- Главная страница
- Молитвы
- Канон преподобному Симеону Мироточивому, Хиландарскому (2-й)
Канон преподобному Симеону Мироточивому, Хиландарскому (2-й)
Текст молитвы
Глас 8
Песнь 1
Ирмос: Посе́ченый несеко́маго пресече́/ и ви́де со́лнце зе́млю, ю́же не ви́де,/ лю́таго врага́ вода́ потопи́/ и непроходи́мое про́йде Изра́иль./ Песнь же воспева́шеся:/ Го́сподеви пои́м, сла́вно бо просла́вися.
Припев: Преподо́бне о́тче Симеóне, моли́ Бо́га о на́с.
Сло́во ра́зума пода́ждь ми, Безнача́льне Сло́ве,/ и́маши бо бога́тство милосе́рдия безчи́сленных Твои́х су́деб,/ да и аз душе́внаго мра́ка избе́гнув,/ скве́рну же ума́ очи́стив, досто́йно воспою́ Твоего́ уго́дника.
Припев: Преподо́бне о́тче Симеóне, моли́ Бо́га о на́с.
Богосве́тла тя свети́льника позна́хом,/ све́том Богоразу́мия лю́ди твоя́, Симео́не о́тче, озари́вша/ и тьму е́реси отгна́вша пе́рвее,/ ны́не же ми́ром моще́й твои́х вся облагоуха́еши./ Тем светоно́сную твою́ па́мять пра́зднуем.
Припев: Преподо́бне о́тче Симеóне, моли́ Бо́га о на́с.
Исправле́нием ве́ры, о́тче, просия́в,/ ре́ку ми́лостыни из се́рдца твоего́ ни́щим источи́л еси́,/ отню́дуже ми́ра исто́чники излива́еши:/ и́хже струи́ веселя́т град Бо́жий, твою́ це́рковь:/ в не́йже твою́ па́мять пра́зднуем.
Припев: Преподо́бне о́тче Симеóне, моли́ Бо́га о на́с.
Ра́ка моще́й твои́х, Симео́не, кла́дезь яви́ся исцеле́ния,/ источа́ющи ми́ро благоуха́ния,/ и́мже се́рдце мое́ омы́й, молю́ся ти, благоуха́ние показу́я Христу́,/ и ум мой обвесели́ твою́ светоно́сную па́мять воспева́ти.
Сла́ва Отцу́ и Сы́ну и Свято́му Ду́ху.
Я́ко два свети́ла ве́рою лю́ди своя́ просвети́сте,/ чуде́сными блиста́ньми, сло́ва пропове́данием мрак е́реси от них отгна́вше,/ и ны́не пога́н нахо́да и вся́кия ско́рби моли́твами ва́шими, Са́вво и Симео́не, сих изба́вите.
И ны́не и при́сно и во ве́ки веко́в. Ами́нь.
Богородичен: Це́рковь пресве́тлую Божию ве́дый Тя,/ всех тва́рей вои́стинну вы́шшую, Симео́н, Твой уго́дник, Богома́ти,/ све́тлу на земли́ це́рковь во Твою́ сла́ву воздви́же, Чи́стая,/ в не́йже чи́стыми гла́сы блажа́щия Тя спаса́й.
Песнь 3
Ирмос: Утвержде́й в нача́ле Небеса́ ра́зумом/ и зе́млю на вода́х основа́вый/ на ка́мени мя, Христе́, за́поведей Твои́х утверди́/ я́ко несть свят па́че Тебе́, Еди́не Человеколю́бче.
Припев: Преподо́бне о́тче Симеóне, моли́ Бо́га о на́с.
Блаже́н муж Дави́дом пе́рвее нарече́ся и на́ми ны́не похваля́ем,/ сове́та нечести́вых Симео́н неприе́м/ и пути́ беззако́нных уклони́вся,/ зако́ну же Госпо́дню поуча́яся,/ дре́во плодови́то насади́вся. Ду́ха благода́тию напая́емь.
Припев: Преподо́бне о́тче Симеóне, моли́ Бо́га о на́с.
Плоды́ доброде́телей, благоуха́ния Де́лателю Христу́ приноша́я, яви́лся еси́,/ от Него́же бла́годать прие́м, ми́ро ны́не источа́еши,/ просвети́вшися же па́мять твоя́, во ве́ки просла́вися,/ Симео́не Богоно́се, похвало́ лю́дем твои́м.
Припев: Преподо́бне о́тче Симеóне, моли́ Бо́га о на́с.
Псало́мски я́ко фи́никс ве́рою, Симео́не, во Христе́ процве́л еси́,/ и я́ко кедр благоче́стием ча́да твоя́ умно́жил еси́,/ и ми́ром моще́й твои́х умаща́я,/ твою́ па́мять любо́вию пою́щих.
Припев: Преподо́бне о́тче Симеóне, моли́ Бо́га о на́с.
Всех кра́сных ми́ра чу́вствия преше́д смы́слом, о́тче, Богому́дрым,/ к вы́шней жи́зни умо́м преложи́вся,/ иде́же ны́не со А́нгелы весели́шися/ и ми́ра твоего́ исто́чники лю́ди твоя́ ра́достно напая́еши.
Сла́ва Отцу́ и Сы́ну и Свято́му Ду́ху.
Све́ту вели́кому предстоя́ще и отону́дными заря́ми осия́еми,/ и пребога́тыми ле́потами сия́юще,/ ду́ши раб свои́х, Симео́не и Са́вво, просвети́те,/ е́же воспе́ти светоно́сную ва́шу па́мять досто́йно.
И ны́не и при́сно и во ве́ки веко́в. Ами́нь.
Богородичен: Дои́ши млеко́м всех, Де́во, Пита́теля,/ рожде́ннаго без тли из пречи́стаго Твоего́ те́ла,/ и держи́ши на руку́ вся Содержа́щаго,/ и сокруше́нных тле́ю па́ки назида́юща:/ и нас в ве́ре не подви́жимых назда́ти, моли́ся.
Седален, глас 8
Другий Авраа́м нра́вом и де́лы яви́лся еси́,/ ми́лостию и ве́рою украша́лся,/ оте́чества и ро́да изше́л еси́ Бо́га послуша́нием,/ и в стра́нах чужды́х уго́дно Тому́ пожи́л еси́./ Тем и Авраа́мле прича́стие тебе́ дарова́ся,/ иде́же ны́не восприе́мля, ра́дуешися,/ и ра́ка моще́й твои́х источа́ет ми́ро исцеле́ния,/ твоя́ сыны́ веселя́щи, пою́щия тя:/ Симео́не о́тче Богоно́се,/ моли́ Христа́ Бо́га прегреше́ний оставле́ние дарова́ти/ чту́щим любо́вию святу́ю па́мять твою́.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Егда́ прии́дет суди́ти всю зе́млю всех Влады́ка и Творе́ц,/ о́вцам мя сопричти́ десны́м осужде́ннаго,/ и кроме́шния тьмы и вся́каго муче́ния Твоего́ непотре́бнаго раба́ исхити́, молю́ся,/ да благода́рно велича́ю бога́тство Твое́я бла́гости, Богоро́дице Всенепоро́чная,/ и вопию́ Ти, ра́дуяся:/ моли́ся Христу́ Бо́гу прегреше́ний оставле́ние да́ти мне,/ Тебе́ бо и́мам наде́жду раб Твой.
Песнь 4
Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
Припев: Преподо́бне о́тче Симеóне, моли́ Бо́га о на́с.
Авраа́ма странноприя́тием подо́бяся,/ И́ова ми́лостивное нищелю́бие подража́я,/ о́ко слепы́м, и нога́ хромы́м, оте́ц си́рым, и всем ми́лование яви́лся еси́,/ и па́че сих изя́щнейшая взыска́л еси́.
Припев: Преподо́бне о́тче Симеóне, моли́ Бо́га о на́с.
Ю́ношеское соверше́ние возлюби́в,/ бога́тство твое́ ни́щим разда́л еси́,/ и ца́рство оста́вив, Христу́ после́довал еси́./ Те́мже на Небесе́х сокро́вище тебе́ дарова́л есть,/ отону́дуже бога́тство, ми́ро, Симео́не, источа́еши.
Припев: Преподо́бне о́тче Симеóне, моли́ Бо́га о на́с.
От благоутро́бнаго твоего́ се́рдца,/ бога́тою руко́ю, е́же к ни́щим,/ ми́ро ны́не истека́ет,/ лю́ди твоя́ умаща́я, преподо́бне, твоя́ доброде́тели похваля́ющия:/ возме́здна бо быша тебе́, о́тче, пе́рвым втора́я.
Припев: Преподо́бне о́тче Симеóне, моли́ Бо́га о на́с.
Я́ко ра́йский крин, ве́рою процве́л еси́,/ и я́ко ма́слина, ми́лость источа́я яви́лся еси́,/ и я́ко ши́пок та́йный, процве́л еси́ поще́нием:/ сего́ ра́ди благово́ния и честна́го ми́ра це́рковь твою́ исполня́я, благоуха́еши лю́ди твоя́.
Сла́ва Отцу́ и Сы́ну и Свято́му Ду́ху.
Тле́емыя сла́вы красоту́ возненави́девше,/ ми́ра и миродержа́ния мы́слию Богому́дрою избежа́вше,/ и в пусты́ни поще́нием просве́щшеся Симео́не и Са́вво,/ па́мять ва́шу пою́щих моли́твами ва́шими озари́те.
И ны́не и при́сно и во ве́ки веко́в. Ами́нь.
Богородичен: По́мощь имени́ту обре́тше Тя, Богоро́дице, Са́вва и Симео́н, Твои́ уго́дницы,/ е́ресей хра́мы разо́рше и Це́ркви в сла́ву всех Бо́га Сы́на Твоего́ воздвиго́ша/ в них, Чи́стая Влады́чице, Засту́пницу христиа́н Тебе́ пою́щих спаса́й.
Песнь 5
Ирмос: Вску́ю мя отри́нул еси́/ от лица́ Твоего́, Све́те Незаходи́мьй/ и покры́ла мя есть чужда́я тьма окая́ннаго/ но обрати́ мя и к све́ту за́поведей Твои́х/ пути́ моя́ напра́ви молю́ся.
Припев: Преподо́бне о́тче Симеóне, моли́ Бо́га о на́с.
Упраздни́теся и разуме́йте, Дави́дом услы́шав, я́ко Аз есмь Бог, Бо́га глаго́люща,/ ца́рство мяте́жное, Симео́не, оста́вив/ в пусты́ни поще́нием упраздни́лся еси́,/ я́ко подо́бне разуме́ти Бо́га и от Него́ разуме́тися.
Припев: Преподо́бне о́тче Симеóне, моли́ Бо́га о на́с.
Свети́льника мы́сленно пресве́тла лю́дие твои́ получи́вше тя весели́мся,/ Боже́ственною бо ве́рою тобо́ю просвеща́еми/ и ми́ром святы́х твои́х моще́й, Симео́не, облагоуха́еми/ обога́щшеся ра́дуемся.
Припев: Преподо́бне о́тче Симеóне, моли́ Бо́га о на́с.
Услышахом твоя́ ди́вная пе́рвее сла́вы ца́рствия преоби́дение,/ ны́не же пресла́вная ви́дим чудеса́ стенапи́санное бо твоего́ о́браза подо́бие,/ от суха́го ва́ра моще́м подо́бно ми́ро источа́ет.
Припев: Преподо́бне о́тче Симеóне, моли́ Бо́га о на́с.
Таково́ю сла́вою просла́ви тя,/ таковы́ми чудесы́ удиви́ тя,/ таковыя по́чести дарова́ тебе́ на земли́,/ И́же бога́тыя дары́ дае́т, Христо́с, лю́бящим Его́/ в Небе́сных, о́тче, и́хже о́ко не ви́де, кто дово́лен изглаго́лати.
Сла́ва Отцу́ и Сы́ну и Свято́му Ду́ху.
К животу́ нестарею́щемуся и ра́дости нетле́нней/ к весе́лию вои́стинну па́че ума́, Симео́не и Са́вва, преста́вистеся/ де́тельным бо любому́дрием веще́ственных отбе́гше, невеще́ственная получи́сте.
И ны́не и при́сно и во ве́ки веко́в. Ами́нь.
Богородичен: Стра́нное Твое́ зача́тие, Отрокови́це,/ стра́нное и стра́шно, е́же па́че ума́, Чи́стая, Твое́ рождество́,/ устра́ншееся дре́вле от Бо́га челове́ческое существо́/ Тому́ собира́ющи, Вла́дычице,/ и добро́ту пе́рвую назида́ющи.
Песнь 6
Ирмос: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол ду́ша моя́ испо́лнися/ и живо́т мой а́ду прибли́жися,/ и молю́ся, я́ко Ио́на,/ от тли, Бо́же, возведи́ мя.
Припев: Преподо́бне о́тче Симеóне, моли́ Бо́га о на́с.
От мно́гих служи́мь, послужи́ти изво́лил еси́,/ от пребога́та убо́г хотя́ быти вои́стинну, о́тче,/ до́брою изме́ною измени́вся, псало́мски подо́бно ре́щи:/ сия́ изме́на десни́цы Вы́шняго.
Припев: Преподо́бне о́тче Симеóне, моли́ Бо́га о на́с.
Храм себе́ Бо́гу сотвори́в,/ це́рковь Того́ Матере с сы́ном в Горе́ святе́й воздви́гл еси́,/ ю́же и облагоуха́л еси́ ми́ром свята́го твоего́ те́ла./ Я́же ны́не благоле́пием, сы́ны твои́ми украша́ема, гроб твой обновля́ет,/ па́мять твою́ пра́зднующих.
Припев: Преподо́бне о́тче Симеóне, моли́ Бо́га о на́с.
Делы доброде́телей живонача́льное де́йство от Живонача́льныя Тро́ицы прие́м,/ ме́ртвость гро́ба, забве́ния хода́тая, я́ко животоча́щ ны́не явля́еши:/ не потаи́ бо твои́х исправле́ний, Симео́не, струя́ми ми́ра твоего́.
Припев: Преподо́бне о́тче Симеóне, моли́ Бо́га о на́с.
Благода́ть вседе́тельная Ду́ха пе́рвее селе́ние в тебе́ обре́тши,/ ны́не ра́ку моще́й твои́х осеня́ющи, ми́ра издаю́щую кла́дязь, сию́ содела́;/ от него́же благода́ть, блажа́ще тя, почерпа́ем, Симео́не преподо́бне, и и́ноков украше́ние.
Сла́ва Отцу́ и Сы́ну и Свято́му Ду́ху.
Непрекло́ннии столпи́ Це́ркве Христо́вы, Симео́не и Са́вво яви́стеся:/ вы бо я́ко персть, е́реси попра́вше,/ лю́ди своя́ возвы́систе к ве́ре благоче́стия./ Тем А́нгелом согра́ждане бы́сте, воспева́юще с ни́ми:/ Свят, Свят, Свят Оте́ц и Сын, и Дух Святы́й.
И ны́не и при́сно и во ве́ки веко́в. Ами́нь.
Богородичен: И́же манове́нием вся содержа́й и ца́рствуяй ве́ки все́ми Христо́с Бог,/ из Тебе́, Богома́ти, воплоти́ся, безстра́стен Сый Бо́жество́м,/ ме́не ра́ди Кресту́ сочта́ся,/ Его́же стра́сти жела́юще Твои́ уго́дницы,/ ца́рство земно́е оста́вльше, по́стнически Тому́ сраспя́шася.
Кондак, глас 6
А́нгельское возлюби́в на земли́ житие́,/ миродержа́ние и мир оста́вив,/ поще́нием Христу́, Симео́не, после́довал еси́,/ к Нему́же лю́бящих тя апо́стольски наста́вил еси́, вопия́:/ возлюби́те Бо́га, я́коже Он возлюби́ нас.
Икос
И́же до распя́тия и сме́рти нас ра́ди Смири́вшагося,/ крест, поще́нием смири́вся, о́тче, поне́сл еси́,/ и тем, хваля́щагося престо́л свой утверди́ти на о́блацех,/ я́коже на го́рдаго до́блественне подви́гся, низложи́л еси́./ Тем ве́льми тя просла́ви Христо́с, Вели́кий Дарода́тель:/ Ему́же ны́не предстоя́, помина́й, я́ко отечестволю́бец,/ и от нападе́ния проти́вных ста́до твое́ соблюда́й неразсыпа́емо/ и, умаща́я ми́ром, твоя́ лю́ди знамена́й,/ губи́теля душ бежа́ти от них творя́й, Симео́не, моли́твами твои́ми,/ апо́стольски же наставля́я и вопия́ лю́бящим тя:/ возлюби́те Бо́га, я́коже Он возлюби́ нас.
Песнь 7
Ирмос: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пещи́ ра́дованною ного́ю,/ я́ко во цве́тнице лику́юще, поя́ху:/ благослове́н еси́, Бо́же оте́ц на́ших.
Припев: Преподо́бне о́тче Симеóне, моли́ Бо́га о на́с.
Разумева́я на ни́ща и убо́га,/ благ муж ми́луяй и дая яви́лся еси́,/ и бла́гости Бо́жия сподо́бився, благи́х зе́млю насле́довал еси́:/ отону́дуже и нас ны́не, Симео́не, весели́ши,/ облагоуха́я струя́ми ми́ра твоего́.
Припев: Преподо́бне о́тче Симеóне, моли́ Бо́га о на́с.
Вседу́шно Христа́ возлюби́в и Того́ за́поведи соблюда́я,/ я́ко реко́ю, благоутро́бием изсо́хших нището́ю бога́тно напои́л еси́./ Тем твою́ па́мять возвели́чил есть/ и ра́ку моще́й твои́х ми́ром, о́тче, обогати́л есть.
Припев: Преподо́бне о́тче Симеóне, моли́ Бо́га о на́с.
В пе́щи пла́менем росу́ источи́вый,/ и из суха́го же́зла цвет израсти́вый,/ ди́вен в де́лех Свои́х Госпо́дь:/ и твоего́ о́браза стенопи́санное подо́бие,/ из суха́го ва́ра, Симео́не, миропрозяба́ющее яви́л есть.
Припев: Преподо́бне о́тче Симеóне, моли́ Бо́га о на́с.
Безме́рным твои́м смире́нием,/ безме́рно хвало́ю вы́сящагося на земли́ го́рдаго смири́л еси́./ Ны́не щито́м моли́тв твои́х от ко́зней его́ лю́ди твоя́, Симео́не, защища́й,/ ма́стию ми́ра твоего́ знамену́я пою́щия:/ благослове́н Бог оте́ц на́ших.
Сла́ва Отцу́ и Сы́ну и Свято́му Ду́ху.
Све́тло отцы́ пе́рвее ва́ше житие́/ светле́йше же ны́не па́мять и честне́йши:/ сокро́вище бо бла́гости и дом ми́лости яви́стеся,/ и пе́рвыя бла́гости существа́ сподо́бистеся, Симео́не и Са́вво,/ и́стинно ублажа́еми и досто́йно хвали́ми.
И ны́не и при́сно и во ве́ки веко́в. Ами́нь.
Богородичен: О́гненными блиста́нии просвети́ омраче́нное мое́ се́рдце, ро́ждшая на земли́ Восто́ка мы́сленнаго Со́лнце,/ И́мже просвети́вшеся Твои́ служи́тели, Са́вва и Симео́н Богома́ти,/ лю́ди своя́ на за́паде озари́ша и научи́ша пе́ти:/ благослове́н Бог оте́ц на́ших.
Песнь 8
Ирмос: Седмери́цею пещь/ халде́йский мучи́тель,/ Богочести́вым неи́стовно разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Припев: Преподо́бне о́тче Симеóне, моли́ Бо́га о на́с.
Я́ко у́тро, я́ко со́лнце па́мять твоя́ возсия́,/ просвеща́ющи сердца́ ве́рных,/ ты бо све́та и дне яви́лся еси́ насле́дник,/ иде́же, о́тче, водворя́яся ны́не,/ помина́й твою́ па́мять блажа́щих, и пою́щих:/ де́ти, благослови́те, свяще́нницы, воспо́йте,/ лю́дие, превозноси́те во вся ве́ки.
Припев: Преподо́бне о́тче Симеóне, моли́ Бо́га о на́с.
Село́ мы́сленное, ду́шу твою́, к ни́щим ми́лостию посе́яв,/ угобзи́вшияся ти плоды́ живо́тныя в ве́чных жи́тницах собра́л еси́,/ и от оби́лия Небе́снаго твоего́ бога́тства,/ ми́ром на земли́ благово́нным сыны́ твоя́ украша́еши.
Припев: Преподо́бне о́тче Симеóне, моли́ Бо́га о на́с.
Прекра́сный душе́ю твой, о́тче Са́вво, любе́зный,/ друга́го тя патриа́рха, я́ко пе́рваго Ио́сиф, но́ваго нам Изра́иля прино́сит,/ не от Еги́пта рабо́ты, но от святы́я горы́:/ и в земли́ люде́й твои́х утвержде́ние мироточи́ва положи́л есть.
Припев: Преподо́бне о́тче Симеóне, моли́ Бо́га о на́с.
Це́рковь твоя́ вели́кая, Боже́ственный я́ко рай ви́дится,/ ра́ку моще́й твои́х, о́тче, иму́щи,/ цве́ты разли́чныя многообра́зныя твое́я доброде́тели чудесно прозяба́ющи,/ и твою́ па́мять, Симео́не, чту́щия облагоуха́ет пою́щи:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.
Сла́ва Отцу́ и Сы́ну и Свято́му Ду́ху.
Чужестра́ннии гро́би по́стническими ва́шими телесы́ освяти́шася,/ земля́ ва́ша благослови́ся прише́ствием моще́й ва́ших,/ це́ркви же ва́ша украша́ются, миропода́тельны и благоуха́нны сих иму́ща:/ я́же от Бога ми́ром спаса́йте.
И ны́не и при́сно и во ве́ки веко́в. Ами́нь.
Богородичен: Свята́я, две́ри отве́рзи ми, Чи́стая Богоро́дице,/ су́щим во тьме свет неопи́санный,/ опи́саннаго пло́тию Христа́, пра́вды Со́лнце, облиста́вши./ Его́же луча́ми Са́вва и Симео́н озари́вшеся,/ страну́ люде́й свои́х ве́рою Тому́ присво́иша.
Песнь 9
Ирмос: Ужасе́ся о сем Не́бо/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дице,/ А́нгелов и челове́к чинонача́лия велича́ют.
Припев: Преподо́бне о́тче Симеóне, моли́ Бо́га о на́с.
Прише́ствием пе́рвее моще́й твои́х/ оте́чество твое́ ра́дости испо́лнися,/ предста́теля тя к Бо́гу стяжа́вше;/ и па́мять твою́ ны́не торжеству́юще, весели́мся,/ обогаща́емы ма́стию ми́ра твоего́.
Припев: Преподо́бне о́тче Симеóне, моли́ Бо́га о на́с.
Я́ко столпа́ высока́ и крепка́,/ я́ко бла́га побо́рника и отечестволю́бца,/ христоимени́тии лю́дие твои́ и́муще тя, проти́вных, о́тче, воста́ния,/ и вся́кия зло́бы ко Христу́ моли́твами твои́ми, Симео́не, избавля́емся.
Припев: Преподо́бне о́тче Симеóне, моли́ Бо́га о на́с.
Моще́й ва́ших прия́тием це́ркви ва́ша на земли́ обога́щшеся,/ и ду́хом на Небесех пе́рвенец Церковь просвеща́ете./ В не́йже со апо́столы, я́ко учи́тели,/ и со преподо́бными, я́ко спо́стницы,/ о нас, Симео́не и Са́вво, моли́теся.
Припев: Преподо́бне о́тче Симеóне, моли́ Бо́га о на́с.
Престо́лу вели́кому предстоя́ще, призира́йте на лю́ди своя́:/ и прие́мше на́ше моле́ние, мир от Христа́ испроси́те земли́ на́шей/ и во благове́рии нас утверди́те.
Сла́ва Отцу́ и Сы́ну и Свято́му Ду́ху.
Преподо́бнии и преблаже́ннии,/ Богому́дрии и Богоно́снии,/ равноапо́столы и чудотво́рцы,/ па́стыри же и учи́тели,/ многохвали́мии же и многоимени́тии отцы́, Симео́не и Са́вво, досточу́днии,/ от нас песнь сию́ прие́мше, спаса́йте рабы́ своя́.
И ны́не и при́сно и во ве́ки веко́в. Ами́нь.
Богородичен: Пла́мене о́гненнаго мя свободи́,/ я́же па́че ума́ Огнь ро́ждши Непостоя́нный,/ прише́дшаго огнь ра́зума на зе́млю воврещи́./ Имже Твои́ уго́дницы разже́гшеся, Богома́ти,/ любо́вию Тому́ после́доваша.
Светилен
От Боже́ственныя благода́ти, о́тче, просвеща́емь,/ мра́ком е́реси одержи́мыя просвети́л еси́ лю́ди твоя́:/ и жития́ све́тлости отврещи́ся собо́ю научи́л еси́./ Тем тя любо́вию чтим, Симео́не му́дре, мона́хов похвало́.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Я́ко два свети́ла мы́сленныя тве́рди,/ страну́ люде́й свои́х ве́рою просвеща́ете./ Те́мже па́мять ва́шу че́стно соверша́юще,/ сла́вим просла́вльшую вас, Пресвяту́ю Тро́ицу./ Симео́не и Са́вво, дво́ице свята́я.
