- Главная страница
- Молитвы
- Акафист пред Богородско-Уфимской иконой Божьей Матери
Акафист пред Богородско-Уфимской иконой Божьей Матери
Текст молитвы
Кондак 1
Избранней от всех родов Заступнице рода христианскаго, / покровом Своея благости покрывающейстрану нашу православную, / благодарственная пения приносим Ти, Богородице, / о явлении чудныя Твоея иконы. / Ты же, яко Всемилостивая, всех притекающих к Тебе Помощнице, / заступай нас во всех скорбех и нуждах, бедах и напастей, да зовем Ти:
Радуйся, Мати Божия Богородско-Уфимская, / Заступнице усердная рода христианскаго.
Икос 1
Ангел предстатель послан бысть рещи Богородице:
Радуйся, егда Бог Слово воплощашеся во утробе Ея: и мы, грешнии, прославляюще явление чудныя Ея Богородския иконы и Божественнаго Младенца Спаса Христа, со умилением вопием Благодатней:
Радуйся, Богоизбранная отроковице.
Радуйся, Мати Божия.
Радуйся, Царице Небесе и земли.
Радуйся, светлое Церкве Небесныя и земныя украшение.
Радуйся, ангелы чтимая.
Радуйся, певаемая от Серафим.
Радуйся, светлое пророческое сбытие.
Радуйся, апостолов похвало.
Радуйся, мученическое исповедание.
Радуйся, преподобных венче.
Радуйся, праведных веселие.
Радуйся, грешных упование.
Радуйся, Мати Божия Богородско-Уфимская, Заступнице усердная рода христианскаго.
Кондак 2
Видящи, Всенепорочная, с высоты небеснаго жилища Своего, идеже с Сыном Твоим в славе пребывающе, скорбь рабов Твоих в новопросвещеннем граде Уфе, яко гневнаго ради Божия посещения вера Христова поругаема бывает агарянским зловерием, благоволила еси явити икону Свою, чудесы ю прославляющи, да утверждаемии знаменьми Твоея благодати, христолюбивии людие верно вопиют Богу: Аллилуиа.
Икос 2
Разумея трикратное явление Богоматери в скорби сущему крестьянину Стефану, тече он к людем и поведающе им дивное явление и грозное прещение. Мы же, дивящеся свыше данному Стефану вразумлению и спасению, благоговейно вопием к преблагословенней:
Радуйся, устнами чистыми хвалу Богови совершающая.
Радуйся, тайны благодати Божия верным открывающая.
Радуйся, неверных сумнительное слышание.
Радуйся, верных известная похвало.
Радуйся, молние, неверных устрашающая.
Радуйся, славою чудес Твоих верных смыслы озаряющая.
Радуйся, агарянскаго зловерия обличение.
Радуйся, гордыни их низложение.
Радуйся, веры христианския утверждение.
Радуйся, почитание святых икон освящение.
Радуйся, скорбь нашу в радость претворяющая.
Радуйся, несумненною надеждою нас увеселяющая.
Радуйся, Мати Божия Богородско-Уфимская, Заступнице усердная рода христианскаго.
Кондак 3
Сила вышняго благодатию Богоматере умудри и укрепи страждущаго крестьянина Стефана к обретению многоценнаго Божия дара, и он, по мольбе жителей веси Богородския с верою и слезами ко Господу молящи, со страхом велиим принял стоящую на воздусех святую икону Богоматери, радостно возопив к Богу: Аллилуиа.
Икос 3
Имеющи благоутробное промышление о новопросвещенных людех града Уфы, от пречестныя Твоея Богородския иконы токи чудес источила еси, Владычице, слепым телесныма очима зрение подавающи, омраченных же душевно светом богопознания и благочестия озаряющи, девствующим под осенением Твоея иконы пристанище небурное дарующи. Сего ради зовем Ти:
Радуйся, явлением иконы Твоея тьму лютых обстояний отгоняющая.
Радуйся, лучами чудес всех просвещающая.
Радуйся, слепых прозрение.
Радуйся, омраченных смыслом просвещение.
Радуйся, славо православия.
Радуйся, тихое пристанище ищущих спасения.
Радуйся, Мати целомудрия.
Радуйся, покрове и ограждение девства.
Радуйся, еюже ликовствует все множество верны.
Радуйся, еяже ради рыдает демонское полщище.
Радуйся, всех христиан вожделенная помощнице.
Радуйся, всех скорбящих Радосте.
Радуйся, Мати Божия Богородско-Уфимская, Заступнице усердная рода христианскаго.
Кондак 4
Бурю смятений и крамолы врагами воздвигнутую в стране нашей Уфимстей утолити тщашься, вси людие слезно пред нею моляшеся и, видев, яко народу православному в щит и победное знамение Твоя икона даровася, верою укрепляемый до конца жития своего вопияше Богу: Аллилуиа.
Икос 4
Слышавше и многие видеша людие откровение Божие Уфимскому краю дарованное, яко предстательством Богоматере суд об отечестве нашем преложен на милость, икону Богоматерню, яко знамя победное приимше, защитившу от разорения и гибели многия селения Уфимския земли от междоусобной брани и возопиша Заступнице христиан:
Радуйся, Мати Бога Вышняго.
Радуйся, яко за всех молиши Сына Твоего, Христа Бога нашего.
Радуйся, яко всем твориши спастися в державный Твой покров прибегающим.
Радуйся, Заступнице всех сущих в скорбех и болезнех.
Радуйся, всем молящимся сокрушенным сердцем пред пречистым Твоим образом полезная дарующая.
Радуйся, избавление зол всем, невозвратно надежду имущим на Тя.
Радуйся, тихое и доброе пристанище.
Радуйся, скорая Помощнице.
Радуйся, готовый и теплый покрове спасения.
Радуйся, источающая нам неоскудныя милости.
Радуйся, предваряющая на помощь.
Радуйся, избавляющая от всех бед.
Радуйся, Мати Божия Богородско-Уфимская, Заступнице усердная рода христианскаго.
Кондак 5
Боготечная звезда явися Твоя, Богомати, икона, всю страну Уфимскую обтекающая, лучами чудес Твоих осиявающая всех блуждающих по морю страстнаго жития, мрак печалей и мглу всяких недуг и скорбей прогоняющая и наставляющая на путь спасения с верою к Тебе притекающих и вопиющих к Богу: Аллилуиа.
Икос 5
Видев многие людие, яко от святыя иконы Богоматерни Богородския благодатию Божиею содеваются многия чудеса, приемлют ю в Покровительницу граду Уфи, в щит и ограждение и, разорив козни врагов Отечества нашего помощию Богоматере, тем камень совершенный во основание града Уфы положи, икону же Твою чудную, яко освящение и от бед избавление, в Смоленском соборе града постави и в новостроенный кафедральный Воскресенский собор абие перенесена бысть. Сего ради вопием Пречистей:
Радуйся, жилище и доме Христа Бога нашего.
Радуйся, вместилище неизреченныя Его славы.
Радуйся, граде одушевленный, присно царствующий.
Радуйся, палато преукрашенная.
Радуйся, радосте градов и весей.
Радуйся, непобедимое христиан в бедах хранилище и предградие.
Радуйся, Церкве Православныя похвало.
Радуйся, Уфимстей земли утверждение.
Радуйся, христолюбиваго воинства Помощнице.
Радуйся, врагов одоление.
Радуйся, от бед избавление.
Радуйся Матерними Твоими щедротами всех посещающая.
Радуйся, Мати Божия Богородско-Уфимская, Заступнице усердная рода христианскаго.
Кондак 6
Предстояще пред пречистым Твоим образом архиреев сословие, царие и князи и вси людие, монаси и мирстии, проповедуют, Госпоже Богородительнице, великия Твоя милости, яко грады Уфимския ограждаеши, обители покрываеши, веси защищаеши, и, ведуще Тя воистину помощницу сильну и непобедиму, со слезами приносят Ти молитвы, да простреши к Сыну Твоему Богоносныя руки за люди Твоя, во еже избавити нас от всех бед и напастей, да благодарне вопием Богу: Аллилуиа.
Икос 6
Возсиявше просвещение истинное и отгнавши древле лесть агарянскую в новопросвещенней стране Уфимстей и в новем граде Уфе светиши светом чудес и милостей: притекающии бо с верою ко Твоей иконе цельбоносней и скорбей избавление, недугов исцеление и радости всякия исполнения приемлют, вопиюще Тебе усердно:
Радуйся, неистощимый источниче святын.
Радуйся, многотекущая реко Божественная благодати.
Радуйся, грешных с Богом примирение.
Радуйся, грехов наших очищение.
Радуйся, благочестия Наставнице.
Радуйся, в добрых делех утверждение и помоще.
Радуйся, добрыя обеты приемлющая.
Радуйся, благим намерением способствующая.
Радуйся, злыя начинания разрушающая.
Радуйся, вражия козни расторгающая.
Радуйся, скорая человеком Помощнице.
Радуйся, милость сугубо нам подающая.
Радуйся, Мати Божия Богородско-Уфимская, Заступнице усердная рода христианскаго.
Кондак 7
Хотящу народу православному исповедати милости Преблагословенныя Царице Неба и земли и по силе благодарственная принести о избавлении его от нашествия иноплеменных, дивному храму, в селе Богородском созданному в честь пречудныя иконы, победная в дар принесе, да вси памятующе милость Богоматере, спасшия град сей и страну Уфимскую, выну воспевают Богу благодарными усты: Аллилуиа.
Икос 7
Новому граду Уфе, святая икона Твоя, Богомати, воистинну явися благая Одигитрия, якоже древле в Цареграде: к Тебе бо прибегают людие, помощи Твоея на начало пути и дел своих просяще и благодарственная приносяще моления пред пречистою иконою Твоею за избавление от скорбей и напастей, Тебе Помощницу и Заступницу крепкую ведают. Темже благодарственно вопием Ти:
Радуйся, Уфимския страны покрове.
Радуйся, православия в ней ограждение и утверждение.
Радуйся, несокрушимый щите воинов наших.
Радуйся, броне их неуязвимая.
Радуйся, козни врагов обличающая.
Радуйся, яко паучину их растерзающая.
Радуйся, нечестия обличение.
Радуйся, крамолы разрушение.
Радуйся, юных от заблуждений исправление.
Радуйся, старцев утешение.
Радуйся, душевредных учений низложение.
Радуйся, душеполезных знаний дарование.
Радуйся, Мати Божия Богородско-Уфимская, Заступнице усердная рода христианскаго.
Кондак 8
Странно и сумнительно неверующим слушати, како от иконы Твоея токи благодати истекают, дыхание жизни благоухает, мы же, верующие слову реченному Тобою, Владычице, к первонаписанней иконе: с тобою Моя благодать и сила, уповаем, яко и с сею иконою благодать Твоя всегда: темже благоговейно предстояще лобызаем ю, поклоняемся ей, яко Тебе самей сущей, честь бо иконы на первообразное восходит, и Твоя благодать сею иконою знамения и чудеса содевает всем с верою притекающим к Тебе и вопиющим Богу: Аллилуиа.
Икос 8
Вся бывши горе к небесным взята и земных не оставляеши, Богомати, священным Твоим предстательством: имаши бо матернее дерзновение ко Христу Богу нашему. Тем утверди в мире глубоце Православных житие, и вся полезная всегда даруй рабом Твоим, да величающе воспеваем Ти:
Радуйся, Невместимаго вместилище.
Радуйся, осененная силою Вышняго.
Радуйся, прозябшая Клас Небесный.
Радуйся, мир весь душепагубнаго глада избавльшая.
Радуйся, выну ходатайствующая за род наш.
Радуйся, яко много может молитва Твоя пред Сыном Твоим и Богом.
Радуйся, всех нас при Кресте Сына Твоего усыновившая.
Радуйся, всегда Матернюю любовь к нам являющая.
Радуйся, ходатаице вечных благ.
Радуйся, и во временней жизни полезная нам подающая.
Радуйся, известное прибежище наше во всех скорбных обстояниях.
Радуйся, несомненное утешение в печалех.
Радуйся, Мати Божия Богородско-Уфимская, Заступнице усердная рода христианскаго.
Кондак 9
Всякаго естества ангельскаго превысшая явилася еси, Пресвятая Дево, Бога бо зачала еси плотию, Невместимаго всеми вместила еси во утробе Твоей, на руках носила еси Носящаго весь мир дланию, темже, яко Честнейшую Херувим и Славнейшую без сравнения Серафим величающе Тя, вопием о Тебе Богу: Аллилуиа.
Икос 9
Ветия многовещанныя, яко рыбы безгласныя, видим о Тебе, Богородице, недоумеет бо всяк язык благохвалити по достоянию, изумевает ум пети Тя, Богородице. Обаче благая сущи, приими и от нас архангельский глас Тебе вопиющих:
Радуйся, Благодатная.
Радуйся, яко Господь с Тобою.
Радуйся, Благословенная в женах.
Радуйся, обретшая благодать у Бога.
Радуйся, родившая Спасителя миру.
Радуйся, Мати Сына Божия.
Радуйся, Родительнице Вечнаго Царя.
Радуйся, израстившая нам плод живота.
Радуйся, освященная Духом Святым.
Радуйся, осененная силою Всевышняго.
Радуйся, верная рабо Господня.
Радуйся, яко Тя блажат вси роди.
Радуйся, Мати Божия Богородско-Уфимская, Заступнице усердная рода христианскаго.
Кондак 10
Спасти хотящи многия от находящих зол, скорбей и болезней, чудную икону Твою, Богомати, даровала еси граду Уфе, еяже ради слепии прозирают, хромии ходят, разслабленнии возстают, беснующиися исцеляются, земли плодоносие подается, людие от смертоносныя язвы избавляются, грады и домы от огня спасаются, темже прославляюще Бога, дающаго нам таковыя милости, вопием Ему усердно: Аллилуиа.
Икос 10
Стена еси, Богородице, Уфимстей стране, всем градом ограждение и слава, православному воинству на враги укрепление. Темже, благодаряще Тя, вопием:
Радуйся, прославляющих Тя прославляющая.
Радуйся, не чтущих Тя посрамляющая.
Радуйся, врагов устрашение.
Радуйся, от нашествия иноплеменных избавление.
Радуйся, воинов крепосте.
Радуйся, в дни брани забрало и ограждение.
Радуйся, в дни мира живоносный саде, увеселяющий сердца верных.
Радуйся, оружие, егоже трепещут демони.
Радуйся, спасительный елей, умащающий греховныя раны кающихся.
Радуйся, теплое наше упование.
Радуйся, несумненная наша надеждо.
Радуйся, тихое и доброе пристанище.
Радуйся, Мати Божия Богородско-Уфимская, Заступнице усердная рода христианскаго.
Кондак 11
Пение хвалебное и благодарственное приносят Тебе, Владычице, припадающе ко иконе Твоей и любезно лобызающе ю, монаси и мирстии под державным покровом Твоим тихое и мирное житие провождающии и, возложивши на Тя все упование, радостно вопиют Богу: Аллилуиа.
Икос 11
Яко светоприемную свещу, зрим Твою честную икону, Пресвятая Владычице, та бо невещественный огнь благодати Твоея восприимши, и в подобиих ея новы возжигает светильники, причастны тояжде силы благодатныя, и озаряет чудесы, наставляющи на путь спасения всех вопиющих Ти сице:
Радуйся, Невесто неневестная.
Радуйся, Богоизбранная Отроковице, Мати Дево.
Радуйся, добрая Наставнице непорочнаго девства.
Радуйся, Хранительнице ревнующих о чистоте.
Радуйся, жен похвало.
Радуйся, дев величание.
Радуйся, вдов заступление.
Радуйся, сирот призрение.
Радуйся, нищих Питательнице.
Радуйся, нагих одеяние.
Радуйся, печальных утешение.
Радуйся, скорбящих веселие.
Радуйся, Мати Божия Богородско-Уфимская, Заступнице усердная рода христианскаго.
Кондак 12
Благодать дати восхотевши почитающим Тя с любовию, Богородительнице, присущую Ти силу благодатную оставила еси во святых Твоих иконах, ибо Божественная благодать, спребывающи тем иконам, знамения и чудеса выну содевает и душевных и телесных недуг исцеление всем с верою приходящим подает Твоими Богоматерними непрестанными к Богу молитвами о вопиющих Ему: Аллилуиа.
Икос 12
Поюще Твоя чудеса, бывшая в древняя и настоящая времена, хвалим Тя, яко живоносный источник благодати, яко неистощимую реку чудес, яко бездну милости и щедрот, и все упование по Бозе возлагающе на Тя и в сей и в будущей жизни, прославляюще Тя, вопием:
Радуйся, христиан непостыдное упование.
Радуйся, верных спасительное прибежище.
Радуйся, ненадежных надеяние.
Радуйся, отчаянных спасение.
Радуйся, бане, омывающая совесть.
Радуйся, росо, оживляющая души.
Радуйся, болезней врачевство скорое и безмездное.
Радуйся, от всех бед быстрое избавление.
Радуйся, Утешительнице во всякой скорби.
Радуйся, из глубины погибели спасающая.
Радуйся, отрадо в день смерти.
Радуйся, единая надеждо и по смерти.
Радуйся, Мати Божия Богородско-Уфимская, Заступнице усердная рода христианскаго.
Кондак 13
О Всепетая Мати, рождшая всех святых святейшее Слово, приими ныне малое сие моление, и величия ради благости Твоея и бездны щедрот Твоих, не помяни множества грехов наших, но исполни во благих прошения наша, подавающи телу здравие, душе спасение, избавляющи от всякия нужды и печали и Царствия Небеснаго наследники сотворяющи всех верно вопиющих Богу: Аллилуиа.
[Се́й конда́к глаго́лется три́жды.][Далее повторяем 1‑е икос и кондак:]
Икос 1
Ангел предстатель послан бысть рещи Богородице:
Радуйся, егда Бог Слово воплощашеся во утробе Ея: и мы, грешнии, прославляюще явление чудныя Ея Богородския иконы и Божественнаго Младенца Спаса Христа, со умилением вопием Благодатней:
Радуйся, Богоизбранная отроковице.
Радуйся, Мати Божия.
Радуйся, Царице Небесе и земли.
Радуйся, светлое Церкве Небесныя и земныя украшение.
Радуйся, ангелы чтимая.
Радуйся, певаемая от Серафим.
Радуйся, светлое пророческое сбытие.
Радуйся, апостолов похвало.
Радуйся, мученическое исповедание.
Радуйся, преподобных венче.
Радуйся, праведных веселие.
Радуйся, грешных упование.
Радуйся, Мати Божия Богородско-Уфимская, Заступнице усердная рода христианскаго.
Кондак 1
Избранней от всех родов Заступнице рода христианскаго, / покровом Своея благости покрывающейстрану нашу православную, / благодарственная пения приносим Ти, Богородице, / о явлении чудныя Твоея иконы. / Ты же, яко Всемилостивая, всех притекающих к Тебе Помощнице, / заступай нас во всех скорбех и нуждах, бедах и напастей, да зовем Ти:
Радуйся, Мати Божия Богородско-Уфимская, / Заступнице усердная рода христианскаго.
Молитва
О Пресвятая Госпоже, Владычице Богородице! Со страхом, верою и любовию припадающе пред честною иконою Твоею , молим Тя, не отврати лица Твоего от прибегающих к Тебе, умоли милосердная Мати, Сына Твоего и Бога нашего, Господа Иисуса Христа, да сохранит мирну Уфимскую страну нашу, да утвердит Церковь Свою Святую, да незыблему соблюдет ее от неверия, ересей и раскола. Не имамы бо иныя помощи, не имамы иныя надежды, разве Тебе, Пречистая Дево: Ты бо еси Всесильная христиан Помощница и Заступница. Избави всех с верою Тебе молящихся от падений греховных, от навета злых человек, от всяких искушений, скорбей, бед и от напрасныя смерти. Даруй нам дух сокрушения, смирение сердца, чистоту помышлений, исправления греховныя жизни и оставление прегрешений, да вси благодарне воспевающе величия Твоя, сподобимся Небесного Царствия и тамо со всеми святыми прославим Пречестное и Великолепное имя Отца и Сына и Святого Духа. Аминь.
