Канон Пресвятой Богородице пред иконой «Всех Скорбящих Радость»

Икона Богородицы «Всех скорбящих Радость» Минея, 24 Октября, Канон Богородицы Глас 4 Песнь 1 Ирмос: Отве́рзу уста моя,/ и наполнятся Духа,/ и слово отры́гну Царице Матери,/ и явлюся, светло торжествуя,/ и воспою, радуяся, Тоя чудеса. Припев: Пресвята́я Богоро́дице, спаси́ на́с. Кую Ти достойную песнь принесет наше неможение,/ точию обрадовательную, ейже нас Гавриил тайно научил есть:/ радуйся, Богородице Дево, Мати Неневестная. Припев: Пресвята́я Богоро́дице, спаси́ на́с. Радуйся, благодати источниче; радуйся, лестнице и дверь Небесная;/ радуйся, све́щниче, и ста́мно златая, и горо́ несеко́мая, Яже Жизнодавца Христа мирови рождшая. Припев: Пресвята́я Богоро́дице, спаси́ на́с. Всея моея жизни Предстательнице, от бед многих избави мя,/ да благодарственный глас воспеваю Ти, Богоневесто Пречистая,/ и будущия мя исхити муки. Припев: Пресвята́я Богоро́дице, спаси́ на́с. Яже всем удобь послушная в скорби/ и в печали помогающая, Богородице Благая,/ благодать подаждь пети Тя дерзающим, Владычице, скорбящих Радосте. Сла́ва Отцу́ и Сы́ну и Свято́му Ду́ху. Многобога́тную благодать стяжа́вши, Владычице,/ дерзновенною Твоею молитвою преславно изми мя от напастей,/ убогаго раба Твоего, скорбящих Радосте. И ны́не и при́сно и во ве́ки веко́в. Ами́нь. Яже едина в напастех и скорбех защищающая,/ под кров Твой, Пречистая, прибегающих тепле,/ приими яко Преблагая, яже от сердца моления. Песнь 3 Ирмос: Твоя песнословцы, Богородице,/ живый и независтный источниче,/ лик себе совоку́пльшия, духовно утверди/ в Божественней Твоей славе,/ венцев славы сподоби. Припев: Пресвята́я Богоро́дице, спаси́ на́с. Утверждение буди, и прибежище, и покров, Дево Богородительнице,/ верою к Тебе прибегающим и Божию Тя Матерь испове́дающим. Припев: Пресвята́я Богоро́дице, спаси́ на́с. Крепость моя, и радость, и веселие, и стена твердая,/ и Предстательница Ты еси, Всенепорочная,/ искушений и бед избавляющи мя. Припев: Пресвята́я Богоро́дице, спаси́ на́с. Милостивным и кротким Твоим оком, Богородительнице,/ зрящи мя во обстоя́нии и скорби одержима, вскоре свободи:/ Тя бо призываю на помощь. Припев: Пресвята́я Богоро́дице, спаси́ на́с. Кропи́ши исцелений струи болящим, Дево, всюду:/ Тя бо источника показа милосердия, Владычице, Иже милости Господь,/ из Тебе рожде́йся паче ума. Сла́ва Отцу́ и Сы́ну и Свято́му Ду́ху. Источник милости, подаяй скорбящим утешение, Ты еси;/ темже, Владычице, и мне молитвенных Твоих вод источник источи и угаси страстей пещь. И ны́не и при́сно и во ве́ки веко́в. Ами́нь. Отчаявся по́мощи всякия,/ к Тебе, Пренепорочная, державней Хранительнице и покрову, притеко́х:/ не отри́ни убо мене от Божественнаго покро́ва Твоего. Седален, глас 7 Радуйся, Солнца облаче мысленнаго и неизреченнаго, Владычице;/ радуйся, всесветлая свеще́; радуйся, све́щниче всезлаты́й;/ Тобою, Пресвятая, Ева избавися от клятвы./ Но яко имущая дерзновение ко Благовременному Сыну Твоему и Богу,/ ма́тернею молитвою не оскудей о нас моли́тися, Пречистая. Песнь 4 Ирмос: Седяй в славе на Престоле Божества,/ во облаце легце/ прии́де Иисус Пребожественный/ нетленною дланию и спасе зовущия:/ слава, Христе, силе Твоей. Припев: Пресвята́я Богоро́дице, спаси́ на́с. Надеждо ненадежных, помощнице сирых,/ плачущих утешение, согрешающих очищение,/ Руководительнице заблудших, болящих Целе́бнице и исправление падающих,/ Владычице, спаси рабы Твоя. Припев: Пресвята́я Богоро́дице, спаси́ на́с. Не неприча́стни есмы, Владычице, Твоего заступления в ско́рбех;/ темже и ныне нам помози́ вскоре, люте обуреваемым, руку простирающи, Чистая:/ буди милостива болезнем нашим, Мати Божия, радость скорую подающи. Припев: Пресвята́я Богоро́дице, спаси́ на́с. Вся Благая и теплая Заступница сущи грешником и смиренным, Богородительнице Пречистая Владычице,/ от бед и скорбей, и грехов спасай рабы Твоя. Припев: Пресвята́я Богоро́дице, спаси́ на́с. Преславную Твою Матерь, Христе́, приими́ молящуюся о мире, милостивно Тебе зовущую:/ Сыне Мой, приими мольбу Мою и ути́ши гнев, належа́щий земли. Сла́ва Отцу́ и Сы́ну и Свято́му Ду́ху. Кров и заступление, и прибежище буди ми, Дево, рабу Твоему,/ и избави мя от безмерных зол, воспевати Тя, Пречистая:/ слава неизреченному Рождеству Твоему. И ны́не и при́сно и во ве́ки веко́в. Ами́нь. Надежда и щит, и утверждение Ты мне еси, Благая,/ и лютых избавление, и просвещение души моей,/ и хвала, и стена, и держава. Песнь 5 Ирмос: Ужасо́шася всяческая/ о Божественной славе Твоей:/ Ты бо, Неискусобрачная Дево,/ имела еси во утробе над всеми Бога/ и родила еси Безлетнаго Сына,/ всем воспевающим Тя/ мир подавающая. Припев: Пресвята́я Богоро́дице, спаси́ на́с. Ты крепость моя, Ты похвала, и радование, и Хранительница ми еси,/ и заступление, и прибежище, и Предстательница непобедима, Пресвятая Богородице Дево:/ темже спаси раба Твоего. Припев: Пресвята́я Богоро́дице, спаси́ на́с. Спаси мя, Владычице, из глубины напастей, и скорбе́й, и печалей, и страстей телесных/ и в тишине Божественней сохрани душу мою. Припев: Пресвята́я Богоро́дице, спаси́ на́с. Молитвеннице неложная, упование христиан, Обрадованная,/ приими мольбы от нас, прилежно призывающих и молящихся Тебе. Припев: Пресвята́я Богоро́дице, спаси́ на́с. Покров мой еси Ты и присное хваление, о Владычице Богородице:/ никакоже бо презираеши к Тебе прибегающих. Сла́ва Отцу́ и Сы́ну и Свято́му Ду́ху. Дом Тя Славы, го́ру Божию святую, Чистая,/ Невесту, чертог, храм освящения/ Сын Божий, в Тя вселивыйся, и рай сладости присносущныя нам соде́ла. И ны́не и при́сно и во ве́ки веко́в. Ами́нь. Сте́ну необори́му, Чистая, молитву Твою стяжавше, вопием Ти:/ умилосердися, о Владычице, и видимыя и невидимыя враги прожени́. Песнь 6 Ирмос: Божественное сие и всечестно́е/ совершающе пра́зднество,/ Богомудрии, Богоматере,/ приидите, руками воспле́щем,/ от Нея рождшагося Бога славим. Припев: Пресвята́я Богоро́дице, спаси́ на́с. Болящих Целительницу, падающих востание, согрешающих очищение, Богородице,/ Тебе молю, со слезами припадаю и зову Ти:/ яко сильна́ Сама мя спаси, погибающаго. Припев: Пресвята́я Богоро́дице, спаси́ на́с. Ты еси стена нерушима, Ты еси покров тверд, Богородице Благая,/ Ты еси Предстательница крепка́ рабу Твоему:/ сего ради призываю Тя присно и притекаю к покро́ву Твоему. Припев: Пресвята́я Богоро́дице, спаси́ на́с. Мирови радость сущи, Богородице Чистая, радуйся, Тебе, Дево, зовем со Ангелом верно:/ Твоея радости сподоби ны и печаль нашу разори. Припев: Пресвята́я Богоро́дице, спаси́ на́с. Сладость Ангелов, скорбящих Радость,/ христиан Предстательница Ты еси, Дево Мати Господня:/ заступи нас и избави вечных мук. Сла́ва Отцу́ и Сы́ну и Свято́му Ду́ху. В день печали, егда имам телесных соу́з разрешитися, предстани ми, Богородительнице,/ и обдержа́ния бесовскаго исхити́. И ны́не и при́сно и во ве́ки веко́в. Ами́нь. При́зри, Владычице, на мя, смиреннаго, и паче надежды спаси мя:/ Ты бо еси упование и покров ми,/ жизнь и свет сердцу моему, Богородице, и утверждение. Кондак, глас 4 Не и́мамы иныя помощи,/ не и́мамы иныя надежды,/ разве Тебе, Владычице./ Ты нам помози́:/ на Тебе надеемся и Тобою хвалимся,/ Твои бо есмы раби,/ да не постыдимся. Икос Простри́ дла́ни Твоя, имиже всех Владыку яко Младенца прияла еси за множество благости:/ не остави нас, всегда надеющихся на Тя, бо́дренною Твоею молитвою,/ и неисчетною просты́нею уще́дри нас,/ и подаждь душам нашим милосердие Твое, во веки источающи,/ Тебе бо имамы грешнии Заступницу от находящих на ны бед и зол./ Но яко имущи милосердия щедроты,/ ускори́ на молитву и потщися на умоление,/ предстательствующи присно, Богородице, чтущих Тя. Песнь 7 Ирмос: Не послужи́ша твари Богомудрии/ паче Создавшаго,/ но огненное прещение мужески поправше,/ радовахуся, поюще:/ препетый отцев Господь и Бог, благословен еси. Припев: Пресвята́я Богоро́дице, спаси́ на́с. Страстьми́ престаре́вся и неосла́бными напастьми, и скорбьми/ и, доспев к за́падом жития моего, добродетелем непричастен, леностию снеде́н быв,/ вопию Ти, Владычице:/ утешение земным, помилуй мя. Припев: Пресвята́я Богоро́дице, спаси́ на́с. Радуйся, источниче присноживо́тныя воды;/ радуйся, раю́ пи́щный;/ радуйся, стено верных;/ радуйся, Неискусобрачная;/ радуйся, всемирная радосте,/ Еюже нам возсия́ хва́лимый отцев Бог и препрославлен. Припев: Пресвята́я Богоро́дице, спаси́ на́с. Всем, сущим в мире, Заступница еси/ и стена христианом, и прибежище непостыдно, Чистая Марие./ Темже верою Тя чтуще, вопием Христу:/ отец наших Боже, благословен еси. Припев: Пресвята́я Богоро́дице, спаси́ на́с. О благоутробия Твоего, Дево Чистая!/ Реши́ши бо безмерныя печали и напасти, призывающим в нужде и обстоянии:/ темже и ныне помози, Благословенная, Тя восхваляющим. Сла́ва Отцу́ и Сы́ну и Свято́му Ду́ху. Едино упование и помощь верным сущи, Богородительнице,/ потщи́ся помощи́ рабом Твоим, погружаемым скорбьми и в болезнех сущим,/ и прибегающим к Тебе с любовию души́. И ны́не и при́сно и во ве́ки веко́в. Ами́нь. Радование благодарственное Тебе приносим, Мати Божия,/ яко воистину Тобою изба́влени всякаго злаго начинания,/ и согласно Тебе поем: благословенна еси. Песнь 8 Ирмос: Отроки благочестивыя в пещи́/ Рождество Богоро́дичо спасло есть:/ тогда убо образуемое,/ ныне же действуемое,/ вселенную всю воздвизает пети Тебе/ Господа пойте дела́/ и превозноси́те Его во вся веки. Припев: Пресвята́я Богоро́дице, спаси́ на́с. Радуйся, Престоле славный Божий;/ радуйся, верных стено́, Еюже сущим во тьме возсия́ Свет, Христос,/ Тебе блажащим и вопиющим:/ вся дела Господня, Господа пойте и превозносите во вся веки. Припев: Пресвята́я Богоро́дице, спаси́ на́с. Поем Тя, Пречистая и Мати Божия,/ и кто не славит Тя, воистину Благую, сущую надежду душ наших,/ темже, Пречистая, и мою мольбу приими́. Припев: Пресвята́я Богоро́дице, спаси́ на́с. Ты еси спасение всех человек, Яже Бога рождшая неизреченно;/ Ты еси верных спасительница, Богородице, и слепых наставница, и падающих исправление./ Темже Тя восхваляюще, Христу зовем:/ благословите вся дела Господа, пойте и превозносите Его во вся веки. Припев: Пресвята́я Богоро́дице, спаси́ на́с. Струи́ исцелений нам всегда, верным, Чистая, источаеши:/ темже незави́стную благодать взе́млюще,/ воспеваем Рождество Твое, Чистая, и превозносим во вся веки. Сла́ва Отцу́ и Сы́ну и Свято́му Ду́ху. На Тя возложих, Владычице, сердце, и душу, и тело: не и́мам бо иныя надежды, разве Тебе, еюже получу милость./ Темже подаждь ми богатую Твою благодать. И ны́не и при́сно и во ве́ки веко́в. Ами́нь. На мольбу мою ныне умилосердися и радость в печали место даруй ми,/ да пою Тя, Владычице, и вопию Сыну Твоему:/ благословите, вся дела Господня, Господа. Песнь 9 Ирмос: Всяк земнородный/ да взыграется, Духом просвещаем,/ да торжествует же Безплотных умов естество,/ почитающее священное торжество Богоматере,/ и да вопиет:/ радуйся, Всеблаженная/ Богородице, Чистая Приснодево. Припев: Пресвята́я Богоро́дице, спаси́ на́с. Радуйся, Марие, великое всея твари чудо;/ радуйся, Дщи убо Давидова, Господня же Мати;/ радуйся, пение Гавриилово;/ радуйся, прибежище и утверждение, и помощь всем, Пресвятая, сущим на земли грешником. Припев: Пресвята́я Богоро́дице, спаси́ на́с. Юже изво́лил еси, Владыко, приими милостивно Молитвенницу, Матерь Твою, о нас,/ и Твоея благости всяческая исполнятся:/ да Тя вси яко Благодетеля величаем. Припев: Пресвята́я Богоро́дице, спаси́ на́с. О Дево Благая! О мира радосте и прибежище!/ О хранилище верных и избавление скорбе́й!/ Ты предста́ни ми в час смерти и избави от бесо́в, ищущих поглоти́ти мя. Припев: Пресвята́я Богоро́дице, спаси́ на́с. Ты еси Ангелов радость, Ты еси праведников добро́та,/ Ты еси верных надежда, Ты еси соблюдение наше,/ Ты еси мост, к жизни нестаре́ющейся преводя́й верою и любовию Тя величающия. Сла́ва Отцу́ и Сы́ну и Свято́му Ду́ху. О Мати всяческих Творца,/ всесветлая печальных уте́хо, оскорбляемых Предстательнице и немощны́х Заступнице,/ сохрани мя, Благая, от бед и прилог вражиих. И ны́не и при́сно и во ве́ки веко́в. Ами́нь. Едина болящих посещение, Едина падших исправление, Владычице,/ Едина к Богу Руководительнице и входе,/ Едина Ходатаице вечных благ,/ помилуй мя единаго, паче всех согрешившаго. Светилен Под кров Твой, Дево Госпоже, прибегаем/ вси ро́ди человечестии:/ просвети ны светом Рождества Твоего,/ грешныя рабы Твоя,/ молящияся прилежно и покланяющияся Тебе,/ и просящия умирения ми́рови/ и душам нашим велия милости.