Канон святителю Тихону Амафунтскому

Пе́снь 1. Ирмо́с: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща. Припев: Святи́телю, о́тче Ти́хоне, моли́ Бо́га о на́с. Виде́нии па́че ума́ исполня́емь, Ти́хоне блаже́нне, и отту́ду Боже́ственныя зари́ насыща́яся, пода́ждь пою́щим тя́ благода́тный гла́с, и́мже яви́мся досто́йни твоя́ доброде́тели пове́дати. Прие́мся пути́ лу́чшаго от ю́ности, все́ прароди́тельное име́ние, я́коже пра́х, ми́мо те́кл еси́ и, ни́щим разда́в, воздая́ние обре́л еси́ стори́цею, глаго́лом, блаже́нне, ве́ровав Го́спода твоего́. И́же в Вы́шних почива́яй се́рдце твое́ доброде́телей до́м обре́т, всели́ся и в тебе́ упоко́ися: со Отце́м бо, я́коже рече́, оби́тель в тебе́ сотвори́, предочище́ну Ду́хом. Богоро́дичен: Бо́г Челове́к бы́сть из утро́бы Твоея́, Пречи́стая, и Де́ву па́ки Тя́ по рождестве́ сохрани́, естество́ же обожи́в, е́же подо́бию сопроти́вно, даде́ пе́рвое достоя́ние. Пе́снь 3. Ирмо́с: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́ я́ко не́сть свя́т, па́че Тебе́, еди́не Человеколю́бче. Зла́то и сребро́, я́коже зе́млю попира́емую, вмени́л еси́ и, я́ко уме́ты, мирску́ю сла́ву, неукло́нно бо тво́й у́м возве́л еси́ к нетле́нным, я́же и получи́в, всели́лся еси́, Ти́хоне Богому́дре пребога́те. Я́ко да лу́чшую жи́знь и ве́чно пребыва́ющую получи́ши, свяще́нный Ти́хоне, преоби́дел еси́ жи́знь тле́нную, му́чениче, произволе́нием все́м де́лу са́м себе́ вда́в. Стоя́л еси́ на суди́щи иногда́ мучи́тельсте, испове́дая Христа́ Царя́ со дерзнове́нием, не ужаса́яся ра́н, ни сме́рти, чу́дне, враги́ вспя́ть твои́ми глаго́лы улови́л еси́. Богоро́дичен: Не отри́нул еси́, Христе́, облещи́ся в смердя́щаго и дале́че Тебе́ бы́вша грехо́м, но от ложе́сн прие́м Деви́ческих нищету́ мою́, боготвори́ши и спаса́еши за мно́гую бла́гость. Седа́лен, гла́с 4. Улучи́ти жела́я ве́чную жи́знь, от страсте́й очи́стил еси́ твою́ ду́шу вои́стинну, Богому́дре о́тче на́ш. Те́мже свяще́ния прия́л еси́ зарю́, дарова́ния исцеле́ний излива́еши ве́рою к покро́ву твоему́ притека́ющим, Ти́хоне блаже́нне. Богоро́дичен: Еди́на, ро́ждшая Творца́ всему́, еди́на, украси́вшая челове́чество Рождество́м Твои́м, Богоневе́сто, изба́ви мя́ от се́ти льсти́ваго врага́, поста́ви мя́ на ка́мени Христо́вых хоте́ний, Того́ моля́щи приле́жно, Его́же воплоти́ла еси́. Крестобогоро́дичен: Де́во Пренепоро́чная, Ма́ти Христа́ Бо́га, ору́жие про́йде Твою́ пресвяту́ю ду́шу, егда́ распина́ема ви́дела еси́ во́лею Сы́на и Бо́га Твоего́. Его́же, Благослове́нная, моля́щи не преста́й проще́ние прегреше́ний на́м дарова́ти. Пе́снь 4 Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче. Прие́м, о́тче, кре́пость Ду́ха, непобеди́м яви́лся еси́ и неутоли́м и укрепля́еши, я́коже воево́да, во́ины, ко устремле́нию призыва́я. Те́мже и без кро́ве твою́ побе́ду поста́вль, муче́ния вене́ц прия́л еси́. Освя́щся, Ти́хоне, Бо́гу, соверша́я свяще́нныя зако́ны, пожи́л еси́, а не я́коже ная́тый па́стырь, но по ста́де ду́шу твою́ полага́я. Те́мже, во́лки уби́в, к па́жити живоно́сней Христо́во наста́вил еси́ ста́до. Твою́ честну́ю вои́стинну почита́ет па́мять Ки́прский о́стров, лику́я со все́ю земле́ю, и е́же в не́м излия́нием чуде́с пове́дая, приложи́ к виде́нию ны́не едина́че зре́ти хотя́щим са́д пресла́внаго прозябе́ния. Богоро́дичен: Све́т от Све́та, просия́в безле́тно, Сы́не Оте́чь, в после́дняя от ложе́сн проше́л еси́ Деви́ческих, всего́ Ада́ма, дре́вле умерщвле́ннаго, Собо́ю исправля́я. Те́мже Твою́ Ма́терь, Богоро́дицу вои́стинну, чту́ще, ве́рнии, пропове́даем. Пе́снь 5. Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тьма́, окая́ннаго? Но обрати́ мя и к све́ту за́поведей Твои́х пути́ моя́ напра́ви, молю́ся. И́стиннаго виде́ния, сла́вне, бы́в, Ти́хоне, испо́лнен, тщи́я му́дрости рача́щия обличи́л еси́, де́монскую пре́лесть отгоня́, и ба́сни вся́, и ки́прская дела́ ме́рзская. Чи́сто житие́ име́я, е́же па́че ума́ де́лы соверша́я, всеосвяще́нным о́бразом трапе́зе Боже́ственней предста́ Христо́ве. Те́мже моли́твами твои́ми, Богому́дре Ти́хоне, де́монския хра́мы опрове́ргл еси́. Распя́тся, я́коже Па́вел, ми́ру, и ми́р распя́, пребога́те, себе́, не жи́л еси́ пло́ти, но Бо́гу и Ду́ху, Богоно́се Ти́хоне. Те́мже улучи́л, и́хже жела́л еси́, и на́с, твои́х рабо́в, помяни́. Богоро́дичен: Неискусобра́чная яви́лася еси́ Ма́ти, светле́йши со́лнца: кто́ бо от ве́ка слы́ша Де́ву доя́щу? На Тебе́ же вся́ боголе́пно, Де́во Ма́ти, устро́ишася, ро́ждшей Зижди́теля Твоего́. Пе́снь 6. Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́. Де́монское сплете́ние от твоего́ ста́да отгоня́, чу́дне, и и́дольскую прогоня́ ле́сть многобо́жную, стра́шен показа́лся еси́ сопроти́вным, Богоглаго́ливе Ти́хоне прему́дре. Просла́ви тя́ Бо́г, И́же тобо́ю просла́вленный, в зна́мениих стра́шна, в чудесе́х вели́ка на́м дарова́в, Богоно́се Ти́хоне, ве́рно тя́ блажа́щим. Освяти́л еси́ твою́, му́дре, жи́в, честну́ю зе́млю и, преше́д от нея́ ко прия́тию Небе́сному, чудесы́ просла́вил еси́ пресла́вными, Ти́хоне, Влады́це дру́же и́скренний. Богоро́дичен: Умерщвле́ния ми́ пло́д, и́же дре́вле естество́м в раи́, жи́зни же Ты́ пло́д, Боже́ственный ра́й, Богоро́дице, процвела́ еси́, и́мже пита́яся, не ктому́ сме́рти порабоще́н бу́ду. Конда́к, гла́с 3. В по́стничестве, свя́те, боголюбе́зном пребы́в, Уте́шителеву си́лу с высоты́ прия́л еси́ и́дол низложи́ти пре́лести, лю́ди же спасти́, де́моны отгна́ти, неду́ги исцеля́ти. Сего́ ра́ди почита́ем тя́ я́ко Бо́жия дру́га, Ти́хоне блаже́нне. Пе́снь 7. Ирмо́с: Халде́йская пе́щь, огне́м распала́емая, ороша́шеся ду́хом, Бо́жиим предстоя́нием, о́троцы поя́ху: благослове́н еси́, Бо́же оте́ц на́ших. Уста́ Боже́ственная бы́в, челове́ки от недосто́инства ты́ досто́йны соде́лал еси́, многочу́дне Ти́хоне. Те́мже тя́ Христо́с чудесы́ и по кончи́не вои́стинну просла́ви. В жела́нии бы́в о́нех наде́жд, всего́ мирска́го, о́тче, пристра́стия му́дре отре́клся еси́. Те́мже и провозвести́л еси́, я́коже проро́к, му́дре Ти́хоне, твою́ кончи́ну. Соше́дшеся, празднолю́бцы, та́йными виде́нии Ки́пр про́йдем и са́да де́лание пресла́вно ви́дим, от него́же ми́р объе́млет чи́сто спасе́ние. Богоро́дичен: Пло́д чре́ва Твоего́, Богоро́дице Де́во, О́наго прича́щшимся безсме́ртие источа́ет: Е́вин бо до́лг Ты́ разреши́ла еси́, Бо́га ро́ждши. Пе́снь 8. Ирмо́с: Седмери́цею пе́щь халде́йский мучи́тель Богочести́вым неи́стовно разжже́, си́лою же лу́чшею спасе́ны, сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки. Свяще́ннейшу истка́л еси́ оде́жду твою́, прехва́льне Ти́хоне, доброде́телей укра́шь добро́тами, те́мже и явле́ние, я́коже от благово́ния, сказу́я, твою́ кончи́ну су́щим о́крест тебе́ провозвеща́я, сла́вити Спа́са устроя́л еси́, блаже́нне: Христа́ превозноси́те во ве́ки. Зако́н телесе́ забы́в, я́коже безпло́тен, те́кл еси́, иде́же вене́ц тебе́ Вы́шняго зва́ния, Богому́дре, угото́вася: не бо́ пло́ти и кро́ви, Ти́хоне, обеща́лся еси́ пожи́ти. Те́мже добро́ты зри́ши Христо́ва Ца́рства, с Ни́м ца́рствуя во вся́ ве́ки. Победоно́сец бы́л еси́ на вся́ враги́ Христо́вы, со́вестным муче́нием держа́лся еси́ и, нра́вом жря́ себе́ во́льным, Ти́хоне му́дре, пред все́ми мучи́тели вопия́л еси́: Христо́с Бо́г е́сть, и бого́в лжеиме́нных па́мять да поги́бнет во ве́ки. Богоро́дичен: Пресвята́я Влады́чице, ми́ру Помо́щнице, ско́рбных кре́пкое прибе́жище, еди́на Засту́пнице су́щих в ну́ждах рабо́в Твои́х, Твое́ достоя́ние изми́ от бе́д и скорбе́й разли́чных, да ве́рою вопие́м: ра́дуйся, ми́ра ра́досте и спасе́ние. Пе́снь 9. Ирмо́с: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от Деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем. Пе́ние тебе́, Ти́хоне, свяще́нно, от усте́н недосто́йных приноси́мо, приими́, воздая́ние подава́я, грехо́в избавле́ние моли́твами твои́ми к Бо́гу: хода́тая бо тя́ вси́ предлага́ем, чту́щии твою́ ве́рно па́мять. Пома́за тя́ Ду́х Чи́стый и Пресвяты́й еле́ем ра́дости, пресла́вне, дарова́ний мно́жеством украси́, и ца́рствовати с Ни́м сла́вно сподо́бися, Ти́хоне всеосвяще́нне, свяще́нников удобре́ние и похвала́. О, твои́х, Ти́хоне свяще́нне, благода́ти чуде́с! Не мо́жет сказа́ти язы́к челове́чь ви́димое: от невла́жна бо прозябе́ния ло́знаго пе́рвее, ны́не ско́рым манове́нием пресла́вно твори́т гре́зн зре́л. Побе́ды мне́ на стра́сти моли́твами твои́ми пода́ждь, молю́ся, и сподо́би улучи́ти мя́, Ти́хоне, человеколю́бия Бо́жия и благи́х наслажде́ния и красоты́ Его́ прия́ти, любо́вию те́пле блажа́щаго. Богоро́дичен: Спаси́ мя, Ма́ти Бо́жия, Я́же ми́рови спасе́ние ро́ждшая, моли́твами Твои́ми от многообра́зных находя́щих ми́ и многоплете́нных искуше́ний, на Тя́ бо наде́жду спасе́ния моего́ возложи́х ве́рно, ра́б Тво́й.