Канон святому благоверному князю Роману Углечскому (2-й)

p1b8h1nktqpea1hr2no0hedk795 - Канон святому благоверному князю Роману Углечскому (2-й) Минея, 3 Февраля, Ин канон Глас 8 Песнь 1 Ирмос: Мо́ре огусти́л еси́, погрузи́вый со ору́жием го́рдаго фарао́на, и лю́ди спа́сл еси́ немо́кренно, Го́споди, и вве́л еси́ я́ в го́ру святы́ни, вопию́щия: пои́м Тебе́, Бо́гу на́шему, пе́снь побе́дную, я́ко просла́вися. Припев: Святы́й благове́рный кня́же Ромáне, моли́ Бо́га о на́с. Иису́су: Преклони́ся недоуме́нию моему́, Христе́ мо́й, преклони́вый снизхожде́нием Твои́м Небеса́, возвы́си к похвале́нию у́м мо́й, Высокоца́рствуяй Небесы́, да́ждь ми́ приноше́ния сло́во, О́тчее Единоро́дное Сло́во, да возмогу́ воспе́ти па́мять Твоего́ уго́дника, его́же Ты́ Са́м, Влады́ко, сла́вна чудесы́ все́й Росси́и показа́л еси́ и и́мже гра́д Тво́й У́глеч просла́вил еси́. Припев: Святы́й благове́рный кня́же Ромáне, моли́ Бо́га о на́с. Раба́ бы́вша мя́ греха́ моли́твами твои́ми свобо́дна покажи́ и души́ моея́ сляче́ние испра́ви, исцели́вый иногда́ сляче́нныя прикоснове́нием честны́я твоея́ ра́ки, благове́рный кня́же Рома́не. Припев: Святы́й благове́рный кня́же Ромáне, моли́ Бо́га о на́с. И́же от Бо́га чудесы́ пресла́вно удивля́емь, и вла́сть от Него́ на ду́хи нечи́стыя прия́л еси́ от челове́к ты́я отгони́ти, от и́же ве́рою тя́ на по́мощь призыва́ющих. Сла́ва Отцу́ и Сы́ну и Свято́му Ду́ху. Троичен: Неразде́льное Существо́м, несли́тное Ли́цы, вси́ ве́рнии, славосло́вити потщи́мся Пренача́льное Боже́ственное Естество́, в трие́х Ипоста́сех разумева́емое и во Еди́ном Божестве́ покланя́емое. И ны́не и при́сно и во ве́ки веко́в. Ами́нь. Богородичен: Ору́жие пламеннообра́зное, храня́щее пре́жде врата́ Еде́мская, не возбраня́ет ны́не вхо́да, воплоти́выйся бо из Тебе́, я́ко Челове́к, И́же естество́м непристу́пный Бо́г па́ки дре́внее дае́т мне́ вхожде́ние. Песнь 3 Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, Еди́не Человеколю́бие. Припев: Святы́й благове́рный кня́же Ромáне, моли́ Бо́га о на́с. Ше́ствие нога́м изменя́шеся и рука́м осяза́ние, животу́ же своему́ ожида́ше сме́ртию поглоще́ну бы́ти предстоя́щая иногда́ жена́ у гро́ба твоего́, свя́те, но еще́ в наде́жди ду́ха ве́рою возопи́ к тебе́: свя́те Рома́не, разреши́ мя́ от ю́зы сея́! и а́бие соверше́нное исцеле́ние получи́. Припев: Святы́й благове́рный кня́же Ромáне, моли́ Бо́га о на́с. Еле́нь, ловцы́ утружде́нный, на исто́чники водны́я жела́ет; утружде́на же бе́ иногда́ жена́ сляче́нием к мы́сленному исто́чнику, ко гро́бу твоему́, кня́же Рома́не, с ве́рою прихо́дит, ты́ же, о́тче, сея́ неду́г здра́вием премени́л еси́. Сла́ва Отцу́ и Сы́ну и Свято́му Ду́ху. Троичен: Неразде́льная Тро́ице, Еди́нице Триипоста́сная, Пренача́льное Боже́ственное Естество́, О́тче, и Сы́не, и Ду́ше Святы́й, пою́щия Тя́ сохрани́ от вся́ких бе́д и искуше́ний. И ны́не и при́сно и во ве́ки веко́в. Ами́нь. Богородичен: Иа́ков ле́ствицу Тя́ предви́де, Пречи́стая Де́во, по не́йже Вы́шний Бо́г сни́де на зе́млю, да обожи́т земноро́дныя и совокупи́т и́х с невеще́ственными Чи́ны и сотвори́т ны́ примире́ны к пре́жде денни́цы Ро́ждшему Его́. Седален, глас 8 Исто́чника чуде́с и ве́рных исцеле́ния, гра́да У́глеча сла́ву и живу́щим в не́м ра́дость, во благове́рных князе́х кня́зя Рома́на пречу́днаго пе́сненно вси́ восхва́лим. Пло́тию бо то́й а́ще и ме́ртв е́сть, но душе́ю живе́т во ве́ки и избавля́ет от неду́г разли́чных прири́чущих к нему́ и мо́лит Христа́ Бо́га прегреше́ний оставле́ние дарова́ти че́ствующим любо́вию святу́ю па́мять его́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Небе́сную две́рь и киво́т, пресвяту́ю го́ру, све́тлый о́блак воспои́м, неопали́мую купину́, слове́сный ра́й, Е́вы воззва́ние, вселе́нныя всея́ вели́кое сокро́вище, я́ко спасе́ние в Не́й соде́лася ми́ру и оставле́ние дре́вних согреше́ний. Сего́ ра́ди вопие́м Е́й: моли́ся Сы́ну Твоему́ прегреше́ний оставле́ние дарова́ти благоче́стно покланя́ющимся всесвято́му Рождеству́ Твоему́. Песнь 4 Ирмос: Проро́к Авваку́м у́мныма очи́ма прови́де, Го́споди, прише́ствие Твое́, те́м и вопия́ше: от ю́га прии́дет Бо́г. Сла́ва си́ле Твое́й, сла́ва снизхожде́нию Твоему́. Припев: Святы́й благове́рный кня́же Ромáне, моли́ Бо́га о на́с. Еди́наго Бо́га па́че все́х на земли́ возлюби́л еси́, свя́те Рома́не, те́мже и са́м от Него́ возлю́блен еси́ и да́р чудотворе́ния по сме́рти твое́й прия́л еси́: разсла́бленным да́руеши встягне́ние и о́чию лиша́емыя благода́тию Ду́ха Свята́го вооча́еши. Припев: Святы́й благове́рный кня́же Ромáне, моли́ Бо́га о на́с. Не исхо́дит то́щь, с ве́рою и́же притека́яй к тебе́, кня́же Рома́не, ниже́ возвраща́ется посра́млен от любве́ душе́вныя моле́ния принося́й к тебе́, но вско́ре прие́млет дарова́ние поле́знаго себе́ проше́ния. Сла́ва Отцу́ и Сы́ну и Свято́му Ду́ху. Троичен: Единоче́стный и Трисо́лнечный Све́те, Безнача́льное Божество́ и конца́ не иму́щее Ца́рство, Бо́же бо́гове, Го́споди, пра́во Тебе́ испове́дающия лю́ди Твоя́ и несумне́нно в Тя́ ве́рующия о́гненнаго осужде́ния и про́чих муче́ний изба́ви. И ны́не и при́сно и во ве́ки веко́в. Ами́нь. Богородичен: Де́ва во ине́х жена́х доне́леже не роди́, по рождестве́ же не де́ва, но уже́ ктому́ жена́. Ты́ же, Пречи́стая Богоро́дице, пре́жде рождества́ Де́ва и в рождестве́ Де́ва, и па́ки по рождестве́ Де́ву же яви́ Тя́ воплоти́выйся из Тебе́ Бо́г. Песнь 5 Ирмос: Го́споди Бо́же на́ш, ми́р да́ждь на́м, Го́споди Бо́же на́ш, стяжи́ ны́; Го́споди, ра́зве Тебе́, ино́го не ве́мы, И́мя Твое́ имену́ем. Припев: Святы́й благове́рный кня́же Ромáне, моли́ Бо́га о на́с. Обстои́му ви́дя свяще́нную ра́ку твою́ на́ми, ве́рными ча́ды твои́ми, и от тебе́ по́мощи прося́щих, свя́те Рома́не, умоли́ Бо́га все́х, е́же изба́витися на́м напа́стей, и иноплеме́нных плене́ния, и вся́ких бе́д, и́миже казни́ми от Него́ быва́ем за грехи́ на́ша. Припев: Святы́й благове́рный кня́же Ромáне, моли́ Бо́га о на́с. Серде́чное о́ко непомраче́но на земли́, свя́те Рома́не, име́л еси́ сла́вою ми́ра сего́ и сего́ ра́ди прозри́л еси́ де́нь Госпо́день вели́кий и стра́шный, в о́ньже судии́ не по сла́ве суди́ми бу́дут, ниже́ суди́мии по оглаго́ланию облича́емы. Сла́ва Отцу́ и Сы́ну и Свято́му Ду́ху. Троичен: Тро́ице Свята́я, Вседержа́вный Бо́же, в Вы́шних трегу́бо песносло́вимый от Безтеле́сных и у́мных слу́г Твои́х, приими́ пе́снь и от бре́нных и веще́ственных на́ших усте́н, ве́рою и со стра́хом приноси́мую держа́ве Твое́й. И ны́не и при́сно и во ве́ки веко́в. Ами́нь. Богородичен: Обветша́вшия ны́ преступле́нием, дале́че от Бо́га отгна́нныя и в сме́рть попо́лзшияся, па́ки возвраща́ет к Себе́ воплоти́выйся из Тебе́ Пребоже́ственный Бо́г, те́м вину́ спасе́ния на́шего ве́мы и славосло́вим Тя́, Пречи́стая Де́во. Песнь 6 Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя́. Припев: Святы́й благове́рный кня́же Ромáне, моли́ Бо́га о на́с. И́же гла́дом ума́ та́ющии, я́коже дре́вле Иа́ков со свои́ми ча́ды вре́менною пи́щею, слы́шавше и мы́ изоби́лие вся́каго благодея́ния, потщи́мся ити́ ко гро́бу чудотво́рца Рома́на, та́йно вопию́щу: и́же в ва́с безу́мен, да уклони́тся ко мне́, и ду́ши своя́, я́ко вре́тища, ве́рою разве́рзше, напо́лнимся Ду́ха благода́ти. Припев: Святы́й благове́рный кня́же Ромáне, моли́ Бо́га о на́с. Не в го́рький и многотру́дный Еги́пет сего́ ра́ди бла́га ити́ на́м, удуже они́ дре́вле в зе́млю чужду́ идя́ху, но ко любе́зней Ма́тери на́шей, Це́ркви, ве́село созыва́ющей ча́да своя́ и глаго́лющей: прииди́те, яди́те хле́б безсме́ртия и пи́йте вино́ безконе́чныя ра́дости, и безу́мен то́й, и́же а́ще кто́ изы́дет отту́ду а́лчен. Сла́ва Отцу́ и Сы́ну и Свято́му Ду́ху. Троичен: А́ще и недосто́йны есмы́, Тро́ице Пребоже́ственная, но оба́че приими́ от на́с пе́ние, ве́рно зову́щих Ти́: Свя́т еси́, О́тче Безнача́льный, Свя́т еси́, Сы́не, Собезнача́льный Отцу́ и Ду́ху, Свя́т еси́, и Ду́ше Святы́й, Равноче́стне Отцу́ и Сопресто́льне Сы́ну, Тро́ице, Еди́ный Бо́же, спаси́ ны́, гре́шныя рабы́ Твоя́. И ны́не и при́сно и во ве́ки веко́в. Ами́нь. Богоро́дичен: Моли́, Пречи́стая Де́во, о на́с, непотре́бных рабе́х Твои́х, все́х Влады́ку и Го́спода, Его́же иногда́, я́ко Сы́на Твоего́, во святы́х Твои́х объя́тиих понесла́ еси́, е́же изба́витися душа́м на́шим от вся́каго преще́ния и получи́ти ми́лость в ча́с стра́шнаго испыта́ния. Кондак, глас 8 Я́ко многосве́тлая звезда́, всепра́зднственная па́мять твоя́ возсия́ дне́сь, благове́рный кня́же Рома́не, созыва́ющи к похвале́нию лю́ди твоя́, пе́сньми славосло́вити честно́е житие́ твое́ и ве́рно торжествова́ти свято́е твое́ успе́ние, в не́мже моли́ся, свя́те, ко Христу́ Бо́гу на́шему, е́же изба́витися на́м от все́х наве́тов вра́жиих, да вси́ зове́м ти́: ра́дуйся, Рома́не пребога́те, но́вый Росси́йский чудотво́рче. Икос Со́н ле́ности души́ моея́ хода́тайствует му́ку, и сласте́й мои́х разжже́ние вжига́ет ми́ ве́чный пла́мень, но́щь же уны́ния моего́ уготовля́ет ми́ тьму́, не иму́щую конца́. Но я́ко скоропослу́шный моли́твенниче ко Христу́ Бо́гу, свя́те Рома́не, и вся́каго бла́га незави́стный да́телю, си́х вино́вных поги́бели бе́д изба́ви мя́ и научи́ мя́ воспе́ти святу́ю па́мять твою́, я́же свы́ше собира́ет мно́жество А́нгел и до́лу созыва́ет к похвале́нию челове́ки, да с ни́ми и а́з возглаго́лю, зовы́й тебе́ сицева́я: ра́дуйся, на похвалу́ от Бо́га оте́честву твоему́ да́нный; ра́дуйся, от младе́нства в сосу́д Ду́ха Свята́го произбра́нный; ра́дуйся, са́де при вода́х Ева́нгельских насажде́нный; ра́дуйся, Христо́вых повеле́ний после́дователю всеусе́рдный; ра́дуйся, апо́стольских преда́ний и́стинный храни́телю; ра́дуйся, святы́х жития́м до́брый ревни́телю; ра́дуйся, от Бо́га в кня́зя гра́ду У́глечу да́нный; ра́дуйся, от Него́ вся́кими благи́ми де́лы одаро́ванный; ра́дуйся, я́ко и по преставле́нии чудесы́ гра́д тво́й назира́еши; ра́дуйся, я́ко от неду́гов с ве́рою приходя́щих к тебе́ избавля́еши; ра́дуйся, гра́ду на́шему У́глечу хвало́; ра́дуйся, от враго́в ему́ необори́мое забра́ло; ра́дуйся, Рома́не о́тче, но́вый Росси́йский чудотво́рче. Песнь 7 Ирмос: Халде́йская пе́щь, огне́м распала́емая, ороша́шеся Ду́хом, Бо́жиим предстоя́нием, о́троцы поя́ху: благослове́н еси́, Бо́же оте́ц на́ших. Припев: Святы́й благове́рный кня́же Ромáне, моли́ Бо́га о на́с. Обыдо́ша, я́ко пче́лы со́т, страсте́й прило́ги смире́нную мою́ ду́шу, и душетле́нными сластьми́, я́ко о́стны, отвсю́ду бодо́м е́смь, но я́же к Бо́гу моли́твами твои́ми, свя́те Рома́не, от си́х зо́л изба́ви мя́, да, ра́дуяся, воспою́ ко Просла́вльшему тя́: благослове́н еси́, Бо́же оте́ц на́ших. Припев: Святы́й благове́рный кня́же Ромáне, моли́ Бо́га о на́с. Не сме́рть, но со́н непщу́ем бы́ти есте́ственных твои́х соу́з разреше́ние. А́ще бо и измени́лся еси́ те́лом, но душе́ю живе́ши во ве́ки и избавля́еши от лю́тых ко Христу́ взыва́ющих: благослове́н еси́, Бо́же оте́ц на́ших. Сла́ва Отцу́ и Сы́ну и Свято́му Ду́ху. Троичен: А́нгелы немо́лчно в Вы́шних песносло́вимый Бо́же, Триипоста́сне Вседе́телю, приими́ пе́ние и от на́с, недосто́йных рабо́в Твои́х, ве́рно Тебе́ пою́щих: благослове́н еси́, Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: Херуви́мский престо́л показа́лася еси́, Де́во Пречи́стая, во объя́тиих Твои́х носи́ла еси́ Невмести́маго все́ми и Неудобозри́маго А́нгельскима очи́ма, Того́, Чи́стая, я́ко Сы́на Твоего́ и Бо́га на́шего, моли́ спасти́ пою́щих Тя́. Песнь 8 Ирмос: А́нгели и Небеса́, на Престо́ле сла́вы Седя́щаго и я́ко Бо́га непреста́нно Сла́вимаго благослови́те, по́йте и превозноси́те Его́ во ве́ки. Припев: Святы́й благове́рный кня́же Ромáне, моли́ Бо́га о на́с. А́нгелы Небе́с свы́ше собира́ет свята́я па́мять твоя́ и на земли́ челове́ком чудеса́ твоя́ повелева́ет любоче́ствовати, чудотво́рче Рома́не, и пе́сньми хвали́ти сла́вное успе́ние твое́. Припев: Святы́й благове́рный кня́же Ромáне, моли́ Бо́га о на́с. Гра́д тво́й, свя́те Рома́не, соблюди́ от вся́ких зо́л и лю́ди, живу́щия в не́м, враго́м стра́шны и нерабо́тны яви́, ору́жие же, изощре́нная на ны́, вонзи́ в сердца́ враго́в, да тя́, кня́же, похваля́ем, защи́тника на́шего. Сла́ва Отцу́ и Сы́ну и Свято́му Ду́ху. Троичен: Еди́ный Бо́же, в Тро́ице Ипоста́сей пева́емый, возьми́ бре́мя от мене́ неудобоноси́мое прегреше́ний и, я́ко Благоутро́бен, поми́луй пою́щия Тя́ и превознося́щая во вся́ ве́ки. И ны́не и при́сно и во ве́ки веко́в. Ами́нь. Богородичен: Роди́выйся из Тебе́ Бо́г Безле́тный благоволе́нием Отца́ Безнача́льнаго и соде́йствием Свята́го Ду́ха дарова́ Тя́ ми́ру избавле́ние и спасе́ние пою́щим честно́е Богорожде́ние Твое́ и превознося́щим во вся́ ве́ки. Песнь 9 Ирмос: Чу́жде ма́терем де́вство, и стра́нно де́вам деторожде́ние: на Тебе́, Богоро́дице, обоя́ устро́ишася. Те́м Тя́, вся́ племена́ земна́я, непреста́нно велича́ем. Припев: Святы́й благове́рный кня́же Ромáне, моли́ Бо́га о на́с. Многожела́нно лю́бящий Небе́сную сла́ву, прииди́те, взыгра́им, веселя́щеся, и во хвале́нии просла́вим чу́днаго в сове́тех и стра́шнаго в де́лех Го́спода, венча́юща по́честьми уго́дников Свои́х. Припев: Святы́й благове́рный кня́же Ромáне, моли́ Бо́га о на́с. А́ще и непотре́бна мене́ раба́ и в небреже́нии ижди́вша жи́знь мою́, дерзну́вша принести́ к тебе́ но́вое сие́ моле́ние, не возгнуша́йся, рабе́ Жива́го Бо́га, от предложе́ния бо души́ принесо́х тебе́ сие́, е́же и прии́м, пребога́те Рома́не, пою́щих тя́ свы́ше назира́й. Сла́ва Отцу́ и Сы́ну и Свято́му Ду́ху. Троичен: Не рожде́нна, но Безнача́льнаго Отца́, рожде́нна же от Него́ Собезнача́льна Сы́на и исходя́ща Свята́го Ду́ха, Трисия́тельное Ипоста́сьми, сра́сленное же Божество́м влады́чество, вся́ племена́ земна́я, велича́ем. И ны́не и при́сно и во ве́ки веко́в. Ами́нь. Богородичен: А́ще и недосто́йне принесо́х Ти́ таково́е мои́х слове́с изви́тие, Ма́тери Ада́мова Соде́теля, но приими́ сие́ с любо́вию, Пречи́стая, и принеси́ о мне́ моле́ние ко всецарю́ющему Сы́ну Твоему́ и Бо́гу, да обря́щу от Него́ ми́лость в де́нь стра́шнаго слововоздая́ния. Светилен Сла́вно торжеству́ет гра́д У́глеч в благонаро́читый де́нь твоея́ па́мяти, благове́рный кня́же Рома́не, и све́тло красу́ется це́рковь, в не́йже лежи́т честна́я ра́ка твоя́, ве́дущи во све́те лица́ Бо́жия сла́вы предстоя́ща тя́, Ему́же предстоя́, и на́с помина́й. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: А́нгелов удивле́ние, апо́столов сла́во, похвало́ му́чеников, утро́бо пречи́стая, Бо́га ро́ждшая, кади́льнице чисте́йшая невеще́ственнаго у́гля, честно́е селе́ние Божества́, в Ню́же О́тчим благоволе́нием Сы́н всели́ся, и Ду́х Святы́й Богоро́дицу Тя́ соде́ла.