Канон святому мученику Иоанну Воину (2-й)

Мученик Иоанн Воин Минея, 30 Июля, Други́й кано́н Глас 1 Песнь 1 Ирмос: Вознесу́ Тя, Бо́же, Спа́се мой,/ я́ко воскре́сл еси́ от ме́ртвых,/ попра́в смерть. Припев: Святы́й му́чениче Иоáнне, моли́ Бо́га о на́с. Иису́се, Спа́се наш,/ пода́ждь нам усе́рдие благодари́ти Тя о всем/ и восхвали́ти уго́дника Твоего́, Иоа́нна. Припев: Святы́й му́чениче Иоáнне, моли́ Бо́га о на́с. Страстоте́рпче сла́вне Иоа́нне,/ богому́дрым смы́слом вво́инился еси́ Всетворцу́ Бо́гу,/ победи́ у́бо вся враги́ на́ша. Сла́ва Отцу́ и Сы́ну и Свято́му Ду́ху. Зре́ти удосто́ивыйся Бо́га воплоще́на,/ всехва́льне во́ине, мо́лим тя:/ твои́ми мольба́ми изба́ви ны от всех бед. И ны́не и при́сно и во ве́ки веко́в. Ами́нь. Богородичен: Богора́дованная, Сло́ва Предве́чнаго Пала́то, Мари́е Де́во,/ милосе́рдием Твои́м сердца́ на́ша в ско́рбех увеселя́й о Бо́зе при́сно. Песнь 3 Ирмос: Утвержде́й сло́вом Твои́м вселе́нную,/ я́же не подви́жится,/ утверди́ и на́шу мысль в страх Твой, Влады́ко Го́споди. Припев: Святы́й му́чениче Иоáнне, моли́ Бо́га о на́с. Тебе́, Творцу́ на́шему Бо́гу, во вся́ком обстоя́нии, припа́дающе, мо́лимся:/ му́ченика Твоего́ мольба́ми в во́ли и любви́ Твое́й утверди́ нас. Припев: Святы́й му́чениче Иоáнне, моли́ Бо́га о на́с. Тве́рдым умо́м стал еси́ на правоте́ богозна́ния, Богоблаже́нне Иоа́нне,/ те́мже утвержда́й ду́ши на́ша во Го́споде наде́жду во всем полага́ти. Сла́ва Отцу́ и Сы́ну и Свято́му Ду́ху. По́хоть пло́ти, по́хоть оче́с и го́рдость жития́ презре́в,/ утверди́лся еси́ в любви́ Иису́сове, му́чениче,/ нам в тойжде помо́щник бу́ди. И ны́не и при́сно и во ве́ки веко́в. Ами́нь. Богородичен: Всеблаже́нная Влады́чице,/ утвержда́ющаго вся Христа́ Го́спода поро́ждши,/ в про́мысле Его́ пребыва́ти укрепи́ ны всегда́. Седален, глас 8 Царю́ Небе́сному и Творцу́ веко́в угожда́я при́сно,/ законопресту́пнаго Иулиа́на мучи́теля вся злокова́рныя и богоме́рзкия сове́ты отрази́л еси́, сла́вне,/ и́долом безду́шным же́ртвы возбрани́в твори́ти,/ и та́ко в по́двизе ду́шу твою́ в ру́це Го́споду Бо́гу пре́дал еси́./ Его́же моли́, свя́те Иоа́нне, прегреше́ний оставле́ние нам дарова́ти,/ честву́ющим святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: О Тебе́ ра́дуется, Благода́тная, вся́кая тварь,/ а́нгельский собо́р и челове́ческий род,/ освяще́нный хра́ме и раю́ слове́сный,/ де́вственная похвало́,/ из Нея́же Бог воплоти́ся, и Младе́нец бысть, пре́жде век Сый Бог наш:/ ложесна́ бо Твоя́ престо́л сотвори́/ и чре́во Твое́ простра́ннее небе́с соде́ла./ О Тебе́ ра́дуется, Благода́тная, вся́кая тварь, сла́ва Тебе́. Песнь 4 Ирмос: Разуме́х, Всеси́льне,/ Твое́ смотре́ние/ и со стра́хом просла́вих Тя, Спа́се. Припев: Святы́й му́чениче Иоáнне, моли́ Бо́га о на́с. Ве́лие Твое́, Го́споди, смотре́ние во всем ми́ре,/ ему́же усе́рдно предае́мся,/ Тебе́ со святы́ми моля́щеся. Припев: Святы́й му́чениче Иоáнне, моли́ Бо́га о на́с. По́двиг добр, му́чениче, во страда́нии соверши́в,/ благоразу́мием во стра́се Го́спода прославля́ти помози́ нам. Сла́ва Отцу́ и Сы́ну и Свято́му Ду́ху. Братолю́бне в гоне́нии лю́дем Бо́жиим помога́л еси́,/ страх отве́ргий мучи́телей, Иоа́нне:/ страх напа́стей отве́ржи от нас. И ны́не и при́сно и во ве́ки веко́в. Ами́нь. Богородичен: Всеси́льнаго Цари́ Цари́ца и Ма́ти сподо́билася еси́ бы́ти;/ сподо́би ны сла́вити Его́ к нам в ми́лости смотре́ние. Песнь 5 Ирмос: От но́щи неве́дения просвеще́й концы́,/ просвети́ мя у́тром/ человеколю́бия Твоего́, Го́споди. Припев: Святы́й му́чениче Иоáнне, моли́ Бо́га о на́с. Человеколю́бче Влады́ко, просвеща́й ны в па́мяти моле́бней страда́льца Твоего́/ у́треневати к Тебе́ благогове́инством. Припев: Святы́й му́чениче Иоáнне, моли́ Бо́га о на́с. Просвети́лся еси́, му́чениче Иоа́нне, богодарова́нными чудесы́,/ тем от злых челове́к, тщеты́ и боле́зни сла́вящия тя премени́. Сла́ва Отцу́ и Сы́ну и Свято́му Ду́ху. Светоно́сным у́тром, побежда́я вся душетли́тельныя враги́ до́блественне,/ от ско́рбных тьмы страсте́й во свет ра́дости привлецы́ ны. И ны́не и при́сно и во ве́ки веко́в. Ами́нь. Богородичен: Я́же Бо́га во пло́ти на́шей родила́ еси́, Де́во Пречи́стая,/ све́том Небе́сным осия́тися нам Ему́ моли́ся,/ ми́лость ко всем простира́ющи. Песнь 6 Ирмос: Со Ио́ною вопие́м Ти, Го́споди,/ со гла́сом хвале́ния моля́щеся:/ возведи́ от тли живо́т наш. Припев: Святы́й му́чениче Иоáнне, моли́ Бо́га о на́с. Не преста́нем моли́ти Тя, Всеще́драго Го́спода,/ подви́жуще с на́ми ве́рнаго во́ина,/ изыма́я от грех, всели́ ны в Небе́сную жизнь. Припев: Святы́й му́чениче Иоáнне, моли́ Бо́га о на́с. Хва́лиши, свя́те Иоа́нне, в Вы́шних Бо́га, ве́рно зде служи́в Ему́,/ отню́дуже прибли́жися и нам, тя хва́лящим, во спасе́ние. Припев: Святы́й му́чениче Иоáнне, моли́ Бо́га о на́с. Стра́сти Христа́ ра́ди терпе́в, всехва́льне,/ всера́достное блаже́нство получи́л еси́,/ те́мже и на́ша мольбы́ приими́ и введи́ ны в ра́дость. Сла́ва Отцу́ и Сы́ну и Свято́му Ду́ху. Ве́лию ве́ру стяжа́л еси́ ко Христу́ Бо́гу,/ вели́ки же и да́ры чуде́с Боже́ственных прия́л еси́ от Него́,/ и от де́йствия их прояви́лся еси́./ И ны́не творя́щих твое́ пра́зднество и па́мять/ моли́ся Го́сподеви изба́вити от вся́кия ну́жды и печа́ли. И ны́не и при́сно и во ве́ки веко́в. Ами́нь. Богородичен: Пречи́стая Де́во, от тле́ния пагубоно́снаго мир спа́сшая,/ от вся́каго зла́го обстоя́ния нас изба́ви. Кондак, глас 6 Благочести́ваго во́ина Христо́ва,/ победи́вшаго враги́ душе́вныя и теле́сныя богому́дренно,/ Иоа́нна му́ченика достодо́лжно пе́сньми восхва́лим,/ чудоде́йствуя бо, подае́т оби́льная исцеле́ния стра́ждущим лю́дем/ и мо́лится Го́споду Бо́гу/ от вся́ких бед спасти́ правове́рныя. Икос Кто по́двиги твоя́ и страда́ния ра́ди ве́ры в Го́спода Иису́са/ изрещи́ возмо́жет, прехва́льне Иоа́нне?/ Или́ ки́ими тя увенча́ем похвала́ми,/ ра́ди му́жественнаго твоего́ в зако́не Госпо́дни и во и́стиннем благоче́стии стоя́ния?/ Попра́л бо еси́ вся ко́зни душетли́теля врага́,/ целому́дрием и вся́кими добротворе́нии вооружи́вся;/ бога́тство и сла́ву и по́хоть вре́дную возненави́дев,/ нищету́ и поноше́ние Христо́во возлюби́л еси́,/ стра́ждущим в ско́рбех помога́я./ Те́мже, всели́вся в Небе́сныя кро́вы, дарова́нии пресла́вных чуде́с обогати́лся еси́./ Отту́ду у́бо, блаже́нне, вся, притека́ющия к тебе́, назира́й, по́мощи творя́,/ во е́же от вся́ких бед спасти́ правове́рныя. Песнь 7 Ирмос: Вся дела́ Твоя́ и́стинна/ и пра́ви путие́ Твои́,/ Бо́же оте́ц на́ших. Припев: Святы́й му́чениче Иоáнне, моли́ Бо́га о на́с. Безме́здный врачу́ Иоа́нне,/ исцели́ моли́твами твои́ми неду́ги и стра́сти душ и теле́с Го́сподеви вопию́щих:/ благослове́н еси́, Бо́же оте́ц на́ших. Припев: Святы́й му́чениче Иоáнне, моли́ Бо́га о на́с. Де́ло вся́кия доброде́тели испра́вил еси́/ и же́ртву тя Всетворцу́ возложи́л еси́, вопия́:/ благослове́н еси́, Бо́же оте́ц на́ших. Сла́ва Отцу́ и Сы́ну и Свято́му Ду́ху. Всеблаго́му Бо́гу в чистоте́ моли́твою и посто́м угожда́я, му́чениче,/ даждь нам богоуго́дне зва́ти:/ благослове́н еси́, Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: Всенепоро́чная Де́во, Путь и И́стину, Христа́, ро́ждши,/ руководи́ нас в Го́рнюю жизнь, к Бо́гу оте́ц на́ших. Песнь 8 Ирмос: Царя́ сла́вы и Победи́теля сме́рти,/ Иису́са Назоре́я,/ Того́ превозноси́те во вся ве́ки. Припев: Святы́й му́чениче Иоáнне, моли́ Бо́га о на́с. Царю́ Небе́сный, побе́ду на си́лу вра́жию свято́му Твоему́ му́ченику дарова́вый,/ да́руй и нам во избавле́ние от нужд сла́вити Тя во вся ве́ки. Припев: Святы́й му́чениче Иоáнне, моли́ Бо́га о на́с. Царя́ Го́спода ра́достно, блаже́нне, в Вы́шних узре́л еси́,/ моли́ся, да мы чи́стым се́рдцем Его́ превозно́сим во вся ве́ки. Припев: Святы́й му́чениче Иоáнне, моли́ Бо́га о на́с. Царю́яй во Христе́ во́ине,/ вся ва́рвары победи́ и злоко́зненныя разори́ на нас сове́ты,/ да превозно́сим Го́спода во вся ве́ки. Сла́ва Отцу́ и Сы́ну и Свято́му Ду́ху. Царю́ ца́рствующим и Го́споду госпо́дствующим во́ин изря́ден показа́ся/ и с пра́ведными венце́м венча́ся нетле́нным от руки́ Вседержи́теля Го́спода. И ны́не и при́сно и во ве́ки веко́в. Ами́нь. Богородичен: Цари́це Всемо́щная,/ Царя́ и Бо́га ма́терски моли́,/ да везде́ Его́ превозно́сим и Тя, Госпожу́, пое́м во вся ве́ки. Песнь 9 Ирмос: Служи́тель безпло́тный предста́, глаго́ля Благода́тней:/ Госпо́дь с Тобо́ю!/ Юже велича́ем. Припев: Святы́й му́чениче Иоáнне, моли́ Бо́га о на́с. Го́споди сил, бу́ди с на́ми,/ укрепля́я иера́рхи, иере́и же и вся лю́ди Твоя́, моли́твами свята́го спаса́я,/ да благоче́стно Тя и Богоро́дицу непреста́нно вси велича́ем. Припев: Святы́й му́чениче Иоáнне, моли́ Бо́га о на́с. Моли́ся, свя́те Иоа́нн, Бо́гу в Тро́ице,/ да удосто́ит ве́рующия во Имя Его́/ богому́дренно, я́ко Всетворца́, при́сно велича́ти. Припев: Святы́й му́чениче Иоáнне, моли́ Бо́га о на́с. Твою́ па́мять соверша́ющия, Госпо́день уго́дниче,/ предста́в, от печа́лей свободи́ и напо́й ра́дости,/ во е́же с Богома́терию Го́спода велича́ти. Сла́ва Отцу́ и Сы́ну и Свято́му Ду́ху. А́ще и на земли́ во́инство оста́вив, но Небе́сному Царю́ во́ин нарече́ся Христо́в,/ лука́вых нахо́ды вспять возвраща́я и ве́рным прося́ грехо́в проще́ния./ Те́мже, Иоа́нне блаже́нне, тя воспева́юще, Христа́ велича́ем. И ны́не и при́сно и во ве́ки веко́в. Ами́нь. Богородичен: Облагода́тствованная Мари́е,/ при́зри на вся лю́ди Твоя́ ми́лостию,/ да Тя безконе́чно в ра́дости велича́ем. Светилен Венцено́сче святе, предстоя́й со А́нгелы Христо́ву Престо́лу/ и све́та отту́ду исполня́яйся, страстоте́рпче,/ мир ми́ру моли́твами твои́ми исхода́тайствуй/ и нам спасе́ние, благоче́стно па́мять твою́ соверша́ющим/ и в ско́рбех притека́ющим к тебе́, Иоа́нне всебога́те. Сла́ва Отцу́ и Сы́ну и Свято́му Ду́ху. Позна́нием себе́ сама́го позна́л еси́ Всетворя́щую Вину́, Бо́га,/ в Него́же и уве́ровал еси́/ и, Того́ испове́дав, просвеща́еши мир чудесы́, Иоа́нне Богоблаже́нне. И ны́не и при́сно и во ве́ки веко́в. Ами́нь. Богородичен: Во чре́ве Твое́м Госпо́дь, погиба́ющий мир от тле́ния призва́ти восхоте́в,/ я́коже ве́дяше, всели́ся, Богоро́дице./ Спасе́ние у́бо вси обре́тше, вопие́м Тебе́:/ ра́дуйся, Всепе́тая Де́во, поро́ждши ра́дость всей вселе́нней,/ обра́дуй и нас, от враго́в злоде́йства храня́щи всегда́.