Акафист святителю Григорию Паламе, архиепископу Солунскому

Святитель Григорий Палама, Солунский (Фессалоникийский) Текст утвержден Священным СинодомРусской Православной Церкви26 декабря 2012 года(журнал № 131) Творение Герасима монаха Микрагианнанита Кондак 1, глас 8 Подобен: Взбранной Воеводе: Фессалони́тскаго па́стыря всеизря́днаго и Це́ркве свети́ло многосве́тлое воспои́м в пе́снех боговеща́нных: Све́та бо незаходи́маго яви́ся селе́ние, и подае́т просвеще́ние и благода́ть незави́стную зову́щим: Ра́дуйся, о́тче Григо́рие, благода́ти пропове́дниче. Икос 1 Ангел в ми́ре, я́ко вы́шних зри́тель, показа́лся еси́, Григо́рие всеблаже́нне, и богови́дным твои́м житие́м а́нгельская дарова́ния улучи́л еси́. Те́мже, твое́й све́тлости дивя́щеся, о́тче, вопие́м: Ра́дуйся, и́мже Свет боже́ственный сия́ет; ра́дуйся, и́мже тьма отгна́ся. Ра́дуйся, прему́дрости ве́рте благово́ннейший; ра́дуйся, наказа́ния лу́чшаго прича́стниче. Ра́дуйся, высото́ неудобозри́мая высо́ких виде́ний; ра́дуйся, глубино́ непроходи́мая даро́в духо́вных. Ра́дуйся, я́ко еси́ церко́вная све́тлость; ра́дуйся, я́ко показа́лся еси́ правосла́вных кре́пость. Ра́дуйся, свети́ло ве́ры всесве́тлое; ра́дуйся, свети́льниче благода́ти незаходи́мый. Ра́дуйся, его́же ра́ди буесло́вцы умолка́ют; ра́дуйся, его́же ра́ди богосло́вцы взыгра́ют. Ра́дуйся, о́тче Григо́рие, благода́ти пропове́дниче. Кондак 2 Зре́ние души́ твоея́ от ю́ности, о́тче, ко Христу́ Царю́ простира́я, ца́рския презре́л еси́ дворы́ и земну́ю сла́ву оста́вил еси́, по́стническими же труды́ Го́сподеви после́дуя, воспева́л еси́: Аллилу́ия. Икос 2 Ра́зуму вне́шнему всему́ обучи́лся еси́, всеблаже́нне, я́ко разу́мен и зело́ остроу́мен, отню́дуже Прему́дрости Бо́жия добро́ты рачи́тель яви́лся еси́, Григо́рие, умудря́я боже́ственными словесы́ твои́ми благогове́йне ти вопию́щия: Ра́дуйся, нра́вов преподо́бных сосу́де; ра́дуйся, Све́та невеще́ственнаго сокро́вище. Ра́дуйся, ко́рене благоро́днаго дре́во всепло́дное; ра́дуйся, благоче́стия кинна́моне[1] благово́нный. Ра́дуйся, цве́те неувяда́емый земледе́лания та́инственнаго; ра́дуйся, фи́никс многопло́дный благопло́дия душе́внаго. Ра́дуйся, я́ко презре́л еси́ лесть мирску́ю; ра́дуйся, я́ко прия́л еси́ благода́ть богода́нную. Ра́дуйся, Христо́в служи́телю тепле́йший; ра́дуйся, тле́нных вся́ческих превы́шший. Ра́дуйся, душе́вныя си́лы оживи́вый; ра́дуйся, страсте́й стремле́ния умертви́вый. Ра́дуйся, о́тче Григо́рие, благода́ти пропове́дниче. Кондак 3 Си́лою на Афо́не обле́клся еси́ свято́ю, прие́м и́ноческий о́браз, и в не́мощи пло́ти к по́стническим угото́вался еси́ трудо́м, Григо́рие блаже́нне, Укрепля́ющему тя зовы́й: Аллилу́ия. Икос 3 Просия́л еси́ безмо́лвием и усе́рдным по́двигом вся́ким де́ятельнаго жи́тельства и у́мною моли́твою Спа́су в та́инстве соедини́лся еси́, Све́та боже́ственнаго исполня́ем и просвеща́я тебе́ вопию́щия: Ра́дуйся, свети́льниче безмо́лвия; ра́дуйся, о́бразе воздержа́ния. Ра́дуйся, у́мныя моли́твы де́лателище; ра́дуйся, де́ятельнаго жи́тельства сокро́вище. Ра́дуйся, сосу́де многоце́нный дохнове́ния Уте́шителева; ра́дуйся, уста́ богоно́сная гла́са духо́внаго. Ра́дуйся, я́ко превозше́л еси́ преде́лы тле́ния; ра́дуйся, я́ко взира́еши на сла́ву Бо́жию. Ра́дуйся, зря́й Све́т боже́ственный; ра́дуйся, Бо́га ви́дяй и от Него ви́димый. Ра́дуйся, бу́яя упраздня́яй мудрова́ния; ра́дуйся, лю́тая отгоня́яй нападе́ния. Ра́дуйся, о́тче Григо́рие, благода́ти пропове́дниче. Кондак 4 Пожи́в в безмо́лвии, я́коже а́нгел, о́тче, го́рнее светозаре́ние прия́л еси́ и, испо́лнь вои́стину боже́ственнаго Све́та, отше́л еси́ от Афо́на я́коже со́лнце, Григо́рие богому́дре, воспламеня́я пою́щия: Аллилу́ия. Икос 4 Обличи́л еси́ боже́ственным сло́вом и прему́дрости си́лою и догма́ты святы́ми, богому́дре, злосла́вие Варлаа́мово, удиви́в вся твое́ю благода́тию, учи́тель бо боже́ственный вопию́щим показа́лся еси́: Ра́дуйся, цевни́це благоче́стия; ра́дуйся, паде́ние злоче́стия. Ра́дуйся, Це́ркве вели́кий учи́телю; ра́дуйся, богоза́рности невеще́ственныя испо́лненный. Ра́дуйся, вети́е многому́дрый догма́тов пра́вых; ра́дуйся, мечу́ обоюдоо́стрый на вся вражду́ющия. Ра́дуйся, у́мных плеве́л искорени́телю; ра́дуйся, доброде́телей небе́сных насади́телю. Ра́дуйся, мно́гий в сло́ве благода́ти; ра́дуйся, кро́ткий во все́х и незло́бивый. Ра́дуйся, ве́рных сердца́ утвержда́яй; ра́дуйся, страсте́й вины́ попаля́яй. Ра́дуйся, о́тче Григо́рие, благода́ти пропове́дниче. Кондак 5 Богоглаго́ливым язы́ком на собо́ре боже́ственнем, я́ко испо́лнь небе́сныя прему́дрости, изложи́л еси́, о́тче, Правосла́вия вои́стину святы́я догма́ты, я́ко отце́м единоду́шный, Григо́рие, с ни́миже зове́ши: Аллилу́ия. Икос 5 Святи́тель богому́дрый, я́ко доброде́телей сокро́вище и таи́нник восхожде́ний боже́ственных, и Фессалони́тский па́стырь богови́ден и прему́др был еси́ боже́ственным жре́бием, преподо́бне, слы́ша от нас сицева́я: Ра́дуйся, уста́ богосло́вов; ра́дуйся, держа́во правосла́вных. Ра́дуйся, иере́ев пра́вило точне́йшее; ра́дуйся, па́стырей о́бразе богонапечатле́нный. Ра́дуйся, трубо́ боговеща́нная уче́ний свяще́нных; ра́дуйся, исто́чниче богостру́йный, во́ду но́ву источа́яй. Ра́дуйся, Солу́ню благосла́вный пастыренача́льниче; ра́дуйся, Правосла́вия богоглаго́ливый предста́телю. Ра́дуйся, Све́та боже́ственнаго служи́телю; ра́дуйся, жи́зни непоро́чныя учи́телю. Ра́дуйся, душе́вную скве́рну очища́яй; ра́дуйся, ве́рных ре́вность возбужда́яй. Ра́дуйся, о́тче Григо́рие, благода́ти пропове́дниче. Кондак 6 Пропове́дник Све́та боже́ственнаго быв, богоглаго́ливе, я́ко того́ прича́стник в житии́, на той подъе́мшия гла́с слове́с све́тлостию затми́л еси́, и вся воздви́гл еси́, Григо́рие, Бо́гови зва́ти: Аллилу́ия. Икос 6 Возсия́в на собо́ре, я́ко све́тлый богосло́в и уста́ неизглаго́ланныя Прему́дрости, неприча́ствуемо бы́ти Бо́жие существо́ боговеща́яй пропове́дал еси́, прича́ствуемо же де́йство, тебе́ вопию́щим, о́тче: Ра́дуйся, ве́лий священнояви́телю; ра́дуйся, боже́ственный богояви́телю. Ра́дуйся, вы́шния све́тлости возвести́телю; ра́дуйся, обоже́ния све́тлый тайнописа́телю. Ра́дуйся, у́мнаго трезве́ния вождю́ богови́дный; ра́дуйся, моли́твы вну́тренния наста́вниче непреле́стный. Ра́дуйся, я́ко испо́лнился еси́ благода́тей небе́сных; ра́дуйся, я́ко приобщи́лся еси́ осия́ний боже́ственных. Ра́дуйся, Бо́жию ви́девый све́тлость; ра́дуйся, страсте́й изгоня́яй те́мность. Ра́дуйся, догма́тов правосла́вных основа́ние; ра́дуйся, струй богото́чных исто́чниче. Ра́дуйся, о́тче Григо́рие, благода́ти пропове́дниче. Кондак 7 Ве́лий во святи́телех вои́стину показа́лся еси́, Григо́рие му́дре, богояви́телю, я́ко апо́стольским житие́м и ди́вными доброде́тельми украше́н, преподо́бне, и вся воздвиза́еши пе́ти: Аллилу́ия. Икос 7 Не́ктар невеще́ственный боже́ственный и ма́нну душепита́тельную и мед и́же из ка́мене источа́ющся, я́ко рече́ свяще́нный Дави́д, твои́х слове́с завеща́ния подаю́т, Григо́рие всечу́дне, веселя́ще вопию́щия: Ра́дуйся, язы́че сладча́йший; ра́дуйся, зра́че боже́ственнейший. Ра́дуйся, подо́бниче Спа́сов и подража́телю; ра́дуйся, ревни́телю отце́м и сообита́телю. Ра́дуйся, ве́яние небе́сное, ду́ши прохлажда́ющее; ра́дуйся, росо́ духора́дованная, нас ороша́ющая. Ра́дуйся, благово́ние свято́е чи́стаго жи́тельства; ра́дуйся, пи́ще соверше́нная душе́внаго пи́ршества. Ра́дуйся, ча́ше не́ктара безсме́ртнаго; ра́дуйся, лю́тых мудрова́ний обличи́телю. Ра́дуйся, богоно́сцев сия́ние му́дрых; ра́дуйся, люде́й води́телю правосла́вных. Ра́дуйся, о́тче Григо́рие, благода́ти пропове́дниче. Кондак 8 Стра́нная даде́ся благода́ть во излия́нии бога́те устна́ма твои́ма, богояви́телю, отню́дуже, я́ко ве́лия река́, из Еде́ма происходя́щая, Григо́рие, Це́рковь всю напоя́еши, Го́сподеви вопию́щую: Аллилу́ия. Икос 8 Гора́, о́тче, Афо́нская све́тлыя твоя́ по́двиги с Солу́нем пропове́дует, и вся Це́рковь ве́рных я́ко богоза́рнаго тя честву́ет изъяви́теля Све́та и́же па́че смы́сла, и́мже просвеща́еши вопию́щия: Ра́дуйся, уста́ богоно́сная; ра́дуйся, сосу́де мироно́сный. Ра́дуйся, трисо́лнечнаго осия́ния орга́не; ра́дуйся, безмо́лвия соверше́ннаго ни́во. Ра́дуйся, до́ме богосве́тлый боже́ственнаго де́йства; ра́дуйся, бога́тство некра́домое и́же в Ду́се живота́. Ра́дуйся, я́ко прия́л еси́ боже́ственная дая́ния; ра́дуйся, я́ко отврати́л еси́ Варлаа́мова пустосло́вия. Ра́дуйся, и́мже Афо́н велича́ется; ра́дуйся, и́мже пре́лесть отгоня́ется. Ра́дуйся, све́тлая Солу́ню сла́во; ра́дуйся, тве́рдая Правосла́вия держа́во. Ра́дуйся, о́тче Григо́рие, благода́ти пропове́дниче. Кондак 9 Ре́ки от чре́ва твоего́ та́инственным одожде́нием с небесе́, я́ко рече́ Спас, теку́т, о́тче прему́дре, и жа́ждущая сердца́ напоя́ют от живо́тныя струи́, Григо́рие, Бо́гови зва́ти: Аллилу́ия. Икос 9 Легча́йше, о́тче, подъя́л еси́ искуше́ния разли́чная за до́брое испове́дание, и я́коже зла́то во огни́ искуше́н все́ми, превозсия́л еси́, возводя́ к лу́чшим благогове́йне ти вопию́щия: Ра́дуйся, ка́меню благому́жества; ра́дуйся, ка́меню терпе́ния. Ра́дуйся, искуше́ний наше́ствия не убоя́выйся; ра́дуйся, страсте́й пещь угаси́вый. Ра́дуйся, стено́ неколеби́мая Це́ркве Христо́вы; ра́дуйся, свети́льниче многосве́тлый люде́й богому́дрых. Ра́дуйся, я́ко ско́рби в ра́дости поне́сл еси́; ра́дуйся, я́ко Го́сподеви со сла́вою предста́л еси́. Ра́дуйся, Бо́жия та́инства пропове́давый; ра́дуйся, ве́рным спаси́тельная предложи́вый. Ра́дуйся, душ домострои́телю боже́ственный; ра́дуйся, Христо́в дру́же боже́ственнейший. Ра́дуйся, о́тче Григо́рие, благода́ти пропове́дниче. Кондак 10 Уст твои́х словесы́ правосла́вная ве́ра утверди́ся в Ду́се боже́ственнем: дре́вним бо боже́ственным отце́м единонра́вен и единоду́шен быв, гла́сы тех, преподо́бне, возгла́вил еси́, поя́: Аллилу́ия. Икос 10 Све́та нетва́рнаго наслажда́яся луча́ми, возсия́вшаго на Фаво́ре, сего́ словопису́еши свяще́нне сла́ву, добро́ту, све́тлость и воздвиза́еши, свя́те, ко приобще́нию вопию́щия: Ра́дуйся, све́та нетва́рнаго таи́нниче; ра́дуйся, от страсте́й душетле́нных изба́вителю. Ра́дуйся, бу́дущаго благосла́вия предначина́ние; ра́дуйся, су́щих в ско́рби ду́ш утеше́ние. Ра́дуйся, я́ко бу́ию показа́л еси́ му́дрость Варлаа́мову; ра́дуйся, я́ко возвести́л еси́ Ду́ха благода́ть. Ра́дуйся, архиере́ев боже́ственное удобре́ние; ра́дуйся, светоно́сное сокро́вище богосло́вия. Ра́дуйся, све́та невеще́ственнаго зерца́ло; ра́дуйся, чужды́х догма́тов се́рпе. Ра́дуйся, ра́досте правосла́вных и да́ре; ра́дуйся, вра́жий ро́г низверга́яй. Ра́дуйся, о́тче Григо́рие, благода́ти пропове́дниче. Кондак 11 Высо́ким помышле́нием и прему́дростию боже́ственною пропове́дав Бо́жия вели́чия, Ду́ха боже́ственных плодо́в открыва́еши благода́ти, Григо́рие, чи́стым ду́хом, и́хже причаща́ются вопию́щии: Аллилу́ия. Икос 11 Светоза́рно твое́ житие́ доброде́телей луча́ми, Григо́рие, яви́ся, боговеща́нне, испо́лнь же све́та вои́стину уче́ние твое́, блаже́нне: Бо́гови бо приво́диши вся́ческия уче́нии твои́ми, вопию́щия: Ра́дуйся, исто́чниче уче́ния; ра́дуйся, утвержде́ние Правосла́вия. Ра́дуйся, жи́тельства свята́го о́бразе; ра́дуйся, Це́ркве боже́ственныя ве́нче. Ра́дуйся, жития́ чисте́йшаго возвести́телю чу́дный; ра́дуйся, сло́ва благода́тнаго пропове́дниче свяще́нный. Ра́дуйся, я́ко душ вся́ку скве́рну очища́еши; ра́дуйся, я́ко на спасе́ния стезю́ наставля́еши. Ра́дуйся, свети́льниче невеще́ственных осия́ний; ра́дуйся, свети́ло вы́шних тайнонауче́ний. Ра́дуйся, его́же ра́ди Це́рковь лику́ет; ра́дуйся, его́же ра́ди всяк ве́рный боже́ственно ра́дуется. Ра́дуйся, о́тче Григо́рие, благода́ти пропове́дниче. Кондак 12 Ра́дость испроси́ боже́ственную и душ спасе́ние, Григо́рие, му́дрый святи́телю, приходя́щим к тебе́ благогове́йне и све́тлыя твоя́ по́двиги честву́ющим; све́та бо я́ко служи́тель, просвеща́еши вопию́щия: Аллилу́ия. Икос 12 Пою́ще твоя́ труды́ и боже́ственныя по́двиги, я́же соверши́л еси́ Це́ркве ра́ди, благочести́вых ли́цы вы́ну пою́т тя, Григо́рие, и благода́рными усты́ вопию́т ти непреста́нно: Ра́дуйся, держа́во Це́ркве; ра́дуйся, вети́е благоче́стия. Ра́дуйся, пустосло́ва Акинди́на постыди́вый; ра́дуйся, си́лу богода́нную яви́вый. Ра́дуйся, апо́столом купножи́телю, я́ко во всех подража́тель; ра́дуйся, о́бщниче и прича́стниче зари́ богонача́льныя. Ра́дуйся, Фессалони́тская све́тлая денни́це; ра́дуйся, Правосла́вия подви́жниче богоглаго́ливый. Ра́дуйся, душ на́ших наслажде́ние; ра́дуйся, вся́каго правосла́внаго утвержде́ние. Ра́дуйся, хра́ма честна́го твоего́ све́тлосте; ра́дуйся, люде́й ве́рных твои́х весе́лие. Ра́дуйся, о́тче Григо́рие, благода́ти пропове́дниче. Кондак 13 О боже́ственный о́тче, таи́нниче неизглаго́ланных, Григо́рие, отце́в кра́ю, твои́х люде́й приими́ гла́сы и твое́ предста́тельство да́ждь всем: ве́рно бо к тебе́ притека́ем и Тро́ице вопие́м: Аллилу́ия. Сей кондак глаголи трижды, посем 1-й икос и 1-й кондак. Молитва святителю Григорию Паламе, архиепископу Солунскому О треблаже́нная и честна́я вои́стину и превожделе́нная главо́, безмо́лвия держа́во, мона́шествующих сла́во, о́бщее богосло́вов и отце́в и учи́телей укра́шение, апо́столов сподви́жниче, испове́дников и му́чеников безкро́вный ревни́телю и венча́телю словесы́ и дея́ньми и благоче́стия побо́рниче и воево́до взбра́нный, боже́ственных догма́тов высо́кий изъясни́телю и учи́телю, пре́лести многоразли́чных ересе́й потреби́телю, всея́ Це́ркве Христо́вы предста́телю, и стра́же, и изба́вителю! Ты и преста́влься ко Христу́ назира́еши у́бо и ны́не ста́до твое́ и всю Це́рковь свы́ше, боле́зни разли́чныя исцеля́я и словесы́ твои́ми вся управля́я, и е́реси изгоня́я, и многообра́зных страсте́й избавля́я. Приими́ же и на́ше сие́ моле́ние и изба́ви нас от страсте́й и искуше́ний, и треволне́ний, и бед, и осла́бу и мир и благоде́нствие нам пода́ждь, о Христе́ Иису́се Го́споде на́шем, Ему́же сла́ва и держа́ва подоба́ет со безнача́льным Его́ Отце́м и Животворя́щим Ду́хом, ны́не и при́сно и во ве́ки веко́в. Ами́нь. [1] Коричное дерево; корица.