, благословя́ще Отца́, Сы́на и Ду́ха Свята́го. Песнь 5 Ирмос: Ужасо́шася вся́ческая о Боже́ственней сла́ве Твое́й: Ты бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ безле́тнаго Сы́на, всем воспева́ющим Тя, мир подава́ющая. Припев: Святы́й великому́чениче Фео́доре, моли́ Бо́га о на́с. Отверза́ются днесь преддве́рия благода́ти, и упокое́ние ны́не са́мое прообража́ет воскресе́ние, си́це светоно́сне све́тлую Влады́чицу почита́юще, и сла́внаго му́ченика. Припев: Святы́й великому́чениче Фео́доре, моли́ Бо́га о на́с. Да́рует тезоимени́тый дар Бог, Фео́дора, возлюби́вшим я́вльшаго возлю́бленнаго явле́ние, пресла́вных дел творца́ и Боже́ственных сил самоде́теля содева́емаго. Сла́ва Отцу́ и Сы́ну и Свято́му Ду́ху. Ничто́же к му́ченику лу́цы и стре́лы твоя́, вра́же челове́ческаго спасе́ния: и уме́рый бо живе́т, и возбну́, и злоде́йством твои́м противля́яйся спасает вся́каго правосла́внаго. И ны́не и при́сно и во ве́ки веко́в. Ами́нь. Богородичен: Стра́нное бя́ше пре́жде чу́до, Богоотрокови́це, страда́льческими же свиде́тельствы прия́т ве́ру несумне́нну, и ве́руемое при́сно пребыва́ет чуди́мое, и ве́рне покланя́емое. Песнь 6 Ирмос: Боже́ственное сие́ и всечестно́е, соверша́юще пра́зднество, богому́дрии Богома́тере, прииди́те, рука́ми воспле́щим, от Нея́ ро́ждшагося Бо́га сла́вим. Припев: Святы́й великому́чениче Фео́доре, моли́ Бо́га о на́с. Пости́тися, Спа́се, не мо́гут, дру́зи и сы́нове черто́га Твоего́: Тебе́ бо Жени́ха с Ма́терию и с дру́гом Твои́м учрежда́ют предстоя́ща, и слу́жат. Припев: Святы́й великому́чениче Фео́доре, моли́ Бо́га о на́с. Отступи́ Бо́га спаса́ющаго, отступи́ и от ра́зума злоимени́тый, и киче́нием воста́ на ве́ру: но вме́сто сего́ обре́те великоимени́таго. Сла́ва Отцу́ и Сы́ну и Свято́му Ду́ху. Пострада́в предста́ му́дрший, и сотво́рь до́блий те́пльший, к мучи́телем бо бра́нию, и побе́дою до́бре обучи́вся, ниже́ у́мер отступи́ исправле́ния. И ны́не и при́сно и во ве́ки веко́в. Ами́нь. Богородичен: Изба́вльшеся днесь, Влады́чице, беды́ душетле́нныя, чудесе́м страстоте́рпца Твоего́, по Твоему́ Боже́ственному промышле́нию, благода́ть обои́м возлага́ем. Кондак, глас 8 Ве́ру Христо́ву я́ко щит внутрь прие́м в се́рдце твое́м, проти́вныя си́лы попра́л еси́, многострада́льче, и венце́м небе́сным венча́лся еси́ ве́чно, Фео́доре, я́ко непобеди́мый. Икос На престо́ле све́та носи́маго, благода́рственно ве́рою воспева́ем Тя, я́ко дарова́ние Боже́ственное дарова́л еси́, до́бляго страда́ньми Фео́дора, в житии́ треблаже́ннаго, я́ко побо́рника су́ща и́стины: и́же благочести́вым помышле́нием стяжа́в Христа́, держа́вный бысть победи́тель на ле́стнаго, я́ко непобеди́мый. Песнь 7 Ирмос: Не послужи́ша тва́ри богому́дрии па́че Созда́вшаго, но о́гненное преще́ние му́жески попра́вше, ра́довахуся пою́ще: препе́тый отце́в, Госпо́дь и Бог, благослове́н еси́. Припев: Святы́й великому́чениче Фео́доре, моли́ Бо́га о на́с. Зако́ну рекл еси́ не лежа́ти пра́ведником Твои́м, пра́ведный Влады́ко: те́мже Ма́ти Твоя́, и многочу́дный сей раб Твой, све́тлостию па́мяти, сих днесь зако́ны разоря́ют поще́ния. Припев: Святы́й великому́чениче Фео́доре, моли́ Бо́га о на́с. Коль сла́дкое и вели́кое, и ра́достное ны́нешнее торжество́! е́же му́чеников нам до́блейший и преве́лий ны́не вообрази́, еди́нем чудесе́м от нечи́стых чи́стыя лю́ди Христо́вы соверши́в. Сла́ва Отцу́ и Сы́ну и Свято́му Ду́ху. К зми́ем лю́тым сопроти́вльшагося, и возмо́гшаго на душетле́ннаго же, и оскверня́ющаго одушевле́нная телеса́, венча́им побе́дными пе́сньми, и венце́в похвала́ми. И ны́не и при́сно и во ве́ки веко́в. Ами́нь. Богородичен: Родонача́льник у́бо проуве́дев душетле́нное бра́шно не убеже́: Твои́ же ве́рнии лю́дие от Твоего́ му́ченика преднаучи́вшеся, и избе́гше всепа́губныя пи́щи, с сим, Влады́чице, спаси́тельная Тебе́ жрут. Песнь 8 Ирмос: О́троки благочести́выя в пещи́, рождество́ Богоро́дичо спасло́ есть, тогда́ у́бо образу́емое, ны́не же де́йствуемое, вселе́нную всю воздвиза́ет пе́ти Тебе́: Го́спода по́йте дела́, и превозноси́те Его́ во вся ве́ки. Припев: Святы́й великому́чениче Фео́доре, моли́ Бо́га о на́с. Ра́дости рождество́м испо́лнившая небе́сная и земна́я, вре́менным се́тованием благода́ть благовре́менную подае́т вене́чнику, спле́щущи све́тло пра́зднственная. Припев: Святы́й великому́чениче Фео́доре, моли́ Бо́га о на́с. Суббо́тствуим, челове́цы, днесь, от трудо́в вчера́шних почи́вше, за благослови́вшаго настоя́щий день упокое́нием, и ны́не торжество́м му́ченика. Припев: Святы́й великому́чениче Фео́доре, моли́ Бо́га о на́с. Вои́стинну сия́ пе́рвая в суббо́тах, и суббо́т бы глаго́лалася суббо́та: му́ченическия же благода́ти и си́лы Боже́ственныя испо́лнена, спасе́ния вели́каго воспомина́ние. Сла́ва Отцу́ и Сы́ну и Свято́му Ду́ху. Царя́ Бо́га чи́стыми бра́шны, ца́рствия беззако́ннаго скверне́ния чи́стый упраздни́, и пресла́вным о́бразом чудоде́йства святу́ю седми́цу освяти́. И ны́не и при́сно и во ве́ки веко́в. Ами́нь. Богородичен: Извеща́ет Твое́, Отрокови́це, та́инство му́чеников усе́рдная смерть, я́ко бо Бо́гу ве́ровавше ро́ждшемуся, а́ще и стра́сть во́лею претерпе́, саме́х себе́ до́блии пожро́ша. Песнь 9 Ирмос: Всяк земноро́дный да взыгра́ется ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во. Припев: Святы́й великому́чениче Фео́доре, моли́ Бо́га о на́с. Стека́ется мно́жество отвсю́ду, в сень сведе́ния, и живу́щую благода́ть, предпросия́вшаго в сла́ве всех му́чеников, со Влады́чицею всех велича́ем. Припев: Святы́й великому́чениче Фео́доре, моли́ Бо́га о на́с. Мужа́йся, Христо́ва Це́рковь, и держа́вствуй всу́е борю́щими: Христо́вы бо дру́зи и предстоя́щии о тебе́ пеку́тся, и отстоя́щии я́коже до́блии, ему́же соверша́еши благода́рственная. Сла́ва Отцу́ и Сы́ну и Свято́му Ду́ху. Возмне́вшася дре́вле умре́ти, ве́щи показу́ют жи́ти и по кончи́не, и ве́ры па́ки предста́тельствовати с ра́вною ре́вностию, е́юже богатя́щеся Благоде́теля велича́ем. И ны́не и при́сно и во ве́ки веко́в. Ами́нь. Богородичен: Я́ко Боже́ственную Тя печа́ть, пе́сньми запеча́танную Бо́жию кни́гу налага́ю нося́, и собира́ю похвалы́ в Тебе́, Де́во, си́це прославля́я наипа́че Твоего́ му́ченика. Светилен Венчено́сче свя́те, предстоя́й со А́нгелы Христо́ву ны́не престо́лу, и све́та отту́ду исполня́яйся страсто́носче, мир ми́рови непреста́нно исхода́тайствуй, и нам спасе́ние, благоче́стно светоно́сную па́мять твою́ соверша́ющим, Фео́доре всебога́те, му́чениче преукраше́нне. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Во чре́ве Твое́м Госпо́дь, погиба́ющий мир от тле́ния призва́ти восхоте́в, я́коже ве́дяше, всели́ся, Богоро́дице. Спасе́ние у́бо вси обре́тше, возопии́м Тебе́ а́нгелово, е́же ра́дуйся, Всепе́тая, во всех жена́х благослове́нная: и́бо ра́дость породила́ есй всей вселе́нней.