Канон священномученику Феодору Пергийскому

Минея, 21 Апреля, Канон Глас 4 Песнь 1 Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́. Припев: Святы́й му́чениче Фео́доре, моли́ Бо́га о на́с. Да́р благоприя́тен и Влады́це возлю́блен, му́чеником украше́ние яви́лся еси́, Фео́доре, сего́ ра́ди тебе́, я́ко да́р, приношу́ пе́ние, пода́ждь ми́ твою́ по́мощь. Припев: Святы́й му́чениче Фео́доре, моли́ Бо́га о на́с. Красе́н те́лом, удобре́н же Ду́хом сы́й, отлучи́лся еси́ к боре́нием льсти́ваго и, сего́ разрази́в, побе́ды вене́ц прия́л еси́. Сла́ва Отцу́ и Сы́ну и Свято́му Ду́ху. Глаго́лы преоби́дел еси́ злочести́ваго, Фео́доре, себе́ же уго́дника Госпо́дня и́скрення, и во́ина Христа́ Царя́, и соверше́нна му́ченика я́ве показа́л еси́. И ны́не и при́сно и во ве́ки веко́в. Ами́нь. Богородичен: Всели́ся во чре́во Твое́ естество́м Непристу́пный, жи́тели показа́ на́с, Пренепоро́чная, рая́ неизрече́нным милосе́рдием, от Него́же изгна́ни бы́хом за́вистию змии́ною. Песнь 3 Ирмос: Твоя́ песносло́вцы, Богоро́дице, живы́й и незави́стный Исто́чниче, ли́к Себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би. Припев: Святы́й му́чениче Фео́доре, моли́ Бо́га о на́с. Хра́м бы́в Ду́ха Боже́ственнаго, хра́мы же истука́нныя, му́дре, па́губныя потреби́л еси́ и словесы́ обличи́л еси́ ме́рзкая приноше́ния беззако́ннующих, Фео́доре. Припев: Святы́й му́чениче Фео́доре, моли́ Бо́га о на́с. Я́ростию и гне́вным произволе́нием бия́ше тя́ беззако́нный судия́, зако́ны Бо́га на́шего утвержда́юща, Фео́доре, Его́же зря́ пред собо́ю, непоколеби́мь пребы́л еси́. Сла́ва Отцу́ и Сы́ну и Свято́му Ду́ху. Положи́лся еси́ усе́рдно на сковраде́ разжже́нне, страда́льче, ре́вностию разгара́емь Бо́га Вседержи́теля и Того́ распаля́емь Боже́ственною любо́вию, Фео́доре. И ны́не и при́сно и во ве́ки веко́в. Ами́нь. Богородичен: Безле́тный естество́м под ле́том из Тебе́ ви́ден бы́сть, роди́ся подо́бием пло́ти, ле́тняя моя́ прегреше́ния за милосе́рдие неизрече́нное презря́, Всенепоро́чная. Седален, глас 4 Спаси́тельных даро́в тезоимени́таго и насле́дника того́ блаже́нства,/ я́ко подо́бника и му́ченика Христа́ Бо́га, прииди́те, восхва́лим,/ честну́ю его́ па́мять ны́не торжеству́юще и к нему́ вопию́ще:/ великому́чениче, моли́ся, согреше́ний дарова́ти нам оставле́ние. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: По Бо́зе во Твой, Богоро́дице,/ прибега́ю смире́нный покро́в Боже́ственный, припа́дая, молю́ся:/ поми́луй, Пречи́стая, я́ко превзыдо́ша главу́ мою́ греси́,/ и бою́ся, Влады́чице, му́ки, и трепе́щу./ Моле́ние сотвори́, Чи́стая, к Сы́ну Твоему́ от сих изба́вити мя. Песнь 4 Ирмос: Седя́й в сла́ве на Престо́ле Божества́ во о́блаце ле́гце, прии́де Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й. Припев: Святы́й му́чениче Фео́доре, моли́ Бо́га о на́с. Возле́зша на сковраду́, небе́сный а́нгел, предста́в, ороша́ет, неопа́льно соблюда́я тя́, Фео́доре, ре́чных во́д потече́нии, и тру́сом, и шу́мом, стра́шными показа́нии. Припев: Святы́й му́чениче Фео́доре, моли́ Бо́га о на́с. Тебе́, ве́рно чудоде́йствующу, пре́лести прилежа́й, к ве́ре внеза́пу, му́чениче, я́коже ка́мень, валя́ется, и к ли́ку му́ченик устроя́ется Диоско́р, огне́м скончава́емь. Припев: Святы́й му́чениче Фео́доре, моли́ Бо́га о на́с. Во блюсти́тельнице поло́жся я́ко храни́тель Зижди́теля повеле́нием, ю́же от младе́нства име́л еси́ ве́ру, Бо́гу сохрани́л еси́ и сию́ неблюду́щих я́ко безу́мных гнуша́лся еси́ соверше́нным ра́зумом, пресла́вне. Сла́ва Отцу́ и Сы́ну и Свято́му Ду́ху. Многоболе́зненных му́к искуше́ния претерпе́л еси́ и мно́гих боле́зней, му́чениче, цели́ти сподо́бился еси́, неболе́зненных жили́щ насле́дник бы́в и безпеча́льныя вои́стинну жи́зни и наслажде́ния. И ны́не и при́сно и во ве́ки веко́в. Ами́нь. Богородичен: Без боле́зни родила́ еси́ Бо́га Безпло́тнаго, боле́зни, Отрокови́це, Е́вы прама́тере реша́ща и боле́зни а́довы избавля́юща боле́зненну иму́щих жи́знь согреша́ющих. Песнь 5 Ирмос: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая. Припев: Святы́й му́чениче Фео́доре, моли́ Бо́га о на́с. Вельми́ безбо́жную пре́лесть обличи́л еси́, те́мже к колесни́це привяза́лся еси́, пребыва́еши же це́л, ко́нем о́гненным, тя́ подъе́мшим, пла́менныя колесни́цы, Фео́доре, я́коже Илию́ сла́внаго. Припев: Святы́й му́чениче Фео́доре, моли́ Бо́га о на́с. Разгне́вався беззако́нный, в пе́щь горя́щую тя́ вку́пе с Сокра́том и боже́ственным Диони́сием вве́рже; с ни́миже проро́ческую свяще́нную пе́л еси́ пе́снь, доблему́дренне Фео́доре. Сла́ва Отцу́ и Сы́ну и Свято́му Ду́ху. Да похва́лится в пе́снех боже́ственный Диони́сий вку́пе с Сокра́том до́блим, посреде́ пе́щи копие́м уя́звени бы́вше; му́ченицы бы́ша кре́пцы, боже́ственным наказа́нием Фео́дора повину́вшеся. И ны́не и при́сно и во ве́ки веко́в. Ами́нь. Богородичен: Вои́стинну су́щи и вресноту́, Пренепоро́чная еди́на Богоро́дице, облада́ти мне́ порабо́щшими мя́ страстьми́ укрепи́, я́ко да свобо́дным по́мыслом, ра́дуяся, ублажа́ю Тя́, ве́рных спасе́ние. Песнь 6 Ирмос: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим. Припев: Святы́й му́чениче Фео́доре, моли́ Бо́га о на́с. А́нгела боже́ственным прише́ствием о́гнь у́бо пе́щи угаса́ше; се́рдце же твое́, преблаже́нне, дерзнове́ния исполня́шеся, е́же к Зижди́телю, манове́нием прохлажда́ющеся. Припев: Святы́й му́чениче Фео́доре, моли́ Бо́га о на́с. Глаго́лы святы́я я́ко услы́ша тебе́ ро́ждшия мучи́тель, му́чениче Фео́доре, сию́ мечу́ предаде́, му́ченически боже́ственне тече́ние сконча́вшу. Сла́ва Отцу́ и Сы́ну и Свято́му Ду́ху. Вожделе́вши, я́ко ю́ница, Фили́ппа с сы́ном умре́ти, с спе́хом прии́де, посреде́ суди́лища самозва́нна, му́ченик сла́ву прие́млющи. И ны́не и при́сно и во ве́ки веко́в. Ами́нь. Богородичен: Се́ гора́ свята́я, се́ мирополо́жница Ду́ха, мо́ст, к Бо́гу все́х преводя́й, Богоро́дица Де́ва, Ю́же ублажа́ем. Кондак, глас 3 Свяще́ния пома́занием и муче́ния кро́вию украси́стеся, сла́вне Ианнуа́рие и Фео́доре, и сия́ете всю́ду, в вы́шних лику́юще, и на́с назира́йте, в хра́м ва́ш прише́дшия и в не́м непреста́нно зову́щия: все́х на́с соблюди́те, моля́ще Человеколю́бца Бо́га. Песнь 7 Ирмос: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́. Припев: Святы́й му́чениче Фео́доре, моли́ Бо́га о на́с. Соблюда́емь росо́ю Ду́ха, я́коже о́троцы трие́, неопали́мь посреди́ огня́, богому́дре Фео́доре, с си́ми пе́л еси́: препе́тый оте́ц на́ших Бо́же, благослове́н еси́. Припев: Святы́й му́чениче Фео́доре, моли́ Бо́га о на́с. Е́ллинскую пре́лесть обличи́л еси́, му́чениче Фео́доре, сло́вом благода́ти, бога́тно истека́ющим от усте́н твои́х, и взыва́л еси́: оте́ц на́ших Бо́же, благослове́н еси́. Сла́ва Отцу́ и Сы́ну и Свято́му Ду́ху. Уве́да твое́ прозва́ние и страда́ние тебе́ ро́ждшая, и пре́жде зача́тия, Фео́доре вели́кий, му́чениче многострада́льне, вопию́щи: оте́ц на́ших Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: Очище́ние ми́ бу́ди, Всенепоро́чная, к ро́ждшемуся из Тебе́ отсече́ния лю́тых долго́в хода́тайствующи ми́, и Ца́рствия Бо́жия боже́ственный вхо́д, и пи́щи наслажде́ние, и све́та прича́стие. Песнь 8 Ирмос: О́троки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки. Припев: Святы́й му́чениче Фео́доре, моли́ Бо́га о на́с. На кре́ст вознесе́н бы́в, три́ дни́ сотвори́л еси́, на се́м пове́шен бы́в, Фео́доре, стра́сть Влады́ки твоего́, при́сно по́мнимую, треми́ часы́ бы́вшую, изобража́я я́ве: Го́спода по́йте, дела́, и превозноси́те Его́ во ве́ки. Припев: Святы́й му́чениче Фео́доре, моли́ Бо́га о на́с. Положе́н бы́л еси́ на дре́во, боле́знены прие́мля я́звы, уязви́л еси́ зми́я борца́, вкуше́нием дре́ва сме́рть боле́зненну, Фео́доре, соде́лавша Ада́му и того́ вну́ком. Те́мже тя́ чти́м во вся́ ве́ки. Сла́ва Отцу́ и Сы́ну и Свято́му Ду́ху. Вопие́т Перги́я твоя́ по́двиги, боле́зни, страда́ние, ра́ны, стра́сть блаже́нную, сме́рть честну́ю, ея́же ра́ди к безсме́ртней жи́зни, Фео́доре, преше́л еси́: благослови́те, — зовы́й, — вся́ дела́, Го́спода и превозноси́те Его́ во ве́ки. И ны́не и при́сно и во ве́ки веко́в. Ами́нь. Богородичен: О, глубина́ неизрече́ннаго та́инства! Созда́вый руко́ю дре́вле челове́ка зи́ждется, воплоща́емь, во утро́бу Присноде́вы вше́д, и спаса́ет мя́, со стра́хом зову́ща: Го́спода по́йте, дела́, и превозноси́те Его́ во ве́ки. Песнь 9 Ирмос: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во. Припев: Святы́й му́чениче Фео́доре, моли́ Бо́га о на́с. Стопа́м Христо́вым после́дуя, прему́дре, пе́рваго му́ченика распя́тие претерпе́л еси́, у́зы и я́звы гвозди́нныя прие́м, и от земли́ восте́кл еси́ к небе́сным, венцено́сец по́честь прие́м, Ца́рство Бо́жие непрее́мное. Припев: Святы́й му́чениче Фео́доре, моли́ Бо́га о на́с. Яви́лся еси́, я́ко зла́то, Фео́доре, светосия́нно, посреде́ стоя́ огня́, соше́ствием честна́го а́нгела, распала́емь Влады́ки жела́нием, неопали́мь, пребы́л еси́, с ни́мже пе́снь спасе́нную поя́, свяще́нно ра́дуяся. Припев: Святы́й му́чениче Фео́доре, моли́ Бо́га о на́с. Ста́нем благоче́стно в дому́ Бо́га на́шего, страда́льца Его́ ве́рою блажа́ще, му́жеским умо́м подви́гшагося, и вра́жие шата́ние победи́вша, и побе́ды свы́ше вене́ц из руки́ Христо́вы прие́мшаго. Сла́ва Отцу́ и Сы́ну и Свято́му Ду́ху. Взя́тся ко оби́телем вы́шним, ра́дуяся, му́чениче Фео́доре, дости́гл еси́ безпло́тных чи́ны, с те́лом безпло́тныя де́моны кре́пко побе́ждь, и мо́лишися ве́рою о чту́щих тя́ долго́в прия́ти избавле́ние. И ны́не и при́сно и во ве́ки веко́в. Ами́нь. Богородичен: Просвети́, Чи́стая, души́ моея́ о́чи, Богороди́тельнице, да не пости́гнет мене́ грехо́вная тма́ тя́жкая, ниже́ глубина́ покры́ет мя́ отча́яния, но Сама́ мя́ спаси́ и упра́ви, Предста́тельнице ве́рных непосты́дная.