Акафист преподобной Параскеве Сербской

Преподобная Параскева-Петка Сербская Кондак 1 Избранная от Господа возсияти на тверди Церкве, преподобная мати Параскево, житием твоим ангелоподобным миру всему просияла еси яко солнце пресветлое, и духовне и телесне недугующым целительница явилася еси. Сего ради верою зовем ти: радуйся, преподобная мати Параскево, скорбящым утешение! Икос 1 Ангельскую показавши ревность, удивления достойную, житие свое на земли добродетельми украсила еси и на небеси со Ангелы жити удостоила ся еси. Темже с ними усердно моли Человеколюбца Бога, да избавит от бед и обстояний вся, вопиющыя ти сице: Радуйся, яко вольне прияла еси благое иго Христовых заповедей. Радуйся, яко житием твоим суету мира сего обличила еси. Радуйся, яко сердце свое от всех страстей соблюла еси. Радуйся, яко творением заповедей любовь Божию снискала еси. Радуйся, яко учиши нас креста ношением Христу следовати. Радуйся, яко изнемогающым нам всегда помогаеши. Радуйся, преподобная мати Параскево, скорбящым утешение! Кондак 2 Видящи земных вещей скорое изменение, мирский мятеж оставила еси и в пустыню вселилася еси, идеже многим пощением и молитвами, аки благодатною пищею, душу свою питала еси, благочестно зовущи: Аллилуиа! Икос 2 Разум обретши, правую веру и любовь совершенную, богомудрая мати, воздержанием и смирением украсилася еси, сего ради храм Божий была еси и источник чудес обильный; темже благоговением поем тебе сице: Радуйся, образе совершенный евангельскаго отречения себе. Радуйся, яко долговременною нищетою богатство вечное и славу снискала еси. Радуйся, яко обетом нищеты высоту духовную показала еси. Радуйся, светлая высото смирения. Радуйся, ибо подвигы твоими душетленную силу погубила еси. Радуйся, ибо высотою подвига твоего всех удивила еси. Радуйся, преподобная мати Параскево, скорбящым утешение! Кондак 3 Силою Духа Святаго укрепляема, мужески подвиг поста носила еси в терпении, преподобная, и слезами твоими гордаго врага победила еси, поющи благодарственне Богу: Аллилуиа! Икос 3 Имущи всегда во уме образ грядущаго Суда Христова, и проливающи теплыя слезы, преблаженная, светильник души своея украсила еси, уготовавши его к сретению праведнейшаго Судии. И нас удостой деснаго стояния пред Ним, верою поющих ти сице: Радуйся, чертоже одушевленный Пресвятаго Духа. Радуйся, ибо вся дни живота твоего непрестанным призыванием имене Божия освящалася еси. Радуйся, ибо в молитвеннем стоянии пред Богом уснула еси. Радуйся, силою молитвы диавольская искушения победившая. Радуйся, памятию смертною от греха себе сохраньшая. Радуйся, яко Богу совершенне угодила еси. Радуйся, преподобная мати Параскево, скорбящым утешение! Кондак 4 Бури живота нынешняго избежала еси, преподобная, волею нищету Христа ради приимши, великими добродетельми обогатилася еси и многих образом жития твоего к ревности подвигнула еси, научающи их Христу Богу взывати: Аллилуиа! Икос 4 Услыша Господь молитвы и воздыхания твоя, в тайне творимая, блаженная мати, и яве на небеси пред Ангелы прослави труды твоя; ныне же в Божиим раи пребывающи, помяни и нас, зовущих ти сице: Радуйся, Ангелов собеседнице достохвальная. Радуйся, велие удобрение святых. Радуйся, совершенная и высокая хвало преподобных. Радуйся, украшение праведных и известнейшее правило постником. Радуйся, славо и богосветлый венче девственников и монашествующих. Радуйся, стено и твердое защищение христиан. Радуйся, преподобная мати Параскево, скорбящым утешение! Кондак 5 В мире живот свой поживши, блаженная мати Параскево, нестяжанием благих земных украсилася еси и воздержанием просветилася еси, былием питавшися и умилением взывавши Владыце твоему: Аллилуиа! Икос 5 Видя чистое житие твое и безмерное смирение твое, Дух Пресвятый показа тя, преблаженная, славну в чудесех. Сего ради, отшедшей ти от жития сего в горнее блаженство, со множеством преподобных предстательствуеши всем, умилением зовущым ти сице: Радуйся, пустыни благоуханный цвете. Радуйся, пустынное воспитание изряднейшее. Радуйся, серпом молитв твоих терние страстей посекшая. Радуйся, слез пролиянием огнь греха угасившая. Радуйся, всякое вражеское возстание отгнавшая. Радуйся, образом добродетельнаго жития твоего ленивая на покаяние воздвизающая. Радуйся, преподобная мати Параскево, скорбящым утешение! Кондак 6 Правды проповеднику, достодивному Илию, уподобилася еси и покаяния светильнику Предтечи Иоанну, о, преподобная мати! Оставила бо еси попечения житейская, во еже безмолвствовати в горах, и всегда поучалася еси в помнении часа смертнаго, в бдениих поющи Богу: Аллилуиа! Икос 6 Свет небесный озари тя, на всенощней молитве стоящей ти во мнозем умилении, и Ангел Господень тебе предста, Божие веление возвещая ти: да возвратишися во отечествие твое, яко тамо подобает ти отдати земли тело, духу же твоему преселитися в небесное жилище свое; сего ради поем тебе сице: Радуйся, еще в жизни сей Ангела видети удостоившаяся. Радуйся, благочестно заповеди Божия исполнившая. Радуйся, яко во Влахернстей церкви тепле Матери Божией помолилася еси. Радуйся, яко теплым Ея защищением себе предала еси. Радуйся, яко пред исходом твоим прилежно о всем мире молилася еси. Радуйся, яко по исходе от телесе живот вечный обрела еси. Радуйся, преподобная мати Параскево, скорбящым утешение! Кондак 7 Хотящи преставитися от нынешняго века, аки звезда в захождении была еси, прехвальная, и в небесней жизни возсияла еси, яко зарю оставивши нам добродетели и исправления жития твоего, имиже и ныне озаряеши сердца всех, верою зовущих Богу: Аллилуиа! Икос 7 Исполнивши закон новыя благодати, возшла еси на небо добродетельми, во еже радоватися вкупе с небесными чинми; темже с ними молися Спасителю Христу за вся, поющия ти сице: Радуйся, яко к свету немерцающему преселилася еси. Радуйся, яко палаты Христовых доброт удостоилася еси. Радуйся, яко от Господа мзду многу за труды твоя восприяла еси. Радуйся, яко венец нетленен с высоты стяжала еси. Радуйся, яко несредственне Триипостаснаго Бога зриши. Радуйся, яко со Ангелы на небеси пребываеши. Радуйся, преподобная мати Параскево, скорбящым утешение! Кондак 8 Странное и дивное виде христолюбивый Георгий: царицу виде некую, седящую на пресветлем престоле и множество светлых воин окрест ея, и услыша словеса сия к нему реченная: Георгие, потщитеся изъяти мощи моя и положити я на честнем месте, поюще Богу: Аллилуиа! Икос 8 Вси людие христианстии, услышавше словеса Георгия, скоро потекоша к мощем Параскевы преподобныя, и вземше я с великим усердием, радующеся яко о некоем сокровищи многоценнем, честно положиша я в церкви, любовию зовуще сице: Радуйся, православных радостное слышание. Радуйся, светлая звездо веры, Церковь озаряющая. Радуйся, несокрушимый ковчеже дарований Божиих. Радуйся, боготечный источниче, воды исцелений верным источаяй. Радуйся, яко всех верных болезни благодатию Христовою исцеляеши. Радуйся, яко в целомудрии и чистоте жити нам помогаеши. Радуйся, преподобная мати Параскево, скорбящым утешение! Кондак 9 Велие усердие имяше к тебе благоверный Царь болгарский Иоанн Асен, иже приимь вест где лежат чудотворныя и святыя мощи твоя, преподобная Параскево, принести я в град свой Терново повеле и с честию великою положи я в церкви своей, идеже многая исцеления источаху всем верою притекающым и Богу поющым: Аллилуиа! Икос 9 Отроча, иже лет девять от рождения своего в немоте бе, верою пришед в храм твой, абие исцеление прият и начат добре глаголати. Сего ради умильно тебе зовем: Радуйся, мощная заступнице наша и от бед избавительнице. Радуйся, скорая помощнице страждущым от духов злобы. Радуйся, молитвами бо твоими слепии прозирают. Радуйся, неплодным бо плод благословен от Бога подаеши. Радуйся, яко разслабленныя от одра болезни воздвизаеши. Радуйся, немолчная молитвеннице верою к тебе притекающих. Радуйся, преподобная мати Параскево, скорбящым утешение! Кондак 10 Спасла еси от беснования жену, яже обещася заповеди Божия творити, но умедли и не исполняше обет свой: темже скоро наказала еси ю болезнию и смертию, да и инии поучатся не лгати Богу, но в истине пребывающе Богу да поют: Аллилуиа! Икос 10 Стена еси и спасительное прибежище православным людем, в рабстве пребывающым, и в бедах своих к целительным и чудоточным мощем твоим притекающым, и всеумиленно тебе зовущым: Радуйся, всем верным тихое пристанище. Радуйся, теплая заступнице и покровительнице онеправдованным. Радуйся, яко порабощенным и бедствующым утешение даруеши. Радуйся, яко и агаряны чудесы страшиши и вразумляеши. Радуйся, яко тобою Православие возвышается. Радуйся, яко тобою неверие и зловерие посрамляются. Радуйся, преподобная мати Параскево, скорбящым утешение! Кондак 11 Благоверная царица сербская Милица, приносящи песны и молитвы пред ракою мощей твоих чудоносных, с великим усердием пренесе я от царствия зловерных в престольный град свой, в защищении рода сербскаго, зовуща Богу: Аллилуиа! Икос 11 Светлая и новоявленная звезда явилася еси Западу, многосветлыми лучами чудотворных мощей твоих сияющи всем верным, наипаче же любящыя тя привлекающи светозарным сиянием подвиг твоих, и избавляющи от бед и напастей нас, вопиющих ти таковая: Радуйся, источниче исцелений многовидных. Радуйся, люте страждущым помощнице. Радуйся, яко мрак скорбей разгоняеши. Радуйся, яко человеки от бездны грехов избавляеши. Радуйся, яко тобою смеем призывати бездну милосердия Божия. Радуйся, яко избавившеся от потопа гнева, тобою мир с Богом обретаем. Радуйся, преподобная мати Параскево, скорбящым утешение! Кондак 12 Благодатию Христовою болезни и страсти исцеляеши, и духи лукавствия прогоняеши, преславная Параскево, и просвещаеши верныя блистанием чудес твоих; темже благодарственне зовем Богу о тебе: Аллилуиа! Икос 12 Поюще прилежно изрядствия твоя, молим ти ся, преподобная наша мати Параскево, молися за Церковь Христову: испроси у Бога крепкостояния Вере Православней и на ереси победы, нам же спасения и мира, да любовию прославляем тя сице: Радуйся, светлое украшение Христовы Церкве. Радуйся, Веры Православныя поборнице. Радуйся, стено и избавительнице отечествия нашего от зловерных. Радуйся, покрове обителей и домов благоверных. Радуйся, заступнице рода христианскаго. Радуйся, скорая помощнице верою требующым защищения твоего. Радуйся, преподобная мати Параскево, скорбящым утешение! Кондак 13 О, преподобная наша мати Параскево, утешение скорбящым и девам украшение, приими нынешнее песнословие от недостойных уст наших, и умоли Господа избавитися нам вечных мук, да с тобою в небеснем Отечествии нашем поем Ему: Аллилуиа![Се́й конда́к глаго́лется три́жды.][Далее повторяем 1‑е икос и кондак:]Икос 1 Ангельскую показавши ревность, удивления достойную, житие свое на земли добродетельми украсила еси и на небеси со Ангелы жити удостоила ся еси. Темже с ними усердно моли Человеколюбца Бога, да избавит от бед и обстояний вся, вопиющыя ти сице: Радуйся, яко вольне прияла еси благое иго Христовых заповедей. Радуйся, яко житием твоим суету мира сего обличила еси. Радуйся, яко сердце свое от всех страстей соблюла еси. Радуйся, яко творением заповедей любовь Божию снискала еси. Радуйся, яко учиши нас креста ношением Христу следовати. Радуйся, яко изнемогающым нам всегда помогаеши. Радуйся, преподобная мати Параскево, скорбящым утешение! Кондак 1 Избранная от Господа возсияти на тверди Церкве, преподобная мати Параскево, житием твоим ангелоподобным миру всему просияла еси яко солнце пресветлое, и духовне и телесне недугующым целительница явилася еси. Сего ради верою зовем ти: радуйся, преподобная мати Параскево, скорбящым утешение!