Православный календарь 10 Июня 2025

Святителие премудрии,/ паствы вашея учителие богопросвещеннии,/ веру евангельскую в людех преумножившия,/ любве Небесныя на земли достоподражательнии образи,/ люди страны Ростовския и Ярославския приобщавшии спасению,/ служителие воистинну Божий/ и сопричастницы апостолов достойнии явилися есте,/ Леонтие священномучениче, Исаие, Игнатие, Иакове, Феодоре/ и златословесниче Российский Димитрие,/ Христа Бога молите/ о архиереех, на престоле вашем преемницех,/ о людех, благочестно вас почитающих,/ о стране нашей православной/ и о всей Христовой Церкви.

Благоверия просвещся учении,/ святительства прием паству/ и апостолов наследник быв,/ тем приял еси от Бога дар чудес, святителю отче Игнатие,/ моли Христа Бога,/ да спасет души наша.

Яко во вселенней трие велицыи святителие,/ бысте вы благочестием и добродетелию наставницы Ростову/ и, благоверием приимше паству, стадо Христово упасосте/ и вечный покой наследовасте./ Молим вас, святии чудотворцы,/ подати добродетелем исправление,/ и болезнем нашим исцеление, и соблазном избавление,/ и душам спасение, да зовем вам:/ радуйтеся, граду нашему Ростову похвала и утверждение.

Новаго Завета Бога с человеки хранителие,/ евангельских заповедей исполнителие,/ в добрых делех совершеннии,/ святителие мудрии, преподобнии и праведнии Богоноснии,/ землю Ростовскую и Ярославскую/ облагоухавшии молитвами,/ именуемии вси и неименуемии,/ явленнии и сокровеннии,/ предстояще Живоначальней Троице,/ не отступайте от нас духом/ и Божественное милосердие преклоните к нам,/ да с дерзновением славу в Вышних Богу вси приносим,/ да пребудет на земли мир нерушимый,/ любовь же и благоволение/ посреде всех человек.

Явися днесь пресветлая память твоя,/ святителю преблаженне Игнатие,/ в мире светло сияющи и являющи всем Божественное сияние.

Правило веры и образ кротости,/ воздержания учителя/ яви тя стаду твоему,/ Яже вещей истина./ Сего ради стяжал еси смирением высокая,/ нищетою богатая,/ отче Никито,/ моли Христа Бога/ спастися душам нашим.

Светлостию дел твоих просиял еси, преподобне,/ апостольскаго престола наследник был еси, Никите,/ и, яко солнце, облистал еси твоей пастве, отче,/ вся Божественных учений исполнь./ Темже зовем ти:/ радуйся, Халкидону удобрение.

Бысть чрево Твое святая трапеза,/ имущи Небеснаго Хлеба, Христа,/ от Негоже всяк ядый не умирает,/ якоже рече всяческих,/ Богородице, Питатель.

Предстательство христиан непостыдное,/ ходатайство ко Творцу непреложное,/ не презри грешных молений гласы,/ но предвари яко Благая на помощь нас,/ верно зовущих Ти:/ ускори на молитву и потщися на умоление,/ предстательствующи присно, Богородице, чтущих Тя.

Днесь душа всяка веселится/ на память успения святителя Христова Геронтия,/ премудрости ревнителя/ и кротости учителя,/ смирению наказателя,/ учением Божественных словес верныя насладившаго./ Русскаго митрополита похвалим,/ святительства паству приимшаго,/ украсившаго Церковь Христову./ Тем и Христос видя твое благопроизволение,/ причте тя в лик праведных,/ святителю Геронтие,/ моли Христа Бога и Пречистую Богородицу/ непрестанно о всех нас.

Божиим Духом иночество вожделе/ и восприя Духа Святаго благодатию,/ и святительства сана сподобился еси,/ содержаще престол Русския Митрополии,/ и бысть пастырь и учитель от рода русскаго,/ пасый стадо Христово словесных овец,/ и обрете благодать от Господа, Геронтие святителю,/ Емуже всегда о нас непрестанно молися,/ спастися душам нашим.