Акафист святителю Никите, епископу Новгородскому, чудотворцу

Святитель Никита Печерский, Новгородский, затворник Конда́к 1. Возбра́нный воево́до и па́стырю свяще́ннейший Вели́каго Нова́града, Це́ркве утвержде́ние, Христо́в иера́рше Ники́то, приими́ от на́с усе́рдно приноси́мая тебе́ благохвале́ния и твои́ми моли́твами от бе́д и напа́стей избавля́й всегда́ любо́вию тебе́ зову́щих: Ра́дуйся, те́плый засту́пниче на́ш Ники́то, святи́телю преди́вный. И́кос 1. А́нгел во пло́ти на земли́ яви́лся еси́ вои́стинну чу́дный Ники́то, с пло́тию бо я́ко безпло́тен пожи́л еси́, те́мже, со безпло́тными ны́не водворя́яся, приими́ от на́с земноро́дных пе́снь сию́: Ра́дуйся, Ники́то, А́нгелов равностоя́телю. Ра́дуйся, иера́рше, преподо́бных сожи́телю. Ра́дуйся, вла́сть пасти́ слове́сныя о́вцы от Бо́га прия́вый. Ра́дуйся, све́том твои́х уче́ний па́ству твою́ осия́вый. Ра́дуйся, преди́вный целому́дрия храни́телю. Ра́дуйся, по́стническаго жития́ и́стинный люби́телю. Ра́дуйся, светоза́рная мо́лние, Но́вград Вели́кий ве́село озаря́ющая. Ра́дуйся, луче́ светосия́нная, де́монскую тму́ разгоня́ющая. Ра́дуйся, ра́дости ве́рным пода́телю. Ра́дуйся, в печа́лех и боле́знех на́ших ско́рый предста́телю. Ра́дуйся, те́плый засту́пниче на́ш Ники́то, святи́телю преди́вный. Конда́к 2. Ви́дяще стра́нный и чу́дный жития́ твоего́ о́браз, Христо́в святи́телю Ники́то, вельми́ удивля́емся, размышля́юще же твоя́ многотру́дныя по́двиги, пое́м Бо́гу на сия́ тебе́ укрепи́вшему: Аллилу́ия. И́кос 2. Ра́зум Боже́ственный пода́ждь на́м свы́ше, иера́рше, да возмо́жем по достоя́нию восхвали́ти доброде́тельное твое́ житие́, тебе́ же любо́вию вопи́ти: Ра́дуйся, мно́гими доброде́тельми просия́вый. Ра́дуйся, пло́ти твоея́ жела́ния обузда́вый. Ра́дуйся, ра́зум тво́й в послуша́ние ве́ры плени́вый. Ра́дуйся, се́рдце твое́ чи́сто сохрани́вый. Ра́дуйся, ра́зумом Христо́вым обогати́выйся. Ра́дуйся, я́ко а́нгел в житии́ твое́м яви́выйся. Ра́дуйся, разруши́телю страсте́й душетле́нных. Ра́дуйся, сокро́вище слове́с богодухнове́нных. Ра́дуйся, гро́зное бесо́вское устраше́ние. Ра́дуйся, пречу́дное в челове́цех удивле́ние. Ра́дуйся, те́плый засту́пниче на́ш Ники́то, святи́телю преди́вный. Конда́к 3. Си́ла Вы́шняго от ю́ности осени́ тя́, богому́дре, и показа́ селе́ние и до́м Ду́ха Всесвята́го, Ему́же и о на́с помоли́ся, о́тче че́стне, тя́ ублажа́ющих, Бо́гу же зову́щих: Аллилу́ия. И́кос 3. Иму́ще вели́ка тя́, о, Ники́то, засту́пника и ско́раго в напа́стех помо́щника, моле́бно тебе́ призыва́ем и с весе́лием к па́мяти твое́й воспева́ем: Ра́дуйся, ско́рый послу́шателю к тебе́ прибега́ющих. Ра́дуйся, скорбя́щим душа́м утеше́ние. Ра́дуйся, отча́янных исправле́ние. Ра́дуйся, Судию́ Пра́веднаго за гре́шныя лю́ди умоля́яй. Ра́дуйся, чту́щия тя́ от печа́ли и бе́д избавля́яй. Ра́дуйся, уныва́ющих всежела́нный посети́телю. Ра́дуйся, неду́жных ми́лостивейший цели́телю. Ра́дуйся, уго́дниче Христо́в преизря́дный. Ра́дуйся, цве́те ра́йский прекра́сный. Ра́дуйся, те́плый засту́пниче на́ш Ники́то, святи́телю преди́вный. Конда́к 4. Бу́рю страсте́й многомяте́жнаго ми́ра возненави́дев, о́тче, все́х красо́т его́ устрани́лся еси́, во оби́тель же всели́вся и а́нгельский чи́н восприи́м, со А́нгелы пе́л еси́ Христо́ви: Аллилу́ия. И́кос 4. Слы́шав христоподража́тельную жи́знь богоно́сных и вели́ких оте́ц, те́м в житии́ уподо́битися возревнова́л еси́, сего́ ра́ди в затво́р всели́вся, сугу́бым по́двигом себе́ предае́ши, те́мже досто́йно слы́шиши: Ра́дуйся, подви́жниче Бо́жий преусе́рднейший. Ра́дуйся, мона́шествующих превели́кая сла́во. Ра́дуйся, святы́х пустынножи́телей доброде́тельными обогати́выйся нра́вы. Ра́дуйся, равноа́нгельно Бо́гу послужи́вый. Ра́дуйся, А́нгелом ра́вную и че́сть получи́вый. Ра́дуйся, до́блий и́ноческих по́двигов ревни́телю. Ра́дуйся, усе́рдный Христо́вых за́поведей исполни́телю. Ра́дуйся, вра́жиих наве́тов бо́дрый прогони́телю. Ра́дуйся, соверше́нства христиа́нскаго изя́щнейший учи́телю. Ра́дуйся, те́плый засту́пниче на́ш Ники́то, святи́телю преди́вный. Конда́к 5. Боготе́чнаго твоего́ жития́ не терпя́, человеконенави́стник искуше́ние льсти́вно тебе́ подлага́ет, во о́бразе а́нгела тебе́ яви́вся и преста́ти моли́тися научи́в: ты́ же а́ще и прельще́н бы́л еси́ хи́тростию его́, оба́че не до конца́ поги́бл еси́ во искуше́нии; моли́твами бо бра́тии спасе́н, Христу́ вопия́л еси́: Аллилу́ия. И́кос 5. Ви́дяще и́ноцы стра́нную ве́щь на тебе́ явля́емую, я́ко от ве́тхих то́кмо Боже́ственных Писа́ний к тебе́ приходя́щих поуча́еши, от Но́ваго же Заве́та ничесо́же глаго́ля, уразуме́ша прельще́на бы́ти тя́, преподо́бне, сего́ ра́ди о́бщую о тебе́ моли́тву сотво́рше, диа́вола отгоня́ют и из затво́ра изво́дят тя́. Мы́ же тебе́, я́ко самому́ искуше́ну бы́вшу и на́м искуша́емым помога́ти могу́щу, не престае́м зва́ти: Ра́дуйся, от врага́ человекоуби́йцы лю́те пострада́вый. Ра́дуйся, всю́ глубину́ бесо́вския ле́сти на себе́ испыта́вый. Ра́дуйся, моли́твами подви́жников от ро́ва поги́бели восхище́нный. Ра́дуйся, от рабо́ты диа́воли Го́сподем освобожде́нный. Ра́дуйся, на неви́димыя враги́ и на́м кре́пкий помо́щниче. Ра́дуйся, во искуше́ниих жите́йских всегда́шний на́м посо́бниче. Ра́дуйся, прило́г вся́каго зла́ от чту́щих тя́ отража́яй. Ра́дуйся, всему́ благо́му вхо́д отверза́яй. Ра́дуйся, бесо́вския си́лы кре́пкое низложе́ние. Ра́дуйся, грехми́ пове́рженных тве́рдое возведе́ние. Ра́дуйся, те́плый засту́пниче на́ш Ники́то, святи́телю преди́вный. Конда́к 6. Пропове́дницы твоего́ спасе́ния бы́вше и́ноцы Пече́рстии, от диа́вола тя́ исхи́тивше, на и́стинный пу́ть наставля́ют: ты́ же, о́тче Ники́то, позна́в го́рькое твое́ прельще́ние, покая́ние со слеза́ми Бо́гу прине́сл еси́, моля́ся и зовы́й: Аллилу́ия. И́кос 6. Возсия́л еси́, я́ко светоза́рное со́лнце на тве́рди церко́вней, диа́вола искуше́ния избе́г и по́стническими по́двиги укрепи́вся: те́мже и на́с наве́тов лука́ваго свободи́, да зове́м ти́: Ра́дуйся, кре́ст тво́й терпели́вно на ра́ме носи́вый. Ра́дуйся, мы́сленнаго те́м Амали́ка низложи́вый. Ра́дуйся, дарова́ния Боже́ственнаго Ду́ха прия́вый. Ра́дуйся, в житии́ стра́ждущим ми́лостивно помога́яй. Ра́дуйся, те́пле к тебе́ притека́ющих треволне́ния страсте́й изменя́яй. Ра́дуйся, оби́димых ско́рый засту́пниче. Ра́дуйся, обурева́емых благопопечи́тельный защи́тниче. Ра́дуйся, бы́стрый спаси́телю в напа́стех су́щим. Ра́дуйся, скоропредста́тельный помо́щниче зову́щим. Ра́дуйся, те́плый засту́пниче на́ш Ники́то, святи́телю преди́вный. Конда́к 7. Хотя́ Христо́с Госпо́дь, Вели́кий Архиере́й, святи́тельскою украси́ти тя́ вла́стию, на свяще́нный престо́л Вели́каго Нова́града возво́дит тя́, на не́м же возсе́д, свети́ло многосве́тлое гра́ду твоему́ яви́лся еси́, все́х просвеща́я и зва́ти Бо́гу науча́я: Аллилу́ия. И́кос 7. Но́вград Вели́кий прии́м тя́ от Го́спода па́стыря и учи́теля, ра́довашеся, преподо́бне, зря́ твои́х доброде́телей исправле́ние, и в пе́снех свяще́нных доны́не взыва́ем тебе́: Ра́дуйся, учи́телю свяще́ннейший, от Бо́га на́м дарова́нный. Ра́дуйся, архиере́ю Бо́жий святы́й предызбра́нный. Ра́дуйся, усе́рдный благове́рия побо́рниче, и у́ме высоча́йший. Ра́дуйся, Христо́вых веле́ний пропове́дниче сладча́йший. Ра́дуйся, Вели́каго Нова́града пречу́дное украше́ние. Ра́дуйся, безкро́вныя же́ртвы непоро́чно Бо́гу приноси́вый. Ра́дуйся, в ве́ре Правосла́вней па́ству твою́ утверди́вый. Ра́дуйся, я́ко мно́гия просвети́л еси́ твои́м архипа́стырским сло́вом. Ра́дуйся, святи́телю, и на́с твои́х ча́д сподо́би ста́ти пред Бо́жиим престо́лом. Ра́дуйся, те́плый засту́пниче на́ш Ники́то, святи́телю преди́вный. Конда́к 8. Стра́нно Бо́га вочелове́чшася на́шего ра́ди спасе́ния па́стве твое́й пропове́дал еси́, Ники́то, и и́дольских суеве́рий мра́к разгна́л еси́, Ипоста́сней Прему́дрости зовы́й: Аллилу́ия. И́кос 8. Ве́сь бы́л еси́ все́м в па́стве твое́й ско́рый помо́щник, святи́телю, засту́пник оби́димым, ни́щим пита́тель, си́рым и вдови́цам защи́тник, на похвалу́ все́х подвиза́я вопи́ти тебе́: Ра́дуйся, во вся́ких ну́ждах ско́рое поможе́ние. Ра́дуйся, в печа́лех бы́строе утеше́ние. Ра́дуйся, от оби́д и озлобле́ний свобожда́яй. Ра́дуйся, о́гненнаго запале́ния гра́д тво́й избавля́яй. Ра́дуйся, ми́лости сокро́вище многоце́нное. Ра́дуйся, бога́тство на́м подава́яй нетле́нное. Ра́дуйся, обурева́емых приста́нище ти́хое. Ра́дуйся, гони́мых и оби́димых прибе́жище вели́кое. Ра́дуйся, мно́гия лю́ди от поги́бели исхи́тивый. Ра́дуйся, о́вцы твоя́ от во́лка лю́таго сохрани́вый. Ра́дуйся, те́плый засту́пниче на́ш Ники́то, святи́телю преди́вный. Конда́к 9. Вся́кий ро́д и во́зраст ве́рных Вели́каго Нова́града усе́рдно чти́т све́тлый де́нь твоея́ па́мяти, святи́телю Ники́то, в о́ньже собра́вшеся моле́бно зове́м ти́: бу́ди на́м в печа́лех уте́шитель, в озлобле́ниих помо́щник, в боле́знех вра́ч ско́рый, да тобо́ю злы́х изба́вльшеся ра́достно зове́м: Аллилу́ия. И́кос 9. Вети́йствующий язы́к не мо́жет по достоя́нию изобрази́ти все́ вели́чие любве́ твоея́ к твоему́ слове́сному ста́ду, приснопа́мятне, не то́чию бо во вре́менней твое́й жи́зни, но и к небе́сным отше́д, оте́чески назира́еши все́х вопию́щих к тебе́ с любо́вию такова́я: Ра́дуйся, наста́вниче превели́кий спасе́ния. Ра́дуйся, согреша́ющих исправле́ние. Ра́дуйся, земны́я сла́сти презре́вый. Ра́дуйся, в го́рния оби́тели возлете́вый. Ра́дуйся, Це́рковь Нова́града святи́тельством украси́вый. Ра́дуйся, ча́д твои́х богому́дренными глаго́лы просвети́вый. Ра́дуйся, лю́бящих тя́ неизрече́нныя исполня́яй ра́дости. Ра́дуйся, я́ко твои́ми моли́твами ве́чныя сме́рти свобожда́емся. Ра́дуйся, те́плый засту́пниче на́ш Ники́то, святи́телю преди́вный. Конда́к 10. Спасти́ся хотя́ще ве́рнии от бе́д и скорбе́й, ко гро́бу твоему́ свяще́нному моле́бно притека́ем. Ты́ же, о, чудотво́рче святы́й, помози́ на́м, немощны́м, утоли́ ско́рбь на́шу и на пу́ть пра́вый заблужда́ющих наста́ви на́с, да спасе́ннии тобо́ю, хвале́бными гла́сы зове́м: Аллилу́ия. И́кос 10. Стена́ необори́мая и покро́в ты́ еси́, о́тче, все́м челове́ком с ве́рою к тебе́ прибега́ющим, те́мже и на́м, прося́щим твоего́ заступле́ния, бу́ди огражде́ние кре́пкое, да в тебе́ утвержда́ющеся всегда́ вопие́м: Ра́дуйся, бе́ды и печа́ли от лю́бящих тя́ отгоня́яй. Ра́дуйся, все́м тебе́ призыва́ющим ско́рую по́мощь подава́яй. Ра́дуйся, кре́посте и огражде́ние благочести́вых. Ра́дуйся, гро́зный наказа́телю нечести́вых. Ра́дуйся, от честны́х моще́й исцеле́ние неоску́дно источа́яй. Ра́дуйся, жела́емых на́м бла́г насади́телю. Ра́дуйся, находя́щих напа́стей отгони́телю. Ра́дуйся, наде́ющихся на тя́ защище́ние. Ра́дуйся, ду́ш на́ших сла́дкое утеше́ние. Ра́дуйся, те́плый засту́пниче на́ш Ники́то, святи́телю преди́вный. Конда́к 11. Пе́ния всеумиле́нная приноша́ху тебе́ лю́дие Новогра́дстии во обре́тении твои́х многоцеле́бных моще́й, святи́телю, от ни́х же и чудеса́ ве́лия с ве́рою приходя́щим яви́л еси́, Бо́гу, во святы́х Свои́х Ди́вному науча́я пе́ти: Аллилу́ия. И́кос 11. Светоприе́мную свещу́, на све́щнице гра́да на́шего возсия́вшую, зри́м тебе́, всесвяще́ннейший о́тче Ники́то, блиста́нием бо чуде́с все́х озаря́еши, любо́вию тебе́ зову́щих: Ра́дуйся, звездо́ небосве́тлая, от ю́га Росси́и возсия́вшая. Ра́дуйся, Но́вград Вели́кий сия́нием твои́м облиста́вшая. Ра́дуйся, во све́те невече́рнем обита́яй. Ра́дуйся, и на́м во мра́це грехо́внем блужда́ющим просвеще́ние низпосыла́яй. Ра́дуйся, свеще́, Боже́ственным пла́менем возжже́нная. Ра́дуйся, свети́льниче Христо́в де́монскими ве́тры не угаше́нный. Ра́дуйся, его́же восходя́ща на го́рняя А́нгели срето́ша. Ра́дуйся, ему́же ра́йская врата́ с весе́лием отверзо́ша. Ра́дуйся, со Христо́м ликовству́яй во сла́ве. Ра́дуйся, Трисия́нныя Зари́ наслажда́яйся я́ве. Ра́дуйся, те́плый засту́пниче на́ш Ники́то, святи́телю преди́вный. Конда́к 12. Благода́ть Боже́ственную испроси́ на́м у Спа́са Христа́, о́тче преподо́бный, простри́ на́м ру́ку по́мощи, покры́й на́с те́плым твои́м заступле́нием, и ве́чныя ра́дости сподо́би дости́гнути, да с тобо́ю во ве́ки веко́в вопие́м: Аллилу́ия. И́кос 12. Пою́ще твоя́ до́блественныя по́двиги, ублажа́ем достохва́льную кончи́ну, торжеству́ем же и па́мять твою́ свяще́нную, преподо́бне, и, чудя́щеся житию́ твоему́, похва́льная тебе́ вопие́м: Ра́дуйся, в го́рния оби́тели превознесе́нный. Ра́дуйся, в небе́сныя черто́ги со сла́вою введе́нный. Ра́дуйся, сла́вы отце́в преи́скренне возжела́вый. Ра́дуйся, преми́рное насле́дие бога́тно восприя́вый. Ра́дуйся, святи́тельским венце́м увенча́нный. Ра́дуйся, за чту́щих тя́ моли́твенниче неуста́нный. Ра́дуйся, посети́телю в не́мощех лежа́щих. Ра́дуйся, уте́шителю уны́лых и скорбя́щих. Ра́дуйся, с небе́сных круго́в на моле́ния на́ша ми́лостивно призира́яй. Ра́дуйся, чту́щих тя́ проше́ния ско́ро исполня́яй. Ра́дуйся, те́плый засту́пниче на́ш Ники́то, святи́телю преди́вный. Конда́к 13 О, всехва́льный и преди́вный святи́телю Христо́в Ники́то! Приими́ усе́рдно ма́лое сие́, от на́с гре́шных приноси́мое, моле́ние и потщи́ся ско́ро умоли́ти Бо́га и Влады́ку, да изба́вит на́с от вся́ких бе́д и озлобле́ний и бу́дущия му́ки свободи́т зову́щих: Аллилу́ия.[Се́й конда́к глаго́лется три́жды.][Далее повторяем 1‑е икос и кондак:]И́кос 1. А́нгел во пло́ти на земли́ яви́лся еси́ вои́стинну чу́дный Ники́то, с пло́тию бо я́ко безпло́тен пожи́л еси́, те́мже, со безпло́тными ны́не водворя́яся, приими́ от на́с земноро́дных пе́снь сию́: Ра́дуйся, Ники́то, А́нгелов равностоя́телю. Ра́дуйся, иера́рше, преподо́бных сожи́телю. Ра́дуйся, вла́сть пасти́ слове́сныя о́вцы от Бо́га прия́вый. Ра́дуйся, све́том твои́х уче́ний па́ству твою́ осия́вый. Ра́дуйся, преди́вный целому́дрия храни́телю. Ра́дуйся, по́стническаго жития́ и́стинный люби́телю. Ра́дуйся, светоза́рная мо́лние, Но́вград Вели́кий ве́село озаря́ющая. Ра́дуйся, луче́ светосия́нная, де́монскую тму́ разгоня́ющая. Ра́дуйся, ра́дости ве́рным пода́телю. Ра́дуйся, в печа́лех и боле́знех на́ших ско́рый предста́телю. Ра́дуйся, те́плый засту́пниче на́ш Ники́то, святи́телю преди́вный. Конда́к 1. Возбра́нный воево́до и па́стырю свяще́ннейший Вели́каго Нова́града, Це́ркве утвержде́ние, Христо́в иера́рше Ники́то, приими́ от на́с усе́рдно приноси́мая тебе́ благохвале́ния и твои́ми моли́твами от бе́д и напа́стей избавля́й всегда́ любо́вию тебе́ зову́щих: Ра́дуйся, те́плый засту́пниче на́ш Ники́то, святи́телю преди́вный. Моли́тва О, архиере́ю Бо́жий, святи́телю Ники́то, услы́ши на́с, гре́шных ра́б твои́х, сте́кшихся дне́сь в свяще́нный хра́м се́й, моля́щихся тебе́ и к свяще́нней твое́й ра́це притека́ющих, и умиле́нно вопию́щих: я́коже седя́ на престо́ле святи́тельства в Вели́ком Нове́граде се́м, и еди́ною належа́щу бездо́ждию, до́ждь моли́твами све́л еси́, и па́ки гра́ду сему́ о́гненным пла́менем обше́дшу, моли́твою пла́мень о́гненный угаси́л еси́. И ны́не мо́лим тя́: о, святи́телю Христо́в Ники́то, моли́ся ко Го́споду, е́же изба́вити Вели́кий гра́д Но́вград се́й и вся́ гра́ды и страны́ христиа́нския от тру́са, пото́па, гла́да, огня́, гра́да, меча́ и от все́х враго́в ви́димых и неви́димых, я́ко да избра́нных ра́ди моли́тв твои́х спаса́еми, сла́вим Пресвяту́ю Тро́ицу, Отца́, и Сы́на, и Свята́го Ду́ха и твое́ ми́лостивное предста́тельство, ны́не и при́сно, и во ве́ки веко́в. Ами́нь.