Акафист Пресвятой Богородице пред иконой «Георгиевская»

p1f3q3foavumjo8c1jafbbem6g3 - Акафист Пресвятой Богородице пред иконой «Георгиевская» Кондак 1 Взбранной Воеводе, небесе и земли Царице, обители Георгиевския всемощней Заступнице, хвалебныя песни приносим, вернии. Ты же, яко имущая державу непобедимую, от всех враг видимых и невидимых защити нас, да со умилением зовем Ти: Радуйся, Благодатная Богородице Дево, иконою Твоею нам присно благодеющая. Икос 1 Архангели и Ангели восхваляют Тя, Владычице мира, Ты бо исполнила еси радости сердца наша явлением чудотворнаго образа Твоего обители Георгиевстей; мы же со трепетом и любовию воспеваем Ти: Радуйся, освященное селение Бога Слова. Радуйся, благодатию Божиею нас освящающая. Радуйся, матерним Твоим попечением всех нас объемлющая. Радуйся, в бедах и напастех скорая нам Помощнице. Радуйся, злыя страсти невидимо укрощающая. Радуйся, в христианских добродетелех преуспевати помогающая. Радуйся, Благодатная Богородице Дево, иконою Твоею нам присно благодеющая. Кондак 2 Видяще благое намерение иночествующих основание обители святаго великомученика Георгия на горе Осуй положити, благословила еси место сие, Владычице, и показала еси воистину зде источник благодатных дарований, да и приходящии семо радостно воспевают Сыну Твоему и Богу нашему: Аллилуиа. Икос 2 Разум человеческий не может постигнути любви Твоея к роду человеческому, Пресвятая, ниже изъяснити силу чудотворную, от святыя иконы Твоея проистекающую; мы же, грешнии, прославляя Тя за вся благодеяния Твоя, сице вопием: Радуйся, радость велию всей вселенней даровавшая. Радуйся, праотцев наших утешение. Радуйся, лествице, небо и землю соединившая. Радуйся, главизно нашего спасения. Радуйся, вместилище Невместимаго Бога. Радуйся, яко Тя блажат вси роди. Радуйся, Благодатная Богородице Дево, иконою Твоею нам присно благодеющая. Кондак 3 Сила благодати Божия осеняет всех, с верою и благоговением притекающих к Твоему пречистому образу, Владычице; темже и мы к тебе припадаем, помощи Твоея и заступления просящи, Богу же вопиюще: Аллилуиа. Икос 3 Имущи к роду христианскому милосердие неизреченное, всем, с верою и упованием прибегающим к тебе, простираеши руку помощи, Владычице; сего ради обители святаго Георгия честный образ Твой милостивно даровала еси, да зряще токи чудес, на молящихся Тебе с верою преизобильно изливаемая, во умилении вопиют таковая: Радуйся, Мати Царя царствующих. Радуйся, Родительнице неискусобрачная Господа господствующих. Радуйся, житие чина иноческаго во спасение устрояющая. Радуйся, всем хотящим улучити спасение способствующая. Радуйся, в скорбех наших утешение. Радуйся, болезней наших исцеление. Радуйся, Благодатная Богородице Дево, иконою Твоею нам присно благодеющая. Кондак 4 Бурею многих бед одержимым нам помогаеши, Владычице, выну пред Престолом Божиим предстоя, воздвигши руце Свои на умоление о нас, грешных. Сего ради, величающе неисчетныя милости Твоя к нам, во смирении воспеваем прославльшему Тя Сыну Твоему и Богу нашему: Аллилуиа. Икос 4 Слышавше людие, яко икона Твоя во обители святаго Георгия даром чудес преизбыточествует, с верою и упованием на милосердие Твое к ней притекают, и, богатством щедрот Твоих обогатившеся, воспевают Ти сице: Радуйся, Предстательнице пред Богом, мир от бед спасающая. Радуйся, Сына Твоего на милость к нам, недостойным, приклоняющая. Радуйся, от запаления огненнаго избавляющая. Радуйся, удары молнии и грома от нас отводящая. Радуйся, изнемогающих укрепление. Радуйся, в страданиих наших присное утешение. Радуйся, Благодатная Богородице Дево, иконою Твоею нам присно благодеющая. Кондак 5 Боготечная звезда явися нам, Владычице, честная икона Твоя: в земли бо Волынстей написана и по сем в землю Карпатскую во обитель святаго великомученика Георгия принесена бысть, да светит лучами чудес и милостей народу православному и да вопиют вси Богу, вся во благо устрояющему: Аллилуиа. Икос 5 Видяще чудеса преславная и знамения пречудная, от иконы Твоея Георгиевския бываемая, вси вернии притекают к ней на поклонение. Ты же, Мати Божия, всем по коегождо потребе дары милости Твоея неоскудно подаеши, подвизая усердно пети Тебе: Радуйся, Мати милосердия и щедрот. Радуйся, дивное о нас попечение. Радуйся, в родах Помощнице. Радуйся, младенцев Воспитательнице. Радуйся, юных Наставнице. Радуйся, старцев укрепление. Радуйся, Благодатная Богородице Дево, иконою Твоею нам присно благодеющая. Кондак 6 Проповедающе чудеса Твоя, Богородительнице, от иконы Твоея святыя бываемая, молим Тя: избави всех нас от падений греховных, недугов и напастей, да со благодарением вопием Богу, Тобою нас спасающему: Аллилуиа. Икос 6 Возсия нам, яко пресветлая заря, чудотворная икона Твоя, Богомати Пречистая, прогоняющи тьму бед и скорбей от всех вопиющих Ти с любовию таковая: Радуйся, страждущих и безпомощных невидимо укрепляющая. Радуйся, покровом Твоим всех притекающих к иконе Твоей осеняющая. Радуйся, гласу моления всех скорбящих внимающая. Радуйся, Целительнице наша в болезнех телесных. Радуйся, Благая Утешительнице в печалех наших душевных. Радуйся, скорбь нашу в радость претворяющая. Радуйся, Благодатная Богородице Дево, иконою Твоею нам присно благодеющая. Кондак 7 Хотящим всем с верою приходити на поклонение к чудотворней иконе Твоей, Владычице, дары благодатныя от нея подаеши и вся спасаеши: Тебе бо дадеся от Господа велия благодать матерняго заступления. Темже, с любовию припадающе к многоцелебному Твоему образу, взываем Сыну Твоему и Богу: Аллилуиа. Икос 7 Новое и дивное промышление явила еси, Богородительнице, о людех земли Карпатския, даровавши обители святаго Георгия чудотворную Твою икону, к нейже припадающе, молим Тя, Владычице: избави нас от всяких болезней душевных и телесных, вопиющих из глубины души: Радуйся, святую обитель иконою Твоею благословившая. Радуйся, от нея токи чудес верным изливающая. Радуйся, в скорбных обстояниих надежное прибежище. Радуйся, ищущим спасения тихое пристанище. Радуйся, правую веру и страх Божий в нас вселяющая. Радуйся, светом Христовым тьму неверия прогоняющая. Радуйся, Благодатная Богородице Дево, иконою Твоею нам присно благодеющая. Кондак 8 Странная и преславная чудеса познаша о Тебе, Богомати Пречистая, вернии людие, яко не токмо иконою Твоею во обители Георгиевстей благодатныя дары являеши, но и водам источника, зде проистекающаго, дар недуги исцеляти подаеши, да вси великую и богатую милость от Тебе восприимше, воспоют хвалебную песнь Богови: Аллилуиа. Икос 8 Все упование наше на Тя возлагаем, Мати Божия, и в скорбех наших к святей иконе Твоей усердно притекаем, чающе от нея утешение благодатное получити. Помози убо нам, Владычице, вся напасти с терпением и благодарением переносити, да с упованием взываем Ти: Радуйся, всех скорбящих Радосте. Радуйся, обидимых Заступнице. Радуйся, алчущих Питательнице. Радуйся, странных утешение. Радуйся, обуреваемых пристанище. Радуйся, болящих посещение. Радуйся, Благодатная Богородице Дево, иконою Твоею нам присно благодеющая. Кондак 9 Всякаго естества Ангельскаго превышши еси, Богородице Дево, честнейшая Херувим и славнейшая без сравнения Серафим, предстоиши бо у Престола Сына Твоего и молишися Ему выну за весь род христианский. Не престани молитися и о нас, Всеблагая, да с радостию вопием: Аллилуиа. Икос 9 Ветии многовещаннии не возмогут по достоянию восхвалити предивная чудеса, от святыя иконы Твоея являемая, изумевает же ум всяк пети Тя, Богородице. Ты же, яко Благая сущи, приими от нас похвалы сия: Радуйся, христиан непостыдное упование. Радуйся, верных спасительное прибежище. Радуйся, благочестия Наставнице. Радуйся, в добрых делех Помощнице. Радуйся, веры Православныя утверждение. Радуйся, рода христианскаго возвышение. Радуйся, Благодатная Богородице Дево, иконою Твоею нам присно благодеющая. Кондак 10 Спасения ищуще, к Тебе прибегаем, Милосердая Мати, и, чудотворную Твою икону ныне обстояще, молим: покрый нас покровом Твоея благости от всякаго зла, да спасаеми Тобою от бед, благодарно вопием Богу, Тобою нам благодеющему: Аллилуиа. Икос 10 Стена еси иноческому чину, Пресвятая Владычице, и всем к Тебе прибегающим; темже молим Тя: заступи и соблюди всех нас во дни сия лукавыя от враг злокозненных, возстающих на ны, да радостно воззовем Ти: Радуйся, Домостроительнице нашего спасения. Радуйся, житие наше добре устрояющая. Радуйся, от враг видимых и невидимых Охранительнице. Радуйся, неправедно гонимых и обидимых Заступнице. Радуйся, гонящих и обидящих правосудная Отмстительнице. Радуйся, заблуждающих кроткая Вразумительнице. Радуйся, Благодатная Богородице Дево, иконою Твоею нам присно благодеющая. Кондак 11 Пения нашего смиреннаго не презри, Богородительнице Пречистая, и не отвратися от нас, недостойных, но помози нам покаянием очиститися от грехов и беззаконий наших, да чистым сердцем и усты вопием Спасителю нашему: Аллилуиа. Икос 11 Светоприемную свещу зрим Тя, Пресвятая Дево, на святей иконе Твоей, посреде лика угодников Божиих, лучами благодати неизреченно блистающую, и Тобою на светлую стезю добродетелей наставляеми, зовем Ти сицевая: Радуйся, молитвами Победоносца великомученика Георгия от всякаго зла нас ограждающая. Радуйся, предстательством равноапостольныя Марии Магдалины паче всех благ возлюбити Господа нас научающая. Радуйся, молением святыя великомученицы Варвары от внезапныя смерти, без покаяния и Святаго Причащения, нас сохраняющая. Радуйся, ходатайством святыя мученицы Лидии в вере нас укрепляющая. Радуйся, мольбами преподобнаго Моисея Угрина от страстей греховных нас избавляющая. Радуйся, заступлением преподобнаго отца нашего Алексия в Православии нас утверждающая. Радуйся, Благодатная Богородице Дево, иконою Твоею нам присно благодеющая. Кондак 12 Благодать Твою яви нам, Пресвятая Мати Дево, молящимся Тебе пред честною иконою Твоею, и щедроты Твоя ниспосли на вся грады и веси наша, да в мире и благочестии поживше на земли, райских селений достигнем, идеже Ангели непрестанно вопиют Богу: Аллилуиа. Икос 12 Поюще Твоя чудеса и милости роду нашему, от иконы Твоея Георгиевския явленныя, молим Тя: лика Твоего святаго не отврати от нас, но исполни во благое вся прошения наша, да вси вопием Ти сице: Радуйся, Радосте наша Пресвятая. Радуйся, Царице наша Преблагая. Радуйся, усыновившая нас при Кресте Сына Твоего. Радуйся, матернюю любовь Твою присно являющая. Радуйся, телес наших безмездное врачевание. Радуйся, душ наших спасение. Радуйся, Благодатная Богородице Дево, иконою Твоею нам присно благодеющая. Кондак 13 О, Пресвятая Госпоже Дево Богородице, Мати Христа Бога нашего, приими милостивно сие малое моление наше, пред пречистым Твоим образом возносимое, и теплою молитвою Твоею ко Господу умоли избавитися нам муки вечныя и сподобитися радости святых, выну поющих Ему: Аллилуиа.[Се́й конда́к глаго́лется три́жды.][Далее повторяем 1‑е икос и кондак:]Икос 1 Архангели и Ангели восхваляют Тя, Владычице мира, Ты бо исполнила еси радости сердца наша явлением чудотворнаго образа Твоего обители Георгиевстей; мы же со трепетом и любовию воспеваем Ти: Радуйся, освященное селение Бога Слова. Радуйся, благодатию Божиею нас освящающая. Радуйся, матерним Твоим попечением всех нас объемлющая. Радуйся, в бедах и напастех скорая нам Помощнице. Радуйся, злыя страсти невидимо укрощающая. Радуйся, в христианских добродетелех преуспевати помогающая. Радуйся, Благодатная Богородице Дево, иконою Твоею нам присно благодеющая. Кондак 1 Взбранной Воеводе, небесе и земли Царице, обители Георгиевския всемощней Заступнице, хвалебныя песни приносим, вернии. Ты же, яко имущая державу непобедимую, от всех враг видимых и невидимых защити нас, да со умилением зовем Ти: Радуйся, Благодатная Богородице Дево, иконою Твоею нам присно благодеющая. Молитва Приими, Всеблагомощная Пречистая Госпоже Владычице Богородительнице, сия честныя дары от нас, недостойных рабов Твоих, к Твоему цельбоносному образу пение возсылающих со умилением, яко Тебе Самой зде сущей и послушающей моления наша и подающи с верою просящим по коемуждо прошению исполнение: скорбящим бо скорби облегчаеши, немощным здравие даруеши, разслабленных и недужных исцеляеши, и от бесных бесы прогоняеши, обидимыя от обид избавляеши, и насилуемых спасаеши, грешных прощаеши, прокаженных очищаеши, и малых детей милуеши, и неплодныя от неплодства разрешаеши. Еще, Госпоже Владычице, от уз и темниц свобождаеши, и всякия многоразличныя страсти исцеляеши, и очныя болезни врачуеши, и от смертоносныя язвы избавляеши: вся бо возможна суть ходатайством Твоим к Сыну Твоему, Христу Богу нашему. О, Всепетая Мати, Пречистая Богородице! Не престай молити о нас, недостойных рабех Твоих, славящих Тя и почитающих, и покланяющихся пречистому образу Твоему, и надежду имущих невозвратну и веру несумненну, к Тебе Приснодеве, Преславней и Непорочней, славящих, и чтущих, и поющих Тя во веки веков. Аминь.