Канон святому пророку Самуилу, судии Израильскому

Минея, 20 Августа, Кано́н свята́го Глас 4 Песнь 1 Ирмос: Триста́ты кре́пкия,/ Рожде́йся от Де́вы,/ безстра́стия во глубине́/ души́ трича́стное потопи́, молю́ся,/ да Тебе́, я́ко в тимпа́не,/ во умерщвле́нии телесе́/ побе́дное воспою́ пе́ние. Припев: Святы́й проро́че Самýиле, моли́ Бо́га о на́с. Непло́дней мое́й души́ доброде́телей благопло́дие израсти́ти/ твои́ми моли́тва́ми сподо́би, му́дре, непло́дныя прозябе́ние,/ я́ко да твое́ восхвалю́ светоно́сное торжество́ свяще́нными, Саму́иле, пе́сньми. Припев: Святы́й проро́че Самýиле, моли́ Бо́га о на́с. Разве́рзый дре́вле ложесна́ Са́рры и А́ннину моли́тву исполня́ет проявле́нно,/ и непло́дную плодови́ту благода́тию сотвори́, Саму́иле,/ я́ко звезду́, тя из нея́ возсия́ти благоизво́ли. Сла́ва Отцу́ и Сы́ну и Свято́му Ду́ху. Боже́ственную свяще́нно омочи́в, преблаже́нне, оде́жду,/ ду́шу же заря́ми та́йными просвети́л еси́ Ду́ха,/ вся́кой та́йне, Богому́дре, научи́вся/ и, я́ко А́нгел, служи́в Бо́гу Вседержи́телю. И ны́не и при́сно и во ве́ки веко́в. Ами́нь. Богородичен: Сый со Отце́м, я́ко Сын преве́чен, в после́дняя вопло́щся,/ Сын Твой и́стинно бысть, Чи́стая,/ всех же сыноположи́в Бо́гу ве́ры ра́ди, рабо́тавший лю́тому бори́телю. Песнь 3 Ирмос: Не му́дростию, и си́лою, и бога́тством хва́лимся,/ но Тобо́ю, О́тчею Ипоста́сною Му́дростию, Христе́,/ несть бо свят, па́че Тебе́, Человеколю́бче. Припев: Святы́й проро́че Самýиле, моли́ Бо́га о на́с. Высоча́йше Бо́гу прилепи́вся, сла́вне,/ возлю́блен был еси́ от Него́,/ му́дростию Боже́ственною украша́емь и це́лостию удобря́емь. Припев: Святы́й проро́че Самýиле, моли́ Бо́га о на́с. Житие́ а́нгельское на земли́, Саму́иле, показу́я,/ собесе́дующия я́ве А́нгелы име́л еси́, блаже́нне,/ и я́же па́че ума́ науча́ющия тя. Сла́ва Отцу́ и Сы́ну и Свято́му Ду́ху. Све́тло о́ко душе́вное стяжа́в,/ зри́ши вои́стинну да́льная, я́ко настоя́щая, благода́тию,/ проро́к показу́яся Вседержи́теля. И ны́не и при́сно и во ве́ки веко́в. Ами́нь. Богородичен: Из Тебе́ про́йде Иису́с Христо́с воплоща́емь/ и обожи́ нас пло́ти прия́тием, Всенепоро́чная,/ те́мже я́ко Ма́терь Тя Сего́ почита́ем. Седален, глас 3 Зако́на судьба́ми воспита́н, пома́зание че́стно яви́лся еси́,/ я́коже Ааро́н, свяще́нствовав, и, просвети́в се́рдце Ду́хом,/ я́ко настоя́щая, да́льная прови́дел еси́, проро́че честны́й./ Христа́ Бо́га моли́ дарова́ти душа́м на́шим мир и ве́лию ми́лость. Песнь 4 Ирмос: Седя́й в сла́ве на Престо́ле Божества́,/во о́блаце ле́гце/ прии́де Иису́с Пребоже́ственный/ Нетле́нною Дла́нию и спасе́ зову́щия:/ Сла́ва, Христе́, си́ле Твое́й. Припев: Святы́й проро́че Самýиле, моли́ Бо́га о на́с. Изря́дным житие́м священноукраша́емь,/ Бо́жия зако́ны спаси́тельныя вве́рени тебе́ бы́ша,/ Изра́илю возвеща́ти преступа́ющу/ и Милосе́рдаго всегда́ прогне́вающу. Припев: Святы́й проро́че Самýиле, моли́ Бо́га о на́с. Или́й жрец, беззако́ннующим сыно́м, осужда́ется,/ и пра́ведным судо́м Боже́ственныя слу́жбы отлуча́ется,/ свяще́нный же Саму́ил, я́ко послу́шник Зову́щаго, неле́стною душе́ю вво́дится. Припев: Святы́й проро́че Самýиле, моли́ Бо́га о на́с. Зако́нным опра́вданием предстоя́ изря́дно,/ я́коже Ааро́н дре́вле, Всецарю́ служи́л еси́/ и зако́нныя же́ртвы приноси́л еси́,/ прообразу́ющия Христово заколе́ние спаси́тельное. Сла́ва Отцу́ и Сы́ну и Свято́му Ду́ху. Безу́мным лю́дем твои́м, Саму́иле, не пребыва́ющим всех Царя́ в Боже́ственных повеле́ниих,/ помазу́еши манове́нием богоде́льным царя́, я́коже проси́ша,/ рогопосека́юща тех кре́пость безу́мную. И ны́не и при́сно и во ве́ки веко́в. Ами́нь. Богородичен: Недр не истощи́в О́тчих,/ в не́дрех Твои́х я́коже нов Младе́нец восклони́тися благоволи́,/ на воззва́ние, Де́во, душ на́ших, Ему́же зове́м:/ Сла́ва, Христе́, си́ле Твое́й. Песнь 5 Ирмос: Нечести́вии не у́зрят сла́вы Твоея́, Христе́,/ но мы Тя, Единоро́дне,/ Оте́ческия сла́вы Сия́ние Божества́,/ от но́щи у́тренююще,/воспева́ем Тя, Человеколю́бче. Припев: Святы́й проро́че Самýиле, моли́ Бо́га о на́с. Умудри́вся Ду́хом Боже́ственным, из младе́нства служи́тель был еси́ Бо́гу,/ еле́ем, сла́вне, пома́зания цари́ благода́тию помазу́я,/ Боже́ственными манове́ньми. Припев: Святы́й проро́че Самýиле, моли́ Бо́га о на́с. Непоко́рно пребыва́ющу предре́кл еси́ Сау́лу безчи́нная преложе́ния, Саму́иле блаже́нне,/ Боже́ственное хоте́ние и оставле́ние я́ве Боже́ственнаго Ду́ха. Сла́ва Отцу́ и Сы́ну и Свято́му Ду́ху. Беззло́бием всегда́ со изра́ильтяны живы́й,/ злое преложе́ние я́ве облича́ше,/ исправля́я, я́ко свяще́нник Боже́ствен, я́ко проро́к и́стиннейший. И ны́не и при́сно и во ве́ки веко́в. Ами́нь. Богородичен: С на́ми быв за милосе́рдие,/ Спас от крове́й Твои́х свяще́нных па́че ума́, Всенепоро́чная, воплоща́ется/ и Бог и Челове́к Человеколю́бец познава́ется. Песнь 6 Ирмос: Возопи́, прообразу́я погребе́ние тридне́вное,/ проро́к Ио́на, в ки́те моля́ся:/ от тли изба́ви мя, Иису́се, Царю́ сил. Припев: Святы́й проро́че Самýиле, моли́ Бо́га о на́с. Сло́во твое́, Сло́во обожа́емо благода́тию, проявля́ше да́льняя, я́ко близ су́щая,/ Саму́иле проро́че, сосу́де Боже́ственнаго Ду́ха. Припев: Святы́й проро́че Самýиле, моли́ Бо́га о на́с. Возвыша́емь высо́кими виде́нии и дея́ньми,/ я́ко проро́к и Бо́жий свяще́нник Вседержи́теля,/ зако́нными служе́нии очи́щаеши лю́ди, досточу́дне. Сла́ва Отцу́ и Сы́ну и Свято́му Ду́ху. Непотре́бствовася Сау́л, престу́пник быв,/ и Бог тебе́ вме́сто о́наго Дави́да кро́ткаго,/ Саму́иле Богому́дре, повелева́ет пома́зати ма́стию. И ны́не и при́сно и во ве́ки веко́в. Ами́нь. Богородичен: Изба́вися от боле́зней Е́ва, Пренепоро́чная,/ без боле́зни бо Ты родила́ еси́ Христа́ Бо́га на́шего,/ страсти́ всех и боле́зни я́ве исцели́вшаго. Кондак, глас 8 Я́ко многоче́стный дар, пре́жде зача́тия вдан Бо́гу,/ и из мла́да тому́, я́ко А́нгел, послужи́л еси́, всеблаже́нне,/ и сподо́бился еси́ предбу́дущая веща́ти./ Те́мже вопие́м ти:/ ра́дуйся, проро́че Бо́жий Саму́иле, архиере́ю вели́кий. Песнь 7 Ирмос: Ю́ноши три в Вавило́не,/веле́ние мучи́телево на бу́йство прело́жше,/ посреде́ пла́мене вопия́ху:/ благослове́н еси́, Го́споди,/ Бо́же оте́ц на́ших. Припев: Святы́й проро́че Самýиле, моли́ Бо́га о на́с. Вели́к тя ро́ждшая дар всех Царю́ приво́дит, блаже́нне,/ моли́тву свяще́нну соверши́вши и пою́щи:/ Го́споди Бо́же оте́ц на́ших, благослове́н еси́. Припев: Святы́й проро́че Самýиле, моли́ Бо́га о на́с. Внутрь су́ща хра́ма тя и по чи́ну Ааро́ню служа́ща Небе́сному Влады́це,/ Боже́ственная благода́ть, сла́вне Саму́иле, просвети́. Припев: Святы́й проро́че Самýиле, моли́ Бо́га о на́с. Сло́вом Боже́ственным су́диши, блаже́нне, люде́й Изра́илевым,/ сим опра́вдание всегда́ Бо́жие возвеща́я/ и отвраща́я всяк вред враго́в моли́твою́ приле́жною. Сла́ва Отцу́ и Сы́ну и Свято́му Ду́ху. Вся́ку вещь упраздни́в, сла́вне, твоего́ ума́,/ зерца́ло Ду́ха показа́лся еси́, вопия́ немо́лчно:/ благослове́н еси́, Го́споди Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: Яви́лася еси́ неопа́льно ро́ждши, Пречи́стая, я́ко вои́стинну Огнь Божества́./ Те́мже, ве́щныя моя́ стра́сти, Богороди́тельнице, попали́,/ я́ко ми́лостива и благолюби́ва. Песнь 8 Ирмос: Изба́вителю всех Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода. Припев: Святы́й проро́че Самýиле, моли́ Бо́га о на́с. Украси́вся Ааро́нею оде́ждою, во святы́х Свята́я вшел еси́,/ же́ртвами, преблаже́нне, Изра́иля очища́я,/ провозвеща́ющими закла́ние А́гнца спаси́тельное. Припев: Святы́й проро́че Самýиле, моли́ Бо́га о на́с. По́мыслом чи́стым прие́м зарю́, Саму́иле, Ду́ха,/ я́коже проро́к Боже́ствен, провозвеща́еши да́льная, я́ко настоя́щая,/ сего́ ра́ди ве́рно восхваля́ем тя. Припев: Святы́й проро́че Самýиле, моли́ Бо́га о на́с. Избра́н Дави́д бысть в сыне́х Иессе́евых,/ я́коже яви́л еси́, помазу́я того́ ма́стию, Саму́иле, свято́ю и взыва́я:/ благослови́те, вся дела́ Госпо́дня, Го́спода. Сла́ва Отцу́ и Сы́ну и Свято́му Ду́ху. И́же твое́ соверша́юще торжество́, Саму́иле, пра́ведным собесе́дниче,/ твои́ми моли́твами да улучи́м Ца́рство Вы́шнее, вопию́ще:/ благослови́те, вся дела́ Госпо́дня, Го́спода. И ны́не и при́сно и во ве́ки веко́в. Ами́нь. Богородичен: Милосе́рдия Твоего́ мя сподо́би, ми́лостивая и благолюби́вая Влады́чице,/ и гее́нны изба́ви мя и тьмы о́ныя кроме́шния,/ да ве́рою и любо́вию почита́ю Тя. Песнь 9 Ирмос: Е́ва у́бо неду́гом преслуша́ния/ кля́тву всели́ла есть,/ Ты же, Де́во Богоро́дице,/прозябе́нием чревоноше́ния ми́рови Благослове́ние процвела́ еси́./ Тем Тя вси велича́ем. Припев: Святы́й проро́че Самýиле, моли́ Бо́га о на́с. Стоя́ я́ко служи́тель пред лице́м Влады́ки и Бо́га на́шего, блаже́нне,/ непоро́чным житие́м укра́шен, тому́ служи́л еси́,/ Боже́ственныя лучи́ прие́мля и проро́чествуя явле́ннее. Припев: Святы́й проро́че Самýиле, моли́ Бо́га о на́с. Яви́лся еси́ от утро́бы ма́терни, сла́вне, Свята́го Ду́ха сосу́д:/ свяще́нною же проси́яв оде́ждою, Бо́гу угоди́л еси́/ кро́тостию се́рдца, пребога́те, и по́мысла красото́ю. Припев: Святы́й проро́че Самýиле, моли́ Бо́га о на́с. Днесь па́мять твоя́ нам, я́ко со́лнце, Богоно́се, возсия́ лучи́ бога́тых дарова́ний,/ просвеща́ющи ду́ши чту́щих тя, мглу же лю́тых отгоня́щи./ Те́мже тя вси ублажа́ем. Сла́ва Отцу́ и Сы́ну и Свято́му Ду́ху. Взя́тся ко оби́телем светови́дным и просия́л еси́ со́лнца светле́йше,/ ви́диши, я́же ви́дят проро́цы, и апо́столи, и вси пра́веднии,/ обожа́емь прича́стием, Богодохнове́нне./ Те́мже тя вси ублажа́ем. И ны́не и при́сно и во ве́ки веко́в. Ами́нь. Богородичен: Тле́ния не позна́вши му́жеска,/ Нетле́ннаго во утро́бе прия́ла еси́ Сло́ва,/ нас, истле́вшия, избавля́ющаго мно́гими грехи́,/ стра́стию нетле́нныя пло́ти его́, нетле́нная еди́на, Всенепоро́чная. Светилен Саму́ил пет бу́ди,/ пре́жде зача́тия да́нный дар Бо́гу Вы́шнему от ма́тере всеблагосла́вныя,/ и цари́ помазу́яй сей, я́ко иере́й и проро́к.