- Главная страница
- Молитвы
- Акафист святителю Амвросию, епископу Медиоланскому
Акафист святителю Амвросию, епископу Медиоланскому
Текст молитвы
Не утвержден для общецерковного использования
Конда́к 1Избра́ннаго чудотво́рца и свети́льника це́ркве Медиола́нския свята́го Амвро́сия, прииди́те, ве́рнии, почти́м по достоя́нию усе́рдною хвало́ю. Ты́ же, уго́дниче Бо́жий ми́лостивый, приими́ с любо́вию сие́ приноше́ние на́ше, да зове́м ти́:
Ра́дуйся, Амвро́сие, святи́телю Христо́в и чудотво́рче.
И́кос 1А́нгельских си́л и всея́ тва́ри Соде́тель, еще́ от младе́нческих пеле́н твои́х предуказа́вый добро́ту души́ твоея́, свя́те Амвро́сие, подаде́ тя́, в во́зраст прише́дша, а́нгела це́ркви Медиола́нстей, па́стыря и учи́теля слове́сному ста́ду Своему́, и си́м научи́ на́с зва́ти тебе́ си́це:
Ра́дуйся, от колыбе́ли младе́нческия на служе́ние Це́ркви ро́ем пче́л предуказа́нный;
ра́дуйся, ко святи́тельству чрез немо́тствующаго младе́нца Бо́гом при́званный.
Ра́дуйся, бога́тство, сла́ву и по́чести ми́ра презре́вый;
ра́дуйся, еди́ному Го́споду служи́ти восхоте́вый.
Ра́дуйся, апо́столов Христо́вых досто́йных прее́мниче;
ра́дуйся, архиере́ев святы́х преподо́бный сопресто́льниче.
Ра́дуйся, Амвро́сие, святи́телю Христо́в и чудотво́рче.
Конда́к 2Ви́дя небе́сное промышле́ние, соверши́вшееся в чу́днем призва́нии твое́м ко служе́нию Це́ркви, прему́дре, посвяти́л еси́ про́чее вре́мя жития́ твоего́ на угожде́ние во́ли Боже́ственней, и прине́сл еси́ всего́ себе́ и вся́ своя́ в же́ртву призва́вшему тя́ Го́споду, поя́ ему́: Аллилу́иа.
И́кос 2Ра́зумом богопросвеще́нным, напое́нным же от сло́ва Бо́жия, уразуме́в я́ко основа́ние все́х доброде́телей и сою́з соверше́нства духо́внаго любы́ к Бо́гу и бли́жнему е́сть, благоче́стне, потща́лся яви́ти ю́ в себе́ не сло́вом то́кмо, но де́лом и и́стиною. Те́мже бе́дствующим ру́ку ско́рыя по́мощи простира́л еси́, име́ния своя́ вся́ убо́гим расточи́л еси́, и та́ко наста́вил еси́ на́с зва́ти тебе́ си́це:
Ра́дуйся, я́ко путе́м нестяжа́ния апо́стольскаго ше́ствовати возлюби́л еси́;
ра́дуйся, я́ко все́ свое́ попече́ние на Про́мысл Бо́жий возложи́л еси́.
Ра́дуйся, милосе́рдия я́же во Христе́ подража́телю;
ра́дуйся, нищеты́ его́ до́льния доброво́льный после́дователю.
Ра́дуйся, ме́ньших бра́тий Христо́вых дру́же и благоде́телю;
ра́дуйся, скорбя́щих и озло́бленных ско́рый уте́шителю.
Ра́дуйся, Амвро́сие, святи́телю Христо́в и чудотво́рче.
Конда́к 3Си́лою Вы́шняго укрепля́емь, преподо́бне, труды́ и ско́рби вели́каго служе́ния святи́тельскаго на по́льзу це́ркве Медиола́нския, во сла́ву же Го́спода Иису́са, благоду́шно поне́сл еси́, о все́х же благословля́л еси́ Бо́га, поя́ Ему́: Аллилу́иа.
И́кос 3Име́я же́зл си́лы, кре́пость ева́нгельскую, по́сланную ти́ от Сио́на Небе́снаго, святи́телю, госпо́дствовал еси́ посреде́ враго́в твои́х и не да́л еси́ волко́м ходя́щим во о́вчих ко́жах, в се́рдце же нося́щим я́д па́губы, расхи́тити ста́до твое́. Те́мже похва́льная воспису́ем ти́ сия́:
Ра́дуйся, слуго́ Спа́са ве́рнейший;
ра́дуйся, стра́же до́му Бо́жия бди́тельнейший.
Ра́дуйся, па́стырю Христо́в честне́йший;
ра́дуйся, побо́рниче ве́ры, во пре́ниих с ересеучи́тельми мудре́йший.
Ра́дуйся, злоче́стия ариа́нскаго потреби́телю;
ра́дуйся, пра́вых догма́тов насади́телю.
Ра́дуйся, Амвро́сие, святи́телю Христо́в и чудотво́рче.
Конда́к 4Бу́рю крамолы́, воздви́гшуюся на це́рковь Медиола́нскую, зря́, Амвро́сие, сладкоглаго́ливою бесе́дою твое́ю, соде́йствием же Бо́жиим утиши́л еси́ мяте́ж людски́й, и та́ко научи́л еси́ ча́д ми́ра пе́ти Бо́гу: Аллилу́иа.
И́кос 4Слы́ша Феодо́сий ца́рь преще́ние твое́, и́мже возбраня́шеся ему́ я́ко уби́йце вни́ти в це́рковь Бо́жию, во е́же приобщи́тися Та́йн святы́х, повинова́ся ти́, я́ко гре́шник смире́нно ка́ющийся и примире́ния с Го́сподом жа́ждущий. Того́ ра́ди по достоя́нию возглаша́ем ти́:
Ра́дуйся, Та́ин Бо́жиих му́дрый строи́телю;
ра́дуйся, постановле́ний оте́ческих ве́рный храни́телю.
Ра́дуйся, Нафа́ну и Предте́чи соревни́телю;
ра́дуйся, законопресту́пных нелицеме́рный обличи́телю.
Ра́дуйся, наста́вниче покая́ния и исправле́ния;
ра́дуйся, Це́ркве Медиола́нския неумира́ющая сла́во и украше́ние.
Ра́дуйся, Амвро́сие, святи́телю Христо́в и чудотво́рче.
Конда́к 5Боготе́чная звезда́ на тве́рди церко́вней бы́л еси́, о́тче Амвро́сие, све́тлостию уче́ния и жития́ твоего́ мглу́ ересе́й разгоня́ющая и мра́к безбо́жия потребля́ющая, неве́рных от тьмы́ неве́рия к све́ту невече́рнему привлача́ющая и все́х ко спасе́нию путеводя́щая, пою́щим Бо́гу: Аллилу́иа.
И́кос 5Ви́девше тя́ медиола́нстии лю́дие му́драго пе́стуна и любвеоби́льнаго отца́ па́стве свое́й, святи́телю, притека́ху к милосе́рдию твоему́ во все́х ско́рбех и ну́ждах свои́х. Ты́ же, ми́лостиве, никого́же отри́нул еси́, но все́м вся́к помо́щник бы́л еси́, досто́йный сицевы́х похва́л:
Ра́дуйся, си́рых покрови́телю;
ра́дуйся, оби́димых защи́тителю.
Ра́дуйся, плене́нных от ва́рвар искупи́телю;
ра́дуйся, от ко́зней сатани́нских свободи́телю.
Ра́дуйся, я́ко досто́йно сла́достное и́мя носи́л еси́;
ра́дуйся, я́ко вои́стину сла́достен наста́вник и пособи́тель все́м бы́л еси́.
Ра́дуйся, Амвро́сие, святи́телю Христо́в и чудотво́рче.
Конда́к 6Пропове́дник веща́емых ти́ от А́нгел к у́ху глаго́лов Бо́жиих бы́л еси́, святи́телю Амвро́сие, те́мже словеса́ у́ст твои́х па́че ме́да и со́та услажда́ху все́х послу́шающих тебе́ и Бо́гу вопию́щих: Аллилу́иа.
И́кос 6Возсия́ а́ки со́лнце све́т доброде́тельнаго жития́ твоего́ на земли́, богому́дре о́тче, в тебе́ бо зри́м вся́ ели́ка честна́, ели́ка пра́ведна, ели́ка пречи́ста. Си́х ра́ди сла́вяще Свята́го Ду́ха, вино́вника благи́х, от си́лы в си́лу священнота́йне ве́дшаго тя́, зове́м:
Ра́дуйся, доброде́телей ева́нгельских пребога́тое сокро́вище;
ра́дуйся, всегда́шних воздыха́ний и моли́тв я́же к Бо́гу пречестно́е святи́лище.
Ра́дуйся, кро́тости и смире́ния боголе́пное жили́ще;
ра́дуйся, терпе́ния тве́рдое храни́лище.
Ра́дуйся, церкве́й Бо́жиих украси́телю и пречу́дный побо́рниче;
ра́дуйся, чистоты́ де́вственный учи́телю и неоску́дный сле́з исто́чниче.
Ра́дуйся, Амвро́сие, святи́телю Христо́в и чудотво́рче.
Конда́к 7Хотя́ улучи́ти спасе́ние во мно́зе сове́те, смиренному́дре, име́л еси́ дру́га души́ твоея́ пресви́тера состаре́вшася и му́дра, почита́я его́ я́ко отца́ и с ни́м совеща́лся о де́лех свои́х; вразуми́ и на́с твори́ти вся́ с сове́том богому́дрых отце́в, да окормле́нием и́х спаса́еми, пое́м Бо́гу: Аллилу́иа.
И́кос 7Зна́мение ева́нгельския любве́ к бли́жнему яви́л еси́, о́тче Амвро́сие, егда́ враго́м свои́м благотвори́л еси́ и со гре́шники ка́ющимися го́рько пла́кал еси́. Те́мже ти́ я́ко непамятозло́бному па́стырю и отцу́, боле́зновавшу о спасе́нии духо́вных ча́д твои́х, вопие́м:
Ра́дуйся, незло́бия Христо́ва подража́телю;
ра́дуйся, ка́ющимся гре́шником те́плый сострада́телю.
Ра́дуйся, Иусти́не, враждова́вшей ти́, благотвори́вый;
ра́дуйся, злоде́ю твоему́ ру́ку усо́хшую исцели́вый.
Ра́дуйся, я́ко ве́сь кро́тость и любо́вь бы́л еси́;
ра́дуйся, я́ко высоты́ соверше́нства дости́гл еси́.
Ра́дуйся, Амвро́сие, святи́телю Христо́в и чудотво́рче.
Конда́к 8Стра́нныя и ди́вныя си́лы пе́рст Бо́жий сотвори́ в житии́ твое́м, святи́телю, егда́ уме́рша о́трока воскреси́ тобо́ю, разсла́бленную исцели́, ариа́нина, почита́ния ра́ди святы́х моще́й хули́вшаго тя́, бе́су преда́, безсту́дную жену́ сирми́йску уничижи́вшую тя́, ка́рою порази́. И кто́ от слы́шащих вся́ сия́ не просла́вит ди́внаго в житии́ твое́м Бо́га пе́снию: Аллилу́иа.
И́кос 8Ве́сь испо́лнен бы́в ре́вности по Бо́зе, о́тче Амвро́сие, такову́ю вла́сть над де́моны стяжа́л еси́, я́ко ниже́ к две́рем до́му твоего́ прибли́зитися можа́ху: о́гнь бо исходя́й отту́ду гна́ше и́х, я́ко пра́х, его́же возмета́ет ве́тр от лица́ земли́. Толи́ко стра́шный де́моном уго́дниче Бо́жий, огради́ и на́шу не́мощь предста́тельством твои́м от губи́тельных стре́л и́х, да вопие́м ти́ сицева́я:
Ра́дуйся, от ко́зней лю́таго мироде́ржца кре́пкий ве́рных храни́телю;
ра́дуйся, от зло́бных слу́г его́, зия́ющих пожре́ти ны́, ве́рный на́ш обличи́телю.
Ра́дуйся, я́ко пла́мень лица́ бесо́в попаля́ющий;
ра́дуйся, я́ко гро́м киче́ние па́дшаго денни́цы поража́ющий.
Ра́дуйся, всю́ си́лу его́ си́лою кре́стною попра́вый;
ра́дуйся, нечи́стых духо́в от притека́ющих к тебе́ отгна́вый.
Ра́дуйся, Амвро́сие, святи́телю Христо́в и чудотво́рче.
Конда́к 9Все́ житие́ на́ше во юдо́ли земна́го стра́нствования сего́ испо́лнено безчи́сленных искуше́ний и бе́д, грехо́в и страсте́й, вою́ющих на ны́: ка́ко у́бо избы́ти возмо́жем ве́чных му́к, окая́ннии, егда́ пости́гнет на́с сме́рть неумоли́мая, а́ще не ты́, о́тче, с наде́ждою на́шею Богома́терию, предста́тельствовати за ны́ бу́деши, поя́ Бо́гу: Аллилу́иа.
И́кос 9Вети́я многовеща́нныя ви́дим тобо́ю посра́мленныя, святи́телю: А́рия бо ху́льных после́дователей препре́л еси́, Симма́ха высокоу́мнаго низложи́л еси́, мудрецы́, и́же от восто́ка, глубино́ю богосло́вия своего́ удиви́л еси́, и вся́ ве́рныя уче́нием и́стинным просвети́л еси́. Те́мже мо́лим тя́: осия́й и на́с све́том богоразу́мия твоего́, да отбе́гше скве́рн тлетво́рнаго ду́ха вре́мене и собла́знов бори́теля, вопие́м ти́:
Ра́дуйся, ду́ш на́ших просвети́телю;
ра́дуйся, ве́ры правосла́вныя побо́рниче.
Ра́дуйся, веле́ний Бо́жиих учи́телю;
ра́дуйся, пле́вел вра́жиих, всева́емых в ду́ши спя́щих челове́к, искорени́телю.
Ра́дуйся, я́ко мно́гих коле́блемых неве́рием в пра́вой ве́ре укрепи́л еси́;
ра́дуйся, я́ко догма́т о единосу́щном и равноче́стном Отцу́ и Ду́хови Божестве́ Сы́на уясни́л еси́.
Ра́дуйся, Амвро́сие, святи́телю Христо́в и чудотво́рче.
Конда́к 10Спасе́ние соверше́нное улучи́в от привре́менных бу́рь и бе́д, уго́дниче Бо́жий Амвро́сие, не забу́ди на́с, потопля́емых напа́стей бу́рею. Но в ни́хже са́м искуше́н бы́л еси́, и на́м искуша́емым помози́, да пое́м Бо́гу: Аллилу́иа.
И́кос 10Сте́ну тя́ тве́рдую и изве́стно утвержде́ние гра́ду твоему́ и все́м чту́щим па́мять твою́ испове́дающе, святи́телю, дерза́ем по достоя́нию воспе́ти тебе́ хвале́ние сие́:
Ра́дуйся, царе́й бранелюби́вых умиротвори́телю;
ра́дуйся, благоде́нствия оте́чественнаго храни́телю.
Ра́дуйся, я́ко тобо́ю царю́ Гратиа́ну побе́да на го́ты дарова́ся;
ра́дуйся, я́ко тобо́ю мно́гим ми́р от Феодо́сия исхода́тайствовася.
Ра́дуйся, я́ко тобо́ю проще́ние грехо́в улуча́ем;
ра́дуйся, я́ко тобо́ю от бе́д спаса́еми, ми́р с Бо́гом обрета́ем.
Ра́дуйся, Амвро́сие, святи́телю Христо́в и чудотво́рче.
Конда́к 11Пе́снь «Тебе́ Бо́га хва́лим, Тебе́ Го́спода испове́дуем…» па́че вся́каго возду́шнаго орга́на услажда́ющую ве́рных, воспе́л еси́ в че́сть Боже́ственней Тро́ице, святи́телю. Ны́не же в Це́ркви Небе́сней пое́ши со А́нгелы и́ну пе́снь то́йжде Тро́ице: Аллилу́иа.
И́кос 11Светопода́тельна свети́льника, еще́ на земли́ просия́вша невеще́ственным све́том, ве́дуще тя́, о́тче святы́й, ку́ю досто́йную похвалу́ принесе́м ти́ гре́шнии, ко́ею пе́снию ублажи́м тя́ недосто́йнии, о святи́телю Христо́в. Еди́н то́кмо све́дый глубины́ серде́чныя и реки́й: «А́з прославля́ющия Мя́ просла́влю», — еди́н О́н ве́сть, ка́ко по достоя́нию просла́вити тя́. Оба́че ве́дый, я́ко челове́к, на́шу не́мощь, не отри́ни, я́ко оте́ц ми́лостивый, и на́ша убо́гия, но от и́скренних серде́ц приноси́мыя ти́ хвалы́ сия́:
Ра́дуйся, а́нгеле земны́й, еще́ на земли́ све́том невеще́ственным озаре́нный;
ра́дуйся, челове́че небе́сный, еще́ во пло́ти лицезре́нием сладча́йшаго Иису́са почте́нный.
Ра́дуйся, свети́льниче Боже́ственнаго све́та, уче́нием свои́м ми́ра концы́ озари́вый;
ра́дуйся, луче́ мы́сленнаго Со́лнца, теплото́ю любве́ своея́ вертогра́д Его́ оживи́вый.
Ра́дуйся, звездо́, тве́рдь церко́вную све́тло украша́ющая;
ра́дуйся, похвало́ и доны́не Медиола́н осиява́ющая.
Ра́дуйся, Амвро́сие, святи́телю Христо́в и чудотво́рче.
Конда́к 12Благода́тию небе́снаго покро́ва твоего́ не лиши́ на́с никогда́, о ми́лостиве о́тче, но при́сно моли́ся о на́с к ще́дрому Го́споду, Ему́же с ли́ки святы́х немо́лчно пое́ши: Аллилу́иа.
И́кос 12Пою́ще чудеса́ и по́двиги преподо́бнаго жития́ твоего́, святи́телю, сла́вим кончи́ну твою́, е́юже ми́рно отше́л еси́ на не́бо, и ублажа́ем соца́рствование твое́ та́мо с Бо́гом ве́чным. Ты́ же, уго́дниче святы́й, при́зри с высоты́ о́наго блаже́ннаго приста́нища твоего́ на на́с, пла́вающих в молве́ жите́йских попече́ний и к тебе́, неви́димому окорми́телю на́шему, из глубины́ души́ вопию́щих:
Ра́дуйся, пла́вание свое́ в жите́йском мо́ри до́бре сверши́вый и безце́нное сокро́вище ве́ры в бе́зднах его́ не потопи́вый;
ра́дуйся, ко приста́нищу ра́йскому безбе́дно приплы́вый и вене́ц нетле́нный от Христа́ улучи́вый.
Ра́дуйся, я́ко та́мо ликовству́я, и на́с, до́лу су́щих, любо́вию твое́ю досяза́еши;
ра́дуйся, я́ко ду́хом твои́м на́м вы́ну спребыва́еши.
Ра́дуйся, я́ко тобо́ю гне́ва Бо́жия избавля́емся;
ра́дуйся, я́ко мольба́ми твои́ми к приста́нищу го́рнему направля́емся.
Ра́дуйся, Амвро́сие, святи́телю Христо́в и чудотво́рче.
Конда́к 13О, святы́й и ми́лостивый уго́дниче Бо́жий Амвро́сие! Приими́ с любо́вию приноси́мое сие́ ма́лое, но от усе́рдия приноси́мое тебе́ хвале́ние на́ше, и потщи́ся изба́вити на́с от боле́зней душе́вных и теле́сных, от все́х бе́д и зо́л, да тобо́ю улучи́вше Ца́рство Небе́сное, во ве́ки пое́м Бо́гу: Аллилу́иа.
[Се́й конда́к глаго́лется три́жды.][Далее повторяем 1‑е икос и кондак:]
И́кос 1А́нгельских си́л и всея́ тва́ри Соде́тель, еще́ от младе́нческих пеле́н твои́х предуказа́вый добро́ту души́ твоея́, свя́те Амвро́сие, подаде́ тя́, в во́зраст прише́дша, а́нгела це́ркви Медиола́нстей, па́стыря и учи́теля слове́сному ста́ду Своему́, и си́м научи́ на́с зва́ти тебе́ си́це:
Ра́дуйся, от колыбе́ли младе́нческия на служе́ние Це́ркви ро́ем пче́л предуказа́нный;
ра́дуйся, ко святи́тельству чрез немо́тствующаго младе́нца Бо́гом при́званный.
Ра́дуйся, бога́тство, сла́ву и по́чести ми́ра презре́вый;
ра́дуйся, еди́ному Го́споду служи́ти восхоте́вый.
Ра́дуйся, апо́столов Христо́вых досто́йных прее́мниче;
ра́дуйся, архиере́ев святы́х преподо́бный сопресто́льниче.
Ра́дуйся, Амвро́сие, святи́телю Христо́в и чудотво́рче.
Конда́к 1Избра́ннаго чудотво́рца и свети́льника це́ркве Медиола́нския свята́го Амвро́сия, прииди́те, ве́рнии, почти́м по достоя́нию усе́рдною хвало́ю. Ты́ же, уго́дниче Бо́жий ми́лостивый, приими́ с любо́вию сие́ приноше́ние на́ше, да зове́м ти́:
Ра́дуйся, Амвро́сие, святи́телю Христо́в и чудотво́рче.
Моли́тваО, пресла́вный чудотво́рче, в ско́рбех ско́рый помо́щниче и усе́рдный о ми́ре к Бо́гу моли́твенниче, о́тче святы́й Амвро́сие! Ве́мы, я́ко ве́лие ко Спа́су и́маши дерзнове́ние, предстоя́ го́рнему Престо́лу Его́, и сего́ ра́ди смире́нно припа́даем ти́: моли́ся Ему́, уго́дниче Бо́жий, да пода́ст наро́ду Росси́йскому благоде́нственное и ми́рное житие́, да изба́вит от вра́г ви́димых и неви́димых, от наше́ствия иноплеме́нных, от неду́га и гла́да, от вся́кия ско́рби и смертоно́сныя я́звы и от вся́каго зла́; на́м же все́м, ве́рою пра́зднующим святу́ю па́мять твою́ и усе́рдно хода́тайства твоего́ ча́ющим, да ниспо́слет вся́ благопотре́бная ко вре́менному и ве́чному житию́ на́шему, па́че же оставле́ние грехо́в, ми́р по́мыслов, тишину́ серде́чную, здра́вие душа́м и телесе́м на́шим. Е́й, святи́телю Бо́жий, па́стырю Христо́в ми́лостивейший, покрови́телю на́ш гото́вейший! услы́ши на́с, еще́ еди́наго от тебе́ прося́щих: бу́ди те́плый моли́твенник и предста́тель ко Го́споду о духо́вных па́стырех и отце́х на́ших (имена́), и́же не́мощи на́ша но́сят и о на́с боле́знуют, до́ндеже вообрази́тся в на́с Христо́с, да сохрани́т О́н, всеблаги́й и вся́ могу́щий Влады́ка, дража́йшия дни́ жития́ и́х в неруши́мом ми́ре и кре́пости си́л духо́вных и теле́сных, да приведе́т на́с, недосто́йных рабо́в Свои́х, и́х окормле́нием и моли́твами, твои́м же хода́йтайством и заступле́нием ко приста́нищу жи́зни несконча́емыя, иде́же херуви́ми и серафи́ми, святи́и вси́ с Богоро́дицею и с тобо́ю, покрови́телем на́шим, непреста́нными гла́сы сла́вят Отца́, и Сы́на, и Свята́го Ду́ха, ны́не и при́сно и во ве́ки веко́в. Ами́нь.
Моли́тва ина́яО, всесвяты́й Амвро́сие, уго́дниче Бо́жий изря́днейший, покрови́телю мо́й ми́лостивейший! При́зри с высоты́ го́рняго жили́ща твоего́ на мя́ недосто́йнаго, неради́ваго, уны́лаго в настоя́щем житии́ се́м. Ви́ждь мене́ гре́шнаго, в толи́цем обстоя́нии су́щаго, умо́м помраче́ннаго, во́лею ко злу́ преклоне́ннаго, и се́рдцем па́че к земли́, не́же к небеси́, прилепле́ннаго. Ви́ждь стра́стное обурева́ние души́ моея́ и не́мощь и небреже́ние мое́. Ви́ждь при се́м и кова́рство злонача́льника и губи́теля моего́, ви́ждь, о святи́телю Христо́в, и умилосе́рдися о мне́, такова́го ра́ди положе́ния моего́. Помози́ ми́, о засту́пниче мо́й, ско́рым предста́тельством твои́м. Исхода́тайствуй ми́ от Отца́ щедро́т бо́дрость и си́лу, во е́же твори́ти во́лю Его́, благу́ю, уго́дную и соверше́нную, стра́сти моя́ умертви́ти, де́мона низложи́ти, ми́р себе́ распя́ти и себе́ ми́ру, и та́ко дости́гнути христиа́нския кончи́ны живота́ своего́, безболе́зненны, непосты́дны, ми́рны. По исхо́де же притре́петныя души́ моея́ от окая́ннаго и бре́ннаго телесе́ сего́, бу́ди е́й а́нгел покрови́тель, до́бр спу́тник, ве́рен храни́тель и защи́тник от лю́тых нападе́ний нача́льника возду́шных мыта́рств, да безбе́дно преше́д о́ныя, си́лою предста́тельства твоего́, сподо́блюся про́чее и а́з, после́дний из все́х, и́же в ца́рстве благода́ти, узре́ти сладча́йшее лице́ Го́спода на́шего и сла́вити Его́ со Отце́м и Святы́м Ду́хом, и твое́ ми́лостивное о мне́ предста́тельство, во ве́ки веко́в. Ами́нь.
