Акафист Пресвятой Богородице пред иконой «Минская»

Икона Богородицы Минская Конда́к 1. Избра́нная от все́х родо́в, Влады́чице Де́во Богоро́дице, ны́не, припа́дающе к чудотво́рному о́бразу Твоему́, хвале́бное пе́ние и благодаре́ние прино́сим Ти́: Ра́дуйся, Пренепоро́чная Отрокови́це, гра́да на́шего Небе́сная Засту́пнице. И́кос 1. А́нгельския си́лы, приле́жно моля́щиися и благогове́йно служа́щии Ти́, Пресвята́я Де́во, от ле́т дре́вних на ге́рбе Богоспаса́емаго гра́да Ми́нска изображе́ни бы́ша во свиде́тельство чу́днаго Твоего́ о на́с попече́ния. Мы́ же земноро́днии, дерза́я подража́ти пе́сни а́нгельстей, благода́рственно Тебе́ пое́м: Ра́дуйся, о зача́тии Сы́на от Ду́ха Свята́го Арха́нгелом предвозвеще́нная; ра́дуйся, благове́стия Арха́нгелова восприе́мнице смире́нная. Ра́дуйся, Херуви́мов и Серафи́мов честне́йшая; ра́дуйся, Арха́нгелов и А́нгелов сла́внейшая. Ра́дуйся, превы́ше си́л небе́сных вознесе́нная; ра́дуйся, от го́рних во́инств почита́емая. Ра́дуйся, ли́ки а́нгельскими песносло́вимая; ра́дуйся, от все́х родо́в при́сно ублажа́емая. Ра́дуйся, прибе́жище на́ше и заступле́ние; ра́дуйся, в ско́рбех и напа́стех вспоможе́ние. Ра́дуйся, за христиа́н усе́рдная моли́твеннице; ра́дуйся, за ны́ пред Бо́гом ми́лостивая предста́тельнице. Ра́дуйся, Пренепоро́чная Отрокови́це, гра́да на́шего Небе́сная Засту́пнице. Конда́к 2. Ви́девши святы́й о́браз Тво́й, Пречи́стая, святы́м Луко́ю первопи́санный, рекла́ еси́: «С си́м о́бразом благода́ть Моя́ и си́ла да пребу́дет». И во Ми́нстем о́бразе зря́ще сбы́тие слове́с Твои́х, о Тебе́ просла́вим Го́спода, пою́ще Ему́: Аллилу́иа. И́кос 2. Разуме́ти не мо́жно ди́внаго Про́мысла Бо́жия, ка́ко чу́дная ико́на Твоя́, Богоро́дице, насади́телю ве́ры правосла́вныя, благове́рному кня́зю Влади́миру, на по́мощь даде́ся во апо́стольстве его́ от Царьгра́да и Корсу́ни да́же до Ки́ева. Мы́ же, преи́скренне умиля́ющеся Твоему́ о ро́де на́шем предста́тельству, ве́рно вопие́м: Ра́дуйся, и́стиннаго благоче́стия наста́внице; ра́дуйся, язы́ческаго нече́стия искорени́тельнице. Ра́дуйся, чудотво́рною ико́ною а́ки драгоце́нным да́ром кня́зя Влади́мира обогати́вшая; ра́дуйся, в равноапо́стольных труде́х его́ укрепи́вшая. Ра́дуйся, вла́сть де́монскую сокруши́вшая; ра́дуйся, ве́ру правосла́вную в земли́ на́шей утверди́вшая. Ра́дуйся, Тобо́ю от пре́лести диа́воли свобожда́емся; ра́дуйся, Тобо́ю же позна́ния Творца́ сподобля́емся. Ра́дуйся, ко́зней вра́жиих посече́ние; ра́дуйся, ве́рных ча́д Отцу́ Небе́сному усыновле́ние. Ра́дуйся, злове́рия и́дольскаго попра́ние; ра́дуйся, уче́ния Христо́ва насажде́ние. Ра́дуйся, Пренепоро́чная Отрокови́це, гра́да на́шего Небе́сная Засту́пнице. Конда́к 3. Си́лу благода́ти, явле́нныя в честне́й ико́не Твое́й, Влады́чице, ви́де святы́й равноапо́стольный кня́зь Влади́мир и со благогове́нием ве́лиим поста́ви ю́ в Десяти́нней це́ркви гра́да Ки́ева, вопию́ще Бо́гу: Аллилу́иа. И́кос 3. Иму́щи попече́ние ма́тернее о просвеще́нных лю́дех земли́ Ру́сския, соде́лала еси́ ю́ До́мом Свои́м, и то́ки чуде́с от ико́ны Твоея́ преизоби́льно источи́ла еси́, Богоро́дице, сего́ ра́ди взыва́ем Ти́ си́це: Ра́дуйся, притека́ющих к ико́не Твое́й луча́ми чуде́с озаря́ющая; ра́дуйся, обраща́ющимся к не́й безчи́сленныя ми́лости подаю́щая. Ра́дуйся, все́м прося́щим мо́ре щедро́т излива́ющая; ра́дуйся, духо́вную ра́дость на́м соде́ловающая. Ра́дуйся, о лю́дех правосла́вных при́сное попече́ние; ра́дуйся, о́браз Тво́й дарова́вшая на́м я́ко зало́г спасе́ния. Ра́дуйся, исто́чник благода́ти неистощи́мый; ра́дуйся, кла́дезю сокро́вищ многоце́нный. Ра́дуйся, кре́посте тве́рдая ве́ры правосла́вныя; ра́дуйся, все́м чту́щим Сы́на Твоего́ по́моще пресла́вная. Ра́дуйся, пу́ть и́стины указу́ющая заблу́ждшим; ра́дуйся, ско́ро поспе́шствующая на по́мощь Тя́ призыва́ющим. Ра́дуйся, Пренепоро́чная Отрокови́це, гра́да на́шего Небе́сная Засту́пнице. Конда́к 4. Бу́ри бе́д и напа́стей за грехи́ на́ша мно́гажды на Ру́сь воздвиза́еми бы́ша, та́кожде и гра́д Ки́ев огню́ и мечу́ предава́ем бе́ от нечести́вых ага́рян, не ве́дущих пе́ти и́стинному Бо́гу: Аллилу́иа. И́кос 4. Слы́шав о бога́тстве Ки́ева, ха́н ага́рянский во еди́но ле́то устреми́ся расхи́тити е́, и гра́д то́й пожже́. Во́ин же не́кий злочести́вый, взя́в ри́зу многоце́нную, Всеблага́я Ма́ти, ико́ну же Твою́ вве́рже в Дне́пр, оба́че сия́ неврежде́нна в вода́х сохрани́ся, подвиза́ющи на́с восхвали́ти Тя́ си́це: Ра́дуйся, о́браз Тво́й, я́ко купину́ неопа́льну яви́вшая; ра́дуйся, ико́ну Твою́ от пла́мене сохрани́вшая. Ра́дуйся, по вода́м а́ки по су́ху от Ки́ева да́же до Ми́нска ико́ну Твою́ прене́сшая; ра́дуйся, во́ды Неми́ги и Сви́слочи явле́нием Свои́м освяти́вшая. Ра́дуйся, Цари́це небесе́ и земли́, Е́йже вся́ стихи́и покоря́ются; ра́дуйся, Тобо́ю же на спаси́тельныя стези́ лю́ди наставля́ются. Ра́дуйся, пото́па грехо́внаго усмире́ние; ра́дуйся, свире́пых страсте́й укроще́ние. Ра́дуйся, мо́ря жите́йскаго благонаде́жное прохожде́ние; ра́дуйся, от земли́ на не́бо ве́рных возведе́ние. Ра́дуйся, ди́вное благода́ти зна́мение; ра́дуйся, си́лы чудотво́рныя явле́ние. Ра́дуйся, Пренепоро́чная Отрокови́це, гра́да на́шего Небе́сная Засту́пнице. Конда́к 5. Боготе́чней звезде́ уподо́билася еси́ пречестна́я ико́на Твоя́, Богороди́тельнице, лучи́ чу́дными осия́вшая насе́льники гра́да Ми́нска. Они́ же, зря́ще таи́нственное явле́ние ея́ на вода́х Сви́слочи, со умиле́нием воспе́ша Сы́ну Твоему́ и Бо́гу на́шему: Аллилу́иа. И́кос 5. Ви́девше чу́дную ико́ну сию́, о Всеми́лостивая, и прие́млюще я́ко да́р Бо́жий, лю́ди христиа́нстии взя́ша ю́ от воды́ и поста́виша в це́ркви за́мковой в че́сть Пресла́внаго Рождества́ Твоего́, и а́бие благода́рне воззва́ша: Ра́дуйся, от ико́ны Твоея́ да́ры многоразли́чнии источа́ющая; ра́дуйся, я́ко Само́й Ти́ су́щей во ико́не Твое́й благода́ть на́м излива́ющая. Ра́дуйся, гре́шников не отмета́ющая; ра́дуйся, ка́ющихся те́пле прие́млющая. Ра́дуйся, гра́да на́шего неусы́пная храни́тельнице; ра́дуйся, за на́с пред Бо́гом любвеоби́льная хода́таице. Ра́дуйся, ве́ры и благоче́стия исправле́ние; ра́дуйся, в моли́твах ко Го́споду всемо́щное дерзнове́ние. Ра́дуйся, боля́щих и немощству́ющих исцеле́ние; ра́дуйся, заблу́ждших на пу́ть пра́вый наставле́ние. Ра́дуйся, благода́ти оби́льное дарова́ние; ра́дуйся, люде́й христоимени́тых непосты́дное упова́ние. Ра́дуйся, Пренепоро́чная Отрокови́це, гра́да на́шего Небе́сная Засту́пнице. Конда́к 6. Пропове́дниками чуде́с ве́лиих, от ико́ны Ми́нския истека́ющих, яви́шася мно́зи лю́дие, и́хже Ты́, Премилосе́рдная Влады́чице, поклоня́тися святы́не се́й научи́ла еси́, да нело́жно воспою́т Бо́гу: Аллилу́иа. И́кос 6. Возсия́ и возвели́чися ве́ра на́ша по мно́зех ле́тех плене́ния ле́стнаго и непра́ваго, и па́ки возврати́ся ико́на Ми́нская лю́дем правосла́вным, и́же с ра́достию воспе́ша Богоро́дице: Ра́дуйся, Правосла́вия щи́те и огражде́ние; ра́дуйся, оте́ческих уста́вов незы́блемое утвержде́ние. Ра́дуйся, малове́рных вразумле́ние; ра́дуйся, в сомне́нии су́щим снисхожде́ние. Ра́дуйся, ве́рных ча́д Це́ркве Правосла́вныя духо́вное услажде́ние; ра́дуйся, отсту́пников пра́выя ве́ры посрамле́ние. Ра́дуйся, правосла́вных немо́лчная похвало́; ра́дуйся, гони́мым за ве́ру несокруши́мое забра́ло. Ра́дуйся, утесня́емым ско́рое вспоможе́ние; ра́дуйся, му́чеников и испове́дников неизглаго́ланная отра́до. Ра́дуйся, искуша́емым по́моще; ра́дуйся, обурева́емым приста́нище. Ра́дуйся, Пренепоро́чная Отрокови́це, гра́да на́шего Небе́сная Засту́пнице. Конда́к 7. Хотя́ Влады́ка на́ш и Судия́ Пра́веднейший вразуми́ти зе́млю Ру́сскую за беззако́ния тмочи́сленныя, попусти́ мучи́телем гна́ти Це́рковь Правосла́вную, да вси́, в покая́ние прише́дше, возопии́м Ему́: Аллилу́иа. И́кос 7. Но́вое наста́ испыта́ние от Го́спода, егда́ собо́рный хра́м во гра́де Ми́нске разруше́н бы́сть от неи́стовых гони́телей. Ико́на же Твоя́, о Богома́ти, отъя́та и сокры́та бе́ от ве́рных. Лю́дие же правосла́внии в сокруше́нии серде́ц возопи́ша к Богоро́дице: Ра́дуйся, во дни́ правосу́днаго Бо́жия посеще́ния гне́в Его́ отводя́щая; ра́дуйся, в тя́жких злострада́ниях на́с не оставля́ющая. Ра́дуйся, лю́тыя крамо́лы облича́ющая; ра́дуйся, душегуби́тельныя уче́ния низлага́ющая. Ра́дуйся, благосе́рдая на́ша вразуми́тельнице; ра́дуйся, непамятозло́бная на́ша настави́тельнице. Ра́дуйся, в злы́х обстоя́ниих неистощи́мое терпе́ние; ра́дуйся, с правосу́дием Бо́жиим смире́нное примире́ние. Ра́дуйся, малоду́шных и па́дших возста́ние; ра́дуйся, ду́ха уны́ния и боя́зни отгна́ние. Ра́дуйся, грехо́в на́ших отпуще́ние; ра́дуйся, Бо́жие к на́м благоволе́ние. Ра́дуйся, Пренепоро́чная Отрокови́це, гра́да на́шего Небе́сная Засту́пнице. Конда́к 8. Стра́нное и ужа́сное наше́ствие иноплеме́нных пости́же на́с. Милосе́рдием же Бо́жиим одоле́в враги́, лю́дие, предста́тельством Богома́тери, отверзо́ша хра́мы правосла́внии и возда́ша благодаре́ние Го́сподеви, воспева́я Ему́: Аллилу́иа. И́кос 8. Вся́ испо́лнися ра́дости неизрече́нныя, егда́ раба́ Бо́жия Варва́ра обре́те чу́дный о́браз Тво́й, Ма́ти Де́во, сокры́тый посреде́ пра́ха и тле́ния. Мы́ же, дивя́щеся таково́му неча́емому обре́тению, восхваля́ем Тя́: Ра́дуйся, ве́ру Христо́ву от поруга́ния защища́ющая; ра́дуйся, пра́ведный гне́в Бо́жий на ми́лость претворя́ющая. Ра́дуйся, отсту́пников ве́ры постыжа́ющая; ра́дуйся, нече́стие гре́шников облича́ющая. Ра́дуйся, броне́ неуязви́мая; ра́дуйся, воево́до непобеди́мая. Ра́дуйся, от наше́ствия иноплеме́нных избавле́ние; ра́дуйся, от рабо́ты вра́жия свобожде́ние. Ра́дуйся, ви́димых и неви́димых супоста́т одоле́ние; ра́дуйся, вражду́ющих ско́рое вразумле́ние. Ра́дуйся, упокое́ние за дру́ги своя́ ду́шы положи́вших; ра́дуйся, прославле́ние за Ве́ру и Оте́чество на по́ле бра́ни убие́нных. Ра́дуйся, Пренепоро́чная Отрокови́це, гра́да на́шего Небе́сная Засту́пнице. Конда́к 9. Вся́кое разуме́ние челове́ческое не возмо́жет исчести́ страда́ния, ко́и претерпе́ли гра́ждане Оте́чества на́шего в годи́ну во́ин, лихоле́тий и в после́днее вре́мя от беды́ черно́быльския. Взира́я же на ико́ну Твою́, Богома́ти, я́ко на цельбоно́сное утеше́ние, непреста́нно пое́м: Аллилу́иа. И́кос 9. Вети́я суему́дренныя соблазня́ются о дре́вности ико́ны Ми́нския и недоуме́ют пости́гнути таи́нственный Про́мысл Бо́жий, сохрани́вший ю́ в огне́ и вода́х, от ру́к иноплеме́нных и злоумышле́ний супроти́вных. Мы́ же, прославля́юще Богоро́дицу пред чудотво́рным о́бразом Ея́, вопие́м такова́я: Ра́дуйся, почита́ния святы́х ико́н увенча́ние; ра́дуйся, иконобо́рнаго злоче́стия обличе́ние. Ра́дуйся, душеполе́зных зна́ний преизоби́льное излия́ние; ра́дуйся, душевре́днаго мра́ка све́тлое озаре́ние. Ра́дуйся, неве́рных смы́слов ми́лостивое просвеще́ние; ра́дуйся, непра́во му́дрствующих внеза́пное низверже́ние. Ра́дуйся, ве́рных незы́блемое увере́ние; ра́дуйся, отъе́млющая духо́вное помраче́ние. Ра́дуйся, Про́мысла Бо́жия прославле́ние; ра́дуйся, прего́рдых хули́телей устраше́ние. Ра́дуйся, суему́дренных прему́дро смиря́ющая; ра́дуйся, заблу́ждших кро́тко вразумля́ющая. Ра́дуйся, Пренепоро́чная Отрокови́це, гра́да на́шего Небе́сная Засту́пнице. Конда́к 10. Спаси́тельное приста́нище от жите́йских треволне́ний и́мамы во хра́ме Ду́ха Свята́го Богоспаса́емаго гра́да на́шего, иде́же светоза́рная ико́на Твоя́, Влады́чице, неотсту́пно доны́не пребыва́ет, все́х на́с путеводя́ к жи́зни ве́чней. Сего́ ра́ди о Тебе́ возглаша́ем Бо́гу: Аллилу́иа. И́кос 10. Стена́ и заступле́ние не то́кмо гра́ду на́шему, но и все́м с ве́рою притека́ющим к Тебе́, Преблагослове́нная, даде́ся свята́я ико́на Твоя́, е́юже мно́гажды благоде́яла еси́ на́м и отце́м на́шим, да вознесе́м Ти́ пе́ние таково́е: Ра́дуйся, и́щущим спасе́ния пра́вый пу́ть указу́ющая; ра́дуйся, снисше́дших да́же до дна́ а́дова моли́твами Свои́ми спаса́ющая. Ра́дуйся, супроти́в наше́ствия иноплеме́нных на́с воздвиза́ющая; ра́дуйся, от враго́в Оте́чество на́ше избавля́ющая. Ра́дуйся, отча́янных ско́рое услы́шание; ра́дуйся, неду́гов душе́вных и теле́сных безме́здное врачева́ние. Ра́дуйся, печа́лей жите́йских утоле́ние; ра́дуйся, грехо́вных я́зв очище́ние. Ра́дуйся, во обстоя́ниях су́щим всегда́шняя помо́щнице; ра́дуйся, лю́дем благове́рным усе́рдная споспе́шнице. Ра́дуйся, неча́янная Ра́досте; ра́дуйся, непосты́дная Наде́ждо. Ра́дуйся, Пренепоро́чная Отрокови́це, гра́да на́шего Небе́сная Засту́пнице. Конда́к 11. Пе́ние и моле́ние о Богохрани́мей стране́ на́шей, власте́х, во́инстве и наро́де ея́, приими́ пред чудотво́рным о́бразом Твои́м, Влады́чице, и спаси́ на́с, я́ко держа́щая ски́петр в руце́ Свое́й. Богомладе́нец же Иису́с, име́яй в десни́це держа́ву, да да́рует на́м ти́хое и безмо́лвное житие́, слы́шаще от на́с: Аллилу́иа. И́кос 11. Све́тлый пра́здник явле́ния ико́ны Твоея́, Присноде́во, во гра́де Ми́нске, исполня́ет ликова́нием сердца́ на́ша. Сего́ ра́ди с ве́рою припа́дающе и с любо́вию лобыза́юще чу́дный о́браз Тво́й, вопие́м Ти́: Ра́дуйся, Богоспаса́емому гра́ду на́шему ми́лость показа́вшая; ра́дуйся, на́с гре́шных сия́нием Свои́м просвети́вшая. Ра́дуйся, при́сно си́лу Свою́ явля́ющая; ра́дуйся, предста́тельством Свои́м на́с спаса́ющая. Ра́дуйся, моли́твы на́ша прие́млющая; ра́дуйся, хвале́ния на́ша не отверга́ющая. Ра́дуйся, небожи́телями при́сно прославля́емая; ра́дуйся, собо́ром белору́сских святы́х и новому́чеников сугу́бо воспева́емая. Ра́дуйся, людьми́ благочести́выми в позлаще́нную ри́зу облече́нная; ра́дуйся, мно́гими би́серами и адама́нтами преукраше́нная. Ра́дуйся, серде́ц на́ших ти́хое умиле́ние; ра́дуйся, жития́ на́шего до́брое устрое́ние. Ра́дуйся, Пренепоро́чная Отрокови́це, гра́да на́шего Небе́сная Засту́пнице. Конда́к 12. Благода́ти Своея́, о Всеми́лостивая Ма́ти, не лиши́ на́с гре́шных, претерпева́ем бо дне́сь но́выя ско́рби и нестрое́ния, ника́коже иму́ще наде́жды оправди́тися, но помози́ на́м возста́ти от поги́бельных сму́т, да, о Тебе́ ра́дующеся, воспое́м Бо́гу: Аллилу́иа. И́кос 12. Пою́ще Небе́сную Засту́пницу на́шу, ве́руем и испове́дуем, я́ко и в после́дняя времена́ яви́ши благода́тную по́мощь, и и́миже ве́си судьба́ми сохрани́ши на́с от собла́знов ми́ра сего́, да благода́рне восхва́лим Тя́: Ра́дуйся, избавле́ние на́ше от наве́т вра́жиих; ра́дуйся, спасе́ние от кова́рств лука́ваго. Ра́дуйся, от сна́ грехо́внаго пробужде́ние; ра́дуйся, беззако́ний на́ших проще́ние. Ра́дуйся, пред Всевы́шним благогове́йное предстоя́ние; ра́дуйся, по́лчищ сатани́нских благомо́щное разсе́яние. Ра́дуйся, поги́бших взыска́ние; ра́дуйся, прельще́нных вразумле́ние. Ра́дуйся, напра́сную сме́рть от на́с отводя́щая; ра́дуйся, о кончи́не христиа́нстей на́м хода́тайствующая. Ра́дуйся, врата́ небе́сная на́м отверза́ющая; ра́дуйся, к жи́зни ве́чней на́с приводя́щая. Ра́дуйся, Пренепоро́чная Отрокови́це, гра́да на́шего Небе́сная Засту́пнице. Конда́к 13 О Всепе́тая Ма́ти, Засту́пнице Небе́сная гра́да на́шего, приими́ сию́ ма́лую моли́тву и умоли́ Сы́на Твоего́, Судию́ Пра́веднаго, да сподо́бит десна́го стоя́ния на́с, вопию́щих Ему́: Аллилу́иа.[Се́й конда́к глаго́лется три́жды.][Далее повторяем 1‑е икос и кондак:]И́кос 1. А́нгельския си́лы, приле́жно моля́щиися и благогове́йно служа́щии Ти́, Пресвята́я Де́во, от ле́т дре́вних на ге́рбе Богоспаса́емаго гра́да Ми́нска изображе́ни бы́ша во свиде́тельство чу́днаго Твоего́ о на́с попече́ния. Мы́ же земноро́днии, дерза́я подража́ти пе́сни а́нгельстей, благода́рственно Тебе́ пое́м: Ра́дуйся, о зача́тии Сы́на от Ду́ха Свята́го Арха́нгелом предвозвеще́нная; ра́дуйся, благове́стия Арха́нгелова восприе́мнице смире́нная. Ра́дуйся, Херуви́мов и Серафи́мов честне́йшая; ра́дуйся, Арха́нгелов и А́нгелов сла́внейшая. Ра́дуйся, превы́ше си́л небе́сных вознесе́нная; ра́дуйся, от го́рних во́инств почита́емая. Ра́дуйся, ли́ки а́нгельскими песносло́вимая; ра́дуйся, от все́х родо́в при́сно ублажа́емая. Ра́дуйся, прибе́жище на́ше и заступле́ние; ра́дуйся, в ско́рбех и напа́стех вспоможе́ние. Ра́дуйся, за христиа́н усе́рдная моли́твеннице; ра́дуйся, за ны́ пред Бо́гом ми́лостивая предста́тельнице. Ра́дуйся, Пренепоро́чная Отрокови́це, гра́да на́шего Небе́сная Засту́пнице. Конда́к 1. Избра́нная от все́х родо́в, Влады́чице Де́во Богоро́дице, ны́не, припа́дающе к чудотво́рному о́бразу Твоему́, хвале́бное пе́ние и благодаре́ние прино́сим Ти́: Ра́дуйся, Пренепоро́чная Отрокови́це, гра́да на́шего Небе́сная Засту́пнице. Моли́тва. О Всепе́тая и Всеблага́я Де́во Богоро́дице, Небе́сная на́ша Засту́пнице! К Тебе́ по Бо́зе, я́ко Премилосе́рдей Госпоже́, собо́рне прибега́ем и вопие́м: приими́ сие́ ма́лое хвале́бное пе́ние, сохрани́ Богоспаса́емый гра́д се́й, ему́ же чудотво́рная ико́на Твоя́ во отра́ду и утеше́ние даде́ся. Сего́ ра́ди мо́лим Тя́: изба́ви на́с от вра́г ви́димых и неви́димых, от наше́ствия иноплеме́нных и междоусо́бныя бра́ни, от зла́го обстоя́ния и ско́рби, от искуше́ний, бе́д и боле́зней. Спаси́ и поми́луй рабы́ Твоя́: Вели́каго Господи́на и Отца́ на́шего Святе́йшаго Патриа́рха Моско́вскаго и всея́ Руси́, Преосвяще́нныя митрополи́ты, архиепи́скопы, епи́скопы, ве́сь свяще́ннический и мона́шеский чи́н, и ве́сь при́чет церко́вный. Приими́ под кро́в Тво́й вла́сти и во́инство богохрани́мыя страны́ на́шея, вразуми́ и наста́ви и́х пра́во пра́вити, за́поведи Бо́жия соблюда́юще, да ти́хое и безмо́лвное житие́ поживе́м во вся́ком благоче́стии и чистоте́. О Пречи́стая Влады́чице! Не забу́ди на́с во вся́ дни́ жи́зни на́шея и да пребыва́ет с на́ми неотсту́пно о́браз Тво́й честны́й. Во вре́мя же исхо́да на́шего проле́й те́плую Твою́ моли́тву ко Пра́ведному Судии́, да, презре́в безчи́сленная прегреше́ния, поми́лует и спасе́т на́с, я́ко Бла́г и Человеколю́бец. Ами́нь.