Канон преподобному Димитрию Прилуцкому, Вологодскому (2-й)

p1b95jodkd1r9t1qm01qai1ukf1p8k4 - Канон преподобному Димитрию Прилуцкому, Вологодскому (2-й) Минея, 11 Февраля, Ин канон Глас 8 Песнь 1 Ирмос: Пои́м Господеви,/ прове́дшему лю́ди Своя́ сквозе́ Че́рмное мо́ре,/ я́ко Еди́н сла́вно просла́вися. Припев: Преподо́бне о́тче Дими́трие, моли́ Бо́га о на́с. Даждь ми, Христе́, мой Спа́се, проще́ние мно́гих ми согреше́ний,/ я́ко да и мы почита́ем па́мять Твоего́ уго́дника, преподо́бнаго Дими́трия./ Его́же моли́твами, Бо́же, спаси́ нас. Припев: Преподо́бне о́тче Дими́трие, моли́ Бо́га о на́с. Твои́ми моли́твами же и мольба́ми ми́лостиваго умоля́й Бо́га,/ преподо́бне о́тче наш Дими́трие,/ и грехо́вный мрак печа́ли нашея разори́,/ и благоду́шия утеше́ния нас духовнаго испо́лни. Сла́ва Отцу́ и Сы́ну и Свято́му Ду́ху. От младе́нства ты, блаже́нне Дими́трие, позна́н бысть Бо́гом/ и, на Него́ наде́яся, наставля́ем на спаси́тельная Его́ повеле́ния./ Ему́же ны́не предстоя́ со дерзнове́нием, о нас помоли́ся. И ны́не и при́сно и во ве́ки веко́в. Ами́нь. Богородичен: Еди́наго от Святы́я Тро́ицы Сло́ва и Сы́на родила́ еси́, Де́во Пречи́стая,/ Его́же с преподо́бными и пра́ведными моли́ о рабе́х Твои́х,/ ве́рою прося́щих грехо́в проще́ния. Песнь 3 Ирмос: Ирмо́с: Ты еси́ утвержде́ние притека́ющих к Тебе́, Го́споди,/ Ты еси́ свет омраче́нных,/ и пое́т Тя дух мой. Припев: Преподо́бне о́тче Дими́трие, моли́ Бо́га о на́с. Ты еси́, преподо́бне о́тче Дими́трие, послу́шатель Ева́нгельских слове́с,/ Самаго́ Го́спода рече́нию,/ вся любы́ ми́ра сего́ отве́рг и после́довал еси́ стопа́м Христо́вым;/ Ему́же с ли́ки А́нгел ны́не служа́,/ и о нас моли́ся, чту́щих тя. Припев: Преподо́бне о́тче Дими́трие, моли́ Бо́га о на́с. В зако́нех по́стных поуча́яся, преподо́бный/ не осла́бися в нача́льных соверше́нных нача́лех, хотя́ угоди́ти своему́ Го́споду,/ Ему́же жела́тельне обещася усе́рдно да́же и до кончи́ны,/ до́ндеже сын Ца́рствия Его́ показа́ся. Сла́ва Отцу́ и Сы́ну и Свято́му Ду́ху. Воздержа́нием кра́йним плоть твою́ умертви́л еси́, Дими́трие,/ сего́ ра́ди Ду́хом Боже́ственным окрили́вся,/ дости́гл еси́ священнонача́льных служи́телей,/ иде́же Небе́сных Бо́жиих слуг безпло́тных ра́дования. И ны́не и при́сно и во ве́ки веко́в. Ами́нь. Богородичен: Благослове́нная, Всенепоро́чная Богоро́дице Де́во Мари́е, Сло́во Божие нам ро́ждшая,/ свобожда́ющаго Свои́х преподо́бных от тле́ннаго ми́ра,/ и́хже ра́ди нас спаса́ющаго. Седален, глас 3 Исправле́ние жития́ твоего́ всем просвеща́ет стопы́, Дими́трие о́тче,/ вои́стинну ве́рою подо́бящим ти ся;/ те́мже, и́же любо́вию блажа́т тя всегда́,/ спаса́й моли́твами твои́ми от вся́кия тесноты́,/ Христа́ Преблага́го моля́,/ преподо́бне блаже́нне досточу́дне. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Я́ко невозде́ланная, Де́во, Лоза́, красне́йший грозд прозябла́ еси́,/ источа́ющ нам вино́ спасе́ния,/ всех веселя́щее ду́ши же и телеса́./ Те́мже я́ко вину́ Тя до́брых блажа́ще при́сно,/ со А́нгелом вопие́м Ти:/ ра́дуйся, Благода́тная. Песнь 4 Ирмос: Услы́шах, Господи,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Боже́ство. Припев: Преподо́бне о́тче Дими́трие, моли́ Бо́га о на́с. Рачи́тель сый ми́лостиваго Спаси́теля Христа́ твоего́,/ е́же ми́лостивно к Нему́ наказу́я не ктому́ согреша́ти,/ разсла́бленную жену́ исцели́л еси́, я́коже при купе́ли иногда́. Припев: Преподо́бне о́тче Дими́трие, моли́ Бо́га о на́с. Яко́же дре́во воздержа́ния, при вода́х насажде́н был еси́, о́тче блаже́нне,/ и благора́слена лоза́ яви́лся еси́, износя́ благоче́стия гро́зды. Сла́ва Отцу́ и Сы́ну и Свято́му Ду́ху. Не восхоте́ сла́вы се́я тле́нныя,/ па́че кня́зя вся́чески благочести́ваго,/ Царю́ Небе́сному хотя́ угоди́ти,/ от Него́же по́честь трудо́в свои́х прия́т нетле́нную. И ны́не и при́сно и во ве́ки веко́в. Ами́нь. Богородичен: Бы́вшее под ле́том Сло́во,/ Возсия́вшаго от Отца́ безле́тно Богома́ти нам родила́ еси́,/ Его́же моли́ спасти́ пою́щия Тя. Песнь 5 Ирмос: У́тренююще, вопие́м Ти,/ Го́споди: спаси́ ны,/ Ты бо еси́ Бог наш,/ ра́зве Тебе́, ино́го не ве́мы. Припев: Преподо́бне о́тче Дими́трие, моли́ Бо́га о на́с. А́ще и земно́е оте́чество, блаже́нне Дими́трие, оста́вил еси́,/ вся́чески Богоимени́тну оби́тель совокупи́л еси́:/ те́мже пе́рвое оте́чество Небе́сное прия́т,/ со дерзнове́нием Христу́ за ны моли́ся. Припев: Преподо́бне о́тче Дими́трие, моли́ Бо́га о на́с. Благоче́стия па́ки на стезю́, Дими́трие, наста́влен был еси́, о́тче,/ от Бо́га к неги́блемому наслажде́нию, посто́м и моли́твою в Вы́шняя приве́дься. Сла́ва Отцу́ и Сы́ну и Свято́му Ду́ху. Зело́ ми́лостива и странноприи́мца показа́ тя Спас наш ми́рови, о́тче,/ врача́ боля́щим, Дими́трие,/ си́рым и убо́гим засту́пника любе́зна. И ны́не и при́сно и во ве́ки веко́в. Ами́нь. Богородичен: Вои́стинну Тя, Ма́терь Божию, испове́дуем, и́стинную Богоро́дицу,/ Твои́м Рождество́м тле́ннаго осужде́ния изба́вльшиися,/ милосе́рдия ра́ди Человеколю́бца Бо́га к жи́зни нетле́нней по́звани бы́хом. Песнь 6 Ирмос: Ри́зу мне пода́ждь светлу,/ одея́йся све́том, я́ко ри́зою,/ Многоми́лостиве Христе́, Бо́же наш. Припев: Преподо́бне о́тче Дими́трие, моли́ Бо́га о на́с. В души́ свое́й Боже́ственная бога́тства Ду́ха Свята́го собра́в,/ непорочну моли́тву и чистоту́ красноле́пну,/ бде́ние и воздержа́ние,/ сего́ ра́ди жили́ще Святе́й Тро́ице яви́ся. Припев: Преподо́бне о́тче Дими́трие, моли́ Бо́га о на́с. Ри́зную ху́дость име́л еси́, пребога́те,/ в зиме́ же и ле́те не пременя́я, боле́зненно претерпе́л еси́ Бо́га ра́ди соверше́нно;/ те́мже Небе́снаго прия́тия насле́дник бы́ти сподо́бился еси́. Сла́ва Отцу́ и Сы́ну и Свято́му Ду́ху. На земли́, я́ко А́нгел, Бо́гу послужи́л еси́ вся́чески,/ и ны́не у Него́ со Безпло́тными и с преподо́бными/ ра́достно лику́еши, преблаженне Дими́трие,/ благоуха́ния же чуде́с нам испусти́л еси́. И ны́не и при́сно и во ве́ки веко́в. Ами́нь. Богородичен: Боже́ственное Сло́во в ложесна́х Твои́х прия́ла еси́, Богоро́дице Де́во Мари́е,/ и па́че естества́ родила́ еси́./ Его́же мо́ли от бед вся́ких нас изба́вити рабы́ Твоя́, пою́щия Тя. Кондак, глас 8 От ю́ности, преподо́бне, крест твой взем, Христу́ после́довал еси́,/ в моли́твах и поще́ниих, во бде́ниих же и злострада́ниих плоть твою́ изнуря́я;/ те́мже и Всеви́дящее О́ко, твоя́ труды́ ви́дев,/ чудесы́ тя прославля́ет и всех зва́ти тебе́ науча́ет:/ ра́дуйся, преподо́бне о́тче Дими́трие, по́стников удобре́ние. Икос Боже́ственными доброде́тельми твои́ми себе́, му́дре, украси́л еси́,/ Спа́су Христу́ жили́ще со́делав, о́тче, му́жественне:/ я́коже зла́то, искуси́лся еси́ ве́рою к Бо́гу и, наде́ждею и любо́вию обе́ты полага́я,/ воздержа́нием пости́вся, я́ко безпло́тен,/ в целому́дрии и во смире́нии возне́слся еси́./ Те́мже и мы, моли́твами твои́ми просве́щшеся,/ преподо́бне Дими́трие, вопие́м ти:/ ра́дуйся, я́ко из млада́ Бо́гу послужи́л еси́;/ ра́дуйся, притека́ющим к тебе́ спасе́ния хода́таю;/ ра́дуйся, христоимени́тым лю́дем похвала́ и утвержде́ние;/ ра́дуйся, я́ко твои́ми моли́твами сопроти́внии побежда́ются;/ ра́дуйся, я́ко всем прося́щим дае́ши дар, от Господа дарова́нный ти, исцеле́ний;/ ра́дуйся, я́ко и чудесы́ тя Бог прославля́ет и всех зва́ти тебе́ науча́ет;/ ра́дуйся, преподо́бне о́тче Дими́трие, по́стников удобре́ние. Песнь 7 Ирмос: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, по́юще:/ отце́в Бо́же, благослове́н еси́. Припев: Преподо́бне о́тче Дими́трие, моли́ Бо́га о на́с. И́же иногда́ притека́ющих, преподо́бне Дими́трие, к твоему́ чудотво́рному гро́бу с ве́рою,/ ка́ющихся к Бо́гу грехо́в свои́х,/ мольба́ми твои́ми ско́рченых челове́к ру́це испра́вил еси́, блаже́нне. Припев: Преподо́бне о́тче Дими́трие, моли́ Бо́га о на́с. И́же иногда́ злочести́ваго ра́тника Боже́ственною си́лою отри́нул еси́ от свята́го твоего́ гро́ба,/ и, не улучи́вш поми́лования, вско́ре обою́ животу́ лиши́ся таковы́й. Сла́ва Отцу́ и Сы́ну и Свято́му Ду́ху. И́же иногда́ благоче́стно благогове́йнии лю́дие твои́ми, свя́те Дими́трие, моли́твами,/ иногда́ же кропле́нием святы́я воды́ свяще́нныя,/ разли́чная исцеле́ния прие́млют, припа́дающии к чудотво́рному твоему́ гро́бу. И ны́не и при́сно и во ве́ки веко́в. Ами́нь. Богородичен: Изба́вихомся вси от страсте́й, и бед, и обстоя́ний, и неду́гов многообра́зных/ мольба́ми Твои́ми, Пречи́стая Богома́ти,/ Спа́су Христу́ зову́ще:/ оте́ц на́ших Бо́же, благослове́н еси́. Песнь 8 Ирмос: Царя́ Небеснаго,/ Его́же пою́т вои́ А́нгельстии,/ хвали́те и превозноси́те во вся ве́ки. Припев: Преподо́бне о́тче Дими́трие, моли́ Бо́га о на́с. Столп одушевле́нный, о́тче Димитрие, и исто́чник неоску́дный вои́стинну,/ слепыя просвеща́я, разсла́бленныя укрепля́я и бе́сы прогоня́я/ не то́кмо у гро́ба, но и на ме́стех, иде́же и́мя твое́ нарица́ют с любо́вию. Припев: Преподо́бне о́тче Дими́трие, моли́ Бо́га о на́с. Яко́же други́й Илия́, яви́вся,/ сугу́бу благода́ть нам дал еси́,/ твоя́ честны́я мо́щи, точи́ти исцеле́ния тре́бующим,/ явле́нием же твои́м и по сме́рти, преподо́бне о́тче Дими́трие,/ ины́х злых устраша́я и па́че ины́м исцеле́ния творя́ ве́рным. Сла́ва Отцу́ и Сы́ну и Свято́му Ду́ху. Иногда́ проро́ческим да́ром от Бо́га, блаже́нне, почте́н был еси́,/ вся́чески же тре́бующим ми́лостив пока́зовался еси́/ и ны́не, о́тче Дими́трие, ми́лостивому Спа́су за ны моли́ся,/ воспева́ющия и превознося́щия Его́ во ве́ки. И ны́не и при́сно и во ве́ки веко́в. Ами́нь. Богородичен: Ра́дуйся, престо́ле Госпо́день огнезра́чный,/ ра́дуйся, две́ре невеще́ственнаго блиста́ния./ Ра́дуйся, о́блаче, Со́лнце возсия́вший Пра́ведное – Христа́ Спа́са на́шего,/ Его́же превозно́сим во ве́ки. Песнь 9 Ирмос: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще. Припев: Преподо́бне о́тче Дими́трие, моли́ Бо́га о на́с. Явле́нием Боже́ственным сия́еши, о́тче Дими́трие преподо́бне,/ я́коже обеща́лся еси́, блаже́нне,/ моли́твою град твой сохрани́л еси́ от хотя́щих воева́ти без вины́ лю́ди твоя́, святе. Припев: Преподо́бне о́тче Дими́трие, моли́ Бо́га о на́с. От Бо́га показа́лся еси́ нам цели́тель, неду́гующим в паде́ниих,/ очи́стник же, блаже́нне, и прогони́тель лука́вым ду́хом,/ тем тя вси велича́ем. Сла́ва Отцу́ и Сы́ну и Свято́му Ду́ху. А́ще и преста́вился еси́ от нас, о́тче Дими́трие,/ в хра́мех Боже́ственных Святе́й Тро́ице предстоя́,/ храм Ду́ху Свято́му был еси́:/ моли́ся за вся христианы, и́ноки же и простцы́, тебе́ велича́ющия. И ны́не и при́сно и во ве́ки веко́в. Ами́нь. Богородичен: Вои́стинну, Богоро́дице, Тобо́ю спа́сшиися, испове́дуем Тя,/ Де́во Влады́чице,/ я́ко родила́ еси́ нам Бо́га Спаси́теля,/ Еди́наго от Тро́ицы Сы́на и Сло́ва, Кресто́м разо́ршаго смерть,/ Его́же о нас с преподо́бным Дими́трием моли́, Тебе́ велича́ющих. Светилен Мирска́го пристра́стия я́ко от скве́рны уклони́лся еси́,/ и а́лчбою плоть увяди́л еси́, о́тче,/ и Небе́сною сла́вою со А́нгелы обогати́лся еси́./ Те́мже непреста́нно моли́ о нас Христа́ Бо́га, преподо́бне Дими́трие. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Тя предста́тельницу и́мамы вси гре́шнии,/ о Пресвята́я Де́во!/ Ты благопреме́нна сотвори́ Сына Твоего́ Ма́терними Твои́ми моли́твами.