Канон святому праведному Симеону Богоприимцу

Праведный Симеон Богоприимец Минея, 3 Февраля, Канон Глас 4 Песнь 1 Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́. Припев: Святы́й пра́ведный Симеóне, моли́ Бо́га о на́с. В пра́ведных селе́ниих ра́достно водворя́яся Пра́веднаго Го́спода, Симео́не пра́ведный, и́же боже́ственное твое́ соверша́ющия преставле́ние, оправда́ти моли́, преблаже́нне. Припев: Святы́й пра́ведный Симеóне, моли́ Бо́га о на́с. В зако́не бы́в священноде́тель, свяще́ннейше, Его́же зако́н пропове́да, Младе́нца ви́дел еси́ и естества́ зако́ном, Богоприи́мче, у́мер, к безсме́ртней, ра́дуяся, преше́л еси́ жи́зни. Сла́ва Отцу́ и Сы́ну и Свято́му Ду́ху. Рука́ми держа́щаго вселе́нныя концы́, Деви́ческими носи́ма рука́ми, ви́дел еси́ и, честны́ми твои́ми прие́м объя́тии, Моисе́я вы́шший яви́лся еси́, пребога́те. И ны́не и при́сно и во ве́ки веко́в. Ами́нь. Богородичен: По́лный истощава́ется, Преве́чный начина́ется, Сло́во одебелева́ет, Соде́тель зи́ждется, Невмести́мый вмеща́ется, во чре́ве Твое́м воплоща́емь, Богоблагода́тная. Песнь 3 Ирмос: Я́ко непло́ды роди́ от язы́к Це́рковь, и мно́гое в ча́дех изнемо́же со́нмище, чу́дному Бо́гу на́шему возопии́м: Свя́т еси́, Го́споди. Припев: Святы́й пра́ведный Симеóне, моли́ Бо́га о на́с. Возвы́сився дея́ньми свяще́нными, богоглаго́ливе, я́ко светови́ден сто́лп высо́к, Всесвято́му Ду́ху бы́л еси́, утвержда́яся я́ве, те́мже восхваля́ем тя́. Припев: Святы́й пра́ведный Симеóне, моли́ Бо́га о на́с. Зако́ну Го́спода, разве́рзшаго ложесна́ Деви́ча, и Младе́нца, плотоно́сна, Симео́не, бы́вша, ви́дел еси́, да́рующаго все́м избавле́ние. Сла́ва Отцу́ и Сы́ну и Свято́му Ду́ху. Рука́ми челове́ка созда́вый, вопло́щся, рука́ми твои́ми держи́мь е́сть, освяща́я тя́ я́ве, и к жи́зни бу́дущей проси́вшася, блаже́нне, отпуща́ет тя́. И ны́не и при́сно и во ве́ки веко́в. Ами́нь. Богородичен: Мы́сленную Тя́ клещу́, у́гль нося́щу Боже́ственный, от Твои́х крове́й воплоще́нна па́че ума́ Симео́н я́ко ви́де, Всенепоро́чная, ра́дуяся, ублажа́ше. Седален, глас 3 От Де́вы Тя́ воплоще́нна, Христе́, ра́дуяся, подъя́т свяще́нный Симео́н, — ны́не отпуща́еши, — вопия́, — раба́ Твоего́, Влады́ко! А́нна же непоро́чная, проро́чица и сла́вная, ны́не испове́дание и пе́ние прино́сит Тебе́. Мы́ же, Жизнода́вче, вопие́м Ти́: сла́ва та́ко благоволи́вшему. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: От Де́вы Тя воплоще́нна, Христе́, ра́дуяся, подъя́т свяще́нный Симео́н, –/ны́не отпущаеши, – вопия́, – раба́ Твоего́, Влады́ко./ А́нна же непоро́чная, проро́чица и сла́вная,/ ны́не испове́дание и пе́ние прино́сит Тебе́./ Мы же, Жизнода́вче, вопие́м Ти:/ сла́ва та́ко благоволи́вшему. Песнь 4 Ирмос: Седя́й в сла́ве на Престо́ле Божества́ во о́блаце ле́гце, прии́де Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й. Припев: Святы́й пра́ведный Симеóне, моли́ Бо́га о на́с. Престаре́лся еси́ в ста́рости, ве́рою же обнови́лся еси́, но́ва Младе́нца хотя́ ви́дети, Симео́не, всесоверше́ннаго, обновля́юща ми́р обетша́вший прило́гом ве́тхаго борца́. Припев: Святы́й пра́ведный Симеóне, моли́ Бо́га о на́с. Ублажи́м согла́сно Симео́на блаже́ннаго, я́ко сподо́бльшася ви́дети Бо́га блаже́ннаго, в пло́ть обо́лкшася, я́ко да сотвори́т блаже́нны, окая́нны пре́жде бы́вшия. Сла́ва Отцу́ и Сы́ну и Свято́му Ду́ху. Законода́вца Тя́ ве́м и зако́нных естества́ вопло́щшагося кроме́, зако́н же но́в вве́дшаго, — Симео́н взыва́ше, — Еди́не Го́споди, ны́не отпусти́ мя к жи́зни нетле́нней. И ны́не и при́сно и во ве́ки веко́в. Ами́нь. Богородичен: И́же руко́ю вся́ нося́й, на рука́х носи́мый Присноде́вы, Сию́ херуви́м соде́ла и серафи́м вы́шшу, я́ко роди́тельницу, Ю́же воспои́м и благоче́стно ублажи́м. Песнь 5 Ирмос: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая. Припев: Святы́й пра́ведный Симеóне, моли́ Бо́га о на́с. Ума́ чистото́ю Бо́гу Вседержи́телю, я́ко а́нгел послужи́в, блаже́нне, кро́вными же́ртвами очи́стил еси́ дре́вле лю́ди Изра́илевы, кро́вь спаси́тельную предзна́менав я́сно. Припев: Святы́й пра́ведный Симеóне, моли́ Бо́га о на́с. Самого́ себе́ сотвори́л еси́ хра́м Бо́гу всесвя́т де́лы боже́ственными, богоглаго́ливе. Те́мже я́ко Младе́нца во святе́м хра́ме ви́дел еси́ Бо́га с пло́тию, тя́ преставля́юща к Боже́ственным селе́нием. Сла́ва Отцу́ и Сы́ну и Свято́му Ду́ху. Воспои́м дне́сь, духо́вно лику́юще, вси́ Симео́на Богоприи́мца и с ни́м А́нну целому́друю, проро́ки су́ща Бо́жия, и Сего́ ви́девшия, на́с ра́ди младе́нствовавшаго. И ны́не и при́сно и во ве́ки веко́в. Ами́нь. Богородичен: Не опали́в ложе́сн Твои́х естество́м Неизме́нный, Еди́на херуви́м святе́йши, Челове́к яви́ся, из Тебе́ ражда́емь, и отринове́нныя тле́нием вся́ совокупи́, Богома́ти, Рождество́м Твои́м. Песнь 6 Ирмос: Возопи́, прообразу́я погребе́ние тридне́вное, проро́к Ио́на, в ки́те моля́ся: от тли́ изба́ви мя́, Иису́се, Царю́ си́л. Припев: Святы́й пра́ведный Симеóне, моли́ Бо́га о на́с. Возопи́л еси́, внегда́ ви́дел еси́ Го́спода, Симео́не, я́ко обеща́лся еси́: ны́не раба́ Твоего́, Спа́се, отпусти́, во а́де су́щим все́м Твое́ Боже́ственное возвеща́юща воплоще́ние. Припев: Святы́й пра́ведный Симеóне, моли́ Бо́га о на́с. Украси́лся еси́ и Моисе́я светле́йший бы́л еси́, на ру́ки добро́тою Кра́снаго прии́м, Симео́не ста́рче, на́с ра́ди по на́м Младе́нца бы́вша. Сла́ва Отцу́ и Сы́ну и Свято́му Ду́ху. Во́д тя́ испо́лнена Боже́ственных су́ща и во а́дова до́льная ме́ста сше́дша, ви́девше та́мо су́щии у́зницы, Симео́не, Боже́ственныя росы́ испо́лнишася. И ны́не и при́сно и во ве́ки веко́в. Ами́нь. Богородичен: Улови́ти мя́ всегда́ и́щет вселука́вый, но того́ мя се́тей исхи́ти, Влады́чице, и боже́ственным кро́вом кри́л Твои́х це́ла соблюди́. Кондак, глас 4 Ста́рец дне́сь отреши́тися от ю́з моля́шеся сего́ жития́ тле́ннаго, Христа́ восприя́т на ру́ки, Зижди́теля и Го́спода. Песнь 7 Ирмос: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́. Припев: Святы́й пра́ведный Симеóне, моли́ Бо́га о на́с. Зако́нно Го́споду Вседержи́телю ты́ послужи́л еси́, пра́веден я́ко и́стинно и в зако́не непоро́чен, блаже́нне, бы́в, те́мже пое́ши: препе́тый отце́в Госпо́дь и Бо́г, благослове́н еси́. Припев: Святы́й пра́ведный Симеóне, моли́ Бо́га о на́с. Ра́дость скорбя́щих прии́де, избавле́ние Изра́илю вои́стинну яви́ся, я́ко Младе́нец в хра́ме свое́м, отпусти́ мя к жи́зни бу́дущей, — Симео́н вопия́ше, ра́дуяся. Сла́ва Отцу́ и Сы́ну и Свято́му Ду́ху. За милосе́рдие щедро́т Твои́х претружде́на мя́ зако́на пи́сменем, сля́чена мя́ ста́ростию отпусти́, Спа́се, раба́ Твоего́, я́ко ви́дех Тя́, — Симео́н взыва́ше, — на земли́ нося́ща пло́ть. И ны́не и при́сно и во ве́ки веко́в. Ами́нь. Богородичен: Не истощи́в По́лный пречи́стых не́др ро́ждшаго Отца́, в Твои́х не́дрех, Чи́стая, я́ко Младе́нец седи́т, угото́вая, и́мже восхоте́ уподо́битися, Пречи́стая, свяще́нное я́ве седа́лище. Песнь 8 Ирмос: О́троки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки. Припев: Святы́й пра́ведный Симеóне, моли́ Бо́га о на́с. Овдове́вший ми́р Боже́ственныя сла́вы прише́дшаго невестоукраси́ти Пребоже́ственнаго, вдова́ су́щи, А́нна всехва́льная, и проро́чества благода́тию облиста́емая, просла́ви Его́, и бу́дущее все́м предстоя́щим показа́ше Боже́ственное избавле́ние. Припев: Святы́й пра́ведный Симеóне, моли́ Бо́га о на́с. Зако́нныя же́ртвы приноси́л еси́, А́гнца за милосе́рдие несказа́нное, кро́вь спаси́тельную провозвеща́я издале́ча, блаже́нне свяще́нниче, Его́же воплоще́нна прие́м, Симео́не, просла́вился еси́ па́че Моисе́я и все́х проро́ков. Сла́ва Отцу́ и Сы́ну и Свято́му Ду́ху. Ви́дев Жела́емаго, разреше́ние прия́л еси́ теле́сное, богодохнове́нне и, я́коже зре́лая пшени́ца, преше́л еси́ ко отце́м, сла́вне, воспита́н в ста́рости до́брей. Те́мже твою́ всепра́зднственную па́мять ра́достию душе́вною соверша́ем. И ны́не и при́сно и во ве́ки веко́в. Ами́нь. Богородичен: Я́ко кри́н, я́ко благово́нен ши́пок, я́ко боже́ственное обоня́ние, обре́т Тя́ Сло́во Пребоже́ственное, Пречи́стая Богоневе́сто, и в Твою́ утро́бу всели́ся, благоуха́я на́ше естество́, злосмра́дия испо́лншееся, е́же от греха́, Мари́е Богоро́дице. Песнь 9 Ирмос: Е́ва у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем. Припев: Святы́й пра́ведный Симеóне, моли́ Бо́га о на́с. Че́стны ру́це твои́, вои́стинну прикосну́вшияся, Богоприи́мче, Боже́ственным удесе́м, — прикаса́ющагося гора́м, — я́коже пое́т Дави́д, — и дымя́тся, — блаже́н вои́стинну ты́ бы́л еси́. Те́мже досто́йно восхваля́ем тя́. Припев: Святы́й пра́ведный Симеóне, моли́ Бо́га о на́с. Ра́ка твоя́ источа́ет ве́рным исцеле́ния, па́мять же блаже́нная, сия́ющи па́че со́лнца, и все́х ду́ши просвеща́ющи, и мра́ка мы́сленнаго исхища́ющи, священнотаи́нниче всече́стне. Сла́ва Отцу́ и Сы́ну и Свято́му Ду́ху. Просвеща́ют сия́нием мы́сленным, я́ко со́лнце и луна́ подсо́лнечную, А́нна целому́дренная и проро́чица, ста́рец же Симео́н сла́вный. И́хже ра́ди на́с, Человеколю́бче Го́споди, грехо́вныя тмы́ изба́ви. И ны́не и при́сно и во ве́ки веко́в. Ами́нь. Богородичен: Я́вльшуюся Тя́, Ма́терь Бо́жию, я́ко ви́дев, Богоро́дице, ста́рец рече́, я́коже проро́к: се́ Тво́й Сы́н, на воста́ние и паде́ние мно́гих лежи́т, Влады́чице, и в зна́мение неудобосказу́емое. Светилен Непреме́нне по Ипоста́си в Тебе́, Богороди́тельнице, пло́тию соедини́ся безсе́менно и младе́нствова Сло́во, Его́же на рука́х нося́щи, херуви́мски, я́ко престо́л, ны́не Бо́гу Отцу́ принесла́ еси́, и Симео́н ста́рец, ра́дуяся, прия́т Того́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Ду́хом во святи́лищи предста́в, ста́рец на ру́ки восприя́т зако́на Влады́ку, вопия́: ны́не соу́з мя́ плотски́х разреши́, я́коже ре́кл еси́, с ми́ром: ви́дех бо очи́ма открове́ние язы́ков и Изра́илю спасе́ние.