Молитвы

Приими, Всеблагомощная Пречистая Госпоже, Владычице Богородительнице, сия честныя дары от нас, недостойных рабов Твоих, к Твоему цельбоносному образу пение возсылающих со умилением, яко Тебе Самой сущей ту и послушающей моления наша, подающи с верою просящим по коемуждо прошению исполнение: скорбящим скорби облегчаеши, немощным здравие даруеши, разслабленных и недужных исцеляеши, и от бесных бесы прогоняеши, обидимыя от обид избавляеши, и насилуемых спасаеши, грешных прощаеши, прокаженных очищаеши, и малых детей милуеши, и неплодныя от неплодства разрешаеши. Еще, Госпоже Владычице, от уз и темниц свобождаеши, и всякия многоразличныя страсти исцеляеши, и очныя болезни уврачуеши, и от смертоносныя язвы избавляеши: вся бо возможна суть ходатайством Твоим к Сыну Твоему, Христу Богу нашему. О Всепетая Мати, Пречистая Богородице! Не престай молити о нас, недостойных рабех Твоих, славящих Тя и почитающих, и покланяющихся пречистому образу Твоему, и надежду имущих невозвратну и веру несумненну к Тебе, Приснодевей, Преславней и Непорочней, славящих, и чтущих, и поющих Тя во веки веков. Аминь.

О, богому́драя и ди́вная отрокови́це, сосу́де Благода́ти Бо́жия, в простоте́ голуби́ней пожи́вшая, кро́тостию небе́сною, чистото́ю и послуша́нием просия́вшая, сотаи́ннице преподо́бнаго Серафи́ма, нача́льнице Диве́евских сесте́р в оби́телех Небе́сных, госпоже́ и ма́ти на́ша Ма́рфо! Бу́ди лю́бящим и чту́щим тя хода́таица спасе́ния, в стра́се Бо́жием нас утверди́, да го́рняя му́дрствуем, а не земна́я, изнемога́ющия си́лы на́ша на бо́дрость премени́, в любви́ и единомы́слии укрепи́ и помяни́ нас, гре́шных, у Престо́ла Бо́жия во Ца́рствии Небе́снем. Ами́нь.

О, Пресвята́я Влады́чице, Де́во Богоро́дице, Засту́пнице на́ша блага́я и ско́рая! Воспева́ем Ти вси благода́рственная за чу́дная дела́ Твоя́. Песносло́вим от лет дре́вних неотъе́млемое заступле́ние Твое́ гра́ду Москве́ и стране́ на́шей, чудотво́рным о́бразом Твои́м Донски́м всегда́ явля́емое: в бе́гство обраща́ются полцы́ чужди́х, гра́ди и ве́си невреди́ми сохраня́ются, лю́дие же от лю́тыя сме́рти избавля́ются, осуша́ются о́чи слезя́щеи, умолка́ют стена́ния ве́рных, плач в ра́дость о́бщую претворя́ется. Бу́ди и нам, Пречи́стая Богоро́дице, утеше́ние в бе́дствиих, возрожде́ние наде́жды, о́браз му́жества и исто́чник ми́лости; в ско́рбных обстоя́ниих неистощи́мое терпе́ние нам да́руй. Пода́ждь коему́ждо по проше́нию и нужде́ его́: младе́нцы воспита́й, ю́ныя уцелому́дри и стра́ху Бо́жию научи́, уныва́ющия ободри́ и немощну́ю ста́рость поддержи́. Ми́лостию посети́ в боле́знех и печа́лех су́щия, зла́я сердца́ умягчи́, братолю́бие укрепи́, ми́ра и любве́ всех нас испо́лни. Примири́, Благосе́рдая Ма́ти, вражду́ющия и оправда́й оклевета́нныя. Истреби́ поро́ки, да не восхо́дят греси́ на́ши пред Судие́ю вся́ческих, да не пости́гнет нас пра́ведный гнев Бо́жий. Твои́ми моли́твами, всемощны́м Твои́м покро́вом огради́ нас от наше́ствий вра́жиих, от гла́да, губи́тельства, огня́, меча́ и вся́каго ина́го злострада́ния. Упова́ем моли́твами Твои́ми получи́ти грехо́в изглажде́ние и с Бо́гом примире́ние. Умоли́ стяжа́ти нам Ца́рствие Небе́сное и с ли́ки А́нгелов и святы́х та́мо восхвали́ти Пречестно́е И́мя Святы́я Тро́ицы: Отца́, и Сы́на, и Свята́го Ду́ха во ве́ки веко́в. Аминь

О Пресвята́я Богоро́дице Де́во, Влады́чице, вы́шшая А́нгел и Арха́нгел и всея́ тва́ри Честне́йшая, а́нгельское вели́кое удивле́ние, проро́ческая высо́кая про́поведь, апо́стольская пресла́вная похвало́, святи́телей изря́дное украше́ние, му́чеников кре́пкое утвержде́ние, и́ноков спаси́тельное наставле́ние, по́стников неизнемога́ющее воздержа́ние, де́вствующих чистото́ и сла́во, матере́й ти́хое весе́лие, младе́нцев му́дросте и наказа́ние, вдови́ц и си́рых Корми́тельнице, наги́х одея́ние, боля́щих здра́вие, пле́нников избавле́ние, по мо́рю пла́вающих тишино́, обурева́емых небу́рное приста́нище, блужда́ющих нетру́дная Наста́внице, путеше́ствующих ле́гкое прохожде́ние, тружда́ющихся благо́е поко́ище, в беда́х су́щих ско́рая Засту́пнице, оби́димых Покро́ве и прибе́жище, ненаде́ющихся наде́яние, тре́бующих Помо́щнице, печа́льных при́сное утеше́ние, ненави́димых любо́вное смире́ние, гре́шников спасе́ние и к Бо́гу присвое́ние, правове́рных всех тве́рдое огражде́ние, непобеди́мое поможе́ние и заступле́ние! Тобо́ю нам, Влады́чице, Неви́димый ви́дим бысть, и Тебе́ мольбу́ прино́сим, Госпоже́, гре́шнии раби́ Твои́: О Преми́лостивая и Пречу́дная Све́та у́мнаго Цари́це, ро́ждшая Царя́ Христа́, Бо́га на́шего, Живода́вца всех, от небе́сных сла́вимая и от земны́х хвали́мая, а́нгельский уме́, светоза́рная звездо́, святы́х Пресвяте́йшая, Влады́чице всех тва́рей, Боголе́пная Деви́це, Нескве́рная Неве́сто, пала́то Ду́ха Пресвята́го, о́гненный Престо́ле Неви́димаго Царя́, небе́сный киво́те, носи́ло Сло́ва Бо́жия, огнеобра́зная колесни́це, поко́ище Жива́го Бо́га, неизрече́нное составле́ние пло́ти Христо́вы, гнездо́ Орла́ Небе́снаго, Го́рлице Богогла́сная, Голуби́це кро́ткая, ти́хая и незло́бивая, Ма́ти чадолюби́вая, ми́лостей бе́здно, разверга́ющая ту́чу гнева Бо́жия, неизмери́мая глубино́, неизрече́нная та́йно, несве́домое чу́до, нерукотворе́нная Це́ркве Еди́наго Царя́ всех век, благоуха́нное кади́ло, честна́я багряни́це, Боготка́нная порфи́ро, душе́вный раю́, живоно́снаго са́да о́трасле, цве́те прекра́сный, процве́тший нам небе́сное весе́лие, гро́зде спасе́ния на́шего, ча́ше Царя́ Небе́снаго, в нейже раствори́ся от Ду́ха Свята́го вино́ неисчерпа́емыя благода́ти, Хода́таице зако́на, зача́ло и́стинныя ве́ры Христо́вы непоколеби́мый сто́лпе, мечу́ я́рости Бо́жия на богопроти́вных, бесо́в устраше́ние, во бра́нех побежде́ние, христиа́н всех нело́жная Храни́тельнице и ми́ра всего́ изве́стное спасе́ние! О Всеми́лостивая Госпоже́, Де́во Влады́чице, Богоро́дице, услы́ши нас, моля́щихся Тебе́, и яви́ ми́лость Твою́ на лю́дех Твои́х, моли́ Сы́на Своего́ избавитися нам от вся́каго зла и сохрани́ оби́тель на́шу и вся́ку оби́тель, и град, и страну́ ве́рных, и лю́ди, благоче́стно прибега́ющия и призыва́ющия и́мя Твое́ свято́е, от вся́кия напа́сти, губи́тельства, гла́да, тру́са, пото́па, огня́, меча́, наше́ствия иноплеме́нников и междоусо́бныя бра́ни, от вся́кия боле́зни и вся́каго обстоя́ния, да ни ра́нами, ни преще́нием, ни мо́ром, ни вся́ким пра́ведным гне́вом Бо́жиим ума́лятся раби́ Твои́. Но соблюда́й и спаса́й ми́лостию Свое́ю, Госпоже́, за ны моля́щися, и поле́зное благорастворе́ние возду́ха во вре́мени пло́днаго приноше́ния нам да́руй. Облегчи́, возста́ви и поми́луй, Преми́лостивая Влады́чице, Богоро́дице препе́тая, во вся́кой беде́ и нужде́ су́щия. Помяни́ рабы́ Твоя́ и не пре́зри слез и воздыха́ния на́шего, и обнови́ нас бла́гостию Своея́ ми́лости, да со благодаре́нием утеша́емся, обре́тше Тя Помо́щницу. Умилосе́рдися, Госпоже́ Пречи́стая, на немощны́я лю́ди Твоя́, Наде́ждо на́ша. Разсе́янныя собери́, заблу́дшия на путь пра́вый наста́ви, отпа́дшия от благочести́выя оте́ческия ве́ры па́ки возврати́, ста́рость поддержи́, ю́ныя вразуми́, младе́нцы воспита́й и просла́ви сла́вящия Тя, изря́днее же — Це́рковь Сы́на Твоего́ соблюди́ и сохрани́ в долготу́ дний. О Ми́лостивая и Преми́лостивая Цари́це Небесе́ и земли́, Богоро́дице Присноде́во! Хода́тайством Твои́м поми́луй страну́ на́шу и во́инство ея́ и вся правосла́вныя христиа́ны, сохраня́ющи их под кро́вом ми́лости Твоея́, ри́зою Твое́ю честно́ю защити́ и моли́ из Тебе́ вопло́щшагося без се́мене Христа́, Бо́га на́шего, да препоя́шет ны свы́ше си́лою на вся ви́димыя и неви́димыя враги́ на́ша. Спаси́ же и поми́луй, Госпоже́, Вели́каго Господи́на и Отца́ на́шего (имя), Святе́йшего Патриа́рха Моско́вского и всея́ Руси́, преосвяще́нныя митрополи́ты, архиепи́скопы и епи́скопы правосла́вныя, иере́и же и диа́коны и весь при́чет церко́вный, и весь мона́шеский чин, и вся правове́рныя лю́ди, поклоня́ющияся и моля́щияся пред честно́ю Твое́ю ико́ною. При́зри на всех нас призре́нием ми́лостивнаго Твоего́ заступле́ния, воздви́гни нас из глубины́ грехо́вныя и просвети́ о́чи серде́чныя ко зре́нию спасе́ния, ми́лостива нам бу́ди зде и на Стра́шнем Суде́ Сы́на Твоего́ о нас умоли́, преста́вльшияся во благоче́стии от жития́ сего́ рабы́ Твоя́ в ве́чней жи́зни со А́нгелы и Арха́нгелы и со все́ми святы́ми причти́, да одесну́ю Сы́на Твоего́ Бо́га предста́нут, и моли́твою Твое́ю сподо́би вся правосла́вныя христиа́ны со Христо́м жи́ти и ра́дости а́нгельския в Небе́сных селе́ниих наслажда́тися. Ты бо еси́, Госпоже́, сла́ва Небе́сных и упова́ние земны́х, Ты на́ша Наде́жда и Засту́пница всех притека́ющих к Тебе́ и Твоея́ святы́я по́мощи прося́щих. Ты Моле́бница на́ша те́плая к Сы́ну Твоему́ и Бо́гу на́шему. Твоя́ Ма́терняя моли́тва мно́го мо́жет на умоле́ние Влады́ки, и Твои́м предста́тельством ко Престо́лу благода́ти Пресвяты́х и Животворя́щих Его́ Та́ин приступа́ти дерза́ем, а́ще и недосто́йнии. Те́мже всечестны́й о́браз Твой и руко́ю Твое́ю держи́маго Вседержи́теля ви́дяще на иконе, ра́дуемся, гре́шнии, со умиле́нием припа́дающе, и любо́вию сей целу́ем, ча́юще, Госпоже́, Твои́ми святы́ми Богоприя́тными моли́твами дойти́ Небе́сныя безконе́чныя жи́зни и непосты́дно ста́ти в день су́дный одесну́ю Сы́на Твоего́ и Бо́га на́шего, сла́вяще Его́ ку́пно со Безнача́льным Отце́м и Пресвятым, Благи́м, Животворя́щим и Единосу́щным Ду́хом, во ве́ки веко́в. Ами́нь.

Влады́ко Го́споди, Твой есть день и Твоя́ есть нощь, Тебе́ вся тварь рабо́тает, и вся́кое дыха́ние сла́вит Тя. Аз же, окая́нный, все житие́ мое́ сконча́в блу́дно, стра́хом одержи́м есмь, я́ко помяну́х дни пе́рвыя, и до ны́не, в ня́же вся нечу́вственная сотвори́х зла́я. И того́ ра́́ди не и́мам к Тебе́ дерзнове́ния, я́ко беззако́ния моя́ велика́, и безме́рни греси́ мои́, врази́ же всегда́ стужа́ют ми. Но, Го́споди мой, Го́споди, отве́рзый устне́ немому, и моя́ уста́ отве́рзи, да глаго́лю в моли́тве уго́дная Тебе́, се бо душа́ моя я́ко земля́ безво́дная оста́, и не мо́жет приноси́ти от себе́ плода́. Но даждь ми от се́мене Свята́го Твоего́ Ду́ха, и напои́ мя росо́ю благода́ти Твоея́, да принесу́ Тебе́ плод покая́ния. Го́споди Иису́се Христе́, хотя́й всем челове́ком спасти́ся, услы́ши моли́тву мою́, моли́твами святы́х апо́стол Твои́х, я́ко ти́и мо́лятся за ны, и аз те́ми у Тебе́ прошу́ проще́ния, я́ко тех моли́твы при́сно послу́шаеши; моле́нием их спаси́ мя, гре́шнаго, исцели́ боле́зни се́рдца моего́, уврачу́й стру́пы души́ моея́, разжжи́ утро́бы моя́; пла́мень стра́ха Твоего́ да поя́ст те́рние грехо́в мои́х, и ду́шу мою́ любо́вию прохлади́, к Тебе́ бо жела́ю и́стинному Све́ту, и Пода́телю све́та, у Тебе́ Еди́наго прошу́ ми́лости: спаси́ мя, насы́ти а́лчущую и напои́ жа́ждущую ду́шу мою́, от пото́ка безчи́сленнаго милосе́рдия Твоего́, покры́й мя благода́тию Твоего́ человеколю́бия от вся́каго зла, да Тобо́ю храни́м изба́влюся мно́гих сете́й лука́ваго, по вся дни на мя пропина́емых, и да не похва́лятся врази́ мои́ о мне, рабе́ Твое́м, упова́ющем на Тя, и спаси́ мя по ми́лости Твое́й. Да возда́м обе́ты моя́, до после́дняго издыха́ния ка́яйся о свои́х согреше́ниях, и просла́влю пресвя́тое и́мя Твое́, со Отце́м и Святы́м Ду́хом, ны́не и при́сно и во ве́ки веко́в. Ами́нь

Воинствование земное на духовную брань преложивый и о людех своих доброе попечение показавый, блаженне Феодоре преподобне! К тебе в смятении сердец наших прибегаем и твоея помощи стране нашей и душам нашим смиренно просити дерзаем. Вемы, угодниче Божий, яко малодушие наше и леность духовная далече от твоея пажити ны отревает и всякаго омерзения достойны ны соделовает: но милосердие твое ко врагом и предателем своим поминающе, имже паки защитник явился еси, равнаго милосердия твоего и нам недостойным молим. Ты убо угодниче Христов, от агарян раззоренную землю нашу и от иноверных подавляему, жалостию и любовию объемля, паки к бодренному житию верныя призвал еси, елико воинскими победами, толико и молитвою, и образом жития своего аки свещник златый блистаяся; ты мирскаго жития суету оставль сам убо о души своей попечению в пещернем уединении предался еси, земли же нашея попечение и исцеление славному роду твоему заповедал еси, и тако предел свой еще на двести лет и вящше по кончине твоей от сетей еретических оградил еси. Ты и далече сущее единокровное нам племя чешское ко православней вере приближати тщался еси и от латинскаго нашествия ограждал еси. Ты и ныне на небесех душею со ангелы водворяяся, нетленным же телом посреде нас почиваяй, наших не отрини гласы скорбныя, но молитвенный плач согрешающих сынов земли нашея услыши. Согрешихом бо неправдовахом и от завет Божиих отступихом, в развращенныя обычаи зле впадохом и еже едино на потребу есть, душ наших спасение в небрежении оставихом, тебе в Бозе правда и слава отче преподобне, нам же стыдение лица. Ова елико грешнейшии явихомся толико вящшаго сострадания твоего требуем и в покаянии зовем ти сице: твоея неистощимыя любве луч нам ниспосли, гнев Божий, праведно на ны движимый, молитвою твоею от нас отведи, спасительную благодать Его к нам недостойным предстательством твоим низведи и от греховныя бездны к высоте покаяния нас возведи, да тако и мы житие свое исправити потщимся, крепость земли нашея паки обновляти начнем, врагов же веры Христовы и злых прелестников безбоязненно отражати словом и житием возревнуем и Спасителя нашего со всеми святыми благодарно воспевати будем, славяще Его со Отцем и Святым Духом, во веки веков. Аминь.

О, пречудный и богоносный отче Моисее, изрядный угодниче Христов и великий чудотворче, к тебе смиренно припадаем и молимся: даждь нам быти причастником любве твоея ко Богу и ближнему, помози нам творити волю Господню в простоте сердца и смирении, заповеди Господни совершати непогрешительно, призри благоутробно на всякую душу верных твоих чтителей, милости и помощи твоея ищущих. Ей, всеблагий угодниче Божий, услыши нас, молящихся тебе, и не презри нас, требующих твоего заступления и достойную песнь тебе приносящих, тебе ублажаем, отче Моисее, тя воспеваем, чистоты светильниче, прославляюще милостиваго Бога, во Святей Безначальней Троице славимаго Отца и Сына и Святаго Духа, ныне и присно и во веки веков. Аминь.

О, святая и многострадальная преподобномученице Параскево! К тебе, аки теплей за ны к Богу молитвеннице, припадаем и прилежно молимся: умоли Господа и Владыку нашего пробавити милость Свою к нам, недостойным рабом Его, даровати же нам душевное и телесное здравие, земли плодоносие, воздуха благорастворение, во благочестии христианстем преуспеяние, к житию временному нужная и довольная, и вся ко спасению потребная; да мирно и благочестно поживше, сподобимся благую кончину христианскую улучити и Царствие Небесное наследити. Ей, предстательнице наша благая! Не посрами упования нашего, еже по Бозе и Пресвятей Богородице крепкое на Тя возлагаем, но буди нам ходатаица во спасение, да сподобимся вкупе с тобою и всеми святыми в радости блаженства вечнаго славити во твоем заступлении великую милость Бога нашего, Отца, и Сына, и Святаго Духа, ныне и присно, и во веки веков. Аминь.

О, преподо́бне и Богоно́сне о́тче наш Мака́рие! Ве́руем, я́ко ты, предстоя́ Престо́лу Пресвяты́я Тро́ицы, ве́лие и́маши дерзнове́ние в моли́твах ко Всеми́лостивому Го́споду Бо́гу, И́же всегда́ послу́шает тебе́, ве́рнаго раба́ и уго́дника Своего́. Сего́ ра́ди с умиле́нием смире́нно припа́даем к тебе́, свя́тче Бо́жий, не премолчи́ о нас моли́тися ко Го́споду Бо́гу, в Тро́ице покланя́емому и сла́вимому, да ми́лостиво призре́в на ны, не попу́стит нам поги́бнути во гресе́х на́ших, но да возста́вит нас па́дших, да пода́ст исправле́ние зло́му и окая́нному на́шему житию́, от гряду́щих грехопаде́ний восхища́я, и да прости́т нам вся, ели́ка са́ми собо́ю или́ чрез други́х кого́ согреши́хом мы́слию, сло́вом и де́лом, от рожде́ния до сего́ часа́. Ты подви́жниче доброде́телей, о́тче наш Мака́рие, ве́си не́мощь естества́ на́шего и тя́жесть и скорбь време́н настоя́щих, моли́ у́бо вы́ну Го́спода Бо́га, да николи́же нас оставля́ет Его́ неизрече́нное милосе́рдие, но да храни́т нас от мирски́х искуше́ний, от диа́вольских сете́й и от плотски́х по́хотей, да прии́мем от Го́спода Бо́га тобо́ю и вся потре́бная к жи́зни вре́менней, освобожде́ние от бед и напа́стей, а среди́ их неосла́бное терпе́ние до конца́. Испроси́ нам у Го́спода Бо́га в ми́ре и покая́нии сконча́ти живо́т наш и невозбра́нно преити́ от земли́ на Не́бо, мыта́рств же и бесо́в возду́шных и ве́чныя му́ки изба́витися и сподо́битися Ца́рства Небе́снаго, с тобо́ю и со все́ми святы́ми, угоди́вшими Го́споду Бо́гу и Спаси́телю на́шему Иису́су Христу́, Ему́же подоба́ет вся́кая сла́ва, честь и поклоне́ние, со Безнача́льным Его́ Отце́м и с Пресвяты́м, и Благи́м, и Животворя́щим Его́ Ду́хом, ны́не и при́сно и во ве́ки веко́в. Ами́нь.

О свята́я мироно́сице и всехва́льная равноапо́стольная Христо́ва учени́це Магдали́но Мари́е! К тебе́, я́ко ве́рней и мо́щней о нас пред Бо́гом хода́таице, гре́шнии и недосто́йнии ны́не усе́рдно прибега́ем и в сокруше́нии серде́ц на́ших мо́лимся. Ты в житии́ свое́м стра́шныя ко́зни бесо́вския испыта́ла еси́, но благода́тию Христо́вою я́вно тех свободи́лася еси́; и нас моли́твами твои́ми от се́ти бесо́вския изба́ви, да всегда́ во всем житии́ на́шем де́лом, сло́вом, мы́слию и та́йными помышле́ниями серде́ц на́ших ве́рно послу́жим Еди́ному Свято́му Влады́це Бо́гу, я́коже Тому́ обеща́лися есмы́. Ты па́че всех благ земны́х Сладча́йшаго Го́спода Иису́са возлюби́ла еси́ и Тому́ чрез все житие́ до́бре после́довала еси́, Боже́ственными уче́нии Его́ и благода́тию не то́кмо свою́ ду́шу пита́ющи, но и мно́жество люде́й от тьмы язы́ческия ко Христа́ чу́дному све́ту приводя́щи. Сия́ у́бо ве́дуще про́сим тя: испроси́ нам у Христа́ Бо́га благода́ть просвеща́ющую и освяща́ющую, да, е́ю осеня́еми, в ве́ре и благоче́стии, в по́двизех любве́ и самоотверже́ния преуспева́ти бу́дем, да неле́ностно тщи́мся служи́ти бли́жним в их ну́ждех духо́вных и теле́сных, твоего́ человеколю́бия о́браз па́мятующе. Ты, свята́я Мари́е, бо́дренно благода́тию Бо́жиею житие́ на земли́ прете́кши, во оби́тели небе́сныя ра́дуяся отшла́ еси́; моли́ у́бо Христа́ Спа́са, да моли́твами твои́ми сподо́бит нас непреткнове́нно соверши́ти стра́нствие на́ше в сей юдо́ли пла́ча, в ми́ре и покая́нии сконча́ти живо́т наш, да та́ко во свя́тости на земли́ пожи́вше, ве́чныя блаже́нныя жи́зни на небеси́ сподо́бимся и та́мо с тобо́ю и все́ми святы́ми вку́пе восхва́лим Тро́ицу Неразде́льную и воспои́м Еди́но Божество́, Отца́ и Сы́на и Ду́ха Всесвята́го во ве́ки веко́в. Ами́нь.

О богодохнове́нный и вселе́нский и́стины учи́телю, изря́дная Святоимени́тыя Горы́ похвало́, светле́йшая звездо́ Правосла́вныя Це́ркве Собо́рныя, всепреподо́бный и святы́й о́тче Никоди́ме! Да́ждь нам просвеще́ние моли́твами твои́ми во исполне́ние боже́ственныя во́ли, напра́ви стопы́ на́ша ко стезя́м доброде́тельнаго жития́, осени́ нас да́нною тебе́ благода́тию и вразуми́ ум наш, во е́же разуме́ти богому́драя поуче́ния твоя́, да обря́щем в них покая́ние, исцеле́ние, ра́дость, мир, кро́тость, поко́й, любо́вь, и а́ще что добро́ и бла́го и спаси́тельно, и в конце́ живо́т ве́чный, и моли́ся всегда́ ко Го́споду о всех нас, и́скренне лю́бящих тя и на всяк день и час призыва́ющих оте́ческую твою́ бла́гость и по́мощь. Аминь.

О, свята́я всехва́льная Евфи́мие, де́во непоро́чная и великому́ченице пресла́вная, и́стинная неве́ста Христо́ва, на́м в защище́ние Го́сподом да́нная, услы́ши ны́не моле́ния на́ша, тебе́ с любо́вию приноси́мыя. Да́нною тебе́ от Бо́га благода́тию, помози́ на́м, немощны́м и убо́гим, по́прище жития́ сего́ многотру́днаго и многоско́рбнаго безбоя́зненно преити́, да возмо́жем, я́ко же и ты́, не устраша́тися ко́зней врага́ злохитростнаго, на ны́ воздвигаемых и ду́шы на́ша погуби́ти хотя́щаго. Принеси́ Го́споду на́шему Сладча́йшему Иису́су Христу́ смире́нное моле́ние на́ше и умоли́ Его́ дарова́ти на́м кре́пость и си́лу, терпе́ние и смире́ние, да и́ми возмо́жем врага́ превозмога́ти и Го́спода на́шего неуста́нно прославля́ти, с Ни́м же и Небе́снаго Отца́ и Свята́го Ду́ха и ны́не и при́сно и во ве́ки веко́в. Ами́нь.

О премилостивая и премилосердная Мати Божия, Покровительнице державы нашея, купно же и о всем мире Молитвеннице, приими сердца нашего воздыхания, и услыши коленопреклоненныя молитвы, во умилении душ наших Тебе возсылаемыя, якоже издревле приимала еси молитвы любящих душ зде, пред иконою Твоею возносимыя. Помози нам в побеждении прелестей и соблазнов мира сего, не попусти нам отверженным быти вечнаго Небеснаго блаженства. Ты Едина наша радость и утешение в жизни сей временней, Ты наша надежда и в Жизни Вечней. Веруем, яко Ты Своею Матернею любовию и снисхождением удостоиши нас вожделеннаго Царствия Сына Твоего. Тебе убо просим: не отступай от нас, Всеблагая, защищай от всех козней вражиих, не попусти нам чрез грехи наша лишитися милосердия Божия, изжени из нас леность в молитве и посещении храма Божия. Избави нас от малодушия, уныния, вражды, гнева, подозрения, зависти, клеветы, ненависти и гордости бесовския. Вразуми поправших заповеди Церкве Христовы. Сродником нашим даруй мир и любовь, да согласно поживут родители и дети. Да будет в стране нашей правда Божия, да сохранятся в народе нашем благочестивии обычаи. Вознеси, о Всеблагая, усердныя молитвы пред Богом о всего мира умирении, да не погибнет род людский в пламени опустошения всемирнаго, да познают вси народи Отца Своего Небеснаго и Тя, Матерь Божию, Заступницу рода христианскаго. Приведи вся народы к истинному покаянию и жизни греховныя исправлению, да не осудимся в день Страшнаго Суда Божия, но да сподобит нас Господь вечныя радости в Небесных селениих, Емуже подобает всякая слава, честь и поклонение, Отцу и Сыну и Святому Духу, ныне и присно и во веки веков. Аминь.

О, преподобная княгине Евфросиние, добляя в женах подвижнице, прехвальная угоднице Христова! Приими моление о нас, недостоиных, с верою и любовию к тебе припадающих, и теплым к Богу ходатайством испроси граду Москве и людем от бед и напастей сохранение, споспешествуй, яко чадолюбивая мати, чадом, тобою собранным, понести иго Христово во благодушии и терпении и добре подвизатися ко исправлению жития своего, еже ко спасению; в мире благочестно живущим испроси у Господа в вере твердость, во благочестии преспеяние и всем, с верою прибегающим к тебе и твоея просящим помощи и заступления, подавай всегда недугов исцеление, в скорбех утешение и во всем житии благопоспешение, наипаче же умоли Господа в мире и покаянии земное житие преити нам, мытарств горьких и мук вечных избавится и Царство Небесное твоим ходатайством получити, идеже ты со всеми святыми Господу предстоиши, да всегда славим Отца и Сына и Святаго Духа, ныне и в безконечныя веки веков. Аминь.

О Пречистая наша Всеблагословенная и Всемощная Госпоже Владычице Влахернская и всего мира христианского похвало и утверждение, благодарим Тя, яко сподобила еси нас великой Своей милости, творити пресветлое торжество Честнаго Твоего многоцелебного Образа, явленнаго благоволением Твоим во граде Константинополе, послеже во многих градах и весех чудесы просиявшего. Взирая на твой светозарный благодатный лик, Пречистая, со трепетом радости и благоговения и зрим очи Твои голубые, голубиные, небесные, исполненные любовью великою, добротою богатою и смирением совершённым. Твои уста подобно цвету розы, исполненны сладких речей. Руки твои распростертые к нам, исполнены добрых дел. Дивную красоту твою неземную во всем не доступно нам описати, токмо бо в молчании и трепете взываем душею умиленной, сокрушенной в смирении пред всесовершенной святостью твоею. Сице и днесь с трепетом, пред Святою иконою Твоею припадая, умоляя наполнити наше немощное человеческое естество живительными и цельбоносными струями непрестанных молитв Твоих и очиститися от всякой скверны плоти и духа, совершая святыню в страсе Божиим, ибо вемы, яко много может молитва Твоя пред Престолом Триединаго Бога. Се мы, смиренныя и грешныя, обремененнии игом тяжких многих беззаконий наших, во умилении глубоцем просим подать исцеление слепым, хромым, глухим и другим страждущим, одержимыми многими и различными скорбями и недугами, ибо мы вемы, яко ничтоже возможно ходатайству Твоему, аще токмо восхощеши. Темже просим утвердити нашу веру праву, Церкве Русстей мир, тишину и благостроение, укрепить православныя люди в настоящую годину испытания и избавить от душепагубных ересей, расколов и разделений, сподобить соблюсти всех в единомыслии и да познают не верующии и не покланяющиися Честному Образу Твоему, яко Ты еси несравненное наше Украшение, Слава, Небесный и Державный Покров, скорая Помощница, непостыдная Заступница и постоянная Ходатаица у Единого Ходатая Бога и человеков Иисуса Христа. Яко Тя ради подобает всякое благодарение Всесильному и Всеблагому Содетелю, Господу нашему Иисусу Христу купно со Безначальным Его Отцем и с Пресвятым и Благим и Животворящим Его Духом, ныне и присно и во веки веков. Аминь.

О пресла́внии апо́столи Пе́тре и Па́вле, ду́ши за Христа́ преда́вшии и кро́вию ва́шею па́жить Его́ удобри́вшии! Услы́шите чад ва́ших моли́твы и воздыха́ния, се́рдцем сокруше́нным ны́не приноси́мыя. Се бо беззако́ньми омрачи́хомся и того́ ра́ди беда́ми, я́коже ту́чами, обложи́хомся, еле́я же до́браго жития́ обнища́хом зело́. О си́льнии! Понеси́те не́мощи на́ша, не отлуча́йтеся ду́хом от нас, да не разлучи́мся вконе́ц от любве́ Бо́жия, но кре́пким заступле́нием ва́шим нас защити́те, да помилует Госпо́дь всех нас моли́тв ва́ших ра́ди, да истреби́т же рукописа́ние безме́рных грехо́в на́ших и да сподо́бит со все́ми святы́ми блаже́ннаго Ца́рствия и бра́ка А́гнца Своего́, Ему́же честь, и сла́ва, и благодаре́ние, и поклонение во ве́ки веко́в. Ами́нь.

О, те́плый моли́твинниче, бла́гостный о́тче, преподо́бне Сампсо́не! Моли́ Бо́га о мне, гре́шнем, и низпосли́ от Всеблага́го Влады́ки по́мощь ми и избавле́ние, привре́менна бо есть жизнь моя́ и испо́лнена труда́, скорбе́й и боле́зней. Укрепи́ се́рдце мое́, да возмогу́ понести́ тяготу́ мою́, и не попусти́, да превозмо́гут искуше́ния мно́гая моя́ ма́лыя си́лы, но споспеше́ствуй мне заступле́нием твои́м и посреде́ обстоя́ний и бед упра́ви путь мой в Ца́рство Небе́сное, да сла́влю просла́вльшагося в тебе́ Го́спода во ве́ки. Ами́нь.

О, великий старче и угодниче Божий, преподобне отче наш Амвросие, Оптинская похвало и всея Руси учителю благочестия! Славим твое во Христе смиренное житие, имже Бог превознесе имя твое, еще на земли тебе суща, наипаче же увенча тя небесною честию по отшествии твоем в чертог славы вечныя. Приими ныне моление нас, недостойных чад твоих, чтущих тя и призывающих имя твое святое, избави нас твоим предстательством пред Престолом Божиим от всех скорбных обстояний, душевных и телесных недугов, злых напастей, тлетворных и лукавых искушений, низпосли Отечеству нашему от великодаровитаго Бога мир, тишину и благоденствие, буди непреложный покровитель святыя обители сия, в нейже в преуспеянии сам подвизался еси и угодил еси всеми в Троице славимому Богу нашему, Емуже подобает всякая слава, честь и поклонение, Отцу и Сыну и Святому Духу, ныне и присно, и во веки веков. Аминь.

О пастырю добрый, наставниче наш и святыя сея обители Дымския начальниче, преподобне отче Антоние! Яко имеяй дерзновение ко Владыце Христу и ко Пречистей Его Матери, буди о нас недостойных, во святей твоей обители живущих и о всех с верю к раце мощей твоих отвсюду притекающих молитвенник теплый, заступая нас от всяких бед и напастей, да твоими молитвами невредими от враг видимых и невидимых пребудем. Моли милосердие Божие, да спасет нас от прегрешений наших, имиже весть судьбами. Моли благость Его, еже милостивно обители сей и всему миру потребная подавати. Молися Дающему всем, яко страждущую страну Российскую от лютых безбожник и власти их да свободит, и да возставит православных правителей: верных рабов Его, в скорби и печали день и нощь вопиющих к Нему, многоболезный вопль да услышит и да изведет от погибели живот наш. И моли всякому верному в доме и на пути и повсюду дни благи и безмятежны даровати: жизнь нашу умирити; и вся люди помиловати, якоже зде предстоящыя, тако и благословною виною отшедыя отцы и братию нашу, и спасти душы наша, да непрестанно славим, хвалим, поем и величаем пречестное и великолепое имя Отца и Сына и Святаго Духа, ныне и присно, и во веки веков. Аминь.

О премилостивая и пречудная Света умнаго Мати, достойно славимая и праведно от всех горних чинов ублажаемая, яко без сравнения их превосходящая, Бога и Творца всяческих рождшая! Благодарим Тя о всех благодеяниих Твоих, яже благоволила еси явити нам преславным принесением чудотворныя Твоея иконы. Кое благохваление пришествию Твоему сотворим, недоумеваем, точию удивляемся, величающе Твое милосердие, еже на нас показала еси. Темже и мы, грешнии, со страхом и радостию припадающе к цельбоносной иконе Твоей, благодарственно вопием Ти: о всесильная рода нашего Помощнице! Услыши нас, молящихся Тебе, и яви милость Твою; се бо, на пречистый образ Твой взирающе, яко живей Ти с нами сущей, молим Тя усердно: не помяни множества грехов наших, но исполни во благих прошения, даруй нам вся потребная к животу и благочестию, избави нас от скорбей, бед и всяких болезней, наипаче же от смертоносныя язвы и пагубы, от навета злых человек и всякаго обстояния. Соблюдай и спасай нас благодатию Своею, Владычице, от тлетворных учений неверия и суеверия, от лукавых совращений. Сохрани нас и отечество наше от всяких крамол, нестроений и злых развращений, врагами веры православныя воздвизаемых. Сподоби же нас, всеблагая Заступнице наша, благочестно житие сие земное совершити, христианскую безболезненную, непостыдную, мирную кончину получити и Небесное Царствие наследовати, да всегда поем, величаем и славим Тя, яко благую Заступницу рода христианскаго, со всеми угодившими Богу. Аминь.