Акафист преподобным Оптинским старцам

Собор всех святых, в Оптиной пустыни просиявших Текст утвержден Священным Синодом Русской Православной Церкви 15 июля 2016 года (журнал № 71) Конда́к 1 Избра́нным служи́телем Святы́я Тро́ицы, собо́ру преподо́бных Ста́рцев О́птинских, наста́вником до́брым и прему́дрым благодаре́ние и похвалы́ прино́сим. Вы же, я́ко Христо́вы Це́ркве украше́ние, моли́теся о нас ко Го́споду, да воспева́ем вам любо́вию: Ра́дуйтеся, преподо́бнии Ста́рцы О́птинстии, богому́дрии наставницы ве́ры и благоче́стия. И́кос 1 А́нгелов Творе́ц просла́ви вас, отцы́ и Ста́рцы преподо́бнии, я́ко сбы́тися на вас рече́нному: свет мона́хом суть А́нгели, свет же всем челове́ком есть мона́шеское житие́. Вои́стину у́бо яви́лися есте́ а́нгели храни́телие стране́ на́шей Росси́йстей: и́ноком наста́вницы, ко спасе́нию путевожди́е всем ве́рным ча́дом Це́ркве, вопию́щим: Ра́дуйся, богопросла́вленный собо́ре; ра́дуйся, богоза́рное благода́ти сия́ние. Ра́дуйся, дре́во ста́рчества многопло́дное; ра́дуйся, во Христе́ еди́нство духо́вное. Ра́дуйся, по́лче, испо́лненный си́лы Бо́жия; ра́дуйся, во́инство, побежда́ющее де́монов. Ра́дуйся, ве́нче, Ду́хом Святы́м благоуха́ющий; ра́дуйся, О́птины пу́стыни сла́во и похвало́. Ра́дуйся, Христо́в пречу́дный виногра́де; ра́дуйся, мы́сленный раю́ богонасажде́нный. Ра́дуйся, ликостоя́ние певце́в Святы́я Тро́ицы; ра́дуйся, созве́здие тве́рди Небе́сныя. Ра́дуйтеся, преподо́бнии Ста́рцы О́птинстии, богому́дрии наставницы ве́ры и благоче́стия Конда́к 2 Ви́дяще су́етная и привре́менная, я́же в ми́ре сем, вся́кое жите́йское попече́ние отверго́сте, отцы́ богому́дрии, приидо́сте в Пу́стынь О́птину, иде́же дре́вний о́браз о́бщаго жития́ яви́сте: соу́з любве́ неразруши́мый о Христе́ и ре́вность первохристиа́нскую Заве́та Но́ваго, невозвра́тно ко Го́споду устреми́стеся любо́вию, а́нгельскую песнь воспева́юще: Аллилу́иа. И́кос 2 Ра́зум спасе́ния взыску́юще, отцы́ пресла́внии, бога́тство, сла́ву и вся земна́я, я́ко мимотеку́щая, презре́вше, еди́но же на потре́бу избра́сте; мно́гими труды́, скорбьми́ и боле́зньми до́брое основа́ние по́двигу положи́сте. Те́мже, Христо́вы за́поведи сотво́рше и святы́х оте́ц сове́ты соблю́дше, доброде́тельми обогати́лися есте́. Сего́ ра́ди вопие́м вам: Ра́дуйтеся, Христо́во смире́ние возлюби́вшии; ра́дуйтеся, кро́тость ду́ха терпе́нием стяжа́вшии. Ра́дуйтеся, во́ли Бо́жией после́довавшии; ра́дуйтеся, свою́ во́лю отсе́кшии. Ра́дуйтеся, моли́твою и посто́м Бо́гу служи́вшии; ра́дуйтеся, чи́стым се́рдцем Го́спода зря́щии. Ра́дуйтеся, стра́сти теле́сныя воздержа́нием умертви́вшии; ра́дуйтеся, плоть вашу Духови покори́вшии. Ра́дуйтеся, ми́лость я́ко ца́рский путь избра́вшии; ра́дуйтеся, разсужде́ние я́ко верх доброде́телей обре́тшии. Ра́дуйтеся, благонра́вную жизнь показа́вшии. ра́дуйтеся, от Бо́га благи́я да́ры прие́мшии. Ра́дуйтеся, преподо́бнии Ста́рцы О́птинстии, богому́дрии наставницы ве́ры и благоче́стия! Конда́к 3 Си́ла Моя́ в не́мощи соверша́ется, рече́ Госпо́дь. Те́мже и вы, преподо́бнии, яре́м скорбе́й и боле́зней подъе́мше, си́лою Ду́ха обогати́стеся: дар разсужде́ния прия́сте, и прему́дрость ста́рчества улучи́сте, воспева́юще Пода́телю вся́ческих: Аллилу́иа. И́кос 3 Име́я о спасе́нии челове́ков ди́вное промышле́ние, сла́вимый в Тро́ице Бог виногра́д ста́рчества оби́льно во Еги́пте возрасти́, и испо́лни сей всю зе́млю; и отра́сль его́ в после́дняя ле́та дости́же пу́стыни О́птинския. Сия́ до́брыми виногра́дари отребля́ема и вода́ми пита́емая святого́рскими и фиваи́дскими, бога́тый плод принесе́. Сие́ до́бре разуме́вше, воззове́м Ста́рцем О́птинским си́це: Ра́дуйся, Моисе́е, избра́нный пустынножи́телю; ра́дуйся, ста́рчества О́птинскаго насади́телю. Ра́дуйся, Анто́ние, богоуго́дный подви́жниче; ра́дуйся, смире́ния и кро́тости наста́вниче. Ра́дуйся, о́тче Льве, по Бо́зе пла́менный ревни́телю; ра́дуйся, ста́рчества О́птинскаго возрасти́телю. Ра́дуйся, ду́шу свою́ за ча́да положи́ти гото́вый; ра́дуйся, во оби́тель Про́мыслом Бо́жиим приведе́нный. Ра́дуйся, Мака́рие, высото́ смире́ния; ра́дуйся, глубино́ прему́дрости ста́рческия. Ра́дуйся, Исаа́кие, вертогра́да ста́рчества храни́телю; ра́дуйся, оте́ческих заве́тов ве́рный исполни́телю. Ра́дуйтеся, преподо́бнии Ста́рцы О́птинстии, богому́дрии наставницы ве́ры и благоче́стия! Конда́к 4 Бу́рное мо́ре без ко́рмчаго никто́же мо́жет прейти́; изра́ильтяне же, Моисе́ом путеводи́мии, я́ко по су́ху преидо́ша е́. Сей проо́браз ста́рчества прие́мше, богоно́снии отцы́ О́птинстии, я́коже о́ный Моисе́й, чрез мо́ре жите́йское мно́гим ко спасе́нию путеводи́телие яви́лися есте́, указу́юще еди́н Путь, Христа́ Го́спода, Ему́же при́сно воспева́ем: Аллилу́иа. И́кос 4 Слу́шаяй вас, Мене́ слу́шает, рече́ Госпо́дь Свои́м ученико́м, на про́поведь я́ посыла́я. И та́ко положе́но бысть свята́го ста́рчества основа́ние, да всяк ве́чныя жи́зни иски́й, вопроша́ет ста́рца своего́, да блага́я позна́ет во спасе́ние. Сие́ Боже́ственное уставле́ние ве́дуще, вы, святи́и Льве и Мака́рие, созда́сте ста́рчество на тве́рдем ка́мени смире́ния, те́мже восхва́лим Ста́рцев О́птинских си́це: Ра́дуйтеся, любо́вию к бли́жним озаре́ннии; ра́дуйтеся, благода́тию ста́рчества одаре́ннии. Ра́дуйтеся, к Бо́гу ве́рнии путеводи́телие; ра́дуйтеся, мно́гих душ просвети́телие. Ра́дуйтеся, смире́нию Христо́ву науча́ющии; Ра́дуйтеся, в пра́вде жи́ти нас укрепля́ющии. Ра́дуйтеся, мона́шескаго жития́ ревни́телие; ра́дуйтеся, послуша́ния до́брии учи́телие. Ра́дуйтеся, на путь покая́ния наставля́ющии; ра́дуйтеся, к любви́ Бо́жией всех возвыша́ющии. Ра́дуйтеся, до́брии де́лателие виногра́да Христо́ва; ра́дуйтеся, я́ко отве́рзеся вам Ца́рство Небе́сное. Ра́дуйтеся, преподо́бнии Ста́рцы О́птинстии, богому́дрии наставницы ве́ры и благоче́стия! Конда́к 5 Богоблаже́ннии отцы́ Моисе́е и Исаа́кие, ре́вностию о до́ме Бо́жием дви́жимии, неле́ностнии зижди́телие оби́тели яви́лися есте́, поло́жше во главу́ у́гла Ка́мень краеуго́лен. Сего́ ра́ди воздвиго́сте ди́вныя красоты́ хра́мы Бо́жия, иде́же мы ны́не воспева́ем: Аллилу́иа. И́кос 5 Виде́ния и созерца́ния та́ин Боже́ственных сподо́бльшеся, яви́стеся благочи́ния церко́внаго приле́жнии ревни́телие и благоле́пия богослуже́ния рачи́телие, е́же жи́ти вам в дому́ Госпо́дни и зре́ти красоту́ его́. Те́мже и мы ны́не, услажда́ющеся красото́ю оби́тели О́птинския и разуме́юще изря́дное попече́ние ва́ше о ней, благода́рно вам взыва́ем: Ра́дуйся, Анто́ние, усе́рдный скита́ строи́телю; ра́дуйся, уде́ла Предте́чи Госпо́дня попечи́телю. Ра́дуйся, Мака́рие, писа́ньми мно́гих просвети́вый; ра́дуйся, слу́жбы церко́вныя украси́вый. Ра́дуйся, Амвро́сие, ди́вно на возду́се моли́выйся; ра́дуйся, в моли́тве сла́ву Бо́жию созерца́вый. Ра́дуйся, богому́дрый наста́вниче и учи́телю, ра́дуйся, Ша́мординския оби́тели созда́телю и окорми́телю. Ра́дуйся, Иларио́не, заблу́ждших обраща́яй; ра́дуйся, тех к та́инством церко́вным привлека́яй. Ра́дуйся, Исаа́кие, оби́тели до́брый управи́телю; ра́дуйся, и́ноков ве́рный путеводи́телю. Ра́дуйтеся, преподо́бнии Ста́рцы О́птинстии, богому́дрии наставницы ве́ры и благоче́стия! Конда́к 6 Пропове́дницы Истины яви́стеся, богоно́снии Ста́рцы О́птинстии, наставля́юще вся бли́жняя и да́льняя, я́ко столп есть и утвержде́ние и́стины Це́рковь Правосла́вная, ея́же вне никто́же мо́жет спасе́ние улучи́ти и жизнь ве́чную насле́дити. Си́це ва́ми науче́ннии, ко Го́споду взыва́ем ра́достно: Аллилу́иа. И́кос 6 Возсия́сте све́том доброде́тельнаго жития́ и свет и́стиннаго богопозна́ния уясни́сте, изъясне́ние слове́с святы́х оте́ц нам яви́вше, к сим же и своя́ писа́ния оста́вивше. Сего́ ра́ди, уподо́бльшеся челове́ку домови́ту, и́же изно́сит от сокро́вища своего́ но́вая и ве́тхая, умно́жили есте́ тала́нты Влады́це Христу́ и просла́вистеся от Него́; мы же тщи́мся пе́ти вам такова́я: Ра́дуйтеся, зако́на Бо́жия ревни́телие; ра́дуйтеся, и́стиннаго любому́дрия рачи́телие. Ра́дуйтеся, ключ разуме́ния нам подава́ющии; ра́дуйтеся, две́ри и́стины отверза́ющии. Ра́дуйтеся, прему́дрости Бо́жия сокро́вище; ра́дуйтеся, слове́с Боже́ственных исто́чниче. Ра́дуйтеся, све́та ева́нгельскаго сия́ние; ра́дуйтеся, за́поведей Христо́вых соблюде́ние. Ра́дуйтеся, писа́ний оте́ческих изъясни́телие; ра́дуйтеся, благоче́стия насади́телие. Ра́дуйтеся, да́нный вам тала́нт возрасти́вшии; ра́дуйтеся, в ра́дость Влады́ки Христа́ вше́дшии. Ра́дуйтеся, преподо́бнии Ста́рцы О́птинстии, богому́дрии наставницы ве́ры и благоче́стия! Конда́к 7 Хотя́й угоди́ти Бо́гови, веле́ний Его́ яви́лся еси́ усе́рдный храни́тель, преподо́бне Мака́рие, соблюда́я за́поведь Госпо́дню: а́ще кто тя уда́рит в лани́ту десну́ю, обрати́ тому́ и другу́ю. Си́лою толи́каго смире́ния исхожда́ху ду́си нечи́стии от одержи́мых те́ми. Мы же, о́браз зря́ще сей смиренному́дрия, сла́вим Бо́га: Аллилу́иа. И́кос 7 Но́вых ви́дяще избра́нников Бо́жиих, притека́ху к вам люде́й мно́жества, ча́юще сове́та и благослове́ния, утеше́ния же и исцеле́ния. Вы же всем вся яви́лися есте́: гре́шныя на путь покая́ния наста́вльше, малове́рныя утверди́вше, стра́ждущим спострада́вше, немощны́м исцеле́ния дарова́вше. Те́мже и нас укрепля́ете пе́ти вам: Ра́дуйся, Мака́рие, зло́бу диа́волю победи́вый; ра́дуйся, того́ смире́нием низложи́вый. Ра́дуйся, Амвро́сие, в боле́знех долготерпели́вый; ра́дуйся, сле́зы стра́ждущих изсуши́вый. Ра́дуйся, Ио́сифе, свята́го Амвро́сия прее́мниче, ра́дуйся, по до́брем учи́тели мона́хов наста́вниче. Ра́дуйся, Цари́цы Небе́сныя люби́миче блаже́нный, ра́дуйся, Е́ю от одра́ боле́зни возста́вленный. Ра́дуйся, Варсоно́фие, сла́ву земну́ю презре́вый, ра́дуйся, во́инству Царя́ Небе́снаго причте́нный. Ра́дуйся, незри́мых враго́в победи́телю, ра́дуйся, прозорли́вый душ врачева́телю. Ра́дуйтеся, преподо́бнии Ста́рцы О́птинстии, богому́дрии наставницы ве́ры и благоче́стия! Конда́к 8 Стра́нников и прише́льцев себе́ на земли́ бы́ти помышля́юще, святы́й Амвро́сие со ученики́, те́сный путь служе́ния бли́жним избра́сте. Сего́ ра́ди яви́шася на вас дарова́ния духо́внаго разсужде́ния, теле́с исцеле́ния, суде́б Бо́жиих тайнозре́ния, душ изнемога́ющих врачева́ния. Си́ми да́ры а́ки мре́жами мно́жество душ уловля́юще, Святе́й Тро́ице воспева́ли есте́ песнь: Аллилу́иа. И́кос 8 Всем се́рдцем, душе́ю и мы́слию Бо́га возлюби́вше, не то́кмо утеше́ния тре́бующих николи́же оставля́сте, поле́зная на потре́бу коему́ждо подаю́ще, но и все вре́мя жития́ моли́тве прилежа́ще, и́стиннаго богомы́слия сподо́билися есте́, преподо́бнии, посто́м и моли́твою, нестяжа́нием и чистото́ю, разсужде́нием и ми́лостию украше́ннии, слы́шите от нас сицева́я: Ра́дуйтеся, всегда́ пред Го́сподем ходи́вшии; ра́дуйтеся, от дея́ния к созерца́нию восте́кшии. Ра́дуйтеся, тяготы́ мно́гих поне́сшии; ра́дуйтеся, та́ко зако́н Христо́в испо́лнившии. Ра́дуйтеся, бли́жнему блага́я иска́вшии; ра́дуйтеся, тех не́мощи любо́вию покрыва́вшии. Ра́дуйтеся, си́лу вра́жию низложи́вшии; ра́дуйтеся, ко́зни бесо́в сокруши́вшии. Ра́дуйтеся, лю́ди Бо́жия до́бре спаса́ющии; ра́дуйтеся, мы́сленныя та́ти от тех отгоня́ющии. Ра́дуйтеся, со́весть от грехо́в очища́ющии; ра́дуйтеся, скорбь серде́чную облегча́ющии. Ра́дуйтеся, преподо́бнии Ста́рцы О́птинстии, богому́дрии наставницы ве́ры и благоче́стия! Конда́к 9 Всяк язы́к, всяк во́зраст, вся́ко сосло́вие хва́лит вы, собо́ре досточу́дный преподо́бных Ста́рцев: упасли́ бо есте́ ста́до Христо́во усе́рдно и неувяда́емыя венцы́ сла́вы от Пастыренача́льника прия́ли есте́. Те́мже и нас науча́ете повинова́тися ста́рцем и па́стырем, да, смиренному́дрие стяжа́вше, благода́ть обря́щем пе́ти Бо́гу: Аллилу́иа. И́кос 9 Ка́ко боже́ственную ва́шу к челове́ком любо́вь изглаго́лем: до кро́ве бо подвиза́ющеся и ду́ши своя́ за ча́да полага́юще, служе́ния своего́ ника́коже оста́вили есте́. Мы же, предста́тельством ва́шим у Царя́ ца́рствующих оби́тели О́птинския узре́вше возрожде́ние, ча́ем и хра́мов душ наших обновле́ние улучи́ти, со умиле́нием вам глаго́люще: Ра́дуйся, Некта́рие, блаже́нный наста́вниче, ра́дуйся, гряду́щих прозорли́вый прови́дче. Ра́дуйся, Исаа́кие, сла́вный преподобному́чениче, ра́дуйся, тве́рдый крестоно́сче. Ра́дуйся, Анато́лие, наро́да Бо́жия окормле́ние, ра́дуйся, в годи́ну искуше́ний всех укрепле́ние. Ра́дуйся, за ве́ру поруга́ния прие́мый, ра́дуйся, в ми́ре дух твой Бо́гу преда́вый. Ра́дуйся, Ни́коне, мона́хов кро́ткое утеше́ние, ра́дуйся, испове́дниче многострада́льный. Ра́дуйся, мно́жество скорбе́й претерпе́вый, ра́дуйся, сумня́щихся в Правосла́вии утверди́вый. Ра́дуйтеся, преподо́бнии Ста́рцы О́птинстии, богому́дрии наставницы ве́ры и благоче́стия! Конда́к 10 Спа́са ми́ра ве́рнии ученицы́ яви́стеся, богоблаже́ннии, благоче́стно во Христе́ пожи́вшии: о́ви у́бо в труде́х зижди́тельных, о́ви же в не́мощех многоболе́зненных, о́ви же в гоне́ниих непра́ведных; проидо́сте путь притру́днаго сего́ жития́ и многоплаче́внаго, о́браз нам подаю́ще, ка́ко достои́т в ско́рбех пе́ти Го́споду Сил: Аллилу́иа. И́кос 10 Стена́ есте́ Це́ркве Правосла́вныя, забра́ло же неруши́мое честна́го и́ночества: вся бо ору́жия Бо́жия прие́мше и обо́лкшеся в броня́ пра́вды, и нас ве́рно науча́ете, ка́ко щит ве́ры, шлем спасе́ния и меч духо́вный, глаго́л Бо́жий обоюдуо́стрый, восприима́ти подоба́ет. Помина́юще вас я́ко наста́вников, усе́рдно мо́лимся, да сподо́бит Госпо́дь подража́ти ве́ре ва́шей и вопити : Ра́дуйтеся, му́дрости Бо́жией науча́ющии; ра́дуйтеся, вода́ми жи́зни напая́ющии. Ра́дуйтеся, мона́шествующих укрепле́ние; ра́дуйтеся, священнои́ноков вспоможе́ние. Ра́дуйтеся, во оби́тели ва́шей незри́мо пребыва́ющии; ра́дуйтеся, чад свои́х не оставля́ющии. Ра́дуйтеся, ско́рии в ско́рбех помо́щницы; ра́дуйтеся, неусы́пнии оби́тели охрани́телие. Ра́дуйтеся, покро́вом Всецари́цы осене́ннии; ра́дуйтеся, Ду́ха Свята́го сосу́ди избра́ннии. Ра́дуйтеся, снасле́дницы Ца́рствия Христо́ва; ра́дуйтеся, по благода́ти сы́нове Отца́ Небе́снаго. Ра́дуйтеся, преподо́бнии Ста́рцы О́птинстии, богому́дрии наставницы ве́ры и благоче́стия! Конда́к 11 Пе́ние от серде́ц на́ших износи́мое сподо́бльшеся приноси́ти вам, отцы́ преподо́бнии, пред честны́ми моща́ми ва́шими, недоумева́ем, ка́ко досто́йно просла́вити просла́вльшаго вас, ди́внаго во святы́х Свои́х Бо́га на́шего. То́чию моли́твами ва́шими укрепля́еми, немо́лчно вопие́м Ему́: Аллилу́иа. И́кос 11 Светоза́рныя лучи́ Со́лнца Пра́вды, столпи́ благоче́стия, достиза́ющии Небесе́, вои́стину яви́лися есте́, отцы́ на́ши преподо́бнии! Ны́не же, во Оби́телех Небе́сных наслажда́ющеся, Престо́лу Святы́я Тро́ицы предстоите́, но и нас недосто́йных не оставля́ете, дар многоце́нен нам яви́вше цельбоно́сныя мо́щи ва́ша, к ни́мже притека́юще, зове́м: Ра́дуйтеся, Моисе́е со Анто́нием, опло́те ста́рчества; ра́дуйся, о́тче Льве, ста́рчества ко́реню кре́пкий. Ра́дуйся, Мака́рие, о́бразе смиренному́дрия; ра́дуйся, Исаа́кие, домоправи́телю Влады́ки Христа́. Ра́дуйся, Иларио́не, душ и теле́с целе́бниче; ра́дуйся, Анато́лие, моли́твы свети́льниче. Ра́дуйся, Амвро́сие, благоуха́нный кри́не ста́рчества; ра́дуйся, Ио́сифе, блага́го ко́рене отра́сле до́брая. Ра́дуйся, Варсоно́фие, до́блий стратила́те Христо́в; ра́дуйся, Анато́лие, уте́шителю скорбя́щих. Ра́дуйся, Некта́рие, прозорли́вче и те́плый моли́твенниче; ра́дуйтеся, Исаа́кие со Ни́коном, сла́внии му́ченицы и испове́дницы. Ра́дуйтеся, преподо́бнии Ста́рцы О́птинстии, богому́дрии наставницы ве́ры и благоче́стия! Конда́к 12 Благода́ть Бо́жию прие́мшии, Ста́рцы преподо́бнии, тече́ние жития́ проидо́сте в по́двизех и доброде́телех, не иму́ще зде пребыва́ющаго гра́да, но гряду́щаго взыску́юще, его́же и достиго́сте, Го́рняго о́наго прекра́снаго Иерусали́ма, иде́же с ли́ки А́нгелов во све́тлости неизрече́нней пое́те Бо́гу: Аллилу́иа. И́кос 12 Пою́ще и пра́зднующе всесве́тлую па́мять ва́шу, отцы́ пресла́внии, почита́ем труды́ и лише́ния, ско́рби и боле́зни, гоне́ния и страда́ния ва́ша: не то́чию бо о́вцы ста́да Христо́ва укрепи́сте, но и ве́ры Христо́вы испове́дницы бы́сте. Те́мже и, блаже́нств ева́нгельских прича́стницы яви́вшеся, слы́шите воспева́емая вам сицева́я: Ра́дуйтеся, нището́ю ду́ха бога́тии; ра́дуйтеся, мно́гаго ра́ди пла́ча уте́шеннии. Ра́дуйтеся, насле́дницы земли́ кро́тких; ра́дуйтеся, обре́тшии пра́вду Христо́ву. Ра́дуйтеся, я́ко поми́лование улучи́вшии; ра́дуйтеся, чи́стым се́рдцем Бо́га зря́щии. Ра́дуйтеся, дух ми́рен стяжа́вшии; ра́дуйтеся, мно́жество душ тем спаса́вшии. Ра́дуйтеся, гоне́ние за пра́вду Бо́жию претерпе́вшии; ра́дуйтеся, в Небе́сное Ца́рствие возше́дшии. Ра́дуйтеся, гони́мии от неве́рных на земли́; ра́дуйтеся, я́ко мзда ва́ша мно́га на Небесе́х. Ра́дуйтеся, преподо́бнии Ста́рцы О́птинстии, богому́дрии наставницы ве́ры и благоче́стия! Конда́к 13 О, вели́цыи уго́дницы Бо́жии, преподо́бнии Ста́рцы О́птинстии! Ми́лостивно приими́те от нас сие́ хвале́ние, с любо́вию вам ны́не приноси́мое, и те́плым ва́шим хода́тайством ко Го́споду испроси́те нам в ве́ре утвержде́ние, покая́ние и во́ли Бо́жией после́дование, да изба́вленнии му́ки ве́чныя, ку́пно с ва́ми воспева́ем Бо́гу: Аллилу́иа.[Се́й конда́к глаго́лется три́жды.][Далее повторяем 1‑е икос и кондак:]И́кос 1 А́нгелов Творе́ц просла́ви вас, отцы́ и Ста́рцы преподо́бнии, я́ко сбы́тися на вас рече́нному: свет мона́хом суть А́нгели, свет же всем челове́ком есть мона́шеское житие́. Вои́стину у́бо яви́лися есте́ а́нгели храни́телие стране́ на́шей Росси́йстей: и́ноком наста́вницы, ко спасе́нию путевожди́е всем ве́рным ча́дом Це́ркве, вопию́щим: Ра́дуйся, богопросла́вленный собо́ре; ра́дуйся, богоза́рное благода́ти сия́ние. Ра́дуйся, дре́во ста́рчества многопло́дное; ра́дуйся, во Христе́ еди́нство духо́вное. Ра́дуйся, по́лче, испо́лненный си́лы Бо́жия; ра́дуйся, во́инство, побежда́ющее де́монов. Ра́дуйся, ве́нче, Ду́хом Святы́м благоуха́ющий; ра́дуйся, О́птины пу́стыни сла́во и похвало́. Ра́дуйся, Христо́в пречу́дный виногра́де; ра́дуйся, мы́сленный раю́ богонасажде́нный. Ра́дуйся, ликостоя́ние певце́в Святы́я Тро́ицы; ра́дуйся, созве́здие тве́рди Небе́сныя. Ра́дуйтеся, преподо́бнии Ста́рцы О́птинстии, богому́дрии наставницы ве́ры и благоче́стия Конда́к 1 Избра́нным служи́телем Святы́я Тро́ицы, собо́ру преподо́бных Ста́рцев О́птинских, наста́вником до́брым и прему́дрым благодаре́ние и похвалы́ прино́сим. Вы же, я́ко Христо́вы Це́ркве украше́ние, моли́теся о нас ко Го́споду, да воспева́ем вам любо́вию: Ра́дуйтеся, преподо́бнии Ста́рцы О́птинстии, богому́дрии наставницы ве́ры и благоче́стия. Моли́тва О, преподо́бнии и богоно́снии отцы́ на́ши, Ста́рцы О́птинстии, богому́дрии учи́телие ве́ры и благоче́стия, столпи́ и светильницы всем взыску́ющим спасе́ния и жи́зни ве́чныя: Льве, Мака́рие, Моисе́е, Анто́ние, Иларио́не, Амвро́сие, Исаа́кие, Анато́лие, Ио́сифе, Варсоно́фие, Анато́лие, Некта́рие, Ни́коне испове́дниче и преподобному́чениче Исаа́кие, мо́лим вас при́сно мы, недосто́йнии, да сохрани́т Христо́с Бог предста́тельством ва́шим Це́рковь Свою́ Святу́ю, страну́ Росси́йскую, оби́тель О́птинскую и вся́кий град и страну́, иде́же сла́вится и правосла́вно испове́дуется и́мя Его́ Боже́ственное. Моли́теся о нас, о преподо́бнии Ста́рцы О́птинстии, да у́зрим беззако́ния на́ша и принесе́м пред Го́сподом на́шим Иису́сом Христо́м покая́ние многосле́зное, да очи́стит мно́гия грехи́ на́ша и да́рует нам времена́ ми́рная и ко спасе́нию благоуспе́шная, да укроти́тся суета́ ве́ка сего́ под кре́пкую ру́ку Бо́жию, я́ко да стяжéм дух ми́ра, кро́тости, братолю́бия и милосе́рдия ко стра́ждущим. О, преподо́бнии, моли́те и Ма́терь Све́та, Цари́цу Небе́сную, Пречи́стую Богоро́дицу, да отве́рзет две́ри милосе́рдия Сы́на Своего́ и Бо́га на́шего и да сподо́бит и нас до́браго отве́та на Стра́шнем Суди́щи, ве́чных мук да изба́вит и ку́пно с ва́ми да удосто́ит во Ца́рствии Небе́снем сла́вити и воспева́ти пречестно́е и великоле́пое и́мя Отца́, и Сы́на, и Свята́го Ду́ха во ве́ки веко́в. Ами́нь.