Канон священномученику Феодоту, епископу Киринейскому

Священномученик Феодот Киринейский, епископ Минея, 2 Марта, Кано́н, его́же краегране́сие: Бо́жие да́ние был еси́ ле́потно, блаже́нне Глас 4 Песнь 1 Ирмос: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л е́сть. Припев: Священному́чениче Феодо́те, моли́ Бо́га о на́с. Бог твоя́ к Нему́ движе́ния, му́чениче, напра́ви,/ Его́же честны́я соблю́д за́поведи,/ иера́рх был еси́/ и муче́ния кро́вию озари́лся еси́, явле́ннейше. Припев: Священному́чениче Феодо́те, моли́ Бо́га о на́с. Боже́ственне и благоче́стне пожи́в,/ пло́ти движе́ния по́стническими умертви́в по́двиги/ и живо́т прие́м,/ иера́рхов удобре́ние, му́чеников исполне́ние. Сла́ва Отцу́ и Сы́ну и Свято́му Ду́ху. Всели́вся в прему́дрое се́рдце твое́ Дух Святы́й,/ от пеле́н, преподо́бне, пра́ва, сострада́тельна тя, и ти́ха,/ и иера́рха Боже́ственна, му́чениче, показа́, Феодо́те. И ны́не и при́сно и во ве́ки веко́в. Ами́нь. Богородичен: Бя́ше порабоще́но пе́рвее пре́лестию, Чи́стая, челове́ческое естество́ лука́вне,/ Христа́ же ро́ждши, Ты свобо́ду улучи́,/ велему́дренно Тя сла́вящее. Песнь 3 Ирмос: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние. Припев: Священному́чениче Феодо́те, моли́ Бо́га о на́с. Слез твои́х стена́ньми, и крове́й пото́ки угаси́л еси́ пре́лести лю́тое у́глие,/ му́чениче святи́телю Феодо́те. Припев: Священному́чениче Феодо́те, моли́ Бо́га о на́с. Житие́ твое́ чи́стое показа́в,/ священноде́теля Боже́ственна и и́стинна свиде́теля тя страсте́й Христо́вых соде́ла. Сла́ва Отцу́ и Сы́ну и Свято́му Ду́ху. Среди́ суди́ща стоя́/ и уязвля́емь лю́тыми ра́нами,/ Христо́ва И́мене, му́чениче, не отве́рглся еси́, Феодо́те. И ны́не и при́сно и во ве́ки веко́в. Ами́нь. Богородичен: Уврачу́й мой ум,/ изнемо́гший прило́ги, Пречи́стая, лука́ваго зми́я/ и греху́ рабо́тающий. Седален, глас 4 Священнонача́льства оде́жду светле́йшу/ крове́й твои́х омоче́ньми соде́лал еси́,/ на Небеса́ всели́вся, Феодо́те,/ ви́дя, Его́же возжеле́л еси́ чи́стою мы́слию./ Те́мже твою́ сла́вим всесвяще́нную па́мять и взыва́ем:/ помяни́ нас, со дерзнове́нием к Бо́гу предстоя́й. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Нечи́стых помысло́в мои́х мно́жество и безме́стных мы́слей обурева́ния/ кто изрещи́ мо́жет, Всенепоро́чная?/ настоя́ния же безпло́тных враг мои́х кто испове́сть и сих зло́бу?/ Но Твое́ю мольбо́ю, Блага́я, сих мне всех избавле́ние да́руй. Песнь 4 Ирмос: Вознесе́на Тя ви́девши Це́рковь на Кресте́,/ Со́лнце пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди. Припев: Священному́чениче Феодо́те, моли́ Бо́га о на́с. Сокруша́емо те́ло твое́ ра́нами,/ по́мысл тверде́йший и вои́стинну, му́чениче, крепча́йшь соде́ловаше, пою́ща:/ сла́ва си́ле Твое́й, Го́споди. Припев: Священному́чениче Феодо́те, моли́ Бо́га о на́с. Распаля́емь любо́вию Влады́чнею,/ я́же от ран терпе́л еси́ боле́зни люте́йшия,/ я́коже ино́му стра́ждущу,/ сам пребыва́л еси́ велича́йший в му́ченицех, Феодо́те. Сла́ва Отцу́ и Сы́ну и Свято́му Ду́ху. Претерпе́л еси́ му́ки, Богому́дре о́тче, прибли́жившися те́лу,/ воздая́ния бо пребыва́ющая ви́дел еси́ ума́ чистото́ю,/ облегча́ющая боле́зни твоя́. И ны́не и при́сно и во ве́ки веко́в. Ами́нь. Богородичен: Светле́йшая пала́то Влады́ки, Пресвята́я Богоро́дице,/ хра́мы нас покажи́ Свята́го Ду́ха,/ в хра́ме Твое́м святе́м хвалу́ Го́сподеви принося́щия. Песнь 5 Ирмос: Ты, Го́споди, мой Свет,/ в мир прише́л еси́,/ Свет святы́й, обраща́яй из мра́чна неве́дения/ ве́рою воспева́ющий Тя. Припев: Священному́чениче Феодо́те, моли́ Бо́га о на́с. Возвыша́емь, му́дре, на дре́во, Феодо́те,/ претерпева́л еси́ тверде́йше терза́ния пло́ти твоея́,/ вельми́ удивля́емь. Припев: Священному́чениче Феодо́те, моли́ Бо́га о на́с. Ви́сим, строга́ния терпе́л еси́ теле́сная, Феодо́те,/ Влады́ку укрепля́ющаго име́яй/ и ве́рою тя утвержда́юща. Сла́ва Отцу́ и Сы́ну и Свято́му Ду́ху. Кро́вными омоче́ньми обагри́в, Феодо́те блаже́нне, оде́жду твою́ свяще́нную,/ светле́йшу показа́л еси́. И ны́не и при́сно и во ве́ки веко́в. Ами́нь. Богородичен: Зачала́ еси́ Бо́га, бы́вша Челове́ка, о Влады́чице!/ Сего́ ра́ди, ро́ди родо́в, Тя непреста́нно ублажа́ем. Песнь 6 Ирмос: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею кро́вию. Припев: Священному́чениче Феодо́те, моли́ Бо́га о на́с. Всажде́н был еси́ в темни́цу, я́ко злоде́й, Феодо́те,/ храни́тель сый Боже́ственных Влады́ки, сла́вне, повеле́ний,/ Боже́ственное твое́ пра́зднество вельми́ уясни́вшаго. Припев: Священному́чениче Феодо́те, моли́ Бо́га о на́с. Стоя́л еси́ пред суди́щем непра́ведных, су́дим,/ и осужда́я челове́ки, беззако́ннующия всу́е/ и предпочита́ющии непра́вду, святи́телю Богому́дре, па́че пра́вды. Сла́ва Отцу́ и Сы́ну и Свято́му Ду́ху. Во́лны свире́пых мук разруши́л еси́,/ я́коже не́кий ка́мень, всеблаже́нне,/ возше́д восхожде́нием твоего́ се́рдца к Ка́меню краеуго́льному – Христу́ Бо́гу. И ны́не и при́сно и во ве́ки веко́в. Ами́нь. Богородичен: Всели́вся во чре́во Твое́, Христо́с Бог наш/ в челове́цех живу́щий грех, Пречи́стая, изгоня́ет/ и сво́йственный Себе́ человеколюбе́зно соде́ловает. Кондак, глас 3 Мо́ря злове́рие обличи́л еси́,/ и и́дольскаго безбо́жия ле́сть ве́рою правове́рия уязви́л еси́/ и, всесожже́ние Боже́ственное быв,/ чудоде́йствием ороша́еши концы́,/ о́тче святи́телю Феодо́те, Христа́ Бо́га моли́/ дарова́ти нам ве́лию ми́лость. Песнь 7 Ирмос: В пещи́ авраа́мстии о́троцы перси́дстей/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди. Припев: Священному́чениче Феодо́те, моли́ Бо́га о на́с. Боже́ственною, о́тче, распаля́емь любо́вию Ду́ха,/ на одр разжже́н весьма́ возложе́н, не опали́м пребы́л еси́,/ благослове́н еси́, Бо́же мой, зовы́й, и Го́споди. Припев: Священному́чениче Феодо́те, моли́ Бо́га о на́с. Я́коже ино́му сам пребыва́я стра́ждущу,/ ве́сь бо умо́м, блаже́нне, к Бо́гу прише́д,/ сече́ния же и жже́ния ты небре́гл еси́,/ не чу́вствуя Христо́вым манове́нием. Сла́ва Отцу́ и Сы́ну и Свято́му Ду́ху. Прему́дростию слове́с безслове́сия су́щия, блаже́нне, испо́лнены посреди́ суди́ща обличи́л еси́,/ проявле́нно злоче́стием неду́говавшия/ и па́че сотво́ршаго де́монския изво́лившия куми́ры. И ны́не и при́сно и во ве́ки веко́в. Ами́нь. Богородичен: С Вы́шним ликостоя́нием, вси, Ма́ти Бо́жия, ра́дуйся, Тебе́ зове́м,/ одушевле́нное не́бо, и пресла́вная пала́то, и престо́ле о́гненный,/ на не́мже Христо́с пло́тию почи́. Песнь 8 Ирмос: Ру́це распросте́р, Дании́л/ льво́в зия́ния в ро́ве затче́:/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:/ благослови́те, вся дела́ Госпо́дня, Го́спода. Припев: Священному́чениче Феодо́те, моли́ Бо́га о на́с. По́двиги твои́ми врагу́ противля́яся, му́чениче Феодо́те,/ гвоздьми́ бо, сла́вне, в но́ги пронзе́н,/ отводя́щею к Ца́рству Небе́сному стезе́ю ше́ствовал еси́,/ благослови́те, поя́, дела́ Госпо́дня, Го́спода. Припев: Священному́чениче Феодо́те, моли́ Бо́га о на́с. Пропове́дая Бо́га, на зе́млю прише́дша/ и Боже́ственными страстьми́ стра́сть всепа́губную разру́шшаго,/ стра́сть Боже́ственную и блаже́нную подъя́л еси́ пло́тию, вопия́, Феодо́те:/ благослови́те, вся дела́ Госпо́дня, Го́спода. Сла́ва Отцу́ и Сы́ну и Свято́му Ду́ху. Крове́й ка́плями и свяще́нных уче́ний тече́нием,/ ве́рных напои́л еси́ се́рдца благода́тию, всему́дре,/ и прозяба́ти устро́ил еси́ Земледе́лателю благи́х Боже́ственная разуме́ния,/ Ему́же вопие́м:/ благослови́те, вся дела́ Госпо́дня, Го́спода. И ны́не и при́сно и во ве́ки веко́в. Ами́нь. Богородичен: Скве́рны очи́стила еси́ вся́кия естество́ челове́ческое, Пречи́стая,/ Небе́сный ро́ждши до́ждь, Челове́ка бы́вша,/ и новосоде́лала еси́ ны, обетша́вшия, Чи́стая, вопию́щия:/ вся дела́, благослови́те Госпо́дня Го́спода. Песнь 9 Ирмос: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́,/ тем, веселя́щеся, Тя, Богоро́дице, велича́ем. Припев: Священному́чениче Феодо́те, моли́ Бо́га о на́с. Исцеле́ния источа́ет вся́ческая моще́й Боже́ственная ра́ка свяще́ннейшаго па́стыря,/ и стра́сти уставля́ет, и реши́т ле́тный я́ко вои́стинну боле́зни/ Спа́са Боже́ственною благода́тию. Припев: Священному́чениче Феодо́те, моли́ Бо́га о на́с. Я́ко священному́ченик,/ вяза́ти же и реши́ти име́я вла́сть,/ разреши́ зол мои́х у́зы/ и ду́шу мою́, жего́му огне́м греха́, ороси́,/ моля́ Всеще́драго. Припев: Священному́чениче Феодо́те, моли́ Бо́га о на́с. Дне́сь ве́рно пра́зднует Це́рковь, Богоно́се, всесвяще́нную твою́ па́мять/ и отше́ствие к Человеколю́бцу/ и, ра́дуяся, плете́т тебе́ пе́сней Боже́ственныя диади́мы. Сла́ва Отцу́ и Сы́ну и Свято́му Ду́ху. Я́коже днесве́тлую звезду́, тя стяжа́вше, Богоглаго́ливе,/ твои́ми светолу́чными заря́ми Боже́ственных боле́зней/ и чуде́с твои́х чи́стыми светлостьми́ озаря́емся, Феодо́те. И ны́не и при́сно и во ве́ки веко́в. Ами́нь. Богородичен: Свет нам ро́ждши, Де́во, от Отца́ пре́жде денни́цы возсия́вший неизрече́нно,/ неразу́мия тьму́ разруши́ла еси́/ и в се́ни спя́щия грехо́вней просвети́ла еси́.