- Главная страница
- Молитвы
- Канон преподобному Венедикту Нурсийскому
Канон преподобному Венедикту Нурсийскому
Текст молитвы
Глас 2
Песнь 1
Ирмос: Гряди́те, лю́дие,/ пои́м пе́снь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.
Припев: Преподо́бне о́тче Венеди́кте, моли́ Бо́га о на́с.
Песносло́вити достохва́льную па́мять твою́ усе́рдствующему, преподо́бне,/ благода́ть да́ти мне моли́ся, Венеди́кте,/ и всех прегреше́ний избавле́ние.
Припев: Преподо́бне о́тче Венеди́кте, моли́ Бо́га о на́с.
Мона́шески, твой от младе́нства взем крест,/ после́довал еси́ Вседержи́телю/ и, умертви́в пло́ть, жи́зни сподо́бился еси́, преблаже́нне.
Сла́ва Отцу́ и Сы́ну и Свято́му Ду́ху.
Зако́ну Бо́жию повину́вся, досточу́дне,/ и страсте́й взыгра́ния увяди́л еси́ воздержа́ния по́двиги,/ и безстра́стия благода́тию обогати́лся еси́.
И ны́не и при́сно и во ве́ки веко́в. Ами́нь.
Богородичен: И́же Тебе́ ра́ди нетле́нием обога́щшеся, Богороди́тельнице Всечи́стая,/ ра́дуйся, вопие́м Ти, обра́дованней,/ преподо́бных и пра́ведных удобре́ние.
Песнь 3
Ирмос: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́/ в се́рдца нас, пою́щих Тя.
Припев: Преподо́бне о́тче Венеди́кте, моли́ Бо́га о на́с.
Вод живо́тных Боже́ственнаго Ду́ха испо́лнившися, Богоно́се,/ душа́ твоя́ ре́ки чуде́с источи́,/ неду́гов изсуша́ющия тече́ние.
Припев: Преподо́бне о́тче Венеди́кте, моли́ Бо́га о на́с.
К широте́ ра́йстей пресели́лся еси́, всеблаже́нне, те́сную ше́ствовав стезю́,/ и де́монов кова́рствия,/ и ше́ствия безчи́нная утесни́л еси́.
Сла́ва Отцу́ и Сы́ну и Свято́му Ду́ху.
Тече́нии твои́х слез напая́емь, я́ко дре́во, Венеди́кте, плодоно́сно,/ благопло́дие Боже́ственно прине́сл еси́ доброде́телей/ и чуде́с Боже́ственною благода́тию.
И ны́не и при́сно и во ве́ки веко́в. Ами́нь.
Богородичен: Еди́н Благи́й Твою́, воплоща́емь, про́йде, Пренепоро́чная, утро́бу/ и Челове́к ви́ден бы́сть соверше́н,/ Его́же моли́ спасти́ пою́щия Тя.
Седален, глас 1
Мона́шествовав богоуго́дно, доброде́тельно пожи́л еси́/ и благода́ть исцеле́ний прия́л еси́, Венеди́кте, чудеса́ соверши́в стра́шна,/ оби́тель же совоку́пль свяще́нну, приве́л еси́ Го́споду спаса́емых мно́жества, пребога́те./ Сла́ва Бо́гу, просвети́вшему тя,/ Сла́ва венча́вшему тя,/ Сла́ва святу́ю твою́ па́мять просла́вльшему.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Ру́це Твои́ Боже́ственныя,/ и́миже Созда́теля понесла́ еси́, Де́во Пресвята́я, вопло́щшагося благосты́нею,/ просте́рши, умоли́ Его́ изба́вите нас от искуше́ний, и страсте́й, и бед,/ хва́лящих Тя любо́вию и вопию́щих:/ Сла́ва Все́льшемуся в Тя,/ Сла́ва Проше́дшему из Тебе́,/ Сла́ва Изба́вльшему нас рождество́м Твои́м.
Песнь 4
Ирмос: Пою́ Тя, слу́хом бо, Го́споди, услы́шах и ужасо́хся:/ до мене́ бо и́деши, мене́ ища́, заблу́ждшаго./ Тем мно́гое Твое́ снизхожде́ние, е́же на мя,/ прославля́ю, Многоми́лостиве.
Припев: Преподо́бне о́тче Венеди́кте, моли́ Бо́га о на́с.
Распе́н себе́ сама́го страсте́м и ми́ру, Богому́дре о́тче,/ на Кресте́ просте́ршему во́лею дла́ни Христу́ угоди́л еси́, Венеди́кте./ Его́же моли́ спасти́ ду́ши на́ша.
Припев: Преподо́бне о́тче Венеди́кте, моли́ Бо́га о на́с.
По́двиги воздержа́ния, преподо́бне, плотски́я умертви́л еси́ у́ды,/ ме́ртвыя же моли́твою возста́вил еси́,/ и разсла́бленным благотече́ние, ве́рно чудим, дарова́л еси́,/ и всяк неду́г, о́тче, исцели́л еси́.
Сла́ва Отцу́ и Сы́ну и Свято́му Ду́ху.
Сухи́я же и невла́жныя, преподо́бне,/ соде́лал еси́ ду́ши ро́дны живи́тельным сло́вом твои́м,/ плодо́в духо́вных и Боже́ственных, му́дре,/ богопрови́ден быв и мона́шествующих красота́, свяще́ннейший.
И ны́не и при́сно и во ве́ки веко́в. Ами́нь.
Богородичен: Я́ко до́ждь на руно́, Чи́стая,/ в честно́е чре́во Твое́ Сло́во сни́де, воплоща́емо,/ и уста́ви многобо́жия я́ве одожде́ния, Всенепоро́чная,/ и го́рькую зи́му разорило е́сть.
Песнь 5
Ирмос: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас:/ ра́зве бо Тебе́, ино́го бо́га не зна́ем.
Припев: Преподо́бне о́тче Венеди́кте, моли́ Бо́га о на́с.
Су́щаго в ми́лости Бо́га моля́, о́тче преподо́бне,/ напо́лнил еси́, я́коже Илия́ чва́нец еле́я, сосу́д вели́к,/ от зря́щих ве́рно удивля́емь.
Припев: Преподо́бне о́тче Венеди́кте, моли́ Бо́га о на́с.
Я́ко чист душе́ю, ты, во изступле́нии быв,/ ви́дел еси́ всю зе́млю, я́ко под заре́ю сия́ющу еди́ною,/ Бо́гу тя почита́ющу, всеблаже́нне Венеди́кте.
Сла́ва Отцу́ и Сы́ну и Свято́му Ду́ху.
Чудоде́йствуя о Христе́,/ воде́ истещи́ моли́твою, преподо́бне, мо́лиши Подвигополо́жника,/ я́же пребыва́ет, возпропове́дающи чудеса́, Венеди́кте.
И ны́не и при́сно и во ве́ки веко́в. Ами́нь.
Богородичен: Живы́й на Небесе́х, хотя́й всели́ся в ложесна́ Твоя́, Чи́стая,/ я́ко да нас до́мы Тро́ице сотвори́т,/ Тя, Богоро́дицу, пропове́дающих, Чи́стая.
Песнь 6
Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.
Припев: Преподо́бне о́тче Венеди́кте, моли́ Бо́га о на́с.
Светозаре́ньми просвеща́емь Ду́ха,/ тьму́ лука́вых де́монов отгна́л еси́, чудотво́рче Венеди́кте,/ мона́шествующих свети́льниче светле́йший.
Припев: Преподо́бне о́тче Венеди́кте, моли́ Бо́га о на́с.
Я́ко пресла́вно, блаже́нне, житие́ твое́,/ я́ко пресве́тло честно́е жи́тельство твое́,/ и́мже ста́да привле́кл еси́ мона́шествующих к ра́зуму спаси́тельному.
Сла́ва Отцу́ и Сы́ну и Свято́му Ду́ху.
Ца́рствия жи́тель быв Небе́снаго, Богому́дре Венеди́кте,/ сего́ улучи́ти моли́ ве́рно тя при́сно блажа́щим.
И ны́не и при́сно и во ве́ки веко́в. Ами́нь.
Богородичен: Из утро́бы Твоея́ святы́я/ возсия́ Пра́вды невече́рнее Со́лнце/ и ве́рныя просвети́, Богоро́дице Де́во Всепе́тая.
Кондак, глас 6
Благода́тию Бо́жиею обогати́лся еси́,/ де́лы же извести́л еси́ зва́ние,/ и яви́лся еси́, Венеди́кте, уго́дниче Христа́ Бо́га,/ в моли́твах и посте́х дарова́ний Бо́жия Ду́ха испо́лнен,/ и был еси́ неду́жным исцели́тель,/ и прогони́тель враго́м,/ и засту́пник ско́рый душа́м на́шим.
Песнь 7
Ирмос: Вети́и яви́шася о́троцы/ любому́дрейшии дре́вле,/ от богоприя́тныя бо души́, богосло́вяще устна́ми, поя́ху:/ Пребоже́ственный отце́в и наш Бо́же, благослове́н еси́.
Припев: Преподо́бне о́тче Венеди́кте, моли́ Бо́га о на́с.
Ме́ртвость живоно́сну стяжа́л еси́ сласте́й отложе́нием./ Те́мже ме́ртвыя возставля́ти сподо́бился еси́, блаже́нне Венеди́кте, вопия́:/ Пребоже́ственный отце́в и наш Бо́же, благослове́н еси́.
Припев: Преподо́бне о́тче Венеди́кте, моли́ Бо́га о на́с.
Удивля́емь от мно́жества ве́рных,/ я́ко Илия́ вели́кий, соде́лал еси́ преподо́бными твои́ми труды́ огра́ду, водрузи́в, мона́хом,/ я́же при́сно пребыва́ет, остеняема моли́твами твои́ми, блаже́нне.
Сла́ва Отцу́ и Сы́ну и Свято́му Ду́ху.
Непщева́вше умори́ти без ума́ чарова́ньми, о́тче, лука́вными/ тя, блюдо́маго Боже́ственною Вседе́теля дла́нию,/ несмы́сленнии постыде́шася, обличе́ни бы́вше/ су́щим в тебе́, Венеди́кте, проразуме́нием.
И ны́не и при́сно и во ве́ки веко́в. Ами́нь.
Богородичен: Исцели́ души́ моея́ стра́сти/ безстра́стия исто́чника заче́ншая несказа́нно, Де́во,/ и умиле́ния ту́чу пода́ждь ми,/ хода́тайствующую ми утеше́ние та́мо, Свята́я Богоро́дице.
Песнь 8
Ирмос: В пе́щь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га,/ по́йте, дела́, я́ко Го́спода/ и превозноси́те во вся ве́ки.
Припев: Преподо́бне о́тче Венеди́кте, моли́ Бо́га о на́с.
Над страстьми́ тлетво́рными ца́рствовал о Христе́, Богому́дре о́тче,/ в Небе́снем Ца́рствии сподо́бился еси́ жи́ти со все́ми, до́бре пожи́вшими/ и Всеви́дца Бо́га возлюбившими.
Припев: Преподо́бне о́тче Венеди́кте, моли́ Бо́га о на́с.
Твоя́ святы́я моли́твы прие́мля, Бог/ су́щим во оскуде́нии тобо́ю подава́ше я́же к Житию́ Вины́,/ вельми́ на земли́ прославля́я тя чудоде́йствы, Венеди́кте треблаже́нне.
Сла́ва Отцу́ и Сы́ну и Свято́му Ду́ху.
Украси́вся добро́тами Боже́ственных доброде́телей,/ к кра́сным черто́гам преста́вился еси́, о́тче, пребыва́ти с Бо́гом/ и сего́ Боже́ственныя красоты́ в безконе́чныя ве́ки наслажда́тися.
И ны́не и при́сно и во ве́ки веко́в. Ами́нь.
Богородичен: Се роди́ся из Тебе́, я́коже вопие́т Иса́ия, Чи́стая, Отроча́, Сын Вы́шняго/ и Твой зрим е́сть Сын, Де́во,/ сы́ны сотворя́я Небе́снаго Отца́, Тя почита́ющия.
Песнь 9
Ирмос: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми велича́ем.
Припев: Преподо́бне о́тче Венеди́кте, моли́ Бо́га о на́с.
Яви́лся еси́, я́ко со́лнце вели́кое,/ озаря́я зда́ние зна́меньми, Богоно́се, стра́шными и доброде́телей сия́нии,/ сего́ ра́ди, соверша́юще па́мять твою́, пои́стинне светоза́рную,/ просвеща́емся, о́тче, серде́чными чу́вствы.
Припев: Преподо́бне о́тче Венеди́кте, моли́ Бо́га о на́с.
Тя мона́шествующих ста́да, тобо́ю собранна, де́нь восхваля́ют и но́щь,/ посреди́ те́ло твое́ иму́ще, источа́ющее бога́тно чуде́с ре́ки, о́тче му́дре,/ и просветя́ще сих непреста́нно стопы́.
Сла́ва Отцу́ и Сы́ну и Свято́му Ду́ху.
Па́че со́лнечных луч облиста́л еси́, о́тче, испо́лнив Бо́жия за́поведи,/ и к Све́ту невече́рнему преста́вился еси́,/ моля́ пода́тися оставле́нию грехо́в ве́рно тя чту́щим,/ приснопа́мятне Венеди́кте.
И ны́не и при́сно и во ве́ки веко́в. Ами́нь.
Богородичен: Светороди́тельнице Де́во, души́ моея́ стра́сти отжени́/ и да́ждь чи́сто зре́ти, Влады́чице,/ спаси́тельную добро́ту возсия́вшаго неизрече́нно из Твое́й пречи́стыя утро́бы/ во свет язы́ков, Всепе́тая.
